Konda Porja Bible
ପାର୍ତୁମ୍ 17
ନିୟମ୍ଦି ସିନା ସୁନ୍ନତ ବିଧି
ଅବ୍ରାମଦି ନବେନୋ ବାର୍ସୁ ବୟସ୍ତୁ ପ୍ରବୁ ୱାନିଙ୍ଗ୍ ତରାୟ୍ଆଜି ଇର୍ହାନ୍, “ମାପୁ ସର୍ବସକ୍ତିମାନ୍ ମାପୁରୁ; ମା ଲାକ୍ତୁ ନେଗି ପାଣିକିଜି ନିନୁ ଦାର୍ମୁତିକାନ୍ ଆଆ । ମାପୁ ମି ୱାଲେ ନିଜେଦି ନିୟମ ତିର୍ କିଜି ନିଙ୍ଗିଁ ନାଣ୍ତ ପିରିସ୍ କିନା ।” ଆବେଟ୍ ଅବ୍ରାମ ମୋକମ୍ ପାଡ଼୍କ୍ସି ମେଡ଼େତାନ୍, ମାପୁରୁ ୱାନିଙ୍ଗ୍ ଇର୍ହାନ୍, ସୁଡ଼ୁଆ, ନାନୁ ମି ୱାଲେ ନିଜେଦି ନିୟମ ତିର୍ କିତାମାନା, ନିନୁ ନାଣ୍ତ କୁଟୁମ୍ତି ପୁର୍ବେଦି ଡକ୍ରା ଆନି । ମାରି ନି ଦରୁ ଅବ୍ରାମ ତେବାଏତ୍, ମାତର୍ ଅବ୍ରାହାମ ଆନାତ୍ । ଏଣ୍ତେସ୍କି ମାପୁ ନିଙ୍ଗିଁ ନାଣ୍ତ କୁଟୁମ୍ଦି ବୁବା କିତାପ୍ । ମାପୁ ନିଙ୍ଗିଁ ନାଣ୍ତପିରିସ୍ କିନା, ମି ମାଡ଼ାନ୍କୁ ନାଣ୍ତ କୁଟୁମ୍ ଜନମ୍ କିବିସ୍ନା ମାରି ରାଜାର୍ ମି ମାଡ଼ାନ୍କୁ ଜନମ୍ ଆନାର୍ ।
“ମାପୁ ନି ୱାଲେ ମାରି ମି ବବିସ୍ୟତ୍ କୁଟୁମ୍ତି ବିଦିବିଦାନ୍ତି ୱାଲେ ଏମେ ନିୟମ୍ ତିର୍ କିତାପ୍, ଆକା ୱିଜୁଦିନ୍ତିକା ଆନାତ୍ । ଆବେଟ୍କୁ ମାପୁ ମି ମାରି ମି ବବିସ୍ୟତ୍ କୁଟୁମ୍ତି ମାପୁରୁ ଆନିକା । ମାରି ମିରୁ ଇଲେ ଇୟା ଏମେ କିଣାନ୍ ଦେସ୍ତୁ ବାସାକିଜିନି, ଆବେଣି ୱିଜୁ ମାପୁ ନିଙ୍ଗିଁ ମାରି ମି ବବିସ୍ୟତ୍ କୁଟୁମୁତିଙ୍ଗ୍ ୱିଜୁଦିନ୍ତି ଅଦିକାର୍ ଉଣ୍ତିଙ୍ଗ୍ ସିନାପ୍ ମାରି ମାଡୁ ୱାରି ମାପୁରୁ ଆନାପ୍ ।”
ମାପୁରୁ ଅବ୍ରାହାମତିଙ୍ଗ୍ ମାରି ଇର୍ହାନ୍, “ନିନୁ ମା ନିୟମ୍ ମାନାଆ; ନିନୁ ମାରି ମି ବବିସ୍ୟତ୍ କୁଟୁମ୍ ନାତିପୁତିକାଡ଼ାଦୁ ଆକା ମାନାନାର୍ । ମିନ୍ଧି ମାରି ମି ବବିସତ୍ କୁଟୁମୁଦି ୱାଲେ କିତିମାନି ମା ଏମେ ନିୟମ୍ ମିରୁ ମାନାନିଦେର୍ ଆକା ଇୟାକା, ମିରୁ ୱିଜିଦେରେ ଲୋକୁ ସୁନ୍ନତ ଆନିଦେର୍ । ମିରୁ ନିଜେ ନିଜେଦି ତଲୁ କୟ୍ନିଦେର୍; ମାରି ଆକା ମି ୱାଲେ ମା ନିୟମ୍ଦି ସିନା ଆନାତ୍ । ନାତିପୁତି କାଡ଼ାଦୁ ମି ୱିଜେରି କଡ଼ର୍ ଆଟ୍ ଦିନ୍ ୱେନ୍କା ସୁନତ୍ ଆନାର୍ । ମାରି ଏମେକାର୍ ମି କୁଟୁମ୍ ଆଏରେ, ଇୟାୱାଜା ଆଇଦେସ୍ତି ଲୋକୁ ମି ଇଣ୍ତ୍ର ଜନମ୍ଆତିକାନ୍ ବା ଡାବୁଣାନ୍ କଣିଦେରେ, ୱାନିଙ୍ଗ୍ ବା ସୁନତ୍ ଆନାତ୍ । ମାରି ମି ଇଣ୍ତ୍ରଜନମ୍ ଆତିଙ୍ଗ୍ ବା କଟି ଲୋକାଦି ସୁନତ୍ ଏଣ୍ତେସ୍ବା ଦରକାର୍; ଆବେଟ୍କୁ ୱିଜୁଦିନ୍ତି ଉଣ୍ତିଙ୍ଗ୍ ମି କାଣ୍ତାଦୁ ମା ନିୟମ୍ଦି ସିନା ତେବାନାତ୍ । ମାତର୍ ଏମେୱାନି ମୁସୁକୁରି ତଲୁ କୟ୍ଏର୍, ଇୟାୱାଜା ଏନ୍ ଅସୁନତ୍ ଲୋକୁ, ଆୟା ଲୋକୁ ନିଜେଦି ଲୋକା ମାଣାନ୍ ଅଲଗା ଆନାନ୍; ୱାନ୍ ମା ନିୟମ୍ ମାନାଏତାନ୍ ।”
ଆବେଟ୍ତାନ୍ ମାପୁରୁ ଅବ୍ରାହାମତିଙ୍ଗ୍ ଇର୍ହାନ୍, “ନିନୁ ନିଜେଦି ଆଡ଼ି ସାରିଙ୍ଗ୍ ମାରି ସାରି ଇଜି କୁକ୍ମା; ତାନି ଦରୁ ସାରା ଆତାତ୍ । ନାନୁ ତାନିଙ୍ଗ୍ ଆର୍ସିବାଦ୍ କିନା ମାରି ତାନି ମାଣାନ୍କୁ ଅରେନ୍ କଡ଼ ସିନା; ନାନୁ ତାନିଙ୍ଗ୍ ଆର୍ସିବାଦ୍ କିନା, ୱାଦ୍ ଆଇ ଆଇ କୁଟୁମୁଦି ପୁର୍ବେଦି ୟାୟା ଆନାତ୍, ତାନି ମାଣାନ୍କୁ ଆଇ ଆଇ ଦେସ୍ତି ରାଜାର୍ ସନାର୍ ।”
ନାସ୍ତିୱାଲେ ଅବ୍ରାହାମ ମୋକମ୍ ପିଡ଼ିକ୍ସି ମେଡ଼ିସି ସିକ୍ତାନ୍, ମାରି ମନ୍ତୁ ମନ୍ତୁ ଇର୍ହାନ୍, “ଲୋକୁଦି ସହେ ବାର୍ସୁ ବୟସ୍ତାନ୍ ଇନିକା କଡ଼ ଜନମ୍ କିନାର୍ ? ନବେ ବାର୍ସୁଦି ସାରା ଜନମ୍ କିନାତ୍ ?” ଆବେଟ୍ ଅବ୍ରାହାମ ମାପୁରୁଙ୍ଗୁଁ ଇର୍ହାନ୍, “ଇସ୍ମାଏଲ୍ ମି ଲାକ୍ତୁ ଜିଜ ମାନିନ୍ ।”
