Konda Porja Bible
ପାର୍ତୁମ୍ 9
ନୋହଦି ୱାଲେ ମାପୁରୁଦି ନିୟମ୍
ଆବେଟ୍କୁ ମାପୁରୁ ନୋହ ମାରି ୱାନି ମାରିସିରିଙ୍ଗ୍ ଆର୍ସିବାଦ୍ କିଜି ଇର୍ହାନ୍, “ମିରୁ କୁଟୁମ୍ ମାରି ବେଲି ନାଣ୍ତ ଆଜି ଦୁନିଆଦିଙ୍ଗ୍ ପୁରାପୁରି ବର୍ତି କିଦୁ । ଦୁନିଆଦି ୱିଜୁ ଜାତୁ ମାରି ପଟିଙ୍ଗ୍ ବୁମିଲୋଇ ମାନିକେଙ୍ଗ୍ ମାରି ଉଜ୍ନି ଜାତୁ ମାରି ସାମୁଦୁର୍ତି ମିନୁକୁ, ଆୟାୱିଜୁ ମି ମାଡ଼ାନ୍କୁ ତିଲାନେ; ଆୟା ୱିଜୁ ମି କିୟୁଦୁ ସର୍ପେ ଆତେମାନେ । ୱିଜୁ ବୁଲାସାଲାନି ଜାତୁ ମି ଉଣିକାଦି ଆନାତ୍, ନାନୁ କୁସା ୱାଜା ଇୟାୱିଜୁ ମିଙ୍ଗିଁ ସିତାପ୍ । ମାତର୍ ମିରୁ ନେତେର୍ତି ୱାଲେ କାଣ୍ତା ତିନ୍ମାଟ୍ । ମାରି, ମାଡୁ ମି ଜିବନ୍ୱାଜା ନେତେର୍ତି ବାଦ୍ଲୁ ଦଣ୍ତ୍ ସିନା; ୱିଜୁ ଜାତୁଦି ମାଡ଼ାନ୍କୁ ଆପିତ୍ କି ଲୋକା ମାଡ଼ାନ୍କୁ ଆପିତ୍, ୱାନି ଇସାବ୍ ଅନା; ନାନୁ ୱିଜୁ ଲୋକ୍ତି ତଡ଼ାନ୍ତି ମାଣାନ୍ ଲୋକ୍ତି ଜିବନ୍ତି ଇସାବ୍ ଅନା । ଏନ୍ଆପିନ୍ ଲୋକ୍ତିଙ୍ଗ୍ ସାୟାମାର୍ଗାଡାକ୍ନାନ୍, ଲୋକ୍ତି ମାଡ଼ାନ୍ ୱାନିଙ୍ଗ୍ ସାପିସ୍କିଆନାନ୍; ଏଣ୍ତେସ୍କି ମାପୁରୁ ନିଜେଦି ରୁପ୍ତାନ୍ ଲୋକ୍ତିଙ୍ଗ୍ ତିଆର୍ କିତାମାନାନ୍ ।
“ମିରୁ ନାଣ୍ତ ଆଜି ମାରି ପେରି କୁଟୁମ୍ ଆଦୁ, ମାରି ଦୁନିଆଦିଙ୍ଗ୍ ପୁରାପୁରି ବର୍ତି କିଜି ପିର୍ଦୁ ।”
ଇୟାୱେନ୍କା ମାପୁରୁ ନୋହଙ୍ଗ୍ ମାରି ୱାନି ମାରିନ୍କାଙ୍ଗ୍ ଇର୍ହାନ୍, “ସୁଡ଼ୁଦୁ, ମି ୱାଲେ ମାରି ମି ଭବିଷ୍ୟତ୍ କୁଟୁମ୍ ୱାଲେ ମାରି ମି ସାଙ୍ଗରିଙ୍ଗ୍ ୱିଜେରିଙ୍ଗ୍ ଜାତ୍କା ୱାଲେ, ମାରି ମି ୱାଲେମାନି ୱିଜୁ ଜାତୁ ୱାଲେ ଜାହାଜ୍ତାନ୍ ସୋତି ନାର୍କା ମାରି ବନ୍ଜାତୁ ମାରି ପଟିଙ୍ଗ୍ ୱିଜୁ ଦୁନିଆଦି ୱିଜୁ ଜାତୁଦି ୱାଲେ ମାପୁ ନିଜେଦି ନିୟମ୍ ତିର୍ କିତାମାନାପ୍ । ମାପୁ ମି ୱାଲେ ଇୟା ନିୟମ୍ ତିର୍ କିନାପ୍, ୱିଜୁ ଜାତୁଙ୍ଗ୍ ପିରୁଗାଲିଦି ମାଡ଼ାନ୍ ମାରି ସାଉ; ମାରି ଦୁନିଆଦିଙ୍ଗ୍ ନାଷ୍ଟୁ କିନି ଉଣ୍ତିଙ୍ଗ୍ ମାରି ପିରୁଗାଲି ଆଏତ୍ନି ।” ମାରିଡ଼େସି ମାପୁରୁ ଇର୍ହାନ୍, “ମାପୁ ମି ୱାଲେ ମାରି ମି ୱାଲେମାନି ୱିଜୁ ଜାତୁଙ୍ଗାଁ ୱାଲେ ଜୁଗ୍ ଜୁଗ୍ ୱିଜୁଦିନ୍ତି ସାନ୍ଧି ଏମେ ନିୟମ୍ ତିର୍ କିତାପ୍, ଆବେଣି ସିନା ଇକା; ମାପୁ ବାଦଡ଼୍ତୁ ନିଜେଦି ଇନ୍ଦ୍ରଦନୁ ତିଆର୍ କିତାମାନାପ୍, ଆକା ଦୁନିଆଦି ୱାଲେ ମା ନିୟମ୍ଦି ସିନା ଆନାତ୍ । ଏସ୍ତିୱାଲେ ମାପୁ ଦୁନିଆ ମୁସୁକୁ ଦୁରି ଉଣ୍ତା କିନାପ୍, ନାସ୍ତିୱାଲେ ଆୟା ଇନ୍ଦ୍ରଦନୁ ଦୁରିଦୁ ତୋର୍ନାତ୍; ଆବେଟ୍ ମି ୱାଲେ ମାରି କାଣ୍ତାମାନି ୱିଜୁ ଜାତୁକା ୱାଲେ ମା ଏମେ ନିୟମ୍ ମାନାତ୍, ଆକା ମାଙ୍ଗିଁ ଏତ୍ ୱାନାତ୍, ଆବେଟ୍ ୱିଜୁ ଜାତୁଙ୍ଗ୍ ସାନିଉଣ୍ତିଙ୍ଗ୍ ଗାଲିପିରୁ ମାରି ଆଏତ୍, ମାରି ଦୁରିଦୁ ଆତିଙ୍ଗ୍, ମାପୁ ଆୟା ଉଣ୍ତିଙ୍ଗ୍ ସୁଣାପ୍, ଆବେଟ୍ ଦୁନିଆଦି ମେନ୍ଦଲମାନି ୱିଜୁ ଜାତୁଙ୍ଗାଁ ୱାଲେ ମାପୁରୁଦି ଏମେ ୱିଜୁଦିନ୍ତି ନିୟମ୍ ମାନାତ୍, ଆକା ମାପୁ ଏତ୍ କିନାପ୍ ।” ମାପୁରୁ ନୋହଙ୍ଗ୍ ଇର୍ହାନ୍, “ଦୁନିଆଦି ମେନ୍ଦଲମାନି ୱିଜୁ ଜାତୁଙ୍ଗାଁ ୱାଲେ ମାପୁ ଏମେ ନିୟମ୍ ତିର୍ କିତାମାନାପ୍, ଆବେଣି ଇୟା ସିନା ଆନାତ୍ ।”
ନୋହ ନି ୱାନି ମାରିସିର୍
