Matayo 8

Yecu ocango ladobo

(Mar 1:40-45; Luk 5:12-16)

1Ikare ma Yecu dong oa ki iwi got olor piny, lwak dano mapol gulube. 2Ci cutcut ladobo mo obino bote, orumu conge piny inyime kun wace ni, “Ladit, ka i mito, itwero canga.” 3Yecu oryeyo bade ogude, kun wace ni, “Amito; cang.” Cutcut dobone otugi cang woko. 41 Yecu ocike ni, “Nen ni pe iwaco lok man bot ngat mo; ento icit inyute keni bot ajwaka pa Lubanga ci ityer mot mayam Moses ociko pire ni, wek dano gunen ni ada in kara dong icang.”

Yecu ocango latic pa ladit ma Laroma maloyo acikari

(Luk 7:1-10)

5Ikare ma Yecu odonyo i Kapernaum, ladit mo maloyo acikari obino bote, malege kun waci, 6“Rwot, latica tye twoyo two akweya, obutu piny i ganga, ma arem dong oketo kome woko.” 7Ci Yecu odoke iye ni, “Aebino ka cange.” 8Ento ladit maloyo acikari ogamo loke ni, “Rwot, an pe amyero me wek in ibin idony i oda; ento wac lok awaca keken, ci latica bicang. 9Pien an bene adano ma kiloya aloya i dog tic, atye ki acikari bene ma an aloyogi. Ka awaco bot acikari mo acel ni, ‘Cit,’ ci cito, dok ka awaco bot ngat mukene ni, ‘Bin,’ ci bino, ka awaco bene bot opiina ni, ‘Tim man,’ ci timo.” 10Ka Yecu owinyo lok man ma dano ni oloko, ci ouru tutwal. Owaco bot lwak ma gulube ni, “Adada awaco botwu ni, peya anongo niye marom ki man, kadi i Icrael. 112 Atitiwu ni jo mapol bia kitung kunyango, kitung kupotoceng gibibedo i dog cam kacel ki Abraim, Icaka ki Yakobo i ker me polo, 123 ento lutino me ker kibibologi woko i colpiny, kama dano bikok kun gikayo lakgi iye.” 13Lacen Yecu owaco bot ladit maloyo acikari ni, “Cit, omyero otime boti kit macalo dong i ye kwede ni.” Ci latice ocang woko cut i cawa meno.

Yecu ocango maro pa Petero

(Mar 1:29-31; Luk 4:38-39)

14Lacen ikare ma Yecu odonyo i ot pa Petero, ci oneno maro pa Petero obutu piny onongo tye ki two lyeto. 15Yecu ogudu cinge, ci two lyeto ocang woko ki ikome, oa malo ocako gwoko Yecu.

16I otyeno me nino meno dano gukelo bote jo mapol ma onongo cen tye ikomgi; ci oryemo cen woko ki lok keken, dok bene ocango jo ducu ma onongo komgi lit. 174 Man otime wek lok mayam lanebi Icaya oloko ocobe kakare ni, “En otingo gorowa, dok otingo twowa ducu ikome.”

Jo ma onongo gimito lubu Yecu

(Luk 9:57-62)

18Ka Yecu dong oneno lwak dano orume woko dyere, ci owaco bot lupwonyene ni myero gikat loka nam tungcel. 19Lapwonycik mo oa obino bote owace ni, “Lapwony, abilubi kama icito iye ducu.” 20Ento Yecu odoke iye ni, “Too tye ki boro, winyo me polo bene tye ki odigi, ento Wod pa dano pe tye ki kama myero opyel iye wiye.” 21Dok dano mo acel ikin lupwonyene owace ni, “Rwot, kong iwek acit ayik wora.” 22Ento Yecu odoke iye ni, “Luba, wek jo ma oto guyik jo ma oto wadigi.”

Yecu ojuku yamo i nam

(Mar 4:35-41; Luk 8:22-25)

23Ka Yecu odonyo i yeya, ci lupwonyene gulube. 24Ci nen, pii me nam ocako twage matek, ma yeya onongo dong cok lwiny woko ite pii; ento Yecu onongo onino woko. 25Ci gucito gucoye, kun giwace ni, “Larwa Rwot, nen wato woko do!” 26En owaco botgi ni, “Pingo wubedo ki lworo, wun jo ma niyewu nok?” Ci oa malo, ojuku yamo ki nam, ci nam ocako ling mot. 27Ma omiyo dano guuru matek, kun giwaco ni, “Man dok kit dano ango ma yamo ki nam giwinye ni?”

Yecu ocango jo matye ki cen

(Mar 5:1-20; Luk 8:26-39)

28Ka Yecu dong oo loka nam tungcel, i lobo pa Lugadara, cutcut jo aryo ma cen tye ikomgi gurwate kwede; onongo gua ki ikin lyel. Onongo giger adada ma ngat mo pe twero kato ki i yoo kenyo. 29Ci gudange matek ni, “Ilaro ango kwedwa, in Wod pa Lubanga? In mono ibino kany kaunuwa ma kare peya oromo?” 30Lwak opego mapol onongo gitye ka cam kama gitye kalok iye. 31Ci cen gubako doggi bote kun giwaco ni, “Kace i mito ryemowa woko, cwalwa i dul opego nica.” 32Ci Yecu owaco botgi ni, “Wucit.” Gua woko ki ikom jonu ci gudonyo i opego; cutcut lwak opego gutware ki ngwec gularo piny i lung matut ci gupoto woko i nam, gumwony guto woko i pii. 33Lukwat guringo woko, gucito wa i taun madit ci gutito lok ikom gin ducu ma otime, wa lok ma otime ikom jo aryo ma cen onongo tye ikomgi ni. 34Ma omiyo lwak dano ducu ma i taun meno gubino karwate ki Yecu; ka gunene, ci gubako doggi bote ni en omyero oa woko ki i lobogi.