Matayo 10

Yecu oyero Lukwena apar wiye aryo

(Mar 3:13-19; Luk 6:12-16)

1Yecu olwongo lupwonyene apar wiye aryo bote, ci omiyogi twero me ryemo cen, ki me cango kit two ducu kadi wa gorogu. 2Nying lukwena pa Yecu magi apar wiye aryo gin ene: mukwongo Cimon, ma kilwongo ni Petero, ki Anderiya omine; Yakobo wod pa Jebedayo, ki Jon omine; 3Pilipo ki Bartolomayo; Tomaci ki Matayo lajog mucoro; Yakobo wod pa Alipayo, ki Tadayo; 4Cimon mayam obedo ikin jo ma gimito locken, ki Juda me Keriot, ma oloke odobe.

Yecu ooro lukwena apar wiye aryo

(Mar 6:7-13; Luk 9:1-6)

5Jo magi apar wiye aryo Yecu oorogi, kun cikogi ni, “Pe wucit ikin Lurok, pe bene wudony i taun pa Lucamaria mo, 6ento wucit bot jo Icrael, ma gitye calo romi ma orwenyo. 71 Ikare me wotwu wutit lok me Kwena Maber kit man ni, ‘Ker me polo dong onyiko cok.’ 8Wucang lutwo, wucer jo ma oto, wucang ludobo wek gulonye, wuryem cen. Wun wugamo twero man nono labongo cul mo, wumii bene nono labongo cul. 9Pe wuwot ki jabu, kadi ryal, kadi lim mo i opiru lim mo ipyerwu, 102 pe wuter kadi opiru mo me wotwu, kadi ki bamo kanyi aryo, kadi war tyen, kadi ki odo; pien latic myero kimiye cam ocam. 11Taun nyo paco mo ma wudonyo iye, kong wuniang anga ma myero ma kite atir ma bedo iye, ci wubed bote nio wang ma wua ki kenyo. 12Ka wubidonyo i ot kong wumot dano ma i ot meno. 13Ci ka ot meno ojolowu, wumii kuc ikom jo me ot meno; ento kace pe ojolowu, ci wuwek kucwu odwog cen botwu. 143 Kace ngat mo pe bijolowu nyo pe biwinyo lokwu, ci wuteng apwa woko ki i tyenwu me bedo caden botgi ka wua wuweko ot nyo taun meno. 154 Adada, atitiwu ni, inino me ngolo kop can pa Codom ki Gomora bibedo tworatwora, ento can ma kibikelo ikom taun meno dong bikato.

Ayelayela ma bibedo ikare me anyim

(Mar 13:9-13; Luk 21:12-17)

165

Nen, dong acwalowu me cito woko macalo romi ikin orudi; pimeno wubed ryek calo twol dok wubed mwol macalo akuri. 176 Dok wugwoke ikom jo ma bikelo ayela ikomwu; pien gibiterowu i kot, dok gibigoyowu i kacokegi, 18gibiywayowu giterowu inyim luloc ki lukergu pira, wubitito lok ma bedo caden botgi ki bot Lurok bene. 19Ka kiterowu ikot, pe wubed ka tamo kit mamyero wulok kwede, nyo kit lok ango ma wubilokone; pien lok mamyero wuloki kibimiyowu i cawa meno; 20pien pe wun aye wubilok, ento Cwiny Maleng pa Wonwu aye bilok ki i iwu. 217 Omego bimiyo omine ni kinek woko, ki wego bene bimiyo latine ni kinek woko, ki lutino gibituge ikom lunyodogi, gimiyo lunyodogi ni kinekgi woko; 228 dok dano ducu bikwerowu pira. Ento ngat ma ciro kun diyo cwinye nio i agiki bilare. 23Ka inen guketo ayela ikomwu i taun acel, ci wuring woko i taun macok kwede; pien ada awaciwu ni, pe wubiwoto i taun me Icrael wurumu woko ducu, ma nongo peya Wod pa dano obino. 249

Dano ma pud kipwonyo apwonya pe bedo dit makato ngat ma pwonye, kadi latic bene pe bedo dit makato ladite; 2510 ento dano ma kipwonyoni romo doko calo ngat ma pwonye, ki latic bene doko calo ladite. Ka onongo gulwongo won ot ni Beeljebul, ci dong jo ma ipacone gibilwongogi ki nying marac marom mene?

Ngat ma myero dano olwor

(Luk 12:2-9)

2611

Pimeno, pe wulworgi; pien pe tye gin ma kiumu ma pe kibiyabo kamaleng, kadi ki gin ma kikano ma pe bingene. 27Gin ma awaco botwu i colpiny, myero wutit kama leng; ki gin ma kikwilo akwila i itwu lawewe, wutuc loke wa iwi labila ot. 28Pe wulwor jo ma neko kom, ento pe gitwero neko tipu; ento myero wulwor ngat matwero neko tipu ki kom ducu i Geena. 29Ojwinyojwiny aryo pe kicato pi cente mo manok keken? Ento mo acel pe poto piny i ngom ma Wonwu pe ngeyo. 30Kadi bed wa yer wiwu dong kikwanogi woko liweng. 31Pimeno, pe wulwor; pien pirwu tek tutwal makato pi ojwinyojwiny mapol. 32Pimeno dano ducu ma biye an inyim dano, an bene abiye en inyim Wora matye i polo, 3312 ento ngat ma bikwera inyim dano, an bene abikwere woko inyim Wora matye i polo.

Pe kuc ento pala lucwan

(Luk 12:51-53; 14:26-27)

34Pe wutam ni abino me kelo kuc i lobo; an pe abino me kelo kuc, ento pala lucwan. 3513 Pien abino me poko kin latin awobi ki wone, nyako bipoke woko ki mine, ki ciwod bene bipoke woko ki daa ne. 36Lukwor pa dano bibedo jo ma ipacone. 37Ngat mamaro wone nyo mine makato an pe myero me bedo danona; ki ngat mamaro wode nyo nyare makato an pe myero me bedo danona. 3814 Dok bene dano ma pe tingo yatariyane kun lubu kwede kora pe myero me bedo danona. 3915 Dano ma keto cwinye i kwo me lobo man, birwenyone woko arwenya; ento dano ma jalo kwone pira binongo kwo ma pe tum.

Mot ma dano binongo

(Mar 9:41)

4016

Dano ma jolowu nongo ojolo an, ki ngat ma jola nongo ojolo ngat ma oora. 41Ngat ma jolo lanebi ni pien obedo lanebi, bilimo mot pa lanebi; ki ngat ma bijolo dano ma kite atir, pien dano meno kite atir, bilimo mot marom ki pa dano ma kite atirni. 42Dok bene dano ma bimiyo pii mangic me amata bot ngat acel ikom jo magi matino ni pien en obedo, lapwonyena, adada awaciwu ni, pe bikeng mote.”