Konda Porja Bible
ପାର୍ତୁମ୍ 38
ଜିଉଦା ମାରି ତାମର
ଆୟା ବେଡ଼ାଦୁ ଜିହୁଦା ନିଜେଦି ତୋଡ଼ାନ୍କା ମାଡ଼ାନ୍ ଅଦୁଲ୍ଲମିୟ ହିରା ଦରୁଦି ଅରେନ୍ ଲୋକୁ ଲାକୁତୁ ସର୍ହାନ୍ । ଆବେନୁ ଜିହୁଦା ସୁୟ ଦରୁଦି ଏମେ କିଣାନିୟ ଲୋକୁଦି ଉନ୍ଡ୍ରି ଆଇଲିଦିଙ୍ଗ୍ ସୁଡ଼ିଜି ତାନିଙ୍ଗ୍ ପେଡ଼ି କିଜି ତାନି ୱାଲେ ଡରିତାନ୍ । ଆବେଟ୍ ୱାଦ୍ ପଟାଦୁ ଆଜି କଡ଼ ଜନମ୍ କିତାତ୍, ୱାଦ୍ ୱାନି ଦରୁ ଏର୍ ସିତାତ୍ । ତାନିୱେନେକା ଡ଼େସି ୱାଦ୍ ପଟାଦୁ ଆଜି, ୱାଦ୍ କଡ଼ ଜନମ୍ କିଜି ୱାନି ଦରୁ ଓନନ୍ ସିତାତ୍ । ଡ଼େସି ତାନି ପଟା ଆତାତ୍, ୱାଦ୍ କଡ଼ ଜନମ୍ କିଜି ୱାନି ଦରୁ ସେଲା ସିତାନ୍ । ୱେନି ଜନମ୍ ୱେଡ଼ାଦୁ ଜିଉଦା କସିବ ବାଡିଦୁ ମାର୍ହାନ୍ ।
ତାନିୱେନେକା ଜିଉଦା ତାମର୍ ଦରୁଦି ଅରେତ୍ ଆଇଲି ତାସି ନିଜେଦି ପେରି କଡ଼ ଏର୍ ୱାଲେ ତାନିଙ୍ଗ୍ ପେଡ଼ି କିତାସିତାନ୍ । ମାତର୍ ଜିଉଦାଦି ପେରି ମାରିନ୍ ଏର୍ ପ୍ରବୁଦି ଆଗିଡ଼ି ତାଗ୍ଇକାନ୍ ମାର୍ହାନ୍; ଆଦେଙ୍ଗ୍ ପ୍ରବୁ ୱାନିଙ୍ଗ୍ ସାପିସ୍ କିତାନ୍ । ଆବେଟ୍ ଜିଉଦା ଓନନ୍ଦିଙ୍ଗ୍ ଇର୍ହାନ୍, “ନିନୁ ନିଜେଦି ଦାଦାଦି ଆଡ଼ିଦି ୱାଲେ ସୁଜ୍ଆ ମାରି ୱାନି ଉଣ୍ତିଙ୍ଗ୍ ସେରନ୍ତି ଦାଇତି ପାଣି କିଜି ଦାଦାଦି କୁଟୁମ୍ ଜିପିସ୍ କିଆ ।” ମାତର୍ ଆୟା କଡ଼ର୍ ନିଜେଦିକାର୍ ଆଏର୍, ଇକା ବୁଜାଜି ଓନନ୍ ଦାଦାଦି ଆଡ଼ିଦି ୱାଲେ ମିସାନିୱାଲେ ଦାଦାଦି କୁଟୁମ୍ ଜିପିସ୍କିନି ବଦା ସିଲି ଉଣ୍ତିଙ୍ଗ୍ ବୁମିଦୁ ଡ଼ିସ୍ତାନ୍ । ୱାନି ଇୟା ୱାଜା ପାଣି ପ୍ରବୁଦି ଆଗିଡ଼ି ତାଗିଇକା ମାର୍ହାତ୍; ଆଦେଙ୍ଗ୍ ୱାନ୍ ୱାନିଙ୍ଗ୍ ବା ସାପିସ୍ କିତାନ୍ । ନାସ୍ତିୱାଲେ ଜିଉଦା