Matayo 13

Carolok ikom lacokodi

(Mar 4:1-9; Luk 8:4-8)

1Inino meno aceli Yecu oa woko ki i ot, ci ocito obedo i dog nam. 21 Lwak madwong tutwal gucoke bote, omiyo en odonyo i yeya ci obedo iye, lwak ducu gucung iwi tura. 3Obedo kaloko botgi lok mapol i carolok, kun waco ni, “Lacokodi ocito kacoyo kodi. 4Ka kun coyo, kodi mogo okir opoto i yoo, winyo gubino gucamo woko. 5Kodi mukene okir ikom pata kama ngom tye iye manok. Cutcut gutwi, kama ngome pe tut. 6Ento ma ceng oryeny, owangogi gutwo woko, pien onongo lwitgi peke. 7Kodi mukene okir ikin okutu, okutu olot odiyogi woko. 8Kodi mukene okir i ngom maber, ci gunyako nyiggi, mogo miya acel, mukene pyere abicel, ki mogo pyere adek. 9Ngat matye ki it me winyone owiny.”

Pwony ikom carolok

(Mar 4:10-12; Luk 8:9-10)

10Lacen lupwonye gubino bot Yecu gupenye ni, “Pingo iloko kwedgi icarolok?” 11En odok iye botgi ni, “Wun kimiyo botwu mot me ngeyo mung me ker me polo, ento bot jo mukene pe kimiyo botgi. 12Pien ngat matye ki gin mo kibimiyo doki makato, ci en bibedo ki jami mabup; ento ngat ma peke ki gin mo, kadi gin ma en tye kwede kibikwanyo woko ki bote. 13Man aye gin ma omiyo aloko kwedgi i carolok, pien kadi neno piny pe gineno, kadi winyo lok bene pe giwinyo, dok bene pe giniang. 142 Piman lok pa Lubanga mayam lanebi Icaya otito ocobe kakare ikomgi ni,

‘Winyone mere wubiwinyo, ento pe wubiniang teloke;

nenone wubineno, ento pe wubingeyo gin matye.

15Pien jo me rok man cwinygi dong odoko nwang,

ki itgi bene dong oding woko kawinyo lok,

dok gumiyo wanggi woko,

wek pe gunen ki wanggi,

pe bene guwiny ki itgi,

pe bene guniang iye ki cwinygi

wek pe guloke gudwog bota acang gi.’ 163

Ento wun wangwu tye kigum, pien gineno piny, itwu bene tye kigum, pien giwinyo lok. 17Adada, awaco botwu ni, lunebi mapol ki jo ma kitgi atir yam guparo pi neno gin ma wun wuneno ni, ento pe guneno, ki me winyo gin ma wuwinyo, ento pe guwinyo.

Yecu ogonyo te carolok ikom lacokodi

(Mar 4:13-20; Luk 8:11-15)

18Kong dong wuwiny carolok ikom lacokodi. 19Ka dano mo owinyo lok me ker pa Lubanga ce pe oniang iye, Larac bino ci mayo kodi ma kicoyo i cwinyeni woko; man aye kodi ma onongo kicoyo okir i yoo. 20Dong kodi ma kicoyo ikom pata tye kit man, en aye dano ma winyo lok ci oyotoyot mako lok meno ki yomcwiny; 21ento pe nongo tye ki lwite i iye, rii pi kare manok. Ka can obino, nyo yelo dano pi lok man, cutcut danoni tugi poto woko. 22Dong kodi ma kicoyo okir ikin okutu, man aye dano ma winyo lok, ento paro lok me lobo man, ki maro lonyo, diyo lok woko, ci miyo pe nyak. 23Ento kodi ma kicoyo okir i ngom maber ni, aye dano ma winyo lok dok niang iye maber; en i ada cako nyako nyige dok cek, mukene miya acel, ki mukene pyere abicel, ki mukene pyere adek.”

Kaldyang ma kicoyo ikin kal

24Yecu dok obolo botgi carolok mukene kun waco ni, “Ker me polo rom ki dano mo ma ocoyo kodi mabeco i potone. 25Ento ikare ma dano dong gubutu woko, lakwore obino ci ocoyo kaldyang ikin kal, ka ocito gire woko. 26Ikare ma ginapitanu otwi odongo, kal ongok, ci kaldyang bene ocako nen. 27Lutic pa won ot gucito bot won ot gupenye ni, ‘Ladit, yam onongo pe icoyo kodi mabeco keken i potoni? Pingo dok waneno kaldyang tye iye?’ 28Won ot odok iye owacigi ni, ‘Lakwor aye ma otimo man.’ Ci lutic gupenye ni, ‘Imito ni wacit waciput kaldyang magi woko?’ 29Ento won ot odok iye owaco ni, ‘Pe, ka wudoyo kaldyang magi woko, miyo kare mukene wubiputu kal mukeneni woko bene kacel ki kaldyang. 30Kong wuwek kaldyang ki kal ducu gudong kacel nio wa ikare me kac; ikare me kac abiciko lutic ni kong wucok kaldyang woko mukwongo ci wutwegi woko i dul ki dul me awanga, ento kal aye wukaa wuket i derona.’”

