Konda Porja Bible
ପାର୍ତୁମ୍ 28
ଜାକୁବଙ୍ଗ ଲାବନଦି ଲାକୁତୁ ପୋକ୍ତାନ୍
ତାନିୱେନେକା ଇସ୍ହାକ୍ ଜାକୁବଙ୍ଗ୍ କୁକ୍ସି ଆର୍ସିବାଦ୍ କିତାନ୍, ମାରି ଇୟା ଆଦେସ୍ ସିଜି ୱାନିଙ୍ଗ୍ ଇର୍ହାନ୍, “ନିନୁ କିଣାନ୍ ଦେସ୍ତି ଏମେ ଆଇଲିଦିଙ୍ଗ୍ ପେଡ଼ି କିମା । ନିଙ୍ଗ୍ଆ, 1ପଦନ ଅରାମରଦୁ ନିଜେଦି ୟାୟାଦି ବୁବା ବତୁୟେଲ୍ତି ଇନ୍ଡ୍ର ସଲ୍ସି ଆବେନୁ ନିଜେଦି ମାମା ଲାବନତି ଆଇଲିଦିଙ୍ଗ୍ ପେଡ଼ିକିଆ । ସର୍ବସକ୍ତିମାନ୍ଦି ମାପୁରୁ ଆର୍ସିବାଦ୍ କିଜି ନିଙ୍ଗିଁ ନାଣ୍ତ ଲୋକୁ ଆନି ଉଣ୍ତିଙ୍ଗ୍ ମାରି ନାଣ୍ତ କଡ଼ର୍ ଜନମ୍ ଆଜି କୁଟୁମ୍ ଆପିର୍ । ମାରି ଅବ୍ରହାମ ଉଣ୍ତିଙ୍ଗ୍ ସିତି ଆର୍ସିବାଦ୍ ନିବାନୁ ମାରି ନି କୁଟୁମ୍ତୁ ପୁରା କିପିନ୍; ଆବେଟ୍ ମାପୁରୁ ନି ବାସା କିନି ଜାଗା ଇୟା ଏମେ ଦେସ୍ ଅବ୍ରହାମଦିଙ୍ଗ୍ ସିତାମାନାନ୍, ଆୟା ଦେସ୍ଦୁ ନି ଅଦିକାର୍ ଆପିତ୍ ।” ତାନିୱେନେକା ଇସ୍ହାକ୍ ଜାକୁବଙ୍ଗ୍ ପୋକ୍ସି, ୱାନ୍ ପଦନ ଅରାମଦୁ ଅରାମିୟ ବତୁୟେଲ୍ତି ମାରିନ୍ ଲାବନଦି, ଅର୍ତାତ୍, ଜାକୁବ ମାରି ଏସୌଦି ୟାୟା ରିବିକାଦି ତଡ଼ାନ୍ ଲାକୁତୁ ସର୍ହାନ୍ ।
ଏସୌଦି ମାରିଡ଼େସି ପେଡ଼ି ଆନିକା
ତାନିୱେନେକା ଇସ୍ହାକ୍ ଜାକୁବଙ୍ଗ୍ ଆର୍ସିବାଦ୍ କିଜି ପେଡ଼ି ଉଣ୍ତିଙ୍ଗ୍ ପଦନ ଅରାମଦୁ ପୋକତାତ୍, ମାରି ଆର୍ସିବାଦ୍ କିନି ବେଡ଼ାଦୁ ୱାନିଙ୍ଗ୍ଁ ଆଦେସ୍ ସିଜି ଇର୍ହାନ୍, ନିନୁ କିଣାନ୍ ଦେସ୍ତି ଏମେ ଆଇଲିଦିଙ୍ଗ୍ ପେଡ଼ି କିମା । ମାରି ଜାକୁବ ନିଜେଦି ବୁବା ୟାୟାଦି ମାଟା ମାନାଜି ପଦନ ଅରାମଦୁ ସର୍ହାମାନାନ୍, ଇକା ସୁଡ଼ୁଜି ଏସୌ ନିଜେଦି ବୁବା ଇସ୍ହାକଦିଙ୍ଗ୍ କିଣାନ୍ ଦେସ୍ଦି ଆଇଲିକା ଉଣ୍ତିଙ୍ଗ୍ ରାଜି