Konda Porja Bible
ପାର୍ତୁମ୍ 2
ଇୟାୱାଜା ବାଦଡ଼୍ ମାରି ଦୁନିଆଦି, ମାରି, ଆୟା ରୁଣ୍ତିନେ ୱିଜୁ ଜିନିସ୍ତି ତିଆର୍ କିନିକା ୱିଜିତାତ୍ ମାପୁରୁ ସାତ୍ ଦିନ୍ଦୁ ନିଜେଦି ପାଣି ୱିସ୍ସି ଆୟା ସାତ୍ ନମ୍ୱର୍ତି ଦିନ୍ଦୁ ନିଜେଦି କିତିମାନି ୱିଜୁ ପାଣିଦାନ୍ ରୋମିତାନ୍ । ମାରି ମାପୁରୁ ସାତ୍ଦିନ୍ତିଙ୍ଗ୍ ଆର୍ସିବାଦ୍ କିଜି ପବିତ୍ର କିତାନ୍ । ଏଣ୍ତେସ୍କି ଆୟା ଦିନ୍ତୁ ମାପୁରୁ ତିଆର୍ କିତିମାନି ରୁପ୍ ନିଜେଦି କିତିମାନି ୱିଜୁ ପାଣିଦାନ୍ ରୋମିତାନ୍ ।
ଏଦନ ଡଡି
ତିଆର୍ କିନି ବେଡ଼ାଦୁ ବାଦଡ଼୍ ମାରି ଦୁନିଆଦି ଇସାବ୍ ଇକା । ଆମା ବେଡ଼ାଦୁ ସଦାପ୍ରବୁ ମାପୁରୁ ବାଦଡ଼ ମାରି ଦୁନିଆ ତିଆର୍ କିତାନ୍, ଆୟା ବେଡ଼ାଦୁ କିଡ଼ିଇଦୁ ଇନି ଲାଟା ସିଲେତାତ୍ ମାରି ବୁମିଦୁ ଇନି କୁସା ବା ସିଲେତାତ୍; ଏଣ୍ଡେସ୍କି ସଦାପ୍ରବୁ ମାପୁରୁ ଦୁନିଆଦୁ ପିରୁ କିବିସ୍ଏନ୍ ମାର୍ହାନ୍, ମାରି ଚାସ୍ପାଣି କିଦେଙ୍ଗ୍ ଲୋକୁ ସିଲେତାର୍ । ମାତର୍ ଦୁନିଆଦାନ୍ କାଣ୍ତେକ୍ ଦୁରି ନିଙ୍ଗିଁଜି ୱିଜୁ ବୁମିଦୁ ମାସୁ ୱାକ୍ତାତ୍ । ଆୟାୱେନ୍କା ସଦାପ୍ରବୁ ମାପୁରୁ ବୁମିଦି ଦୁଡ଼ି ଦାନ୍ ଲୋକ୍ତିଙ୍ଗ୍ ତିଆର୍ କିଜି ୱାନି ମୁଜିଦୁ ତୁବ୍ଜି ଜିବନ୍ ସିତାନ୍; ଆବେଟ୍ ଲୋକ୍ ଜିବନ୍ ଆତାନ୍ । ମାରି ସଦାପ୍ରବୁ ମାପୁରୁ ୱେଡ଼ା ସନି ତୋରିଙ୍ଗ୍ ଏଦନ୍ ଦର୍ତି ବାଡିଦୁ ଉନ୍ଡ୍ରି ଡଡି ତିଆର୍ କିଜି ଆବେନୁ ନିଜେ ତିଆର୍ କିତି ଲୋକ୍ତିଙ୍ଗ୍ ଇଟ୍ତାନ୍ । ସଦାପ୍ରବୁ ମାପୁରୁ ଆୟା ବୁମିଦାନ୍ ଆଇ ଆଇ ନେଗେନ୍ ତର୍ନି ମାରି ନେଗି କାଦି ମାରାନ୍, ମାରି, ଆୟା ଡଡିଦି ନାଡ଼ିମି ବାଡିଦୁ ସାୱି ମାରାନ୍ ମାରି ସତ୍ ବୁଦି ସିନି ମାରାନ୍ ନେରିସ୍ କିତାନ୍ ।
ଡଡିଦୁ ଏରୁସିନି ଉଣ୍ତିଙ୍ଗ୍ ଏଦନ ଡଡିତାନ୍ ଉନ୍ଡ୍ରି ଗାଡା ସୋସି ୱାଜି ଆୟାବାଡିଦାନ୍ ୱେର୍ହେ ଆଜି ନାଲିଗି ବାଗ୍କୁ ଗାଡେଙ୍ଗ୍ ଆତେ । ପାର୍ତୁମ୍ ଗାଡାଦି ଦରୁ ପିସୋନ; ଆକା ବାଙ୍ଗାରାମ୍ ସନି ହବିଲା ଦେସ୍କାଙ୍ଗ୍ ୱିଜୁ ସିଜି ସଲ୍ସିନାତ୍ । ଆୟା ଦେସ୍ତି ବାଙ୍ଗାରାମ୍ ନେଗିକା, ମାରି, ଆବେନୁ ମୁକ୍ତା ମାରି ଦାରାଦି କାଲୁ ମାନେ । ମାରିଉଣ୍ଡ୍ରି ଗାଡାଦି ଦରୁ ଗିହୋନ; ଇକା ୱିଜୁ କୁସ୍ ଦେସ୍ ସିଜି ସଲ୍ସିନାତ୍ । ମୁଣ୍ତ୍ରି ଦର୍ତି ଗାଡାଦି ଦରୁ ହିଦେକଲ୍, ଇକା ୱେଡ଼ା ସନି ଅସୁରିୟ ଦେସ୍ତି ମୋକମ୍ ସିଜି ସନାତ୍ । ନାଲ୍ଗି ଦର୍ତି ଗାଡାଦି ଦରୁ ପରାତ୍ ।
