Matayo 14

To pa Jon Labatija

(Mar 6:14-29; Luk 9:7-9)

1Ikare meno Kerode ma laloc madit owinyo pi yweka pa Yecu; 2ma omiyo owaco bot lutice ni, “Man aye Jon Labatija. Lubanga ocere woko ki ikin jo ma oto, en aye ma omiyo lakit teko macalo meno tye katic ikome ni.” 31

Pien onongo yam Kerode omako Jon, otweyo ci oketo ibuc pi Kerodia, ciomine, dako pa Pilipo. 42 Pien Jon onongo owaco bote ni, “Cik pe oye ni ibed ki ciomeru.” 5Kadi bed Kerode onongo mito neke woko, ento olworo lwak, pien lwak onongo giworo Jon ni en lanebi. 6Ento ka kare me po pi nywalo Kerode oromo, ci nya pa Kerodia omyelo inyim welo ci oyomo cwiny Kerode mada. 7Ma omiyo Kerode ocike kun kwonge akwonga bot nyako meno ni ebimiye gin ducu ma en bipenyo pire. 8Mine otite lok roro, omiyo nyakonu ocito olego rwot ni, “Amito imiya wi Jon Labatija i wee kombedi.” 9Ci rwot Kerode okumu matek; ento pi kwong ma en okwongo ki pi welone omiyo ociko ni omyero kimiye. 10Ci ooro dano ocito oweko kingolo ngut Jon woko ki ibuc, 11ci kiketo wiye i wee kikelo kimiyo bot nyako meno, ka nyakonu otero bot mine. 12Lacen lupwonye pa Jon gubino gutingo kome guyiko woko ilyel; ka gucito gutito pire bot Yecu bene.

Yecu omiyo cam ki jo alip abic

(Mar 6:30-44; Luk 9:10-17; Jon 6:1-14)

13Ka Yecu owinyo lok man, ci oa woko ki kunu, owoto ki yeya ocito kakene ikabedo ma dano pe iye. Ento ka lwak guwinyo pire, ci gulube kun giwoto ki tyen gi ma gia ki i taun mapatpat. 14Ka Yecu okato iwi tura, oneno lwak madwong; kica omake ikomgi, ci ocango lutwo ma kikelo bote. 15Ka oo otyeno, ci lupwonyene gubino bote, guwace ni, “Man kabedo kama dano peke iye, cawa bene dong okato woko; cwal lwak gucit ikin paco macokcok, wek guwil cam pirgi ken gi.” 16Yecu odok iye ni, “Pe omyero gucit; ento wun wumii botgi cam gucam.” 17Guwace ni, “Watye kany ki mugati abic ki rec aryo.” 18Yecu owaco ni, “Wukel mugati ki rec aryo ni bota kany.” 19Ka ociko lwak ni gubed piny ikom lum alita. Yecu okwanyo mugati abic ki rec aryo, oneno malo i polo, olego gum, obaro i mugati omiyo ki lupwonyene, ci lupwonyene gumiyo bot lwak. 20Gin ducu gucamo guyeng. Kicoko ngide cam ma odong, opongo aduku apar wiye aryo. 21Jo ma gucamo cam meno onongo giromo co alip abic, ma nongo pe kikwano iye mon ki lutino.

Yecu owoto iwi nam ki tyene

(Mar 6:45-52; Jon 6:16-21)

22Cutcut Yecu ociko lupwonyene ni gudony i yeya, gukwong nyime me cito loka ca, kun nongo en pud eciko lwak. 23Lacen madong ociko lwak, ci ocito iwi got ka lega kakene. Ikare ma piny dong oyutu, onongo en tye kunu kene. 24Yeya onongo dong okato woko mairo madwong nia ki iwi tura, kun pii tye ka twago yeya; pien onongo yamo kodo bino ki inyimgi. 25I kine okokgweno, Yecu oa obino botgi kun woto iwi nam ki tyene. 26Ento ka lupwonyene gunene kun woto iwi nam ki tyene, tipu komgi oto woko lirut, kun giwaco ni, “Man gemo!” Ci gudange matek pi lworo. 27Ento oyotoyot Yecu oloko kwedgi kun waco ni, “Wudii cwinywu, meno an; gwok wulwor.” 28Ci Petero ogamo doge owaco ni, “Rwot, ka meno aye in, ci wek abin boti kunu kun awoto ki iwi pii.” 29Yecu odoke iye ni, “Bin.” Ci Petero oa woko ki i yeya, owoto ki iwi pii obino bot Yecu. 30Ento ka oneno yamo tye ka kodo, ocako doko lwor, oweko ocako lwiny woko i pii, ci odange matek ni, “Rwot, lara do!” 31Cutcut Yecu ocwalo cinge ci omake, kun waco ni, “In dano ma niyeni nok, pingo kono ibedo ki akalakala?” 32Ka dong gudonyo i yeya, ci yamo ocako pye mot. 33Jo ducu ma onongo gitye i yeya gucako woro Yecu kun giwaco ni, “Adada, in giri i Wod pa Lubanga.”

Yecu ocango lutwo i Genecaret

(Mar 6:53-56)

34Ka dong gukato loka ca, ci gukato iwi tura i lobo Genecaret. 35Ka jo ma ikabedo meno dong gungeye, ci gucwalo lok ikabedo ducu macokcok ki kunu, ci dano gukelo bote jo ducu mayam onongo komgi lit. 36Gubako doggi bote ni myero oye gugud dog bongone keken; jo ducu ma gugudo dog bongone gucang woko maber.