Matayo 12

Lapeny ma mako ceng Cabit

(Mar 2:23-28; Luk 6:1-5)

11

Ikare meno Yecu owoto kun ngolo ki i poto ngano i ceng Cabit. Kec onongo neko lupwonyene, ci gucako rito wit ngano gumwodo. 2Ento ka Luparicayo guneno, ci guwaco bot Yecu ni, “Nen, lupwonyeni gitiyo gin ma cik ogengo ni pe kiti i ceng Cabit.” 32 Yecu odok iye botgi ni, “Wun pe wukwano gin ma Daudi otiyo, ikare ma onongo kec oneke, en kacel ki jo ma onongo gitye kwede? 43 Kit ma en odonyo kwede i Ot pa Lubanga, ci ocamo mugati ma kiketo inyim Lubanga, mayam Cik ogengo ni en pe ocam, kadi ki jo ma onongo gitye kacel kwede, ento kono ajwaki pa Lubanga keken? 54 Dok bene pe wukwano i Cik ni i ceng Cabit ajwaki ma i Ot pa Lubanga gipyedo ceng Cabit, ento gipeke kibal? 6Atitiwu ni gin madit makato Ot pa Lubanga tye kany. 75 Kace onongo wungeyo tyen lok man ni, ‘Amito kica, pe lee me gitum,’ onongo myero pe wungolkop oloo jo ma peke ki bal. 8Pien Wod pa dano aye Rwot me ceng Cabit.”

Dano ma bade otal

(Mar 3:1-6; Luk 6:6-11)

9Yecu oa ki kunu ocito odonyo i kacoke. 10Nen, onongo yam tye kunu dano mo ma bade otal. Ci gupenye ni, “Cik ye ni kicang dano i ceng Cabit?” Gupenye kitmeno pien onongo gimito ni gidote. 116 Yecu openyogi ni, “Anga ikinwu ma ka tye ki romo acel ce romo meno opoto i bur i ceng Cabit, en pe bimako ywayo kelo woko kamaleng? 12Dano pe pire tek tutwal kato pi romo? Pimeno Cik ye ni myero kitim gin maber i ceng Cabit.” 13Ci owaco bot danoni ni, “Rye badi.” Danoni oryeyo bade, ci bade ocang woko maber odoko calo mukeneni. 14Ento Luparicayo gukato woko ci gupiro lok ikom Yecu, kit macalo myero gineke kwede.

Latic ma ki yero

15Ka Yecu ongeyo lok man, oa woko ki kunu. Jo mapol gulube, ci en bene ocangogi woko ducu, 16ocikogi ni pe myero gumi pire ongene. 17Man otime wek lok mayam lanebi Icaya oloko ocobe kakare ni, 187

“Nen, latica ma ayero ma amaro,

ma cwinya yom ikome.

Abiketo Cwiny Maleng ikome,

en bitucu ngolo kop atir bot Lurok.

19Pe bidaa, pe bene bidange matek,

ngat mo pe biwinyo dwone i wanga yoo;

20pe bituru lagada ma okak,

dok pe bineko mac tara ma lyel nio wang ma en omiyo ngolo kop atir oloyo loc;

21ento Lurok bigeno gin maber pi nyinge.”

Yecu ki Beeljebul

(Mar 3:20-30; Luk 11:14-23)

22Ci kikelo bote latowang mo matye ki cen, ma pe loko, ci Yecu ocange. Cutcut latelebeoto otugi lok dok oneno piny bene. 23Jo ducu ma onongo gitye kenyo guuru matek kun giwaco ni, “Man twero bedo Lakwar Daudi?” 248 Ento Luparicayo guwinyo ci guwaco ni, “Dano ni ryemo cen pi twero pa beeljebul, ma en aye ladit pa cen.” 25Ka Yecu ongeyo tamgi, ci owaco botgi ni. “Ka ker iye opoke aryo, ker meno lobone bale woko, ki taun bene nyo ot ka opoke iye aryo pe twero cung. 26Kace Catan ryemo Catan, nongo opoke i dul aryo ikome kekene; ci kere dong bicung ningning? 27Ka an aryemo cen ki twero pa Beeljebul, ci lupwonyewu kono giryemo cen ki twero pa anga? Pimeno gin aye gibibedo lungolkopwu. 28Ento kace an aryemo cen i twero pa Cwiny pa Lubanga, ci dong nen ni ker pa Lubanga dong obino woko botwu. 29Dano mo twero donyo i ot pa ngat ma kome tek ningning, ci cako yako jamine ducu, ka pe kong en otweyo laco meno ma kome teki woko? Ka lacen dong cako yako ode. 309 Ngat ma pe tung bota, meno nongo en lakwora, dok ngat ma pe nywako kacel kweda ka coko, nongo keto mere aketa. 31Pimeno awaciwu ni, bal ducu ma dano timo, ki lok ducu ma giyeto kwede Lubanga, kibiwekone woko, ento bal me yet ma kiyeto ki Cwiny Maleng pe kibiwekone matwal. 3210 Dok dano ma loko lok marac ikom Wod pa dano kibiweko bale; ento ngat ma loko lok marac ikom Cwiny Maleng pe kibiweko bale, kadi ikare man nyo ikare mabino anyim.

