Malaki 2

1Rwot waco ni, “Dong koni wun ajwaki, wunge man ni, lok man me cik tye pirwu. 2Ka pe wubiwinyone, dok ka pe wubiketo cwinywu iye pi miyo deyo i nyinga, ci bimiyo acwalo can ikomwu, dok bene abicenowu woko; adada dong atyeko ceno jami ma wujenge iye woko, pien pe wuketo cwinywu me lubu cik ma mera. 3Nen, abijuku likwayowu woko, dok abipuyu wangwu ki wee, en wee me gitum ma mewuni, dok abiryemowu woko ki inyima. 41Kitmeno wubiniang ni ceng acwaliwu cik man, wek cikena ki Lulevi omok matek. 52

Cikena mayam acike kwede ki gin, yam obedo cike me kwo ki me kuc. Amiyo man botgi wek gubed ki lworo; ci gulwora, dok bene gubedo ki woro ikom nyinga. 6Gin gupwonyo lok me ada, pe kinongo bal mo idoggi. Yam gubedo kweda ki kuc, kun cwinygi tye atir, dok gumiyo jo mapol guloke guweko timo bal. 7Dong ajwaka myero opwony dano wek gunge Lubanga, dok dano myero guyeny pwony ma a ki idoge, pien en tye lakwena pa Rwot me mony.

8Ento wun ajwaki wuweko yo meno; wumiyo jo mapol gigate agata pi pwony mewu; wubalo bene gicike mayam acike kwedwu. 9Pimeno abimiyo wubedo me acaya dok mayot inyim jo ducu, pien pe wulubu yona, ento wun pe otero dano maromrom ikare manongo wutye ipwonye mewu.”

Dano guweko bedo lugen ikom Rwot

10Wan weng pe wonwa acel? Pe Lubanga aceli aye ma ocweyo wan ducu? Pingo dok ngat acel acel ikinwa turu cikene ki omine, kun bene wapyedo gicike ma Lubanga oketo ikin en ki kwariwa? 11Jo Juda guturu cikegi bot Rwot Lubangagi, ci gutimo gin me kwer i Icrael ki i Jerucalem; pien jo Juda gupyedo kabedo maleng pa Rwot ma en maro, ka dok gunyomo kwede wa anyira pa jo ma giworo lubanga me rok mukene. 12Rwot myero ojwer jo ducu ma gitimo gin macalo man ki i kema pa Yakobo, wek pe gukel gityergi bot Rwot me mony!

13Dok wutimo man bene. Wudyako keno tyer pa Rwot ki pig wangwu, kun wukok, wucur iye, pien en pe dong keto cwinye ikom gityerwu, dok pe gamo gin ma wukelo bene ki yomcwiny ki i cingwu. 14Ci wupenyo ni, “Pingo en pe gamo?” Pien Rwot obedo caden me cike ikin in ki dako ma i nyomo ikare me awobini, ma dong pe i geneni, kadi bed en gire obedo lawoti, en aye dako mayam icike kwede. 15Pe Lubanga aceli aye ma otiyo me kelo wun kacel dok en aye gwoko cwiny me kwo pirwa? En kono mitine onongo gin ango iyub man? Ni wunywal lutino ma giworo Lubanga. Pimeno wugwoke kenwu, ngat mo pe myero obed ma pe gene bot dakone ma en onyomo ikare me awobine. 16Rwot Lubanga pa Icrael owaco kuman ni, “Adag gonyo nyom, ki ngat ma ryemo dakone woko tektek. Pimeno wugwoke kenwu, dok pe myero wubed ma pe wugene bot monwu.”

Nino me ngolo kop dong cok

17Wutye dong kaolo kom Rwot woko ki lokwu. Ka pud dok bene wuwaco ni, “Waolo kome ningning?” Wun wuolo kome ka wuwaco ni, “Ngat ma timo gin marac inyim Rwot en aye ber, iye bene bedo yom ikome.” Nyo gwok pi penyo ni, “Lubanga ma ngolo kop atiri tye kwene?”