ନୋହଦି ଏମେ ମାରିସିର୍ ଜାହାଜ୍ଦାନ୍ ସୋସି ୱାତାର୍, ୱାରି ଦରୁ ସେମ ମାରି ହାମ ମାରି ଜେପତ୍; ହାମ କିଣାନଦି ବୁବା । ଇୟା ମୁଏରେ ନୋହଦି ମାରିସିର୍; ଇୟାୱାରି କୁଟୁମ୍ ୱିଜୁ ଦୁନିଆଦୁ ବର୍ତି ଆତାମାନାର୍ ।
ତାନିୱେନ୍କା ନୋହ ଚାସ୍ପାଣିଦୁ ତେବାଜି ଅଙ୍ଗୁରୁକିଡ଼ିଇ କିତାନ୍ । ଆବେଟ୍ ୱାନ୍ ଅଙ୍ଗୁରୁରସ୍ ଉଣୁଜି ସୋସ୍ସି ଗୁଡ଼ାଦି ଲୋଇ ଡୁମୁଣ୍ତା ଆଜି ଗୁରିତାନ୍ । ଇୟାୱାଜାଦି ବେଡ଼ାଦୁ କିଣାନଦି ବୁବା ହାମ ନିଜେଦି ବୁବାଦି ଡୁମୁଣ୍ତା ସୁଡ଼ୁଜି ଆତ୍ରେ ରିଏର୍ ତଡ଼ାନ୍କାଙ୍ଗ୍ ୱେର୍ତାନ୍ । ନାସ୍ତିୱାଲେ ସେମ ମାରି ଜେପତ୍ ମେପିଦୁ ପାସିୟା ଆସ୍ସି ୱେନ୍କା ସୋଲ୍ସି ନିଜେଦି ବୁବାଦି ଡୁମୁଡା ମାନିକା ପିଡ଼ିକ୍ତାର୍; ୱାର୍ ୱେନେକା ମକମ୍ କିଜି ସନି ଉଣ୍ତିଙ୍ଗ୍ ବୁବାଦି ଡୁମୁଡାଦିକା ସୁଡ଼ୁଏତାର୍ । ଆବେଟ୍କୁ ନୋହ ଅଙ୍ଗୁର୍ରସ୍ଦି ସୁସ୍କାଣ୍କାଣାନ୍ ନିଙ୍ଗିଁଜି ନିଜେଦି ଉଣ୍ତିଙ୍ଗ୍ ଇସ୍ରି ମାରିନ୍ଦି ପାଣିଦି ବିସୟ୍ତାନ୍ ନେସ୍ତାନ୍ । ମାରି, ୱାନ୍ ଇର୍ହାନ୍,
“କିଣାନ୍ ଆନାଦୁରିଆ ଆପିନ୍;
ୱାନ୍ ନିଜେଦି ତଡ଼ାନ୍ତି ସାକର୍ ଆପିନ୍ ।”
ମାରି ୱାନ୍ ଇର୍ହାନ୍, “ସେମଦି ମାପୁରୁ ସଦାପ୍ରବୁ ଦନ୍ୟ ଆପିନ୍;
କିଣାନ୍ ସେମଦି ସାକର୍ ଆପିନ୍ ।
ମାପୁରୁ ଜେପତ୍ଦିଙ୍ଗ୍ ପିରିସ୍ କିପିନ୍;
ମାରି ୱାନ୍ ସେମଦି ଗୁଡ଼ାଦୁ ବାସା କିପିନ୍;
ମାରି କିଣାନ୍ ୱାନି ସାକର୍ ଆପିନ୍ ।”
ଗାଲିପିରୁ ୱେନ୍କା ନୋହ ମାରି ତିନିସ ପସାସ୍ ବାର୍ସେକ୍ ଜିତାନ୍ । ମାରି ନୋହଦି ବୟସ୍ ନଅସ ପସାସ୍ ବାର୍ସେକ୍ ମାର୍ହାନ୍; ଆବେଟ୍ ୱାନ୍ ସାତାନ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.