Kingeyo yat ki nyige

(Luk 6:43-45)

3311

Myero wunge ni yat maber nyako nyige mabeco, ki yat marac nyako nyige maracu; pien yat ki ngeyo ikom nyige. 3412 Wun lutino ororo, wutwero loko lok maber ningning, ma kun wun jo maracu? Pien lok ma ogure i cwiny dano, en aye dog bene loko. 35Dano maber kwanyo gin maber ki ikin jamine mabeco ma en okano, dano marac kwanyo gin marac ki i gin maracu ma en okano. 36Atitiwu ni, lok ducu me carocaro ma dano giwaco ma pe gigwoke iye ni, kibipidogi pire inino me ngolo kop. 37Pien lok ma iloko aye bimiyo iloyo kop, ki dok bene lok ma iloko aye bimiyo kingolo kop loyi.”

Kipenyo Yecu pi lanyut

(Mar 8:11-12; Luk 11:29-32)

3813

Jo mogo ikin Lupwonycik ki Luparicayo guwaco bot Yecu ni, “Lapwony, wamito neno lanyut mo ma a ki boti.” 3914 Ento Yecu odok iye owaco botgi ni, “Yalwak pa jo maracu ki lutim abor giyenyo lanyut, ento pe kibimiyo botgi lanyut mo kono lanyut pa lanebi Yona keken. 4015 Pien kit macalo Yona yam otyeko nino adek, dyeceng ki dyewor, irec, kitmeno Wod pa dano bene bityeko nino adek, dyeceng ki dyewor ibur lyel. 41Jo Nineve bicung kacel ki yalwak me kare man, ikare me ngolo kop, ci miyo kop loyogi; pien gin yam gungut pi lok ma Yona onongo otito ento nen, gin madit makato Yona tye kany. 4216 Rwot ma dako matye tung kupiny bicung kacel ki yalwak me kare man, ikare me ngolo kop, ci miyo kop loyogi; pien en oa ki i agiki lobo obino kawinyo ryeko pa Solomon, ento nen, gin madit makato Solomon tye kany.”

Dwogo pa cen ikom dano

(Luk 11:24-26)

43“Ka cen dong oa woko ki ikom dano mo, ci cito wire i tim kama pii peke iye kun yenyo kama ebiywe iye; ento pe nongo kabedo mo kadi ki acel. 44Ci cako waco ni, ‘Abidok gira i oda kama yam aa ki iye ni.’ Ka obino, ce nongo ode tye nono, kiyweyo woko, dok kiyubu woko maber, 45ka dong cito kelo cen mukene abiro ma giracu gikate woko, ci gidonyo gibedo i ode ni. Lacen danoni bibedo marac makato kit ma onongo yam obedo kwede con. Bibedo kitmeno bene bot yalwak pa jo maracu me kare man.”

Min Yecu ki omegi Yecu

(Mar 3:31-35; Luk 8:19-21)

46Ikare ma Yecu pud tye kalok bot lwak, nen, mine kacel ki omegine onongo gucung woko, kun guwaco ni gimito lok ki Yecu. 47Ci dano mo acel owace ni, “Nen, meni ki omegini gitye gucung woko gimito lok kwedi.” 48Ento Yecu odok iye ki danoni ni, “Maa anga? Ki omegina kono angagi?” 49Ka oryeyo bade tung bot lupwonyene, ci owaco botgi ni, “Wunen, maa ki omegina aye jo matye kany! 50Pien dano ma tiyo gin ma Wora matye i polo mito, meno aye omera ki lamera, ki maa bene.”