ପାର୍ତୁମ୍
Genesis
Introduction from this edition
ମୋଶାଙ୍କ ଲିଖିତ ପ୍ରଥମ ପୁସ୍ତକ
ପାର୍ତୁମ୍ ବଇ
ପାର୍ତୁମ୍ ବଇ ବିସୟ୍ତାନ୍ ଏସ ମାଟା
ରାସ୍ତିବେଡ଼ା
ରାସ୍ତିକାନ୍, ତାରିକ୍ ମାରି ୱେନିକାର୍
ରିତିନିତି ଇସାବ୍ତାନ୍, ମୋସା ପାର୍ତୁମ୍ ବଇ ମାରି ଆଇ ପାର୍ତୁମ୍ ପାସ୍ ଗୋଟା ବଇଦି ରାସ୍ନିକାନ୍ ୱାଜା ୱେଙ୍ଗିଁତାମାନାନ୍ ଗଣନା ୩୩:୨; ଦ୍ୱିତୀୟ ବିବରଣି ୩୧:୨୪; ଜୋହନ ୫:୪୬ ସିଡ଼ୁଦୁ । ମାରିବା, ମୋସା ଆଗ୍ଡ଼ିରି ଗଟ୍ନା ବାଦ୍ଲୁ ବେସି ୱେନ୍କା ଜିତା ମାର୍ହାନ୍ । ଆୟା ଆଗ୍ଡ଼ିରି ଗଟ୍ନାଦି ବିସୟ୍ତି କାତେଙ୍ଗ୍ ୱିଜୁ ଆଡିଗି ପୋକ୍ତାମାର୍ହାର୍ ମାରି ମୋସା ଆୟା ୱିଜୁ ବିସୟ୍ତିଙ୍ଗ୍ ଉଣ୍ତା କିତାମାର୍ହାନ୍ ।
ପାର୍ତୁମ୍ ସୁଣିକା ଇସ୍ରାଏଲତି ମୋସା ମରୁବୁମି ସିଜି ୱାନିକା ମାର୍ହାତ୍ । ନେରୁ ପଡ଼ାନି ୱାରି ଉଣ୍ତିଙ୍ଗ୍ ପାର୍ତୁମ୍ ବଇ ବାଇବଲତି ବାକିତେବାତି ମାନି ଉଡ୍ରି ଦର୍କାର୍ତି ନେସ୍ସିସି କିନି ବଇ ଇକା । ଇୟାତାନିଙ୍ଗ୍ ଟିକ୍ତାନ୍ ଆରାମ୍ତି ବଇ ଇଜି ଇନାର୍ ।
ବିସୟ୍
ପାର୍ତୁମ୍ ବଇ ଆଜିନାତ୍ ତିଆର୍, ପାପ୍ ମାରି ପୁନା ତିଆର୍ ଆନି କାତା । ମାପୁରୁ ଦୁନିଆଦିଙ୍ଗ୍ ବେସି ନେଗେନ୍ତାନ୍ ତିଆର୍ କିତା ମାର୍ହାନ୍, ମାତର୍ ପାର୍ତୁମ୍ ଇୟାତାନିଙ୍ଗ୍ ଆନାଦୁରିଆ ଇଟ୍ତାମାର୍ହାନ୍ ମାରି ୱେନ୍କା ଲୋକା ମାନାଇ ଉଣ୍ତିଙ୍ଗ୍ ତେନିଙ୍ଗ୍ ପିରୁଗାଲିଦାନ୍ ନାସ୍ଟୁ କିତାନ୍ । ଗାଲିପିରୁ ଡ଼ିସ୍ତି ୱେନ୍କା ତିଆର୍ଆତିମାନି ପୁନି ଦୁନିଆ ବା ଲୋକା ପାପ୍ତାନ୍ ନାସ୍ଟୁ ଆତାତ୍ ୧୧ ଅଦ୍ୟାୟ୍ । ମାପୁରୁ ଅବ୍ରହାମତିଙ୍ଗ୍ ଉଡ୍ରି ଆଇ ଉଦେସ୍ତାନ୍ ଆସ୍କିତାନ୍ । ୱାନି ଇଲୁ କୁଟୁମ୍ତାନ୍ ୱିଜୁ ଜାତି ଆର୍ସିବାଦ୍ ପୋୟ୍ନାର୍ ୧୨:୧-୩ । ଅବ୍ରହାମଦି କୁଟୁମ୍ତି ଲୋକାମାଣାନ୍ ସାରାସାରି ୱେନ୍କା ମାପୁରୁଦି ମାଟା ପୁରା ଆନାତ୍ ୪୯ ଅଦ୍ୟାୟ୍ ।
