Konda Porja Bible
ପାର୍ତୁମ୍ 47
ଗୋସନ୍ ରାଜିଦୁ ଜାକୁବଦି କୁଟୁମ୍
ତାନିୱେନେକା ଜୋସେପ୍ ସଲ୍ସି ପାରୋ ରାଜେଙ୍ଗ୍ କାବୁର୍ ସିଜି ଇର୍ହାନ୍, “ନା ବୁବା ମାରି ଦାଦାର୍ କିଣାନ୍ ଦେସ୍ତାନ୍ ନିଜେଦି ଡ଼ାକୁକଡିଙ୍ଗ୍ ମାନ୍ଦା ଦନ୍ ୱିଜୁ ଆସ୍ସି ୱାତା ମାନାର୍; ସୁଡ଼ୁଆ, ୱାର୍ ଗୋସନ୍ ରାଜିଦୁ ମାନାର୍ ।” ମାରି, ଜୋସେପ୍ ନିଜେ ଦାଦାରି ମାଡ଼ାନ୍ ପାସ୍ ଲୋକାଙ୍ଗ୍ ଅସି ପାରୋ ରାଜାଦି ୱାଲେ ବେଟ୍ କିବିସ୍କିତାନ୍ । ଆବେଟ୍ ପାରୋ ରାଜା ଜୋସେପ୍ତି ଦାଦ୍ସିରିଙ୍ଗ୍ ୱେନ୍ବାତାନ୍, “ମିରୁ ଇନି ବେପାର୍ଙ୍ଗୁଁ ?” ୱାର୍ ପାରୋ ରାଜେଙ୍ଗ୍ ଇର୍ହାର୍, “ନି ଇୟା ଦାସର୍ ପୁର୍ବେଦାନ୍ ଡ଼ାକୁକଡିଙ୍ଗ୍ ସାରାକିନି ଗାଉଡ଼ୁର୍ ।” ୱାର୍ ପାରୋ ରାଜେଙ୍ଗ୍ ମାରି ଇର୍ହାର୍, “ମାପୁ ଇୟା ଦେସ୍ତୁ ବାସା କିଦେଙ୍ଗ୍ ୱାତାମାନାପ୍; ଆଦେଙ୍ଗ୍ ନି ଇୟା ଦାସରି ଡ଼ାକୁକଡିଙ୍ଗାଁ ମାନ୍ଦା ଉଣ୍ତିଙ୍ଗ୍ ଇନି ସାରା ସିଲେତ୍; କିଣାନ୍ ଦେସ୍ତୁ ନାଣ୍ତ ପେରି ଦୁର୍ବିକ ୱାତାମାନାତ୍; ଇୟାଉଣ୍ତିଙ୍ଗ୍ ମାଡ଼ିସ୍ କିଜିନାପ୍, ନି ଇୟା ଦାସରିଙ୍ଗ୍ ଗୋସନ୍ ରାଜିଦୁ ବାସା କିଦେଙ୍ଗ୍ ବାଡି ସିଦା ।”
ଆବେଟ୍ ପାରୋ ରାଜା ଜୋସେପ୍ତିଙ୍ଗ୍ ଆଦେସ୍ ସିତାନ୍, “ମି ବୁବା ମାରି ଦାଦାର୍ ନି ଲାକୁତୁ ୱାତାମାନାର୍; ମିସର ଦେସ୍ ମି ଆଗିଡ଼ି ମାନାତ୍; ଦେସ୍ତି ୱିଜେରିଙ୍ଗ୍ ନେଗି ବାଡିଦୁ ନି ବୁବା ମାରି ଦାଦାରିଙ୍ଗ୍ ବାସା କିବିସ୍ଆ; ଗୋସନ୍ ରାଜିଦୁ ୱାର୍ ବାସା କିପିର୍; ମାରି, ୱାରି ମାଡ଼ାନ୍ ଏମେ ଏମେୱାନିଙ୍ଗ୍ ସାକ୍ତିଦି ଲୋକୁ ଇଜି ନେସ୍ନି, ୱାରିଙ୍ଗ୍ ମା ଡ଼ାକୁକଡିଙ୍ଗାଁ ମାନ୍ଦାଦି ନେତା ପଦଦୁ ଦାୟିତ୍ ସିଆ ।”
ତାନିୱେନେକା ଜୋସେପ୍ ନିଜେଦି ବୁବା ଜାକୁବଙ୍ଗ୍ ତାସି ପାରୋ ରାଜାଦି ଆଗିଡ଼ି ନିଲିପ୍ତାନ୍; ଆବେଟ୍ ଜାକୁବ ପାରୋ ରାଜେଙ୍ଗ୍ ଆର୍ସିବାଦ୍ କିତାନ୍ । ନାସ୍ତିୱାଲେ ପାରୋ ରାଜା ଜାକୁବଙ୍ଗ୍ ୱେନ୍ବାତାନ୍, “ନି ବାର୍ସେକ୍ ଏସ ?”