ନାସ୍ତିୱାଲେ ମାପୁରୁ ଇର୍ହାନ୍, “ନି ଆଡ଼ି ସାରା ମି ଉଣ୍ତିଙ୍ଗ୍ ସତେନେ କଡ଼ ଜନମ୍ କିନାତ୍, ମାରି ନିନୁ ୱାନି ଦରୁ ଇସ୍ହାକ୍ ଇଡ଼୍ନି, ମାରି, ନାନୁ ୱାନି ୱାଲେ ନିଜେଦି ନିୟମ୍ ତିର୍ କିନା; ଆକା ୱାନି ୱାନିଦିନ୍ତି କୁଟୁମ୍ ଉଣ୍ତିଙ୍ଗ୍ ୱିଜୁଦିନ୍ତି ନିୟମ୍ ଆନାତ୍ । ମାରି, ଇସ୍ମାଏଲ ବିସୟ୍ତାନ୍ ମି ମାଟା ୱେର୍ଆ; ସୁଡ଼ୁଆ ନାନୁ ୱାନିଙ୍ଗ୍ ଆର୍ସିବାଦ୍ କିନା, ମାରି, ନାଣ୍ତ କଡ଼କକ୍ରା କିଜି ୱାନି କୁଟୁମ୍ ନାଣ୍ତ ପିରିସ୍ କିନା । ତାନି ମାଣାନ୍କୁ ବାର ରାଜାର୍ ଜନମ୍ ଆନାର୍ ମାରି ନାନୁ ୱାନିଙ୍ଗ୍ ପେରି କୁଟୁମ୍ କିନା । ମାତର୍ କାଡ଼େରିଙ୍ଗ୍ ଇୟା ବେଡ଼ାଦୁ ସାରାଦି ପଟାଦୁ ଏମେ ଇସ୍ହାକ୍ ଜନମ୍ ଆନାନ୍, ୱାନି ୱାଲେ ନାନୁ ନିଜେଦି ନିୟମ୍ ତିର୍ କିନା ।” ଇୟାୱାଜା ୱାରିଗିଜି ସାନିକା ୱିସ୍ସି ମାପୁରୁ ଅବ୍ରାହାମତି ଲାକୁତୁରାନ୍ ସର୍ହାନ୍ ।
ଆବେଟ୍କୁ ଅବ୍ରାହାମ ନିଜେଦି କଡ଼ ଇସ୍ମାଏଲତିଙ୍ଗ୍ ମାରି ନିଜେଦି ଇନ୍ଡ୍ର ମାନି ମାରି କଟିସାକର୍ ୱିଜୁ ଲୋକାଙ୍ଗ୍, ଅର୍ତାତ୍ ଅବ୍ରାହାମଦି ଇନ୍ଡ୍ରମାନି ୱିଜୁ ଲୋକାଙ୍ଗ୍ ଅସି ମାପୁରୁଦି ଆଦେସ୍ଦାନ୍ ଆୟା ନାଣ୍ତିଙ୍ଗ୍ ୱିଜେରିଙ୍ଗ୍ ସୁନ୍ନତ କିତାର୍ । ଅବ୍ରାହାମ ନବେ ନଅ ବୟସ୍ତାନ୍ ୱାନି ତଲୁ କଇତାର୍ । ମାରି ୱାନି କଡ଼ ଇସ୍ମାଏଲତି ତେର ବାର୍ସୁ ବୟସ୍ତୁ ତଲୁ କଇତାର୍ । ଇୟାୱାଜା ଉଡ୍ରି ନାଣ୍ତିଙ୍ଗ୍ ଅବ୍ରାହାମଦି ମାରି ୱାନି କଡ଼ ଇସ୍ମାଏଲଦି ସୁନତ୍ ଆତାତ୍ । ମାରି, ଇଲୁଦୁ ଜନମ୍ ଆତିକାର୍ ମାରି ଆଇଦେସ୍ଦି ଲୋକା ଲାକୁତୁରାନ୍ କଟିସାକର୍କୁ ୱାନି ଇନ୍ଣ୍ତ୍ର ମାନି ୱିଜୁ ଲୋକାଙ୍ଗ୍ ସୁନ୍ନତ ଆତାତ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.