ନିଜେଦି କୁଡ଼ିଆବୁଡି ତାମରତିଙ୍ଗ୍ ଇର୍ହାନ୍, “ନା ମାରିନ୍ ସେଲା ପେରିକାନ୍ ଆଇସାନ୍ଦି ନିନୁ ରାଣ୍ତି ଆଜି ନିଜେଦି ବୁବାରି ଇଲୁଦୁ ସଲ୍ସ ମାନ୍ଆ,” ଏଣ୍ତେସ୍କି ୱାନ୍ ଅଡ଼୍ବିତାନ୍, ନେସ୍ତି ଦାଦ୍ସିରି ୱାଜା ସେଲା ବା ସାନାସନାନ୍ । ଇୟାଉଣ୍ତିଙ୍ଗ୍ ତାମର ତାନି ବୁବାରି ଇନ୍ଡ୍ର ସଲ୍ସି ବାସାକିତାତ୍ ।
ମାରି ନାଣ୍ତଦିନ୍ ଜିଣାତି ୱେନେକା, ସୁୟଦି ଗାଡ଼ି ଜିଉଦାଦି ଆଡ଼ି ସାତାତ୍; ତାନି ୱେନେକା ଜିଉଦା ସାନ୍ତି ଆଜି ଅଦୁଲ୍ଲମିୟ ହିରା ଦରୁଦି ସଙ୍ଗ୍ ୱାଲେ ତିମ୍ନାଦୁ ୱାଲେ ନିଜେଦି ମେଣ୍ତାଦି ବୁର୍ବୁସେଙ୍ଗ୍ କୟ୍ନିୱାରି ଲାକୁତୁ ସର୍ହାନ୍ । ନାସ୍ତିୱାଲେ ଏନ୍ ଅରେନ୍ ତାମର୍ଦିଙ୍ଗ୍ କାବୁରୁସିଜି ଇର୍ହାନ୍, “ସୁଡୁଆ, ମି ମାମା ନିଜେଦି ମେଣ୍ତେଙ୍ଗ୍ ବୁର୍ବୁସେଙ୍ଗ୍ କୟ୍ନି ଉଣ୍ତିଙ୍ଗ୍ ତିମ୍ନାଦୁ ସଲ୍ସିନାନ୍ ।” ଆବେଟ୍ ତାମର ରାଣ୍ତି ୱାତି କୁତ୍ସି ଆଇ ୱାତି ପିଡ଼୍ଗିଜି ନିଜେଦିଙ୍ଗ୍ ପିଡ଼୍ଗାଜି ତିମ୍ନାଦି ସାରି ଲାକ୍ତୁମାନି ଐନମଦି ଡ଼ୁଗୁନି ସାରିଦୁ ବାସ୍ତା ମାର୍ହାତ୍; ଇରିଙ୍ଗ୍ ୱାଦ୍ ସୁଡ଼ୁତାତ୍, ସେଲା ପିରିତିଙ୍ଗାଁ ବା ତାନି ୱାଲେ ନିଜେଦି ପେଡ଼ି ଆଏତାତ୍ ।
ନାସ୍ତିୱାଲେ ଜିଉଦା ତାନିଙ୍ଗ୍ ସୁଡ଼ିଜି ଦାରିପାଣି କିନିକାତ୍ ଅଡ଼ବିତାନ୍, ଇରିଙ୍ଗ୍ ୱାଦ୍ ମୋକମ୍ ପିଡ଼ିକ୍ତା ମାର୍ହାତ୍ । ଇୟାଉଣ୍ତିଙ୍ଗ୍ ୱାଦ୍ ସାରି ପାଡ଼ିଦୁ ତାନି ଲାକୁତୁ ସଲ୍ସି କଡ଼ିଆବୁଡିଙ୍ଗ୍ ଚିନିସ୍ କିଦେଙ୍ଗ୍ ଆଟ୍ଏଜି ଇର୍ହାନ୍, “ମାଡ଼ିସ୍ କିଜିନା, ନି ଲାକୁତୁ ନାନୁ ୱାଦେଙ୍ଗ୍ ଏସ ଡାବୁଙ୍ଗ୍ ସିନା । ଆବେଟ୍ ତାମର ଇର୍ହାତ୍, ନିନୁ ନା ଲାକୁତୁ ୱାଦେଙ୍ଗ୍ ଇନିକା ସିନି ?”
