Konda Porja Bible
ପାର୍ତୁମ୍ 8
ଗାଲିପିରୁ ଡ଼ିସ୍ତିକା
ତାନିୱେନେକା ମାପୁରୁ ନୋହଙ୍ଗ୍ ମାରି ୱାନି ୱାଲେ ଜାହାଜ୍ଦି ଲୋଇମାନି ୱିଜୁ ଜାତୁଆଙ୍ଗାଁ ଏତ୍ କିଜି ଦୁନିଆଦୁ ଗାଲି ପୋକତାନ୍, ଆବେଟ୍ ଏରୁ ନିକ୍ତେ; ପେରିସାମ୍ଦୁର୍ତି ଏରୁ ମାରି ବାଦଡ଼୍ତି ସେର୍ଲା ବନ୍ଧ୍ ଆତାତ୍, ମାରି, ବାଦଡ଼୍ତାନ୍ ପିରୁ ଡ଼ିସ୍ତାତ୍ । ଆବେଟ୍ ଦୁନିଆଦାନ୍ ଏରୁ ସଲିସ୍ ସହେ ପସାସ୍ ଦିନ୍ ସାନ୍ଦି ୱେନ୍କା ନିକ୍ତେ । ଇୟାୱେନ୍କା ସାତ୍ଗୋଟା ଲେଜୁଦି ସତର୍ ଦିନ୍ତୁ ଆରାରାଟ୍ ଗୋରନ୍ ମୁସୁକୁ ଜାହାଜ୍ ତେବାତାତ୍ । ଇୟାୱାଜା ଦସ୍ଗୋଟା ଲେଜୁକୁ ସାନ୍ଧି ଏରୁ ଉଣାଆତେ; ଆୟା ଦସ୍ଗୋଟା ଲେଜୁଦି ପାର୍ତୁମ୍ ଦିନ୍ତୁ ଗରନ୍ତି ଟିପୁକୁ ତୋରିତେ ।
ମାରି ଚାଲିସ୍ ଦିନ୍ ୱେନେକା ନୋହ ନିଜେ ତିଆର୍ କିତି ଜାହାଜ୍ତି କିଡ଼ିକି ରେସି, ଉଣ୍ତ୍ରି କାକିଦିଙ୍ଗ୍ ଇପ୍ତାନ୍ । ଆବେଟ୍କୁ ଦୁନିଆଦି ଏରୁ ନିକିନି ସାନ୍ଦି ୱାଦ୍ ଇନିଙ୍ଗାଁ ଆନିଙ୍ଗାଁ ଇମିଜି ବୁଲାତାତ୍ । ମାରି, ନୋହ ବୁମିଦି ଏରୁ ଉଣାଆନିକା ନେସିନି ଉଣ୍ତିଙ୍ଗ୍ ଉଣ୍ତ୍ରି ପର୍ଜ ଇପ୍ତାନ୍ । ନାସ୍ତିୱାଲେ ଦୁନିଆ ଏରୁଦୁମାନିଙ୍ଗ୍ ଗୁଗୁରାମ୍ ନିଜେଦି କାଲୁକୁ ଇଡିନି ବାଡି ପୋୟ୍ଏଜି ଜାହାଜ୍ଦୁ ୱାନି ଲାକୁତୁ ଡ଼େସି ୱାତାତ୍; ଆବେଟ୍ ୱାନ୍ କିୟୁ ସାକ୍ସି ତାନିଙ୍ଗ୍ ଆସ୍ସି ଜାହାଜ୍ ଲୋଇ ନିଜେଦି ଲାକୁତୁ ଅତାନ୍ । ମାରି ସାତ୍ ଦିନ୍ ୱେନେକା ୱାନ୍ ଆୟା ଗୁଗୁରାମ୍ତିଙ୍ଗ୍ ମାରିଡ଼େସି ଜାହାଜ୍ଦାନ୍ ଇପ୍ତାନ୍; ଆବେଟ୍କୁ ଗୁଗୁରାମ୍ ମିଲିମିଲିକା ବେଡ଼ାଦୁ ୱାନି ଲାକୁତୁ ଡ଼େସି ୱାତାତ୍; ମାରି ସୁଡ଼ୁଦୁ, ତାନି ୱେୟୁଦୁ ଜିତ ମାରାନ୍ତି ପୁନାସତି କଡ଼୍କି ଆକୁ ମାର୍ହାତ୍; ଆଦେଙ୍ଗ୍ ଦୁନିଆଦି ଏରୁ ଉଣା ଆତେମାନେ ଇଜି ନୋହ ନେସ୍ତାନ୍ । ମାରି ସାତ୍ ଦିନ୍ ୱେନେକା ୱାନ୍ ଆୟା ଗୁଗୁରାମ୍ତିଙ୍ଗ୍ ମାରିଡ଼େସି ଇପ୍ତାନ୍, ମାତର୍ ପଟି ମାରି ଅରୁସୁ ୱାନି ଲାକୁତୁ ଡ଼େସି ରେଏତାତ୍ନି ।