ପେରି ବିସୟ୍
୧. ପ୍ରବୁ ମାପୁରୁ ଲୋକାଙ୍ଗ୍ ଦୁନିଆଦୁ ୱାନି ପାଣିକିନିକାର୍ ଆଦେଙ୍ଗ୍ ୱେର୍ନାନ୍ । ୱାରିଙ୍ଗ୍ ଦୁନିଆଦିଙ୍ଗ୍ ଜାତୁନ୍ କିନିକା ମାନାତ୍ ମାରି ଆଇ ଜାତୁଆଙ୍ଗାଁ ସାସନ୍ କିନିକା ମାନାତ୍ ୧:୧ - ୨:୨ ।
୨. ଦୁନିଆଦୁ ମାପୁରୁଦି ପାଣିକିନିକାର୍ ୱାଜା ପାଣି କିନି ବାଦ୍ଲୁ, ପାର୍ତୁମ୍ ମେମାରି ନି ଆଇମା ଆଦମ ନି ଅବା ସାରାସ୍ତି ମାଟାଦିଙ୍ଗ୍ ୱେର୍ଆର୍ ମାରି ତାନି ମାଟାଦିଙ୍ଗ୍ ମାନାତାର୍ । ୱାରି ମାନାଇକା ୱିଜୁ ଲୋକା ଜାତି ମାରି ୱିଜୁ ତିଆର୍ ଆତି ଦୁନିଆ ଉଣ୍ତିଙ୍ଗ୍ ନାଣ୍ତ କାସ୍ଟୁଦି ଦଣ୍ତ୍ ଆତାତ୍ ୩:୧-୨୪; ୬:୫-୬ ।
୩. ମାପୁରୁ ଦୟାଦାନ୍ ୱେର୍ତାମାନାନ୍ ଜେ ଅବାଦି କୁଟୁମ୍ ଲୋକାଙ୍ଗ୍ ସାରାସ୍ତି ଲୋଇରାନ୍ ମୁକୁଡ଼ା କିନାନ୍ ୩:୧୫ । ଆଦି ୱେନ୍କା ଉଡ୍ରି ଇଲୁ କୁଟୁମ୍ ଇତିଆସ୍ ପୋୟ୍ନିକା ଆରାମ୍ ଆନାତ୍ ଆମାକା ଇସ୍ରାଏଲତି ଲୋକୁ ଆନାନ୍ । ଇୟା ଇଲୁ ମାପୁରୁଦି ୱାଲେ ଉଡ୍ରି ବିସାବିଡ଼ାନିକା ମାନାତ୍ ମାରି ପାପ୍ତୁ ଆର୍ତି ଲୋକା ଉଣ୍ତିଙ୍ଗ୍ ଆର୍ସିବାଦ୍ତି ମୁଲ୍ ଆନାନ୍ ୧୨:୧-୩ ।
୪. ଆଦମତି ମାନାଇ ଉଣ୍ତିଙ୍ଗ୍, ବୁମିଦି ୱାଲେ ୱାନି ଆଇଆଇ ବିସାବିଡ଼ାନିକା କାରାପ୍ ଆନାତ୍, ଦଣ୍ତ୍ ୱାଜା ବାଦାନି ପାଣି ମାରି ୱେନ୍କା ଗାଲିପିରୁ ମାରି ଉଣିତିନିକା ପୁଟ୍ଏତାତ୍ । ମାତର୍ ଆଦମତି ମାଣାନ୍ ୱାଜିମାନି ଇଲୁତାନ୍ ୱିଜୁ ବାଦାଦାନ୍ ମୁକୁଡ଼ାନିକା ତାନାନ୍ ୩:୧୭-୧୯; ୫:୨୯; ୫୦:୧୯-୨୧ ।
୫. ଏସ୍ତିୱାଲେ କଡ଼ ଜିନମ୍ କିନି ବାଦା ମୁସ୍କୁ ଅବାଦି ଦଣ୍ତ୍ତିଙ୍ଗ୍ ମିସା କିତାନ୍ ୩:୧୬ ଆଇଆଇ ଇଲୁକୁ ଦାଡ଼ି କିଜି ଇଡ୍ଦେଙ୍ଗ୍ ଆଇମେକ୍ ଉଡ୍ରି ଦିୟାନ୍ତି ବିସୟ୍ ମାନାନିକା । ମାପୁରୁଦି ସାକାଦାନ୍ ବାଞ୍ଜି ବା ଆକ ଆନାତ୍ ୧୧:୩୦; ୨୧:୧-୭; ୨୫:୨୧; ୩୮:୧-୩୦ ।