ୱାଦ୍ ଇର୍ହାତ୍, “ଦାନ୍ଦାଦାନ୍ ଉନ୍ଡ୍ରି ଗରିଆପିଲା ପୋକ୍ନା ।” ତାମର୍ ଇର୍ହାତ୍, “ଆକା ପୋକନି ସାନ୍ଦି ନାଙ୍ଗିଁ ନ ଇନି ବାନ୍ଦା ସିନି ?”
ଜିଉଦା ଇର୍ହାନ୍, “ଇନିକା ବାନ୍ଦା ସିନା ?” ତାମର୍ ଇର୍ହାତ୍, “ନି ଇୟା ଟାପ୍ ଡ଼େଇନିକା ମାରି ନାସୁ, ମାରି କିୟୁଦି ବାଡିଗା ।” ଆବେନୁ ଜିଉଦା ତାନିଙ୍ଗ୍ ଆୟା ୱିଜୁ ସିଜି ତାନି ଲାକ୍ତୁ ସଲ୍ସି ମିସାତାନ୍, ଆବେଟ୍ ୱାଦ୍ ୱାନି ମାଡ଼ାନ୍ ପଟାଦୁ ଆତାତ୍ । ତାନିୱେନେକା ତାମର ନିଙ୍ଗ୍ଜି ସର୍ହାତ୍, ମାରି, ପିଡ଼୍ଗାତି ୱାତି କୁତ୍ସି ରାଣ୍ତି ୱାତି ପିଡ଼୍ଗିତାତ୍ ।
ଆବେଟ୍ତାନ୍ ଜିଉଦା ଆୟା ଆଇମାଦି ମାଡ଼ାନ୍ ବାନ୍ଦା କିତି ଜିନିସ୍ ଅନି ଉଣ୍ତିଙ୍ଗ୍ ନିଜେଦି ଅଦୁଲ୍ଲମିୟ ସାଙ୍ଗ ହିରା ମାଡ଼ାନ୍ ଗରିଆପିଲା ପୋକ୍ତାସିତାତ୍, ମାତର ୱାନ୍ ତାନିଙ୍ଗ୍ ପୋୟ୍ଏତାନ୍ । ଆଦେଙ୍ଗ୍ ୱାନ୍ ଆବେଣି ଲୋକାଙ୍ଗ୍ ୱେନ୍ବାତାନ୍, ଐନମ ସାରି ପାଡ଼ିଦୁ ଏମେ ଦାରିଣି ମାର୍ହାତ୍, ୱାଦ୍ ଏମେ ? ୱାର୍ ଇର୍ହାର୍, “ଇବେନୁ ଇନି ଦାରିଣି ତେବାଏତ୍ ।”
ତାନିୱେନେକା ୱାନ୍ ଜିଉଦା ଲାକୁତୁ ଡ଼େସି ସଲ୍ସି ଇର୍ହାନ୍, “ନାନୁ ତାନିଙ୍ଗ୍ ପୋୟ୍ଏତା,” ମାରି ଆବେଣି ଲୋକୁ ବା ଇର୍ହାର୍, “ଇୟା ବାଡିଦୁ ଇନି ଦାରି ଆଇମା ତେବାଏତ୍ ।”
ଆର୍ତିଙ୍ଗ୍ ଜିଉଦା ଇର୍ହାନ୍, “ତାନିମାନୁ ଆମାକା ମାନାତ୍, ୱାଦ୍ ଆକା ଇଡିତ୍, ମାଡୁ ଏନ୍ଦାନିଙ୍ଗ୍ ସେମାର୍ କୁତାନାଟ୍ ? ସୁଡ଼ୁଆ, ନାନୁ ଇୟା ଗରିଆପିଲା ପୋକ୍ତା, ମାତର୍ ନିନୁ ତାନିଙ୍ଗ୍ ପୋଇତି ।”
ମାରି ମୁଣ୍ତ୍ରି ଲେଜୁ ୱେନେକା ଏନ୍ ଅରେନ୍ ଜିଉଦେଙ୍ଗ୍ ଇର୍ହାନ୍, “ମି କଡ଼ିଆବୁଡି ତାମର୍ ଦାରିଣି ଆତାମାନାତ୍; ମାରି ଦାରିପାଣି ଉଣ୍ତିଙ୍ଗ୍ ୱାଦ୍ ମେନ୍ଦଲ୍ତୁ ମାନାତ୍ ।” ଆବେଟ୍ ଜିଉଦା ଇର୍ହାନ୍, “ତାନିଙ୍ଗ୍ ଆତ୍ରେ ତାସି ସିସୁଦୁ ଆଡ଼କ୍ସୋ ପୋକତୁ ।”