ନୋହଦି ବୟସ୍ ସୋଅସ ଏକ୍ ବାର୍ସେକ୍ ପାର୍ତୁମ୍ ଲେଜୁଦି ପାର୍ତୁମ୍ତି ନାଣ୍ତିଙ୍ଗ୍ ଦୁନିଆ ମୁସୁକୁରାନ୍ ଏରୁ ନିକ୍ତେ ମାରେଏ; ନାସ୍ତିୱାଲେ ନୋହ ଜାହାଜ୍ଦି ଚାତ୍ ରେସି ସୁଡ଼ୁତାନ୍, ବୁମିଦିଙ୍ଗ୍ ୱାର୍ତିକା ସୁଡ଼ୁତାନ୍ । ଇୟାୱାଜା ମାରିଉଣ୍ଡ୍ରି ଲେଜୁଦି କଡ଼େସାତ୍ ଦିନ୍ତୁ ଦୁନିଆ ପୁରା ନିକିତା ସର୍ହାତ୍ ।
ତାନିୱେନ୍କା ମାପୁରୁ ନୋହଙ୍ଗ୍ ଇର୍ହାନ୍, “ନିନୁ ନିଜେଦି ଆଡ଼ି ମାରି ମାରିନ୍କୁ ମାରି କଡ଼ିଏକାଙ୍ଗ୍ ଅରେସ୍ ଆସ୍ସି ଜାହାଜ୍ଦାନ୍ ସୋସି ସାଣ୍ତ୍ରୁରୁ । ମାରି ନିଜେଦି ୱାଲେ ମାନି ଜାତୁ, ପଟିଙ୍ଗ୍ ମାରି ବୁମିଲୋଇ ମାନିକେଙ୍ଗ୍, ଉଜ୍ନିକେଙ୍ଗ୍ ୱିଜୁ ଜାତୁଆଙ୍ଗ୍ ଆତ୍ରେ ଆସ୍ସୋ ସାଣ୍ତ୍ରୁ; ୱାକ୍ ଦୁନିଆଦୁ ପୁରାପୁରି ବର୍ତି କିପିୟି, ମାରି ଦୁନିଆଦୁ ଜନମ୍ ଆଜି ମାରି ନାଣ୍ତ ଆଜି ୱିଜୁ ତରିନ୍ ଆପିୟି ।” ଆବେଟ୍ ନୋହ ନିଜେଦି ଆଡ଼ି, ମାରିନ୍କୁ ମାରି କଡ଼ିଏକାଙ୍ଗ୍ ଅର୍ସେ ଆସ୍ସି ଆତ୍ରେ ୱାତାର୍; ମାରି ନିଜେ ନିଜେ ଜାତି ଇସାପ୍ତାନ୍ ୱିଜୁ ଜାତୁ, ୱିଜୁ ଉଜ୍ନି ଜାତୁ ମାରି ୱିଜୁ ପଟିଙ୍ଗ୍ ୱିଜୁ ବୁମିଲୋଇ ମାନିକେଙ୍ଗ୍ ଜାହାଜ୍ଦାନ୍ ସୋସି ୱାତେ ।
ନୋହଦି ପୁଜାସିନିକା
ଇୟାୱେନ୍କା ନୋହ ସଦାପ୍ରବୁଦି ଉଦେସ୍ତାନ୍ ପୁଜା କିନି ବେଦି ତିଆର୍ କିତାନ୍; ମାରି ୱିଜୁ ରକମ୍ତି ନେଗି ଜାତୁ ମାରି ନେଗି ପଟିଙ୍ଗାଁ ଲୋଇରାନ୍ ଏସ ଅସି ବେଦି ମୁସୁକୁ ପୁଜା ସିତାନ୍ । ଆବେଟ୍ ସଦାପ୍ରବୁ ଆବେଣି ବାସ୍ନା ନେସ୍ସି ମନ୍ତୁ ମନ୍ତୁ ଇର୍ହାନ୍, “ମାପୁ ଲୋକା ଉଣ୍ତିଙ୍ଗ୍ ମାରି ଦୁନିଆଦିଙ୍ଗ୍ ଅବିସାପ୍ ସିଏପ୍; ଆର୍ତିଙ୍ଗ୍ ଇସ୍ରିକଡ଼ ୱାଲେରାନ୍ନେ ଲୋକୁ ମୋନ୍ତି ସିନ୍ତା ତାଗ୍ଇକା, ମାରିବା ମାପୁ ଏଣ୍ତେସ୍ କିତାମାନାପ୍, ଆୟାୱାଜା ମାରିଉଣ୍ଡ୍ରି ଦେବା ଏସାଙ୍ଗ୍ବା ୱିଜୁ ଜାତୁଆଙ୍ଗାଁ ନାସ୍ଟୁ କିଏପ୍ । ମାରି, ଏମେ ସାନ୍ଦି ଦୁନିଆ ମାନାତ୍, ଆୟାସାନ୍ଦି ୱିତ୍ନି କୟିନି ବେଡ଼ା, ପିନି ମାରି ଜେଟାପ୍, ମାରି ଜେଟାପ୍ ମାରି ପିନି କାଡ଼ା, ମାରି ୱେଡ଼େ ମାରି ନାଡ଼ା, ଇୟାୱିଜୁଦି ବନ୍ଦ୍ ଆଏତ୍ ।”
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.