୬. ଲୋକା ଗୁଣୁତି ତାଗ୍ଇକେଙ୍ଗ୍ ଇଲୁଦିଙ୍ଗ୍ ବାଗ୍ ବାଗ୍ କିନାତ୍ ୪:୧-୧୬; ୧୩:୫-୮; ୨୫:୨୨-୨୩; ୨୭:୪୧-୪୫; ୩୭:୨-୩୫ । ମାରିବା ପାର୍ତୁମ୍ ବଇ ଇଲୁଦି ଜାଟିଜଗଡ଼ା ତର୍ନାତ୍, ଆସ୍କିତି ଇଲୁଦି ଲୋକୁ ବା ଆୟା ଜାଟିଜଗଡ଼ାଦି ସମାଦାନ୍ କିଦେଙ୍ଗ୍ ସାହାଜ୍ୟ କିଦେଙ୍ଗ୍ ଆଟ୍ନାର୍ ୧୩:୧୧; ୩୩:୧-୧୧; ୪୫:୧-୨୮; ୫୦:୧୫-୨୧ ।
୭. ତାଗ୍ଇକାର୍ ଏଦନ ଡଡିଦାନ୍ ସୋପାଇ ଆଜି ଦୁନିଆଦୁ ଇନିଙ୍ଗାଁ ଆନିଙ୍ଗାଁ ଆଜି ତେବାତା ମାନାର୍ ୩:୨୨-୨୪; ୪:୧୨-୧୬; ୧୧:୯ । ମାତର୍ ମାପୁରୁ ୱାନି ଆସ୍କିତି ଲୋକା ଉଣ୍ତିଙ୍ଗ୍ ଦୟା କିନିକାନ୍ ମାରି ୱାରିଙ୍ଗ୍ ୱାରି ନିଜେଦି ଉଡ୍ରି ଦେସ୍ ପାର୍ମାଣ୍ କିନାନ୍ ୧୨:୧-୨, ୭; ୧୫:୭-୨୧; ୨୮:୧୩-୧୪; ୫୦:୨୪ ।
୮. ମାପୁରୁ ଲୋକା ତାଗ୍ଇ ପାଣି ଉଣ୍ତିଙ୍ଗ୍ ୱିଜୁ ଲୋକା ଜାତିଦିଙ୍ଗ୍ ଦ୍ୱଂସ୍ କିଦେଙ୍ଗ୍ ତିଆର୍ ଆତା ମାର୍ହାନ୍ ୬:୭, ୧୧:୧୨; ୧୮:୧୭-୩୩ । ମାତର୍ ୱାନ୍ ମାରିବା ନେସ୍ନାନ୍ ଜେ ୱାନି ଦୁନିଆ ଦାର୍ମୁଦି ଲୋକା ମାଣାନ୍ ଜିନିକା ଆପିତ୍ ୧:୨୮; ୯:୧; ୧୫:୧-୫; ୩୫:୧୧ ।
ଇୟା ବଇଦୁ ମାନି ମୁକିୟ୍ ବିସୟ୍
୧. ଆଗ୍ଡ଼ିରି ଇତିଆସ୍ ୧:୧ - ୧୧:୨୬
କ. ମାପୁରୁଦି ତିଆର୍ ମାରି ମୁସ୍କୁପୁର୍ ନି ଦୁନିଆଦି ଦାଡ଼ି ୧:୧ - ୨:୩
ଖ. ଦୁନିଆଦି ପାର୍ତୁମ୍ ଲୋକୁ ୨:୪ - ୪:୨୬
ଗ. ଆଦମତି କୁଟୁମ୍ ୫:୧ - ୬:୨୬
ଘ. ନହଦି କୁଟୁମ୍ ୬:୯ - ୯:୨୯
ଙ. ନହଦି ମାରିସିରି କୁଟୁମ୍ ୧୦:୧ - ୧୧:୯
ଚ. ସେମଦି କୁଟୁମ୍ ୧୧:୧୦ - ୨୬
୨. ପୁର୍ବେଦି ଲୋକାଦି ଇତିଆସ୍ ୧୧:୨୭ - ୫୦:୨୬
କ. ତେରହଦି କୁଟୁମ୍ ୧୧:୨୭ - ୨୫:୧୮
ଖ. ଇସ୍ହାକଦି କୁଟୁମ୍ ୨୫:୧୯ - ୩୭:୧
ଗ. ଜାକୁବଦି କୁଟୁମ୍ ୩୭:୨ - ୫୦:୨୬
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.