ସିଲିକା ନେସ୍ସି । ଆୟାଉଣ୍ତିଙ୍ଗ୍ ନିଜେଦି ଆଡ଼ିକ୍ ମାର୍ହିଙ୍ଗ୍ ବା ଇସ୍ମାଏଲ ଲାକୁତୁ ସଲ୍ସି ଅବ୍ରହାମଦି ନାତି ଇସ୍ମାଏଲଦି ଗାଡ଼ି ନବାୟୋତଦି ତାଙ୍ଗିଁ ମହଲତ୍ ଦର୍ତି ଆଇଲିଦିଙ୍ଗ୍ ପେଡ଼ି କିତାନ୍ ।
ବେତେଲଦୁ ଜାକୁବଦି ଲବୁ ସୁଣିକା
ତାନିୱେନେକା ଜାକୁବ ବେର୍ସେବାଦାନ୍ ସୋହସି ହାରଣ ତରିନ୍ ସର୍ହାନ୍ । ମାରି ୱେଡ଼ା ଆତାତ୍ଆକା ୱାନ୍ ଉଣ୍ତ୍ରି ବାଡିଦୁ ନାଡ଼ା ତେବାତାନ୍; ମାରି, ୱାନ୍ ଆୟା ବାଡିଦି ଇସ୍ରି କାଲୁ ଅସି ତାଲା ଟାଟ୍ସି ଆୟା ବାଡିଦୁ ଡରିତାନ୍ । ଆବେଟ୍ ୱାନ୍ ଲବ୍ତୁ ଦୁନିଆଦୁ ତିଆର୍ ଆତିମାନି ଉଣ୍ତ୍ରି ଦାପା ସୁଡ଼ୁତାନ୍, ଦୁନିଆଦାନ୍ ମୁସ୍କୁପୁର୍ ସାନ୍ଦି ଇତାମାନାତ୍; ମାରି, ସୁଡ଼ୁଦୁ, ଆକା ସିଜି ମାପୁରୁଦି ଦୁତ୍କୁ ମୁସ୍କୁ ଏକ୍ସିନେ ମାରି ଆଡ୍ଗି ରେସି ୱାଜିନେ । ମାରି ସୁଡ଼ୁଦୁ, ପ୍ରବୁ ଆୟା ମୁସୁକୁ ନିରା ଇର୍ହାନ୍, “ମାପୁ ସଦାପ୍ରବୁ ମି ପୁର୍ବେଦିବୁବା ଅବ୍ରହାମଦି ମାପୁରୁ ମାରି ଇସ୍ହାକଦି ମାପୁରୁ; ନିନୁ ଇୟା ଏମେ ଦେସ୍ଦୁ ବାସା କିଜିନି, ଆକା ନାନୁ ନିଙ୍ଗିଁ ମାରି ନି କୁଟୁମ୍ତିଙ୍ଗ୍ ସିନା । ମି କୁଟୁମ୍ ଦୁନିଆଦି ଦୁଡ଼ି ୱାଜା ନାଣ୍ତଲୋକୁ ଆନାର୍, ମାରି ନିନୁ ମକମ୍ ତରିନ୍ ମାରି ୱେନ୍କା ତରିନ୍ ମାରି ଡେବ୍ରି ତରିନ୍ ମାରି ଉଣେରି ତରିନ୍, ସାରିବେଡ଼ିତି ପିର୍ନାର୍; ମାରି ନି ମାଡ଼ାନ୍ ମାରି ନି କୁଟୁମ୍ତାନ୍ ଦୁନିଆଦୁ ଜିନିମାନି କୁଟୁମ୍ ଆର୍ସିବାଦ୍ ପୋଇନାର୍ । ମାରି, ସୁଡୁଆ, ନାନୁ ନି ସାକା ମାନା, ମାରି ନିନୁ ଏମେ ଏମେ ବାଡିଦୁ ସନି, ଆୟା ଆୟା ବାଡିଦୁ ନାନୁ ନିଙ୍ଗିଁ ସାକା ଆନା ମାରି ମାରିଡ଼େସି ନିଙ୍ଗିଁ ଇୟା ଦେସ୍ଦୁ ତାନା; ମାତର ନାନୁ ଏମେକା ନିଙ୍ଗିଁ ଇର୍ହାମାନା, ଆକା ପୁରାକିଇ ସାନ୍ଦି ନାନୁ ନିଙ୍ଗିଁ ଡ଼ିସ୍ଏ ।”