ଜାକୁବ ପାରୋ ରାଜେଙ୍ଗ୍ ଇର୍ହାନ୍, “ନା ଜିନି ଦିନ୍ ସହେ ତିରିସ୍ ବାର୍ସୁ ଆତାତ୍; ନା ଜିନି ଦିନ୍ ଉଣା ମାରି ନାଣ୍ତ ଦିନ୍ ସିଲେତ୍; ମାରି, ନା ଡକରାଦାଦାର୍ ଜିନି ବାର୍ସୁ ଦିନ୍ ୱାଜା ସିଲେ ।” ତାନିୱେନେକା ଜାକୁବ ପାରୋ ରାଜେଙ୍ଗ୍ ଆର୍ସିବାଦ୍ କିଜି ୱାନି ଆଗିଡ଼ିରାନ୍ ସତାସର୍ହାନ୍ । ଆବେଟ୍ ଜୋସେପ ପାରୋ ରାଜାଦି ଆଦେସ୍ତାନ୍ ମିସର ଦେସ୍ତି ୱେଜେରିଙ୍ଗ୍ ନେଗି ବାଡିଦୁ, ଅର୍ତାତ୍, ରାମିସେସ୍ ରାଜିଦୁ ଅଦିକାର୍ ସିଜି ନିଜେଦି ବୁବା ମାରି ଦାଦାରିଙ୍ଗ୍ ବାସାକିବିସ୍ତାନ୍ । ମାରି, ଜୋସେପ୍ ନିଜେଦି ବୁବା ମାରି ଦାଦାରିଙ୍ଗ୍ ମାରି ୱିଜୁ ଇଲୁ କୁଟୁମ୍ତି ୱିଜେରି କୁଟୁମ୍ ଇସାପ୍ତାନ୍ କାଦି ସିଜି ପୋସା କିତାନ୍ ।
ଦୁର୍ବିକ୍ୟ
ଆୟା ବେଡ଼ାଦୁ ବେସି ଦୁର୍ବିକ ଆନିଙ୍ଗ୍ ୱିଜୁ ଦେସ୍ତୁ କାଦି ଉଣା ଆତାତ୍; ଆବେଟ୍ ମିସର ଦେସ୍ତି ମାରି କିଣାନ୍ ଦେସ୍ତି ଲୋକୁ ଦୁର୍ବିକ ଉଣ୍ତିଙ୍ଗ୍ ବେସି ବାଙ୍ଗାଁ ନି ସାକିସିଲି ୱାଜା ଆଦେଙ୍ଗ୍ ଆସ୍ତାର୍ । ମାରି ମିସର ଦେସ୍ତୁ ମାରି କିଣାନ୍ ଦେସ୍ତୁ ଏସୋ ଡାବୁଙ୍ଗ୍ ମାର୍ହେ, ଲୋକୁ ଆକା ସିଜି ପାସି କଣି ଉଣ୍ତିଙ୍ଗ୍ ଜୋସେପ୍ ଆୟାୱିଜୁ ଡାବୁଙ୍ଗ୍ ଉଣ୍ତା କିଜି ପାରୋ ରାଜାଦି ଇଲୁତୁ ତାତାନ୍ । ଇୟାୱେନେକା ମିସର ଦେସ୍ତୁ ମାରି କିଣାନ୍ ଦେସ୍ତୁ ଡାବୁଙ୍ଗ୍ ଉଣା ଆତେ, ମିସରତି ଲୋକୁ ୱିଜେରେ ଜୋସେପ୍ଦି ଲାକୁତୁ ୱାଜି ଇର୍ହାର୍, “ମାଙ୍ଗିଁ କାଦି ସିଦା, ମା ଡାବୁଙ୍ଗ୍ ୱିଜ୍ଜି ୱାଜିନାତ୍ ଇଜି ଏନ୍ଧାନିଙ୍ଗ୍ ମାପୁ ନି ଆଗିଡ଼ି ସାନାପ୍ ?”