ତାନିୱେନେକା ତାନିଙ୍ଗ୍ ଆତ୍ରେ ତାତାର୍ । ମାତର୍ ନିଜେଦି ମାମା ଲାକୁତୁ ଇନିଜି ପୋକ୍ତାତ୍, ଇୟା ୱିଜୁ ଜିନିସ୍ ଏମେ ୱାନିନ୍ଦି, ଆୟା ମେମାରି ମାଡ଼ାନ୍ ନା ପଟା ଆତାମାନାତ୍ । ମାରି ଇର୍ହାତ୍, “ଇୟା ଟାପ୍ ଡ଼େଇନିକା ମାରି ନାସୁ ମାରି ବାଡିଗା ଏମେୱାନିନ୍ଦି ? ଆକା ସିନିସ୍ କିଜି ସୁଡ଼ୁଦୁ ।”
ଆବେଟ୍ ଜିଉଦା ଆୟା ୱିଜୁ ଜିନିସ୍ ନିଜେଦିକା ଇଜି ମାନାଜି ଇର୍ହାନ୍, “ୱାଦ୍ ନା ମାଡ଼ାନ୍ ନାଣ୍ତ ଦାର୍ମୁ, ଇରିଙ୍ଗ୍ ନାନୁ ତାନିଙ୍ଗ୍ ନା ମାରିନ୍ ସେଲାଙ୍ଗ୍ ସିଏତା ।” ମାତର୍ ଜିଉଦା ମାରି ତାନି ମାନୁ ସଲ୍ଏତାନ୍ନି ।
ମାରି, ତାମରତି ଜନମ୍ କିନି ବେଡ଼ା ଇଗାୱାତାତ୍, ତାନି ପଟାଦୁ ଜାଡୁୱା କଡ଼ର୍ ମାନିକା ତୋରିତାତ୍ । ମାରି ତାନି ଜନମ୍ କିନି ବେଡ଼ାଦୁ ଅରେନ୍ କଡ଼ଦି କିୟୁ ସତାତ୍; ଆବେଟ୍ ବଡୁଡକ୍ରି ୱାନି ଆୟା କିୟୁଦୁ ନେତେର୍ ରଙ୍ଗ୍ ନୁଲ୍ ତର୍ସି ଇର୍ହାତ୍, “ଇୟାକାନ୍ ପେରିକାନ୍ ।” ମାତର୍ ୱାନ୍ ନିଜେଦି କିୟୁ ରେଲିଜି ଅତାତ୍, ସୁଡୁଦୁ, ୱାନି ତୋଡ଼ାନ୍ ବୁମିଦୁ ମାଡ଼ିସ୍ତାନ୍; ଆବେଟ୍ ବଡୁଡକ୍ରି ଇର୍ହାତ୍, “ନିନୁ ଏଣ୍ତେସ୍ କିଜି ନିଜେଦି ଉଣ୍ତିଙ୍ଗ୍ ସାରି ପାକ୍ସି ୱାତି !” ନି ମାନୁ ଇୟା ପାକ୍ନିକା ଆପିତ୍ । ଆଦେଙ୍ଗ୍ ୱାନି ଦରୁ ପେରସ1 ଆତାତ୍ । ତାନିୱେନେକା କିୟୁଦୁ ନେତେର୍ ରଙ୍ଗ୍ ନୁଲୁତରିସ୍ ୱାନି ତୋଡ଼ାନ୍ ବୁମିଦୁ ମାଡ଼ିସ୍ କିତାନ୍, ୱାନି ଦରୁ ସେରହ2 ଆତାତ୍ ।
Source notes (2)
- Footnote ରୁକୁତାନ୍
- Footnote ଜାୟ୍
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.