Matayo 9

Yecu ocango dano matwoyo two akweya kom

(Mar 2:1-12; Luk 5:17-26)

1Yecu odonyo i yeya ongolo nam okato loka tungcel, ci obino i lobo tugi kikome. 2Ci kikelo bote dano mo matwoyo two akweya kom kun obutu iwi kitara. Ka Yecu oneno niyegi, ci owaco bot dano matwo ni, “Di cwinyi, latina, bali dong kiweko woko.” 3Ma omiyo Lupwonycik mogo gucako loko lok keken gi ni, “Dano man tye kayeto Lubanga.” 4Ento Yecu ongeyo tamgi woko, ci openyogi ni, “Pingo wutamo tam marac i cwinywu? 5Mene mayot makato, me waco ni, ‘Bali dong kiweko’, nyo ni, ‘Aa, iwoti’? 6Ento man me miyo wek wunge ni, Wod pa dano tye ki twero i lobo man me weko bal,” ci owaco bot latwo ni, “Aa, ikwany kabutuni idok paco.” 7Ci oa odok paco. 8Ka lwak guneno gin ma otime, lworo omakogi, ci gumiyo deyo bot Lubanga, ma omiyo kit twero macalo meno bot dano.

Yecu olwongo Matayo

(Mar 2:13-17; Luk 5:27-32)

9Ikare ma Yecu tye kakato ki kunu, ci oneno laco mo ma nyinge Matayo obedo kama kijogo iye mucoro owace ni, “Lub kora.” Ci oa malo olubu kore. 101

Ikare ma Yecu obedo i ot pa Matayo i dog cam, lujog mucoro mapol ki lubalo gubino gubedo kacel ki Yecu ki lupwonyene. 11Ka Luparicayo guneno man, gupenyo lupwonyene ni, “Pingo lapwonywu camo kacel ki lujog mucoro ki lubalo?” 12Ikare ma Yecu owinyo ogamo ni, “Jo ma komgi yot pe gimito daktar, ento kono jo ma komgi lit aye. 132 Wucit wupwonye i tyen lok man ni, ‘Amito kica, pe gin atyera.’ Pien pe abino kalwongo jo ma kitgi atir, ento lubalo.”

Peny ikom lok me rii kec

(Mar 2:18-22; Luk 5:33-39)

14Ikare meno lupwonye pa Jon gubino bot Yecu, gupenye ni, “Pingo wan kacel ki Luparicayo wa rii kec, ento lupwonyeni pe giri kec?” 15Ci Yecu odok iye botgi ni, “Lurem lanyom twero kumu ma nongo lanyom pud tye kacel kwedgi? Kare bibino ma kibikwanyo lanyom woko ki botgi, ka dong gibiri kec ikare meno. 16Pe tye ngat mo ma dabo bongo manyen ikom ginaruka ma otii. Pien kiraka biyec woko ki ikom ginaruka, ci wang bongo yec mede marac adada. 17Dok bene pe tye ngat mo ma piko kongo bwino manyen i opiru macon; ka opiko, ci kongo bwino biyeco opiru woko, kongo bwino bio woko ki opiru bene bibale. Ento kongo bwino manyen myero kipik i opiru kongo bwino manyen, wek gin aryo ducu kigwokgi maber.”

Nya pa laloc mo ki dako ma ogudu dog bongo pa Yecu

(Mar 5:21-43; Luk 8:40-56)

18Ikare ma Yecu tye kalok botgi, cutcut laloc mo obino odonyo i ot orumu conge, inyime kun wace ni, “Nyara oto pud kombedi, ento alegi ibin iket cingi ikome, ci bibedo kwo.” 19Yecu oa olubu kore kacel ki lupwonyene. 20Ci dako mo ma onongo dong otwoyo two agobi pi mwaka apar wiye aryo obino kitung inge Yecu ogudu dog bongone, 21pien onongo otamo ki i cwinye kekene ni, “Kace agudu bongone keken, ci abicang.” 22Yecu oloke, ka onene owace ni, “Di cwinyi nyara; niyeni ocangi.” 23Ka Yecu obino i ot pa laloc, oneno lukut nyamulere, kun lwak tye kakoko, 24ci owaco ni, “Wua woko; nyakoni pe oto ento onino anina.” Ci gin gunyere anyera. 25Ento ikare madong oryemo lwak gukato woko, ci en odonyo i ot omako latin nyakoni ki cinge, nyakoni oa malo. 26Lok meno oywek owinye oromo lobo meno ducu.

Yecu ocango lutowang aryo

(Mat 20:29-34)

27Ikare ma Yecu dong oa ki kunu omede ki wote, ci lutowang aryo gulube, ma gidange matek ni, “Kica omaki ikomwa do, Lakwar Daudi.” 28Ka Yecu dong odonyo i ot, lutowang aryo magi gubino bote; ci en openyogi ni, “Wuye ni atwero timo man?” Gudoke iye ni, “Itwero, Rwot.” 29Yecu ogudu wanggi kun waco ni, “Wek otime botwu kit macalo niyewu tye kwede.” 30Cutcut wanggi otugi yabe woko. Yecu ocikogi matek tutwal ni, “Wunen ni dano mo pe ongeyo lok man.” 31Ento gin gucito guketo lok man omiyo nyinge oywek oromo lobo meno ducu.

Dano ma telebe oto oloko

(Mat 12:22-24; Luk 11:14-15)

32Ikare ma Yecu ki lupwonyene gia me cito woko, kikelo bote dano mo ma telebe oto, ma onongo tye ki cen. 33Ka dong Yecu oryemo cen woko, cutcut laco meno ma telebe oto ni ocako lok. Ma omiyo lwak ma onongo gitye kenyo guuru matek, kun giwaco ni, “Cake manaka yam con kit gin macalo man peya onongo onen i Icrael.” 343 Ento Luparicayo guwaco ni, “En ryemo cen pi twero pa ladit pa cen.”

Kica omako Yecu ikom lwak

354

Yecu owoto orumu taun madito mapatpat ki gangi matino ma i carogu ducu, kun pwonyo i kacokegi, dok tito kwede lok me Kwena Maber me ker pa Lubanga ki cango kit two ducu kadi wa kit goro ducu. 365 Ka oneno lwak ci kica omake ikomgi mada, pien onongo gitye ka unugi matek, dong gudoko goro, calo romi ma lakwatgi peke. 376 Lacen owaco ki lupwonyene ni, “Kac dwong, ento lutic nok. 38Pimeno, wuleg Won poto wek ocwal lutic ka kayo kace.”