Konda Porja Bible
ପାର୍ତୁମ୍ 29
ଜାକୁବ ଲାବନ୍ତିଙ୍ଗ୍ ଇନ୍ଡ୍ର ସର୍ହାନ୍
ତାନିୱେନେକା ଜାକୁବ ସନିୱାଲେ ଆଗ୍ଡ଼ି ତରିଟି ଲୋକା ଦେସ୍ଦୁ ଇଗା ସର୍ହାନ୍ । ଆବେଟ୍ ୱାନ୍ ସୁଡ଼ୁତାନ୍, ମାରି ସୁଡ଼ୁଦୁ, କିଡ଼ିଇ ନାଡ଼ିମି ଉଣ୍ତ୍ରି କୁଇଁ, ମାରି ସୁଡ଼ୁଆ, ଆୟା ଲାକୁତୁ ମୁଣ୍ତୁରି ମାନ୍ଦେଙ୍ଗ୍ ମେଣ୍ତେଙ୍ଗ୍ ଡରିତେମାନେ; ଇରିଙ୍ଗ୍ ଲୋକୁ ମେଣ୍ତେଆଙ୍ଗାଁ ଆୟା କୁଇଁଦି ଏରୁ ଉଟ୍ପିସ୍ କିନାର୍; ଆୟା କୁଇଁଦୁ ପେରିକାଲୁ ପିଡ଼ିକ୍ନା ମାନାର୍ । ଆୟା କୁଇଁ ଲାକୁତୁ ୱିଜୁ ମେଣ୍ତେଙ୍ଗ୍ ଉଣ୍ତାନେ; ମାରି, ଲୋକୁ କୁଇଁଦୁ ପିଡ଼ିକ୍ନିମାନି କାଲୁ ଗୁସାକିଜି ମେଣ୍ତେଆଙ୍ଗାଁ ଏରୁ ଉଟ୍ପିସ୍ କିନାର୍, ମାରିଡ଼େସି କୁଇଁଦୁ କାଲୁ ପିଡ଼ିକ୍ନାର୍ ।
ଜାକୁବ ୱାରିଙ୍ଗ୍ ୱେନ୍ବାତାନ୍, “ଏ ତୋଡ଼ାନ୍କୁ, ମିରୁ ଏମେ ବାଡିଦି ଲୋକୁ ?” ୱାର୍ ଇର୍ହାର୍, “ମାପୁ ହାରଣ ଗାଡ଼୍ତି ଲୋକୁ ।” ଆର୍ତିଙ୍ଗ୍ ଜାକୁବ ୱେନ୍ବାତାନ୍, “ମିରୁ ନାହୋରଦି ନାତି ଲାବନତିଙ୍ଗ୍ ନେସ୍ତି ମାନିଦେର୍ ନୋ ?” ୱାର୍ ଇର୍ହାର୍, “ମାପୁ ନେସ୍ନାପ୍ ।”
ଜାକୁବ ୱେନେବାତାନ୍, “ୱାନ୍ ନେଗେନ୍ ମାନାନ୍ ନ ?” ୱାର୍ ଇର୍ହାର୍, “ନେଗେନ୍ ମାନାନ୍; ଇଦି ସୁଡ଼ୁଆ, ତାନି ଆଇଲି ରାହେଲ ମେଣ୍ତେଙ୍ଗ୍ ଆସ୍ସି ୱାଜିନାତ୍ ।”
ନାସ୍ତିୱାଲେ ଜାକୁବ ଇର୍ହାନ୍, “ସୁଡୁଆ, ଇଲେଇ ନାଣ୍ତ ୱେଡ଼ା ମାନାତ୍; ମେଣ୍ତେଙ୍ଗ୍ ଉଣ୍ତାକିନି ବେଡ଼ା ଆଏଦେ; ମିରୁ ମେଣ୍ତେଆଙ୍ଗାଁ ଏରୁ ଉଟ୍ପିସ୍ କିଜି ଡ଼େସି ସାରାକିଦେଙ୍ଗ୍ ଅତୁ ।”
ମାତ୍ର ୱାର୍ ଇର୍ହାର୍, “ଆକା ମାପୁ କିଦେଙ୍ଗ୍ ଆଟ୍ଏପ୍; ୱିଜୁ ମେଣ୍ତେଙ୍ଗ୍ ଉଣ୍ତାଦେଙ୍ଗ୍ କାପ୍କିଦେଙ୍ଗ୍ ଆନାତ୍; ଆୟାୱେନେକା କୁଇଁଦି କାଲୁ ଗୁସାକିନାର୍, ଆର୍ତିଙ୍ଗ୍, ମାପୁ ମେଣ୍ତେଆଙ୍ଗ୍ ଏରୁ ଉଟ୍ପିସ୍ କିନାପ୍ ।”
