Matayo 7

Ngolo kop ikom jo mukene

(Luk 6:37-38,41-42)

1“Pe wungolkop ikom jo mukene, wek wun bene pe kingolkop ikomwu. 21 Pien kit ma itero ki dano, en aye kibiteri kwede, dok kit ma ingolo kwede kop, en aye kibingolo kwede kop boti. 3Pingo ineno cungkal matye iwang omeru, ento dul yat matye i wangi in ki komi pe ineno? 4Nyo itwero waco bot omeru ningning ni, ‘Wek akwany cungkal matye i wangini woko’ kun in bene dul yat tye i wangi? 5In lagoba, kong ikwong kwanyo dul yat matye i wangini woko, ci miyo dong ineno piny maber me kwanyo cungkal matye iwang omeru ca.

6Pe myero wumii jami maleng bot gwogi dok pe wubol ryal ma welgi tek bot opego, pien gibinyono anyona ki tyen gi dok gibiloke kalweny alwenya ikomwu.

Leg, yeny, dwong

(Luk 11:9-13; 6:31)

7Wuleg, ci kibimiyo botwu; wuyeny, ci wubinongo; wudwong dogola ci kibiyabo botwu. 8Pien dano ma lego kimiye, ki ngat ma yenyo bene nongo, ki ngat madwongo dogola bene kibiyabo dogola bote. 9Anga ikinwu ma won latin, ma ka latine olege ni omiye kwon, ci bimiye gweng? 10Nyo ka olege ni omiye rec, ci bimiye twol? 11Dong kace wun jo maracu wungeyo miyo mot mabeco bot lutinowu, ci Wonwu matye i polo pe bimiyo jami mabeco makato ducu bot jo ma lege? 122 Kit gin ducu ma wumito ni dano gutim botwu, wun bene wutim botgi kitmeno; pien man aye tyen lok me Cik ki pwony pa lunebi.

Dogola mading

(Luk 13:24)

13Wudony ki idogola mading, pien dogola ma tero dano ito lac, dok yoo ne kipiro maber, dok jo ma donyo ki iye pol. 14Pien dogola matero dano i kwo ding, ki yoo ne bene ding, dok jo ma nongo yoo meno gin nok.

Yat maber kingeyo ki nyige

(Luk 6:43-44)

15Wugwoke ikom lunebi ma lugoba, ma gibino botwu ma guruke woko calo romi, ento ki i cwinygi nongo gitye calo orudi ma owor. 16Wubingeyogi ki kitgi. Kitwero pwono olok ki ikom yat okutu, nyo nyig oduru ki ikom yat tworo? 17Kitmeno, yat maber nyako nyige mabeco, ento yat marac nyako nyige maracu. 18Yat maber pe twero nyako nyige maracu, ki yat marac bene pe twero nyako nyige mabeco. 193 Kit yat ducu ma pe nyako nyige mabeco kitongo ci kibolo woko imac. 204 Kitmeno wun bene wubingeyogi ki kitgi.

Cake wacon onongo pe angeyowu

(Luk 13:25-27)

21Pe dano ducu ma gilwonga ni, ‘Rwot, Rwot’ aye gibidonyo i ker me polo, ento ngat ma tiyo gin ma Wora ma i polo mito. 22Inino meno jo mapol biwaco bota ni, ‘Rwot, Rwot, yam pe watito lok pa Lubanga i nyingi, dok pe waryemo cen maracugu woko ducu i nyingi? Yam pe watiyo tic mogo matek madito i nyingi?’ 235 Ci abitucu botgi kamaleng ni, ‘Onongo pe angeyowu; wua woko ki bota, wun lutim gin maracu.’

Lugedo aryo

(Luk 6:47-49)

24Dano acel acel ma winyo loka ce tiyo kwede, bibedo calo dano maryek, ma ogedo ode ikom pata got. 25Kot ocwer, lalele omol matek, ci yamo okodo matek ikom ot meno, oyengo, ento pe opoto, pien tegutine kikwinyo ikom pata got. 26Ento dano acel acel ma winyo loka ce pe tiyo kwede bibedo calo dano ma laming ma ogedo ode ikom kweyo. 27Kot ocwer, lalele omol matek, yamo okodo matek ikom ot, oyengo, ci opoto woko; potone owinye matek adada.”

Twero ma Yecu tye kwede

(Mar 1:22)

286

Ikare ma Yecu dong otyeko loko lok magi ducu, lwak guuru kit pwonye matek, 29pien opwonyogi calo ngat matye ki twero, pe macalo Lupwonycik.