Konda Porja Bible
ପାର୍ତୁମ୍ 16
ହାଗାର ନି ଇସ୍ମାଏଲ
ଅବ୍ରାମଦି ଆଡ଼ି ସାରି କଡ଼କକ୍ରା ଆଏଣ୍ତା ମାର୍ହାତ୍, ମାରି ହାଗାର ଦର୍ତି ତାନି ଅରେତ୍ ମିସରତି ସାକର୍ଣି ମାର୍ହାତ୍ । ଆବେଟ୍ ସାରି ଅବ୍ରାମଦିଙ୍ଗ୍ ଇର୍ହାତ୍, “ସୁଡ଼ୁଆ, ପ୍ରବୁ ନାଙ୍ଗିଁ ବାଜିଂକିତାମାନାନ୍; ଆଦେଙ୍ଗ୍ ନାନୁ ଅନୁରଦ୍ କିଜିନା, ନିନୁ ନା ଇୟା ସାକର୍ଣି ୱାଲେ ଇଲୁ ଆସ୍ଆ; ନେସ୍ସ୍ତି ନାନୁ ତେନିମାଡ଼ାନ୍କୁ କଡ଼ ପୋଇଦେଙ୍ଗ ଆଟ୍ନା ।” ଆବେଟ୍ ଅବ୍ରାମ ସାରିଦି ମାଟାଦିଙ୍ଗ୍ ମାନାତାନ୍ । ଅବ୍ରାମ କିଣାନ୍ ଦେସ୍ତୁ ଦସ୍ ବାର୍ସୁ ବାସା କିନି ୱେନେକା ୱାନି ଆଇମା ସାରି ନିଜେଦି ମିସରିୟ ସାକରଣି ହାଗାରଦିଙ୍ଗ୍ ଅସି ନିଜେଦି କନ୍ଲି ଅବ୍ରାମ ୱାଲେ ପେଡ଼ି କିତାତ୍ । ତାନିୱେନେକା ଅବ୍ରାମ ହାଗାର୍ଦି ୱାଲେ ଗୁରିତାନ୍, ୱାଦ୍ ମେନ୍ଦଲ୍ତୁ ତେବାତାତ୍; ମାରି ନିଜେ ମେନ୍ଦଲ୍ତୁ ତେବାତିମାନିକା, ଇକା ନେସ୍ସି ୱାଦ୍ ନିଜେ ତଇସିଙ୍ଗ୍ କାଡ଼୍ଦେଙ୍ଗ୍ ଆସ୍ତାତ୍ ।
ଆବେଟ୍ ସାରି ଅବ୍ରାମଦିଙ୍ଗ୍ ଇର୍ହାତ୍, ନା ଉଣ୍ତିଙ୍ଗ୍ ଇୟା ଅନ୍ୟାୟ୍ତି ପାପ୍ ମିଦି ଆପିତ୍; ନାନୁ ନିଜେଦି ଏମେ ସାକରାଣିଙ୍ଗ୍ ନି ଗାତୁ ସିତାମାନା, ୱାଦ୍ ଇଲେଇ ନିଜେଦି ଗାର୍ବୁଦୁ ମାନିକା ନେସ୍ସି ନାଙ୍ଗିଁ କାଡ଼୍ଜିନାତ୍; ପ୍ରବୁ ନିଙ୍ଗିଁ ମାରି ନାଙ୍ଗିଁ ବିସାର୍ କିପିନ୍ । ଆବେଟ୍ ଅବ୍ରାମ ସାରିଙ୍ଗ୍ ଇର୍ହାନ୍, ସୁଡ଼ୁଆ, ନି ସାକରାଣି ନି କିୟୁଦୁ ମାନାତ୍; ମିଙ୍ଗିଁ ଏମେକା ନେଗିକା ତରିନାତ୍, ଆକା ତାନି ଉଣ୍ତିଙ୍ଗ୍ କିଆ । ଆବେଟ୍ ସାରି ହାଗାର୍ତିଙ୍ଗ୍ କାସ୍ଟୁ କିତାତ୍, ୱାଦ୍ ତାନିମାଡ଼ାନ୍କୁ ସୋତାସରାତ୍ । ତାନିୱେନେକା ପ୍ରବୁଦି ଦୁତ୍ ବାଲିବାଡିଦି ନାଣିମି ଉଣ୍ତ୍ରି ଜଲା ଲାକ୍ତୁ, ମାରି, ସୁରଦି ସାରିଦୁ ଏମେ ଜଲା ମାନାତ୍, ଆୟା ଲାକୁତୁ ତାନିଙ୍ଗ୍ ସୁଡ଼ୁଜି ଇର୍ହାର୍, “ଏ ସାରୀଦି ସାକରାଣି ହାଗାର, ନିନୁ ଏମେ ମାଣାନ୍ ୱାତି ? ମାରି ଏମେମାନୁ ସନି ?” ଆବେଟ୍କୁ ୱାଦ୍ ଇର୍ହାତ୍, “ନାନୁ ନା ମାଲିକ୍ ସାରି ଲାକୁତୁରାନ୍ ସଲ୍ସିନା ।”