ଆବେଟ୍ ଜୋସେପ୍ ଇର୍ହାନ୍, “ମି ଡ଼ାକୁକଡିଙ୍ଗ୍ ସିଦାଟ୍ ଜଦି ଡାବୁଙ୍ଗ୍ ୱିଜିତେ ମାନେ, ଆର୍ତିଙ୍ଗ୍ ଡ଼ାକୁ ବାଦୁଲ୍ ନାନୁ ମିଙ୍ଗିଁ ପାସି ସିନା ।” ଆବେଟ୍ ୱାର୍ ଜୋସେପ୍ତି ଲାକୁତୁ ନିଜେ ନିଜେଦି ଡ଼ାକୁକଡିଙ୍ଗ୍ ତାତାର୍; ଆବେଟ୍ ଜୋସେପ୍ ଗଡ଼ା ମାରି ମେଣ୍ତେଙ୍ଗ୍ ମାରି ଡ଼ାକୁମାନ୍ଦା ମାରି ଗଦଙ୍ଗ୍ ୱିଜୁ ବାଦ୍ଲେ କିଜି ଅସି ୱାରିଙ୍ଗ୍ କାଦି ସିଦେଙ୍ଗ୍ ଆସ୍ତାନ୍; ଇୟା ୱାଜା ଜୋସେପ୍ ଡ଼ାକୁ ବାଦୁଲୁ ୱାରିଙ୍ଗ୍ କାଦି ସିଜି ଆୟା ବାର୍ସୁ ଜିପିସ୍ କିତାନ୍ ।
ମାରି ଆୟା ବାର୍ସୁ ପୁରା ଆତାତ୍ଆକା, ଆୟା ବାର୍ସେକ୍ତୁ ୱାର୍ ଜୋସେପ୍ତି ଲାକୁତୁ ୱାଜି ଇର୍ହାର୍, “ମା ୱିଜୁ ଡାବୁଙ୍ଗ୍ ୱିଜିତେ ମାନେ; ଆକା ମାଲିକ୍ ମାଡ଼ାନ୍ ଆଡ଼େକ୍ଏପ୍; ମାରି, ମା ୱିଜୁ ଡ଼ାକୁ ଦନ୍ ବା ମାଲିକ୍ଦି ଆତେମାନେ; ଇଲେଇ ମାଲିକ୍ଦି ଆଗିଡ଼ି ମା ମେନ୍ଦଲ୍ ମାରି ବୁମି ଡ଼ିସ୍ତିଙ୍ଗ୍ ମାରି ଇନିକା ବାକି ସିଲେତ୍ନି । ଇୟାଉଣ୍ତିଙ୍ଗ୍ ମାପୁ ମାରି ମା ବୁମି ଅର୍ସେ ଏନ୍ଦାନିଙ୍ଗ୍ ନିଜେଦି ଆଗିଡ଼ି ସାନାପ୍ ? ନିନୁ କାଦି ସିଜି ମାଙ୍ଗିଁ ମାରି ମା ବୁମି କଡ଼ିଜି ଅଆ, ଆବେଟ୍ ମାପୁ ମାରି ମା ବୁମି ପାରୋ ରାଜାଦି ସାକର୍ ଆନାପ୍; ତାନିୱେନ୍କା ମାଙ୍ଗିଁ ୱିତୁ ସିଦାଟ୍, ଆବେଟ୍ ଜିନାପ୍; ସିଲେତିଙ୍ଗ୍ ମାପୁ ସାନାସନାପ୍, ମାରି, ବୁମି ବା ନାଟୁ ଆନାତ୍ ।”
