Matayo 16

Luparicayo gulego lanyut

(Mar 8:11-13; Luk 12:54-56)

11

Luparicayo ki Lucadukayo gubino, gubito Yecu ni onyut botgi lanyut ma a ki i polo. 2Yecu ogamo doggi ni, “Ka piny oyutu, wuwaco ni, ‘Piny bibedo maber; pien polo nen makwar.’ 3Dok i odiko wuwaco ni, ‘Tin kot bicwer madit, pien polo nen makwar, dok ocido woko licuc.’ Wungeyo poko kin gin manen i pol, ento pe wutwero poko lanyut me kare man. 42 Yalwak pa jo maracu ma pe tike atir bot Lubanga, gin yenyo lanyut, ento pe kibimiyo botgi lanyut mo kono lanyut pa Yona keken.” Ci oa woko ki botgi ocito kamukene.

Tobi pa Luparicayo ki pa Lucadukayo

(Mar 8:14-21)

5Ikare ma lupwonyene guo loka tungcel, onongo wigi owil woko me tero mugati mo. 63 Ci Yecu owaco botgi ni, “Wugwoke ikom tobi pa Luparicayo ki pa Lucadukayo.” 7Gubedo ka laro lok ikin gi keken gi kun giwaco ni, “Pe wakelo mugati.” 8Ka Yecu ongeyo, ci openyogi ni, “Pingo wupenye kekenwu ni mugati peke, wun jo ma niyewu nok? 94 Peya wuniang ce, nyo pe wupo pi mugati abic pi jo alip abici? Yam wucoko ngide opongo aduku adi? 105 Nyo mugati abiro pi jo alip angwen, yam wucoko ngide opongo adita adi? 11Pingo pe wuniang ni an pe aloko botwu lok ikom mugati kikome? Wugwoke ikom tobi pa Luparicayo ki pa Lucadukayo.” 12Lacen guniang maber ni, Yecu onongo pe oloko botgi me gwoke ikom tobi me mugati, ento ikom pwony pa Luparicayo ki pa Lucadukayo.

Petero otucu lok ikom Yecu

(Mar 8:27-30; Luk 9:18-21)

13Ka Yecu dong oo i lobo macok ki Cecaria Pilipi, ci openyo lupwonyene ni, “Dano mono giwaco ni Wod pa dano en anga?” 146 Gin owaco ni, “Jo mogo giwaco ni Jon Labatija, jo mukene giwaco ni Eliya, ki jo mogo giwaco ni Jeremia nyo ngat mo acel ikin lunebi.” 15Ka dok openyogi ni, “Wun kono wuwaco ni an anga?” 167 Cimon Petero ogamo ni, “In i Kricito ma Lubanga oyero, Wod pa Lubanga makwo.” 17Ci Yecu odoke iye ni, “Itye ki gum, Cimon wod pa Yona! Pien dano adana aye pe onyuti lok man, ento Wora matye i polo aye onyuti. 18Dong awaco ni in i Petero, ma teloke ni Pata, abimiyo lwak jo ma oye an gicung ikom pata man, teko me to pe bitwero loyone. 198 Abimini layab me ker me polo, dong gin ducu ma in itweyo iwi lobo man kibitweyo bene wa i polo, dok gin ducu ma igonyo iwi lobo man kibigonyo bene wa i polo.” 20Ci ocikogi matek tutwal ni pe gutit bot ngat mo ni en aye Kricito ma Lubanga oyero.

Yecu otito pi tone

(Mar 8:31—9:1; Luk 9:22-27)

21Cake ikare meno Yecu ocako nyutu bot lupwonyene ni myero ecit i Jerucalem, dok myero ecir can madwong ki bot ludongo ki ajwaki madito pa Lubanga ki Lupwonycik. Kibineke, ento inino me adeke kibicere woko. 22Ci Petero otere cen, ocako juke, kun waco ni, “Lubanga myero pe oye ni kitimi kitmeno, Rwot! Gin macalo man pe otime ikomi wa ki acel.” 23Ento Yecu oloke ci owaco bot Petero ni, “Dok cen i ngeya, in Catan! Idoko ariya woko bota, pien tami pe lubu pa Lubanga, ento pa dano.” 249

Yecu otito bot lupwonyene ni, “Kace dano mo mito lubu kora, myero okwong kwere kekene, ka ocak tingo yatariyane, olub kwede kora. 2510 Pien dano ma mito laro kwone pire kene birwenyone arwenya, ento dano mo ma rwenyo kwone pira aye binongone. 26Konyo dano ma olimo lobo ducu ki gin ango mono, kace kwone kikwanyo woko? Dano dok bimiyo kit gin ango maka kwone? 2711 Pien Wod pa dano bidwogo ki deyo pa Wone kacel ki lumalaikane, ci biculu dano acel acel kun lubu kit tic mayam dano ni otiyo. 28Adada, awaco ki wun ni, tye jo mogo ma gucung kany ma pe gibibilo to wa ki acel, ni oo wang ma guneno Wod pa dano kabino i kere.”