ନାସ୍ତିୱାଲେ ମାପୁରୁଦି ଦୁତ୍ ତାନିଙ୍ଗ୍ ଇର୍ହାତ୍, “ନିନୁ ନି ମାଲିକ୍ତି ମାନୁ ଡ଼େସି ସଲ୍ସି ନମ୍ର ୱାଜା ମାନାଜି ତାନି କିୟୁଦି ସାକରାଣି ଆଆ ।” ସଦାପ୍ରବୁଦି ଦୁତ୍ ମାରି ଇର୍ହାତ୍, “ମାପୁ ନି କୁଟୁମ୍ ଇୟାୱାଜା ନାଣ୍ତ କିବିସ୍କିନା, ଏନ୍ ବାଲିଦି ଉଣ୍ତିଙ୍ଗ୍ ଲେକ୍ସିତେଙ୍ଗ୍ ଆଟ୍ଇକା ।” ପ୍ରବୁଦି ଦୁତ୍ ମାରି ଇର୍ହାତ୍, “ସୁଡ଼ୁଆ, ନିନୁ ମେନ୍ଦଲ୍ତୁମାନି, ନିନୁ କଡ଼ ଜନମ୍ କିନି, ୱାନି ଦରୁ ଇସ୍ମାୟେଲ ସିନି, ଏଣ୍ତେସ୍କି ପ୍ରବୁ ନି ଦୁଃକ୍ ୱେର୍ହାନ୍ । ମାରି ୱାନ୍ ଲୋକା ଲୋଇ ବନ୍ତି ଗଦ ୱାଜା ଆନାନ୍, ୱାନି କିୟୁ ୱିଜୁ ଲୋକାଙ୍ଗ୍ ବିରୁଦ୍ତାନ୍ ମାରି ୱିଜେରି କିକୁ ୱାନି ବିରୁଦ୍ତାନ୍ ମାନାତ୍, ମାରି ୱାନ୍ ନିଜେଦି ତଡ଼ାନ୍କା ୱାଲେ ସାତ୍ରୁ ୱାଜା ବାସା କିନାନ୍ ।”
ମାରି ହାଗାର୍ ନିଜେଦି ୱାଲେ ୱାର୍ଗିଜିସାନି ପ୍ରବୁଦି ଇୟା ଦରୁ ଇଟ୍ତାତ୍, ମୁସୁକିରି ମାପୁରୁ, ନିନୁ ନାଙ୍ଗିଁ ସୁଡ଼ୁଜିନି । ଏଣ୍ତେସ୍ ୱାନ୍ ଇର୍ହାନ୍, “ଏନ୍ ନାଙ୍ଗିଁ ସୁଡ଼ୁଜିନାନ୍, ୱାନି ସୁଡ଼ୁତି ୱେନ୍କା ନାନୁ ଇନିକା ଇବେନୁ ମାରି ଜିତାମାନା !” ଆବେଟ୍ ଆୟା କୁଇଁକାଲ୍ତି ଦରୁ ବେର ଲହୟ ରୋୟି ଇଟ୍ତାର୍ । ଆୟା କୁଇଁକାଲ୍ କାଦେସ ମାରି ବେରଦ ନାଣିମି ମାନାତ୍ ।
ଇୟାୱେନେକା ହାଗାର ଅବ୍ରାମଦି ଉଣ୍ତିଙ୍ଗ୍ କଡ଼ ଜନମ୍ କିତିଙ୍ଗ୍, ଅବ୍ରାମ ହାଗାର ପଟାଦୁ ଜନମ୍ଆତି ନିଜେଦି ଆୟା କଡ଼ଦି ଦରୁ ଇସ୍ମାୟେଲ ଇଟ୍ତାନ୍ । ଅବ୍ରାମଦି ଅସେ ସଅ ବାର୍ସେକ୍ ବୟସ୍ତୁ ହାଗାର ଅବ୍ରାମଦି ଉଣ୍ତିଙ୍ଗ୍ ଇସ୍ମାୟେଲଦିଙ୍ଗ୍ ଜନମ୍ କିତାତ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.