ମାରି, ପ୍ରବୁ ମାପୁରୁ ଆୟା ଲୋକ୍ତିଙ୍ଗ୍ ଅସି ଏଦନ ଡଡିଦିଙ୍ଗ୍ ନେଗେନ୍ତାନ୍ ପାଣିକିଦେଙ୍ଗ୍ ନି ଜାତୁନ୍କିନି ଉଣ୍ତିଙ୍ଗ୍ ଦାୟିତ୍ ସିତାନ୍ । ମାତର୍ ପ୍ରବୁ ମାପୁରୁ ଆୟା ଲୋକ୍ତିଙ୍ଗ୍ ଆଦେସ୍ସିଜି ଇର୍ହାନ୍, “ନିନୁ ଡଡିଦି ୱିଜୁ ମାରାତି ପଲ୍ ନିଜେଦି ବଦାଦାନ୍ ତିଣ୍ତ୍ରେଙ୍ଗ୍ ଆଟ୍ନି । ମାତର୍ ସତ୍ ନି ବୁଦିସିନି ମାରାନ୍ତି ପଲ୍ ତିନ୍ମା, ଏମେ ନାଣ୍ତିଙ୍ଗ୍ ଆକା ତିନି, ଆୟା ନାଣ୍ତିଙ୍ଗ୍ ସତେନେ ସାନି ।”
ପ୍ରବୁ ମାପୁରୁ ଇର୍ହାନ୍, “ଲୋକ୍ ଅରେନ୍ ମାନିକା ନେଗେନ୍ ସିଲେ, ନାନୁ ୱାନି ଉଣ୍ତିଙ୍ଗ୍ ୱାନିନାନି ୱାନିୱାଲେ ଅର୍ସେ ତେବାନିତାନିଙ୍ଗ୍ ତିଆର୍ କିନା ।” ମାରି ପ୍ରବୁ ମାପୁରୁ ବୁମିଦାନ୍ ଜାତୁଙ୍ଗ୍ ମାରି ଇମିନି ପଟିଙ୍ଗ୍ ତିଆର୍ କିଜି ଆଦମ ୱାନିକାଙ୍ଗ୍ ଇନି ଦରୁ ସିନାନ୍, ଇକା ନେସିନି ଉଣ୍ତିଙ୍ଗ୍ ୱିଜୁ ୱାନି ଲାକୁତୁ ତାତାନ୍ । ଆବେଟ୍ ଆଦମ ଆୟା ଜାତୁଆଙ୍ଗ୍ ମାଡ଼ାନ୍ ଏମେତାନିଙ୍ଗ୍ ଏମେ ଦରୁ ସିତାନ୍, ତାନି ଆୟା ଦରୁ ଆତାତ୍ । ଇୟାୱାଜା ଆଦମ ଜାତୁ, ନାଣ୍ତ ପଟିଙ୍ଗ୍ ମାରି ବୁମିଦୁମାନି ୱିଜୁ ଜାତୁକା ଦରୁ ସିତାନ୍; ମାତର, ଲୋକା ଉଣ୍ତିଙ୍ଗ୍ ୱାନି ମାନାନି ୱାନିୱାଲେ ମାନି ସଙ୍ଗ୍ ତୋର୍ଏତାତ୍ ।
ସଦାପ୍ରବୁ ମାପୁରୁ ଆଦମତିଙ୍ଗ୍ ନାଣ୍ତସୁସ୍କାଣୁକୁ ତିଗିସ୍ସି ଆୟା ସୁଜିନି ବେଡ଼ାଦୁ ୱାନି କାଣ୍ତେକ୍ ପାଞ୍ଜାରା ପେଡ଼େନ୍ ଅସି କାଣ୍ତା ସାରି ଆୟା ଜାଗା ପୁରା କିତାନ୍ ମାରି ସଦାପ୍ରବୁ ମାପୁରୁ ଆଦମତି ମାଡ଼ାନ୍ ଏମେ ପାଞ୍ଜାରା ପେଡ଼େନ୍ ଅତାନ୍ ଆୟାମାଡ଼ାନ୍ ଅରେତ୍ ଆଇମା ତିଆର୍ କିଜି ଆଦମତି ଲାକୁତୁ ତାତାନ୍ । ଆବେଟ୍ ଆଦମ ଇର୍ହାନ୍,
“ଇଲେଇ ଆତାତ୍;
ଇକା ନା ପେଡ଼େନ୍ତି ପେଡ଼େନ୍ ମାରି କାଣ୍ତାଦି କାଣ୍ତା;
ଇୟାତେନି ଦରୁ ଆଇମା, ଏଣ୍ତେସ୍ କି ୱେଦୁ ମେମାରିଦି ମାଣାନ୍ ଅଆୟ୍ ଆତାମାନାତ୍ ।”
ଇୟାଉଣ୍ତିଙ୍ଗ୍ ଲୋକ୍ ନିଜେଦି ୟାୟା ବୁବେଙ୍ଗ୍ ଡ଼ିସ୍ସି ନିଜେଦି ଆଡ଼ିସିଦିମାନୁ ଅର୍ସେ ଆନାନ୍, ମାରି ୱାର୍ ଉଣ୍ତ୍ରେମାନୁ ଆନାର୍ । ଆଦମ ନି ୱାନି ଆଡ଼ିସି, ରିଏର୍ ଡୁମ୍ଣ୍ତା ମାର୍ହିଙ୍ଗ୍ ବା ୱାରି ସେମାର୍ ସିଲେତାତ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.