Konda Porja Bible
ପାର୍ତୁମ୍ 7
ଗାଲିପିରୁ
ପ୍ରବୁ ନୋହଙ୍ଗ୍ ଇର୍ହାନ୍, “ମିରୁ ଇଲୁ ପରିବାର୍ତାନ୍ ଜାହାଜ୍ଦୁ ଡ଼ୁଗୁଦୁ; ଇରିଙ୍ଗ୍ ଇୟା କାଡ଼ାଦି ଲୋକା ମାନୁ ନାନୁ ନିଙ୍ଗିଁ ନା ଆଗିଡ଼ି ଦାର୍ମୁ ସୁଡ଼ୁତାମାନା । ମାରି ଦୁନିଆଦୁ କୁଟୁମ୍ ରକିୟା କିନି ଉଣ୍ତିଙ୍ଗ୍ ୱିଜୁ ନେଗି ପସୁଜାତିଦି ସାତ୍ ସାତ୍ ଗୋଟା ପତୁ ନି ତାଡ଼ି ମାରି ୱିଜୁ ଅସୁଚି ପସୁଜାତିଦି ଉଣ୍ତ୍ରି ଉଣ୍ତ୍ରି ପତୁ ନି ତାଡ଼ି; ୱିଜୁ ପଟିଜାତିଦି ସାତ୍ ସାତ୍ ପତୁ ନି ତାଡ଼ି ଜୋଡ଼ି ନିଜେଦି ୱାଲେ ଅତୁ । ଏଣ୍ତେସ୍କି ମାରିଡ଼େସି କୁଟୁମ୍ ନାଣ୍ତ ଆନି ଉଣ୍ତିଙ୍ଗ୍ ୱିଜୁ ରକମ୍ତି ପଟିଙ୍ଗ୍ ନି ଜାତୁଙ୍ଗ୍ ଜିପିସ୍ କିଜି ଦୁନିଆଦୁ ଇଡ୍ଦୁ । ଏଣ୍ତେସ୍କି ସାତ୍ ଦିନ୍ ୱେନେକା ମାପୁ ସାଲିସ୍ ଦିନ୍ ୱେଡ଼େନାଡ଼ା ଦୁନିଆଦୁ ଗାଲିପିରୁ କିଜି ଦୁନିଆ ତ ମାଦି ନାନୁ ତିଆର୍ କିତି ୱିଜୁ ଜାତୁଆଙ୍ଗାଁ ନାଷ୍ଟୁ କିନାପ୍ ।” ନୋହ ସଦାପ୍ରବୁଦି ମାଟା ଇସାବ୍ଦାନ୍ ୱିଜୁ ପାଣି କିତାନ୍ ।
ନୋହଦି ସଅସୋ ବାର୍ସେକ୍ତି ବୟସ୍ତାନ୍ ଦୁନିଆ ମୁସୁକୁ ଗାଲିପିରୁ ଆତାତ୍ । ଆବେଟ୍ ଗାଲିପିରୁଦାନ୍ ରକିୟା ପୋଇନି ଉଣ୍ତିଙ୍ଗ୍ ନୋହ ମାରି ୱାରି ଆଡ଼ିସିକ୍ ମାରି ମାରିସିର୍ ମାରି କଡ଼େସିକ୍ ଜାହାଜ୍ଦୁ ଡ଼ୁଗିତେ । ମାରି ନୋହଦି ଉଣ୍ତିଙ୍ଗ୍ ମାପୁରୁଦି ମାଟା ଇସାବ୍ତାନ୍ ସୁଚି ମାରି ଅସୁଚି ଜାତୁ ପଟିଙ୍ଗ୍ ୱିଜୁ ମାରି ଉଜ୍ନି ଜାତୁଙ୍ଗ୍ ୱିଜୁ ଜଡ଼ ଜଡ଼ ଆଜି, ନୋହଦି ଲାକୁତୁ ସଲ୍ସି ଜାହାଜ୍ଦୁ ଡ଼ୁଗିତେ । ମାରି ଆୟା ସାତ୍ ନମ୍ୱର୍ତି ଦିନ୍ ୱେନେକା ଦୁନିଆଦୁ ଗାଲିପିରୁ ଆରାମ୍ ଆତାତ୍ ।
ନୋହଦି ବୟସ୍ଦି ସଅସୋ ବାର୍ସେକ୍ ରୁଣ୍ତି ଲେଜୁକୁ ସତୁରି ବାର୍ସେକ୍ ଦିନ୍ତୁ ପେରି ସାମୁଦୁର୍ତି ୱିଜୁ ଏରୁମାନିକେଙ୍ଗ୍ ରୁଙ୍ଗିଁତେ ସରେଏ, ମାରି ବାଦ୍ଡ଼ତି ସେର୍ଲେଙ୍ଗ୍ ୱିଜୁ ରେଆତେ ସରେଏ । ଆବେଟ୍କୁ ଚାଲିସ୍ ଦିନ୍ ୱେଡ଼େନାଡ଼ା ଦୁନିଆଦୁ ଗାଲିପିରୁ ଆତାତ୍ । ଆୟା ନାଣ୍ତିଙ୍ଗ୍ ନୋହ, ମାରି ସେମ ମାରି ହାମ ମାରି ଜେପତ ଦରୁଦି ନୋହଦି ମାରିନ୍କୁ, ମାରି ୱାରି ୱାଲେ ନୋହଦି ଆଡ଼ିସି ମାରି ମୁଣ୍ତ୍ରି ମାରିନ୍କା ଆଡ଼ିସିକ୍ ଜାହାଜ୍ଦୁ ଡ଼ୁଗିତାର୍ । ମାରି ୱିଜୁ ଜାତିଦି ନାଟିକେଙ୍ଗ୍ ମାରି ବନ୍ ଜାତୁ ମାରି ୱିଜୁ ଜାତିଦି ଉଜ୍ନି ବୁଲାନିକେଙ୍ଗ୍ ମାରି ୱିଜୁ ଜାତିଦି ମାରି ଇମିନି ପଟିଙ୍ଗ୍; ଅର୍ତାତ୍, ଜିବନ୍ମାନିକେଙ୍ଗ୍ ୱିଜୁପ୍ରକାର୍ତି ଜାତୁଙ୍ଗ୍ ଜଡ଼ ଜଡ଼ ଆଜି ନୋହଦି ଲାକୁତୁ ସଲିସ୍ ଜାହାଜ୍ଦୁ ଡ଼ୁଗିତେ । ମାପୁରୁଦି ମାଟା ଇସାବ୍ଦାନ୍ ୱିଜୁ ରକମ୍ତି ଜାତୁଙ୍ଗ୍ ରୁଣ୍ତି ରୁଣ୍ତି ଆଜି ଜାହାଜ୍ଦୁ ଡ଼ୁଗିତେ; ଆବେଟ୍ ସଦାପ୍ରବୁ ୱାନି ଲାକୁତୁରି ସେର୍ଲା କେର୍ତାନ୍ ।
ଇୟାୱେନ୍କା ଚାଲିସ୍ ଦିନ୍ ସାନ୍ଦି ଦୁନିଆଦୁ ଗାଲିପିରୁ ଆତାତ୍; ମାରି ଗାଡା ନିରୁବୁ ନିରୁବୁ ଜାହାଜ୍ ବୁମିଦିଙ୍ଗ୍ ଡ଼ିସ୍ସି ମୁସ୍କୁ ଦେଲ୍ଜି ନିଙ୍ଗିଁତାତ୍ । ମାରି ଦୁନିଆଦୁ ଦିରେ ଦିରେ ଏରୁ ନାଣ୍ତ ଆଜି ନିରୁବୁ ନିରୁବୁ ଜାହାଜ୍ ଏରୁ ମୁସୁକୁ ସାଲାତାତ୍ । ଦୁନିଆ ମୁସୁକୁ ଏରୁ ନାଣ୍ତ ନିରିଜି ବାଦ୍ଡ଼ ଆଡ୍ଗିରି ୱିଜୁ ପେରିଗରକ୍ ମୁସ୍ତାତ୍ । ଗରନ୍ ମୁସୁକୁ ପନ୍ଦ୍ର କିୟୁ ସାନ୍ଦି ଏରୁ ନିଙ୍ଗିଁତେ; ଆଦେଙ୍ଗ୍ ଗରକ୍ ୱିଜୁ ମୁଜିତେ । ଆବେଟ୍ ୱିଜୁ ବୁମିଦୁମାନି ଜାତୁଙ୍ଗ୍ ସାତେସରେ, ଅର୍ତାତ୍ ପଟିଙ୍ଗ୍, ନାଟି ଜାତୁଙ୍ଗ୍ ମାରି ବନ୍ତି ଜାତୁଙ୍ଗ୍ ମାରି ଦୁନିଆଦୁ ବୁଲାନି ଜାତୁଙ୍ଗ୍ ମାରି ୱିଜୁ ଲୋକୁ ସାତାର୍ । ମାରି ୱାର୍ତି ବୁମିଦୁ ଏସ ଜାତୁଙ୍ଗାଁ ମୁଜିଦୁ ଜିବନ୍ମାର୍ହାତ୍, ୱିଜୁ ସାତେ । ଇୟାୱାଜା ଦୁନିଆଦି ମୁସୁକୁ ୱିଜୁ ଜାତୁଙ୍ଗ୍ ନାଷ୍ଟୁ ଆତେ, ଅର୍ତାତ୍ ଲୋକୁ, ଜାତୁ, ଉଜ୍ନି ଜାତୁଙ୍ଗ୍, ପଟିଙ୍ଗ୍, ୱିଜୁ ଦୁନିଆଦାନ୍ ନାଷ୍ଟୁଆତେ; କେବଲ ନୋହ ମାରି ଜାହାଜ୍ତୁମାନି ୱାରି ସଙ୍ଗ୍ର୍ ୱିଜେରେ ଜିତାର୍ । ଇୟାୱାଜା ଦୁନିଆ ସଏ ପସାସ୍ ଦିନ୍ ସାନ୍ଦି ଏରୁଦୁ ମୁଡ଼ୁଗିତା ମାର୍ହାତ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.