Konda Porja Bible
ପାର୍ତୁମ୍ 40
ଜୋସେପ୍ ଲବୁଦି ଅର୍ତ ୱେର୍ନିକା
ଇୟା ୱିଜୁ ଗଟ୍ନା ୱେନେକା ମିସ୍ରିୟ ରାଜାଦି ଅଙ୍ଗୁର୍ରସ୍ ସିନିକାକାନ୍ ମାରି ୱାର୍ନିକାନ୍ ନିଜେଦି ମାଲିକ୍ ମିସ୍ରିୟ ରାଜାଦି ତରିନ୍ ତାଗିଇ ପାଣି କିତାର୍ । ଆବେଟ୍ ପାର ରାଜା ନିଜେଦି ପେରି ଅଙ୍ଗୁର୍ରସ୍ ସିନିକାନ୍ ମାରି ପେରି ୱାର୍ନିକାନ୍ ଇୟା ରିଏର୍ ଦାସରିଙ୍ଗ୍ ମୁସ୍କୁ ରିସା ଆତାନ୍, ମାରି କାପ୍କିନି ସେନାପତି ଏମେ ଜଇଲି ଇଲୁଦୁ ଜୋସେପ୍ ତରାତା ମାରାନ୍, ଆବେନୁ ୱାରିଙ୍ଗ୍ ବନ୍ଦ୍ କିଜି ଇଟ୍ତାନ୍ । ଆବେଟ୍ କାପ୍କିନିୱାରି ସେନାପତି ଜୋସେପ୍ଦି କିୟୁଦୁ ୱାରିଙ୍ଗ୍ ସର୍ପେକିତାନ୍, ଜୋସେପ୍ ୱାରି ସେବା କିଦେଙ୍ଗ୍ ଆସ୍ତାନ୍ । ଇୟା ୱାଜା ୱାର୍ ଏସୋଦିନ୍ ଜଇଲ୍ତୁ ମାର୍ହାର୍ ।
ତାନିୱେନେକା ମିସ୍ରିୟ ରାଜାର୍ ଆୟା ଜଇଲ୍ତୁମାନି ଅଙ୍ଗୁର୍ରସ୍ ସିନିକାନ୍ ମାରି ୱାର୍ନିକାନ୍ ରିଏର୍ ଉଣ୍ତ୍ରି ନାଡ଼ା ରୁଣ୍ତି ରକମ୍ ଅର୍ତ କିନି ରୁଣ୍ତି ଲୋବୁକୁ ସୁଡ଼ୁତାର୍ । ଆବେଟ୍ ଜୋସେପ୍ ସାଲିଦିନେ ୱାରି ଲାକୁତୁ ୱାନି ୱାଲେ ୱାରିଙ୍ଗ୍ ସିମ୍ରା ସୁଡ଼ୁତାନ୍ । ଆବେଟ୍ ପାର ରାଜାଦି ଏମେ ସାକରଙ୍ଗୁ ୱାନି ୱାଲେ ୱାନିଙ୍ଗ୍ ମାଲିକ୍ତି ଜଇଲ୍ତୁ ବନ୍ଦି ମାରାର୍, ୱାରିଙ୍ଗ୍ ୱାନ୍ ୱେନେବାତାନ୍, “ନେରୁ ମି ମୋକମ୍ ସିମ୍ରା ଏନ୍ଦା ?”
