Matayo 15

Kit tekwaro pa ludongo

(Mar 7:1-13)

1Luparicayo ki Lupwonycik gua ki Jerucalem gubino bot Yecu, ci gupenye ni, 2“Pingo lupwonyeni pe gilubu tekwaro pa ludongo? Pien gin camo cam ma pe gulwoko cinggi.” 3Yecu odok iye botgi ni, “Pingo wun kono pe wulubu Cik pa Lubanga pi lubu kit me tekwarowu? 41 Pien Lubanga yam ociko ni, ‘Wor woru ki meni’, ka dok ni, ‘Ngat ma loko lok marac ikom wone nyo ikom mine myero kinek woko aneka.’ 5Ento wun wuwaco ni ka dano mo owaco bot wone nyo bot mine ni, ‘Gin ma kono akonyi kwede dong amiyo woko bot Lubanga,’ 6en pe myero owor wone. Kitmeno pi lubu kit me tekwarowu, omiyo lok pa Lubanga dong odoko yogoyogo. 7Wun lugoba! Lanebi Icaya yam oloko ikomwu kakare ikare ma en owaco ni: 82 ‘Rok man kara giwora ki doggi nono,

ento cwinygi pe ikoma wa ki acel;

9giwora nono, pwony ma gipwonyo obedo pwony ma mako cik pa dano.’”

Gin ma balo dano

(Mar 7:14-23)

10Yecu olwongo lwak bote, ci owaco botgi ni, “Wuwiny loka, ci wuniang iye maber. 11Pe gin ma donyo i dog dano aye balo dano, ento kono gin ma a ki i dog aye balo dano.” 12Ci lupwonyene gubino guwaco ni, “Ingeyo ni Luparicayo cwinygi ocwer tutwal ikare ma guwinyo lok ma in iwaco?” 13Yecu odok iye ni, “Kit ginapita ducu ma Wora matye i polo pe opito kibiputu woko ki lwite. 143 Wek gubedi; meno gin lutowang ma gipeyo lutowang wadigi. Kace latowang peyo latowang lawote, ci gin aryo ducu gibipoto woko ibur.” 15Ento Petero owaco ni, “Gony telok me carolok man botwa.” 16Ci Yecu openyogi ni, “Wun kara peya wuniang bene? 17Pe wuneno ni gin ma donyo i dog dano kato cito i ic, kitmeno a ki kunu kato woko? 184 Ento gin ma kati ki i dog a ki i cwiny dano, man aye balo dano. 19Pien gin ma a ki i cwiny dano aye tam maracu, nek, abor, cot, kwalo kwo, bedo caden me goba ki yet. 20Magi aye gin ma balo dano; ento camo cam ma pe kilwoko cing pe balo dano mo.”

Niye pa dako me Kanaan

(Mar 7:24-30)

21Yecu oa ki kunu, ocito wa i lobo matye cok ki Turo ki Cidon. 22Ci nen, dako mo ma en Lakanan ma oa ki i lobo meno obino kun dange adanga ni, “Ai Rwot, Lakwar Daudi tima kica do; nyara tye ki cen, tye kaune marac tutwal.” 23Ento Yecu pe ogamo dog dakonu kadi ki acel. Ma omiyo lupwonyene gubino gubako doggi bote ni, “Ryem dako ni ocit woko cen, pien tye ka dange tung ingewa.” 24Yecu odok iye ni, “Yam kiora bot jo Icrael keken, pien gitye calo romi ma orwenyo.” 25Ento dakonu obino ogungo inyime, kun waco ni, “Rwot, konya.” 26Ci Yecu odok iye ni, “Pe ber me kwanyo cam pa lutino me bolone woko bot gwogi.” 27Dakonu odok iye ni, “Rwoda, meno iwaco kakare. Kadi bed kitmeno lutino gwogi bene gin camo ngide cam ma poto ki iwi meja pa ladit do.” 28Yecu ogamo doge owaco ni, “In dakoni niyeni dit. Wek otime boti kit macalo i mito.” Ci nyare otugi cang woko cut i cawa meno.

Yecu ocango lutwo mapol

29Yecu oa ki kunu, omede ki wote, ongolo ki i dog nam Galilaya. Ocito oito iwi got ci obedo kunu. 30Ci lwak dano gukelo bote luput ki lungolo, jo ma telebgi oto, ki lutowang, ki lutwo mukene mapol, gupyelogi piny katyen Yecu, ci en ocangogi. 31Man omiyo lwak guuru tutwal ka guneno lutelebgi oto guloko, jo ma cinggi okwe gucang, jo matyen gi ongol guwoto, kadi wa lutowang bene guneno piny; gupako Lubanga pa jo Icrael matek.

Yecu omiyo cam ki jo alip angwen

(Mar 8:1-10)

32Yecu olwongo lupwonyene bote ci owaco botgi ni, “Kica maka ikom lwak man, pien dong gubedo kweda kany pi nino adek, makun pe gitye ki cam mo. Pe amito ni acwalgi woko ki kec, miyo kec bwoyogi woko i yoo.” 33Ci lupwonyene gudoke iye ni, “Kara man wabinongo mugati kwene matwero romo lwak macalo man i tim kany?” 34Yecu openyogi ni, “Wutye ki mugati adi?” Gugamo ni, “Abiro, ki rec mogo matinotino manok.” 35Ociko lwak ni gubed piny i ngom, 36ci omako mugati abiro ni ki rec bene, ka dong opwoyo Lubanga, obaro igi, ci omiyogi bot lupwonyene, ka lupwonyene gumiyo bot lwak. 37Gin ducu gucamo guyeng; gucoko ngide cam ma oloyogi, oromo adita abiro ma opong. 38Jo ma gucamo cam meno onongo giromo co alip angwen, ma pe kikwano iye mon ki lutino. 39Lacen, ociko lwak, odonyo i yeya, ci ocito i lobo Magadan.