Carolok ikom kodi karadali

(Mar 4:30-32; Luk 13:18-19)

31Dok obolo botgi carolok mukene, kun waco ni, “Ker me polo rom ki kodi karadali, ma dano okwanyo ci ocoyo i potone. 32Kodi karadalini dok tidi tutwal ki ikin kodi ducu, ento ka odongo doko yat madit makato yat mukene ducu. Doko yat mo madit mamiyo winyo me polo gibino gigero odigi i jange.”

Carolok ikom tobi

(Luk 13:20-21)

33Yecu obolo botgi dok carolok mukene ni, “Ker me polo rom ki tobi ma dako mo okwanyo orubu ki moko mugati maromo adita adek, nio ka moko ducu oyenyo, okwot.”

Kit ma Yecu onongo maro tic kwede ki carolok

(Mar 4:33-34)

34Lok magi ducu Yecu oloko bot lwak i carolok. I adane en pe obedo kalok kwedgi lok mo labongo bolo carolok, 354 wek omii lok mayam lanebi oloko ocobe kakare ni,

“Abiwaco lok i carolok,

abitito lok mayam okane woko cake wa i acaki piny.”

Yecu ogonyo carolok ikom kaldyang ma kicoyo ikin kal

36Ka Yecu oweko lwak ci ocito odonyo i ot, lupwonyene gubino bote guwace ni, “Kong itit botwa carolok ikom kaldyang ma i poto.” 37Yecu odok iye ni, “Ngat ma ocoyo kodi mabeconi aye Wod pa dano; 38poto aye lobo man, dok kodi mabeconi teloke ni lutino me ker pa Lubanga, kaldyang aye lutino pa Larac. 39Lakwor ma ocoyogi aye Catan; kac, meno agiki piny, lukac aye lumalaika. 40Kit macalo kicoko kwede kaldyang kiwango woko i mac, bibedo bene kitmeno i agiki piny. 41Wod pa dano bioro lumalaikane, gibicoko ki itekere gin ducu mamiyo dano gipoto ibal, kacel ki jo ducu ma gin lutim maracu, 42ci bologi woko i ruk mac, kama dano bibedo iye kakoko kun gikayo lakgi. 43Ikare meno jo ma kitgi atir biryeny calo ceng i ker pa Wongi. Ngat ma ite tye omyero owiny.

Lonyo ma kikano i poto

44Ker me polo rom ki lonyo ma kikano i poto, ma dano onongo ci dok oyiko woko. Dong pi yomcwiny omiyo en ocito ocato jami ducu ma onongo en tye kwede, ci owilo poto meno woko.

Tiko ma wele malo

45Dok ker me polo rom ki lacatwil ma onongo yam obedo kayenyo tiko mabeco me wel. 46Ikare madong onongo tiko mo acel me wel, ocito ocato jami ducu ma onongo en tye kwede, ci owilo tiko meno woko.

Obwo ma kiciko i nam

47Dok ker me polo rom ki obwo ma kiciko i nam ci omako kit kwayi recgu ducu. 48Ikare madong gupong woko ki rec, dano guywayo gukelo woko iwi tura, gucako bedo piny guyero mabecone guketo i aduku, ki maracune gubolo woko. 49Bibedo kitmeno i agiki piny. Lumalaika gin bibino ci gin gipoko jo maracu woko ki ikom jo ma kitgi atir, 50kibibologi woko i ruk mac, kama dano gibikok kun gikayo lakgi.”

Lonyo manyen ki macon

51Cutcut Yecu openyogi ni, “Dong wuniang i lok man ducu?” Gudoke iye ni, “Eyo.” 52Yecu dok owaco botgi ni, “Pimeno Lapwonycik mo ma kipwonyo pi ker me polo rom ki dano mo ma won ot, ma kwanyo gin manyen ki macon ki ikom lonyone.”

Kikwero Yecu i Najaret

(Mar 6:1-6; Luk 4:16-30)

53Ikare ma Yecu dong otyeko loko carolok magi, oa woko ki kunu, 54ci odwogo i lobo tugi. Opwonyogi i kacokegi, omiyo guuru matek kun giwaco ni, “Dano ni onongo ryeko man ki kwene? Dok tic matego macalo magi ma en tiyogu oa ki kwene? 55Man pe latin pa lapac? Mine pe Maliam? Ki omegine pe Yakobo ki Yucepu ki Cimon ka Juda? 56Lumegine ducu pe gitye kacel kwedwa kany? Ci danoni onongo kit man ducu ki kwene?” 575 Cutcut cwinygi ocako kwere woko. Ento Yecu owaco botgi ni, “Lanebi kiketo deyo ikome, ento pe kiketo deyo ikome i lobo tugi ki i ode.” 58Pe otiyo tic matego mapol kunu, pien onongo niyegi peke.