ଜାକୁବ ୱାରିୱାଲେ ଇୟାୱାଜା ୱାର୍ଗିଜି ସାଜିନାର୍, ଆୟାଲୋଇ ରାହେଲ ନିଜେଦି ବୁବାଦି ମେଣ୍ତେଙ୍ଗ୍ ଆସ୍ସି ୱାତାତ୍, ମାତର ୱାଦ୍ ମେଣ୍ତେଙ୍ଗ୍ ସାରାକିନି ଗଡ଼ୁଣି ମାର୍ହାତ୍ । ନାସ୍ତିୱାଲେ ଜାକୁବ ନିଜେଦି ମାମା ଲାବନଦି ଗାଡ଼ି ରାହେଲଦିଙ୍ଗ୍ ମାରି ମାମାଦି ମେଣ୍ତେଙ୍ଗ୍ ମାନ୍ଦା ସୁଡ଼ୁଜି ଲାକୁତୁ ସଲିସ୍ କୁଇଁଦୁ ପିଡ଼ିକ୍ତି କାଲୁ ଗୁସାକିଜି ମାସ୍ସି ଲାବନୱି ମାନ୍ଦାଦିଙ୍ଗ୍ ଏରୁ ଉଟ୍ପିସ୍ କିତାନ୍ । ତାନିୱେନେକା ଜାକୁବ ରାହେଲଦିଙ୍ଗ୍ ନଣ୍ତଜି ୱେଡ଼ିକା ଆଜି ପେରିଆଉଲିଦାନ୍ ଆଡ଼ାବାତାନ୍ । ମାରି ନିଜେ ଜାକୁବ ୱାନି ବୁବାରି କୁଟୁମ୍ ମାରି ରିବିକାଦି ମାରିନ୍, ଇୟା ପରିଚୟ ସିତାନ୍; ଆବେଟ୍ ରାହେଲ ଉରୁକ୍ସି ସଲିସ୍ ନିଜେଦି ବୁବେଙ୍ଗ୍ କାବୁର୍ ୱେର୍ତାତ୍ । ଆବେଟ୍ ଲାବନ ନିଜେଦି ବାଣ୍ଜା ଜାକୁବଦି କାବୁର୍ ୱେନିଜି ୱାନି ୱାଲେ ବେଟ୍ଗାଟ୍ ଆଦେଙ୍ଗ୍ ଉର୍କୁସି ସର୍ହାନ୍, ମାରି ୱାନିଙ୍ଗ୍ ପୋମିଜି ମାରି ନଣ୍ତଜି ନିଜେଦି ଇନ୍ଡ୍ର କୁକ୍ତା ଅତାନ୍; ଆବେଟ୍ ଜାକୁବ ୱିଜୁ କାବୁର୍ ଲାବନତିଙ୍ଗ୍ ୱେର୍ତାନ୍ । ଆବେଟ୍ ଲାବନ ଇର୍ହାନ୍, “ନିନୁ ମା ନେତେର୍ ନି କାଣ୍ତାୱାଜା ।” ଆବେଟ୍ ଜାକୁବ ୱାନି ଇନ୍ଡ୍ର ଉଣ୍ତ୍ରି ଲେଜୁ ସାନ୍ଦି ତେବାତାନ୍ ।
ଜାକୁବ ରାହେଲ ନି ଲେୟାଦିଙ୍ଗ୍ ପେଡ଼ି ଆତାନ୍
ତାନିୱେନେକା ଲାବନ ଜାକୁବଦିଙ୍ଗ୍ ଇର୍ହାନ୍, “ନିନୁ ନା କୁଟୁମ୍ ଇଜି ଇନିକା ଆରେଏ ବୁତିଦାନ୍ ନା ଦାସ୍ ପାଣି କିନି ନୋ ? ଆଦେଙ୍ଗ୍ ଇଲେଇ ଇନି କୁଲି ଅନି ? ଆକା ଇନ୍ଆ ।” ଆୟା ଲାବନଦି ରୁଣ୍ତି ଗାଡ଼ିସ୍କି ମାରେଏ; ପେରିତାନି ଦରୁ ଲେୟା, ଇସ୍ରିଦାନି ଦରୁ ରାହେଲ । ଲେୟା କାଣି ନାନିକାତ୍, ମାତର୍ ରାହେଲ ସୁନ୍ଦିରି ମାରି ଗୁଣୁତିକାତ୍ ମାର୍ହାତ୍ ।
