Matayo 11

Jo ma Jon Labatija oorogi bot Yecu

(Luk 7:18-35)

1Ikare madong Yecu otyeko ciko lupwonyene apar wiye aryoni, oa ki kunu ocito kapwony ki katito lok ikin taun gi macok ki kunu.

2Madong Jon owinyo pi tic pa Yecu ki i buc, ci ooro lupwonyene bot Yecu 3wek gupenye ni, “In aye ngat ma myero obin ni, nyo dok wakur ngat mukene?” 4Ci Yecu odok iye botgi ni, “Wucitit bot Jon gin ma wuwinyo ki ma wuneno; 5lutowang wanggi oyabe guneno piny, lungolo guwoto, ludobo kicangogi, ki ludingit guwinyo lok, ki jo ma oto kicerogi woko, ki lucan bene kitito botgi lok me Kwena Maber. 6Dong dano ma pe okwanyo niye ne woko ki ikoma tye ki gum.”

7Ikare ma lupwonye pa Jon dong gitye ka dok cen, Yecu ocako lok ki lwak, lok ikom Jon ni, “Onongo wucito i tim kaneno gin ango? Onongo wucito kaneno lagada ma yamo obedo ka yengone? 8Wucito kunu kono pingo? Wucito kaneno dano ma oruku bongi mabeco? Nen, jo ma ruku bongi mabeco gibedo i odi pa luker. 9Wucito kunu pingo? Wucito kaneno lanebi mo? Eyo, awaciwu ni kaneno ngat makato lanebi. 101 Man aye ngat mayam kicoyo lok ikome ni,

‘Nen, acwalo lakwenana otelo nyimi,

ma bigero yoo ni ma peya nongo in ibino.’

11Adada, awaco botwu ni, pe tye dano mo ki ikin jo ma mon onywalogi makato Jon Labatija ki dit; ento ngat matidi tutwal i ker me polo aye dit kate. 122 Cake ikare pa Jon Labatija nio kwede wa onyo ker me polo kinyayo ki tek, jo ma gin lutim gero aye gijuku ki tek. 13Pien Cik pa Moses ki lunebi gubedo katito lok pa Lubanga nio wa ikare pa Jon; 143 kace wumito ye lok gi ci Jon aye Eliya ma omyero obin ni. 15Ngat ma ite tye me winyo lok man myero owiny.

16Abiporo yalwak me kare man ki gin ango? Gin romaroma ki lutino mabedo i cuk ma gilwongo lutino wadigi kun giwaco ni,

17‘Yam wakutu nyamulere botwu,

ento wun pe wumyelo;

wawero wer lyel,

ento wun pe wukok.’

18Pien Jon yam obino ma pe camo cam, dok bene onongo pe mato kongo bwino mo, man omiyo guwaco ni, ‘Dano man tye ki cen.’ 19Wod pa dano obino kun camo cam dok mato mat bene, meno bene guwaco ni, ‘Nen, dano ma owor dok lamero bene, larem lujog mucoro ki lubalo!’ Ento ryeko pa Lubanga tye kakare pi gin ma en tiyo.”

Can ikom taun madito ma pe giye ngut

(Luk 19:13-15)

20Lacen Yecu ocako loko lok ki kiniga ikom taun madito mogo mayam en onongo otiyo iye tice matego dok madito, pien jo matye iye gukwero ngut woko. 214 Yecu owaco ni “Ibineno can, in Korajin! Ibineno can, in Betecaida! Kono yam tic madito ma kitiyo botwu kitiyo i Turo ki Cidon, kono onongo jone gungut wa con, kun gin ruku bongo cola, ma gibedo i buru bene. 22Ento atiti ni, can pa Turo ki Cidon bibedo tworatwora inino me ngolo kop, makato can ma bipoto ikomi. 235 Ki in Kapernaum kibitingi woko malo i polo? Pe kumeno, kibidwoki woko piny i lyel. Kono yam tic matek madito ma kitiyo botwuni kitiyo i Codom, kono obedo tye nio wa onyo. 246 Ento atiti ni, can pa Codom bibedo tworatwora inino me ngolo kop, makato can ma bipoto ikom in.”

Wubin bota wek wuywe

(Luk 10:21-22)

25Ikare meno Yecu otucu ni, “Apwoyi Wora, in Rwot me polo ki me lobo, pien ikano lok magi woko ki bot luryeko ki jo makwiri, ci inyutugi bot lutino lukere. 26Eyo, Wora, pien onongo ineno ni ber i wangi kitmeno, dok ipwoyo kit yo macalo meno. 277 Jami ducu dong Wora otyeko miyogi woko bota; ngat mo pe mangeyo Wod, kono Won keken, dok bene ngat mo pe mangeyo Won kono Wod keken ki ngat ma Wod oyero me nyutu Won bote. 28Wubin bota, wun jo ducu ma wuol ki ma yec onuruwu, ci abimiyo wuywe. 298 Wuting ayokona, ki wupwony kita, pien an awor, dok amwol bene i cwinya, ma omiyo wun bene wubilimo yweyo i cwinywu. 30Pien ayokona yot, ki yeca bene pe pek.”