ଇୟାୱାଜା ଦୁର୍ବିକ ୱାରି ଉଣ୍ତିଙ୍ଗ୍ ବେସି ସାସ୍ କିଦେଙ୍ଗ୍ ଆଟ୍ଇକା ଆତାତ୍, ମିସରତି ୱିଜେରେ ନିଜେ ନିଜେଦି ବୁମି ପୋର୍ତାର୍; ଆବେଟ୍ ଜୋସେପ୍ ପାରୋ ରାଜା ଉଣ୍ତିଙ୍ଗ୍ ମିସର ଦେସ୍ତି ୱିଜୁ ବୁମି କଟାନ୍; ଆଦେଙ୍ଗ୍ ୱିଜୁ ବୁମି ପାରୋ ରାଜାଦି ଆତାତ୍ । ଆବେଟ୍ ଜୋସେପ୍ ମିସରତି ଉଣ୍ତ୍ରି କନାଦାନ୍ ମାରି ଉଣ୍ତ୍ରିକନା ସାନ୍ଦି ଗାଡ଼୍ତୁ ଗାଡ଼୍ତୁ ଲୋକାଙ୍ଗ୍ ବାସା କିବିସ୍କିତାନ୍ । ୱାନ୍ କେବଲ ଜାଜକରି ବୁମି କଡ଼େଏତାନ୍; ଇରିଙ୍ଗ୍ ଜାଜକର ପାରୋ ରାଜାଦି ମାଡ଼ାନ୍ କୁଲି ପୋଇତାର୍; ଆଦେଙ୍ଗ୍ ପାରୋ ରାଜା ସିଜିମାନି କୁଲିଦି ମାଡ଼ାନ୍କୁ ୱାରି ଜିନିକା ଆତାତ୍ଆକା ମାରି ୱାର୍ ନିଜେ ନିଜେଦି ବୁମି ପର୍ଏତାର୍ । ତାନିୱେନେକା ଜୋସେପ୍ ଲୋକାଙ୍ଗ୍ ଇର୍ହାନ୍, “ସୁଡ଼ୁଦୁ, ମାପୁ ପାରୋ ରାଜାଦି ଉଣ୍ତିଙ୍ଗ୍ ମିଙ୍ଗିଁ ମାରି ମି ବୁମି ୱିଜୁ କଟାପ୍; ଇଲେଇ ଇୟା ୱିତୁ ଅସି ବୁମିଦୁ ୱିତ୍ତୁ । ଆବେଟ୍ ଏମେକା ପାଣ୍ତ୍ନାତ୍, ତାନି ପାସ୍ ବାଗ୍ତାନ୍ ଉଣ୍ତ୍ରି ବାଗ୍ ପାରୋ ରାଜେଙ୍ଗ୍ ସିନିଦେର୍, ମାରି, ଆଇ ନାଲିଗି ବାଗ୍ ବୁମିଦି ୱିତୁ ଉଣ୍ତିଙ୍ଗ୍ ମାରି ନିଜେ ନିଜେଦି ଇଲୁଦି ଲୋକା ମାରି କଡ଼ର୍ ଆଇଲିକା ଉଣ୍ତିଙ୍ଗ୍ ଇଡ୍ନିଦେର୍ ।”
ଆବେଟ୍ ୱାର୍ ଇର୍ହାର୍, “ନିନୁ ମା ଜିବନ୍ ରକିଆ କିତି; ନିନୁ କାର୍ମୁ ସୁଡ଼ୁତି, ମାପୁ ପାରୋ ରାଜାଦି ସାକର୍ ଆନାପ୍ ।” ପାସ୍ ବାଗ୍ତାନ୍ ଉଣ୍ତ୍ରି ବାଗ୍ ପାରୋ ରାଜା ପୋଇନାନ୍, ମିସରତି ୱିଜୁ ବୁମି ବିସୟ୍ତାନ୍ ଜୋସେପ୍ କିତିମାନି ଇୟା ନିୟମ୍ ନେରୁ ସାନ୍ଦି ସାଲାଜିନାତ୍; କେବଲ ଜାଜକରି ବୁମି ପାରୋ ରାଜାଦି ଆଏତାତ୍ ।