ମାରି ଜାକୁବ ରାହେଲତିଙ୍ଗ୍ ଜିବନ୍ନୋତାନ୍; ଆବେଟ୍ ୱାନ୍ ଇର୍ହାନ୍, “ନି ଇସ୍ରି ଗାଡ଼ି ରାହେଲ ଉଣ୍ତିଙ୍ଗ୍ ନାନୁ ସାତ୍ ବାର୍ସେକ୍ ମିମାନୁ ଗତି ପାଣି କିନା ।”
ଆବେଟ୍ ଲାବନ ଇର୍ହାନ୍, “ଆଇ ଲୋକ୍ତିଙ୍ଗ୍ ସିନି ଦାବୁଲୁ ନିଙ୍ଗିଁ ସିନିକା ନାଣ୍ତ ନେଗେତ୍; ନା ଲାକୁତୁ ମାନିତ୍ ।” ଇୟାୱାଜା ଜାକୁବ ରାହେଲ ଉଣ୍ତିଙ୍ଗ୍ ସାତ୍ ବାର୍ସେକ୍ ଗତିପାଣି କିତାନ୍; ମାରି ରାହେଲ ଉଣ୍ତିଙ୍ଗ୍ ୱାନି ଇୟାୱାଜା ଜିବନ୍ନୋନିକା ମାର୍ହାତ୍, ଆୟା ସାତ୍ ନମ୍ୱର୍ତି ବାର୍ସେକ୍ ୱାନି ଉଣ୍ତିଙ୍ଗ୍ କେବଲ ଉଣା ଦିନ୍ ୱାଜା ଆତାତ୍ ।
ତାନିୱେନେକା ଜାକୁବ ଲାବନଦିଙ୍ଗ୍ ଇର୍ହାନ୍, “ନାନୁ ଗତି କାଟେକିତି କାଡ଼ା ପୁରା ଆତାତ୍, ଇଲେଇ ନାଙ୍ଗିଁ ରାହେଲତିଙ୍ଗ୍ ସିଦା, ନାନୁ ତାନିଙ୍ଗ୍ ପେଡ଼ି କିନା ।” ଆବେଟ୍ ଲାବନ ଆୟା ବାଡିଦୁ ୱିଜୁ ଲୋକାଙ୍ଗ୍ ଉଣ୍ତା କିଜି ବଜି ତିଆର୍ କିତାନ୍ । ମିଲିମିଲିକା ଲାବନ ନିଜେଦି ଗାଡ଼ି ଲେୟାଙ୍ଗ୍ ଆସ୍ସି ଜାକୁବ ଲାକୁତୁ ତାତାନ୍; ମାରି ଜାକୁବ ତାନି ୱାଲେ ଇଲୁଆସ୍ତାର୍ । ମାରି ଲାବନ ନିଜେଦି ଗାଡ଼ି ଲେୟାଦି ସାକରାଣି ଆନି ଉଣ୍ତିଙ୍ଗ୍ ସିଲ୍ପା ଦରୁଦି ନିଜେଦି ସାକରାଣିଙ୍ଗ୍ ସିତାନ୍ । ମାତର୍ ସାଲିଦି ଆତାତ୍, ସୁଡ଼ୁଦୁ, ୱାଦ୍ ତ ଲେୟା! ଆବେଟ୍ ଜାକୁବ ଲାବନତିଙ୍ଗ୍ ଇର୍ହାନ୍, “ନିନୁ ନା ୱାଲେ ଏନ୍ଦା ନିନି ପାଣି କିତି ? ନାନୁ ଇନିକା ରାହେଲ ଉଣ୍ତିଙ୍ଗ୍ ନି ଗତିପାଣି କିଏ; ଆର୍ତିଙ୍ଗ୍ ଏନ୍ଧା ନାଙ୍ଗିଁ ଟକେ କିତି ?”