ତାନିୱେନେକା ସୁସ୍କାଣୁକୁ ରୁଙ୍ଗିଁତି ୱେନ୍କା ନିଙ୍ଗିଁଜି, ଜାକୁବ ଜାଗାର୍ତା ଆଜି ଇର୍ହାନ୍, “ସତେନେ ଇୟା ବାଡିଦୁ ପ୍ରବୁ ମାନାନ୍; ମାତର୍ ନାନୁ ଆକା ନେସ୍ଏତା ।” ମାରି, ୱାନ୍ ତିଲାଜି ମାରି ଇର୍ହାନ୍, “ଇକା ଏଣ୍ତେସ୍ ତିଲାନି ବାଡି! ଇକା ତ ସତେନେ ମାପୁରୁଦି ଇଲୁ, ଇକା ତ ମୁସ୍କୁପୁର୍ତି ସେର୍ଲା ।”
ତାନିୱେନେକା ଜାକୁବ ସାଲିଦିନେ ନିଙ୍ଗିଁଜି ଏମେ କାଲୁ ତାଲା ଆଡିଗି ଇଟ୍ତାମାର୍ହାନ୍, ଆକା ଅସି ମୁଣ୍ତା ୱାଜା ତିଆର୍ କିଜି ତାନି ମୁସୁକୁ ନିୟୁ ୱାକ୍ତାନ୍ । ମାରି ଆୟା ବାଡିଦି ଦରୁ 2ବେତେଲ ଇଟ୍ତାନ୍; ମାତର୍ ଆଗିଡ଼ି ଆୟା ଗାଡ଼୍ଦି ଦରୁ ଲୁସ୍ ମାର୍ହାତ୍ । ମାରି ଜାକୁବ ପାର୍ମାଣ୍ କିଜି ଇର୍ହାନ୍, “ଜଦି ମାପୁରୁ ନା ସାକା ଆନାନ୍ ମାରି ନା ଇୟା ସନି ସାରିଦୁ ନାଙ୍ଗିଁ ରକିୟା କିନାନ୍, ମାରି, ଉଣି ଉଣ୍ତିଙ୍ଗ୍ କାଦି ମାରି ପିଡ଼ିଗିନି ଉଣ୍ତିଙ୍ଗ୍ ୱାତିଗନ୍ଦା ସିନାନ୍, ମାରି ଜଦି ନାନୁ ସାନ୍ତିଦାନ୍ ବୁବା ଇଲୁଦୁ ମାରିଡ଼େସି ୱାନା, ଆର୍ତିଙ୍ଗ୍ ପ୍ରବୁ ନା ମାପୁରୁ ଆନାନ୍, ମାରି, ନାନୁ ଏମେ କାଲୁ ମୁଣ୍ତା ୱାଜା ତିଆର୍ କିତାମାନା, ଆକା ମାପୁରୁଦି ଇଲୁ ଆନାତ୍, ମାରି ନିନୁ ନାଙ୍ଗିଁ ଏମେ ୱିଜୁ ସିନି, ଆବେଣି 3ଦସମାଂସ ନାନୁ ନିଙ୍ଗିଁ ଏଣ୍ତେସ୍ବା ସିନା ।”
Source notes (3)
- Footnote ମେସପଟାମିଆ
- Footnote ମାପୁରୁଦି ଇଲୁ
- Footnote ଦସ୍ବାଗ୍ତାନ୍ ଉଣ୍ତ୍ରି ବାଗ୍
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.