ଜାକୁବଦି ସାରାସାରି ଅନୁରଦ୍
ଆୟା ବେଡ଼ାଦୁ ଇସ୍ରାଏଲ ଲୋକୁ ମିସରଦି ଗୋସନ୍ ରାଜିଦୁ ବାସା କିତାନ୍, ମାରି, ଆବେନୁ ୱାର୍ ଅଦିକାର୍ ପୋଇଜି ପିର୍ଜି ମାରି ବେସି କୁଟୁମ୍ ଆତାର୍ ।
ଜାକୁବ ମିସର ଦେସ୍ତୁ ସତର ବାର୍ସୁ ସାନ୍ଦି ଜିତାନ୍, ୱାନି ଜିନି ବୟସ୍ ସହେ ସାଲିସ୍ ସାତ୍ ବାର୍ସୁ ମାର୍ହାତ୍ । ଜାକୁବଦି ସାନି ଦିନ୍ ଇଗାୱାତାତ୍ଆକା ୱାନ୍ ନିଜେ ମାରିନ୍ ଜୋସେପ୍ତିଙ୍ଗ୍ କୁକିସ୍କିବିସ୍ସି ଇର୍ହାନ୍, “ନାନୁ ଜଦି ନି ଆଗିଡ଼ି କାର୍ମୁ ପୋଇତା, ଆର୍ତିଙ୍ଗ୍ ମାଡ଼ିସ୍ କିଜିନା, ନିନୁ ନା କୁରୁଗୁଦୁ କିୟୁ ଇଡ୍ଆ; ମାରି, ନା ଉଣ୍ତିଙ୍ଗ୍ ଦୟା ମାରି ସତ୍ ବେବହାର୍ କିଜି ଇୟା ମିସର ଦେସ୍ତୁ ନାଙ୍ଗିଁ ମୁସ୍ମା ।” ମାତର୍ ନାନୁ ନିଜେଦି ପୁର୍ବେଦି ଡକରାଦାଦାରି ୱାଲେ ସାତିଙ୍ଗା, ନିନୁ ନାଙ୍ଗିଁ ଇୟା ମିସର ଦେସ୍ତାନ୍ ଆସ୍ସ ସଲ୍ସି ୱାରି ଦୁକି ବାଡିଦୁ ମୁସ୍ଆ । ଆବେଟ୍ ଜୋସେପ୍ ଇର୍ହାନ୍, “ନି ଆଦେସ୍ ଇସାବ୍ତାନ୍ କିନା ।” ଆବେଟ୍ ଜାକୁବ ଜୋସେପ୍ତିଙ୍ଗ୍ ପାର୍ମାଣ୍ କିଦେଙ୍ଗ୍ ଇର୍ହାନ୍, “ୱାନ୍ ୱାନି ଲାକୁତୁ ପାର୍ମାଣ୍ କିତାନ୍ ।” ନାସ୍ତିୱାଲେ ଜାକୁବ ଟାଟିଦି ତାଲାତରିଙ୍ଗ୍ ମାଡ଼ିସ୍ କିଜି ମାପୁରୁଦି ଦନ୍ୟବାଦ୍ କିତାନ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.