ଆବେଟ୍ ଲାବନ ଇର୍ହାନ୍, “ପେରିଗାଡ଼ି ମାନୁବୁ ମାନୁବୁ ଇସ୍ରି ଗାଡ଼ିଙ୍ଗ୍ ସିନିକା ମା ଦେସ୍ଦି ନିୟମ୍ ସିଲେତ୍ । ଇୟା ୱାରା ପୁରା କିଆ, ତାନି ୱେନେକା ଜଦି ମାରି ସାତ୍ ବାର୍ସେକ୍ ନା ଗତିପାଣି କିନି, ଆର୍ତିଙ୍ଗ୍ ଆଇ ଆଇଲିଦିଙ୍ଗ୍ ନେ ମିଙ୍ଗିଁ ସିନା ।” ଆବେଟ୍ ଜାକୁବ ଆୟାୱାଜା ୱାରି ୱାରା ପୁରା କିତାନ୍; ଆବେଟ୍ ଲାବନ ତାନି ୱାଲେ ନିଜେଦି ଗାଡ଼ି ରାହେଲଦିଙ୍ଗ୍ ପେଡ଼ିକିତା ସିତାନ୍ । ମାରି ରାହେଲଦି ସାକର ଆନି ଉଣ୍ତିଙ୍ଗ୍ ଲାବନ୍ ନିଜେଦି ବିଲ୍ହା ଦରୁଦି ଦାସିଙ୍ଗ୍ ସିତାନ୍ । ଆବେଟ୍ ରାହେଲଦି ୱାଲେ ବା ଇଲୁଆସ୍ତାର୍ ମାରି ଲେୟା ମାଡ଼ାନ୍ ରାହେଲତିଙ୍ଗ୍ ନାଣ୍ତ ଜିବନ୍ନୋତାନ୍; ମାରି, ସାତ୍ ବାର୍ସୁ ଲାବନତି ଗତିପାଣି କିତାନ୍ ।
ଜାକୁବଦି କଡ଼ର୍ ଆଇଲିକ୍
ତାନିୱେନେକା ପ୍ରବୁ ଲେୟାଦିଙ୍ଗ୍ ଅପମାନ୍ କିନିକା ସୁଡ଼ୁଜି ତାନିଙ୍ଗ୍ ଗାର୍ବୁଦୁ ତେବାନି ସାକ୍ତି ସିତାନ୍; ମାତର୍ ରାହେଲ ବାଞ୍ଜି ଆତାତ୍ । ଲେୟା ଗାର୍ବୁଦୁ ଆଜି କଡ଼ ଜନମ୍ କିତାତ୍, ୱାନି ଦରୁ 1ରୁବେନ୍ ସିତାତ୍; ଏଣ୍ତେସ୍ ୱାଦ୍ ଇର୍ହାତ୍, “ପ୍ରବୁ ନା ଦୁଃକ୍ ସୁଡ଼ୁତାନ୍; ଇଲେଇ ନା କନ୍ଲି ନାଙ୍ଗିଁ ଜିବନ୍ନୋନାନ୍ ।” ମାରି, ୱାଦ୍ ମାରିଡ଼େସି ଗାର୍ବୁଦୁ ଆଜି କଡ଼ ଜନମ୍ କିଜି ଇର୍ହାତ୍, “ନାନୁ ନିସାର୍ଆନି ଲୋକୁ, ଇକା ପ୍ରବୁ ୱେନ୍ଜି ନାଙ୍ଗିଁ ଇୟା କଡ଼ ସିତାନ୍,” ଆଦେଙ୍ଗ୍ ୱାଦ୍ ୱାନି ଦରୁ 2ସିମିୟୋନ୍ ସିତାନ୍ । ଡ଼େସି ୱାଦ୍ ପଟାଦୁ ଆଜି ମାରିନ୍ ଜନମ୍ କିଜି ଇର୍ହାତ୍, “ଇଲେଇ କନ୍ଲି ନା ମାନୁ ଆସା ଆନାନ୍, ଏଣ୍ତେସ୍ ନାନୁ ୱାନି ମୁଏରି ମାରିନ୍କାଙ୍ଗ୍ ଜନମ୍ କିତାମାନା,” ଏଣ୍ତେସ୍ ତାନି ଦରୁ 3ଲେବି ସିତାର୍ । ତାନିୱେନେକା ମାରିଡ଼େସି ୱାଦ୍ ମେନ୍ଦଲତୁ ତେବାଜି, ୱାଦ୍ କଡ଼ ଜନମ୍ କିତାଦ ଇର୍ହାତ୍, “ଇଲେଇ ନାନୁ ପ୍ରବୁଦି ଦନ୍ୟବାଦ୍ କିନା,” ଆବେଟ୍ ୱାଦ୍ ୱାନି ଦରୁ 4ଜିହୁଦା ସିତାତ୍ । ଆୟାୱେନ୍କା ୱାଦ୍ କଡ଼କକ୍ରା ଆନିକା ବନ୍ଦ୍ ଆତାତ୍ ।
Source notes (4)
- Footnote କଡ଼ଦିଙ୍ଗ୍ ସୁଡ଼୍ଆ
- Footnote ୱେନିକାନ୍
- Footnote ଲାଲାୟ୍ଆନିକା
- Footnote ପ୍ରବୁଦି ଦନ୍ୟବାଦ୍
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.