ୱାର୍ ଇର୍ହାର୍, “ମାପୁ ଲୋବୁ ସୁଡ଼ୁତାପ୍, ମାତର୍ ଆବେଣି ଅର୍ତ ଇନ୍ଡ୍ରେଙ୍ଗ୍ ଏନ୍ ସିଲେନ୍ ।” ଆବେଟ୍ ଜୋସେପ୍ ୱାରିଙ୍ଗ୍ ଇର୍ହାନ୍, “ଅର୍ତ କିଦେଙ୍ଗ୍ ନ ମାପୁରୁଦି ଅଦିକାର୍ ସିଲେତ୍ ?” ମାଡ଼ିସ୍ କିଜିନା, “ମି ଲୋବୁ ନାଙ୍ଗିଁ ଇନ୍ଡ୍ରୁ ।”
ଆବେଟ୍ ପେରି ଅଙ୍ଗୁର୍ରସ୍ ସିନିକାନ୍ ଜୋସେପ୍ଦିଙ୍ଗ୍ ନିଜେଦି ଲୋବୁ ମାଟା ୱିକିସ୍ ଇର୍ହାନ୍, “ସୁଡୁଦୁ, ଉଣ୍ତ୍ରି ଅଙ୍ଗୁରୁତିୱା ନା ଆଗିଡ଼ି ମାର୍ହାତ୍, ଆୟା ଅଙ୍ଗୁରୁତିୱାଦୁ ମୁଣ୍ତୁରି କମେଙ୍ଗ୍ ମାର୍ହେ, ମାରି ଆକା ପୁତାତ୍ ଆକା, ଆବେଟ୍ ପୁଙ୍ଗୁଁ ପୁତାତ୍, ମାରି ୱିଜୁ କମେଙ୍ଗ୍ଆଙ୍ଗ୍ ଜୁପା ଜୁପା ଅଙ୍ଗୁର୍ ପାଣ୍ତିତାତ୍ । ନାସ୍ତିୱାଲେ ନା କିୟୁଦୁ ପାର ରାଜାଦି ଅଙ୍ଗୁରୁରସ୍ ଗିଲାସ୍ ମାର୍ହାତ୍ । ମାରି ଆୟା ଗିଲାସ୍ତୁ ନାନୁ ଆୟା ଅଙ୍ଗୁରୁପଲ୍ ଆସ୍ସି ପିସ୍ସି ପାର ରାଜାଦି କିୟୁଦୁ ଆୟା ଗିଲାସ୍ ସିତା ।”
ଆବେଟ୍ ଜୋସେପ୍ ୱାନିଙ୍ଗ୍ ଇର୍ହାନ୍, “ଇବେଣି ଅର୍ତ ଇକା; ଆୟା ମୁଣ୍ତୁରି କମେଙ୍ଗ୍ ମୁଣ୍ତୁରି ନାଣ୍ତିଙ୍ଗ୍ ବୁଜାଜିନାତ୍ । ମୁଣ୍ତୁରି ନାଣ୍ତିଙ୍ଗ୍ ୱେନେକା ପାରୋ ରାଜା ନି ତାଲା ନିକ୍ସି ନିଙ୍ଗିଁ ନିଜେଦି ପଦଦୁ ଡ଼େସି ବାସାକିନାନ୍; ଆବେଟ୍ ନିନୁ ଆଗିଡ଼ିରି ୱାଜା ଅଙ୍ଗୁର୍ରସ୍ ସିନିକାନ୍ ଆଜି ଡ଼େସି ପାରୋ ରାଜାଦି କିୟୁଦୁ ଅଙ୍ଗୁର୍ରସ୍ ସିନି । ମାତର୍ ନି ନେଗିକା ଆତିଙ୍ଗ୍, ନାଙ୍ଗିଁ ଏତ୍ କିନି, ମାରି ନା ତୋରିଙ୍ଗ୍ ଦୟା କିଜି ପାରୋ ରାଜାଦି ଆଗିଡ଼ି ନା ବିସୟ୍ ଇନିଜି ନାଙ୍ଗିଁ ଇୟା ଜେଲ୍ତାନ୍ ମୁକ୍ଡ଼ା କିନି । ଇରିଙ୍ଗ୍ ଏବ୍ରିୟରି ଦେସ୍ତାନ୍ ଲୋକୁ ନାଙ୍ଗିଁ ସତେନେ ଡଙ୍ଗାଁ କିଜି ତାତାମାନାର୍; ମାରି, ଇୟା ବାଡି ମିସର୍ତୁ ବା ନାନୁ ଇନିକା କିଏ, ମାରିବା ୱାର୍ ନାଙ୍ଗିଁ ଇୟା ଜଇଲ୍ତୁ ବନ୍ଦ କିତାମାନାର୍ ।”
ଆବେଟ୍ ୱାନ୍ ନେଗି ଅର୍ତ କିତାନ୍, ପେରି ୱାର୍ନିକାନ୍ ଇକା ସୁଡୁଜି ଜୋସେପ୍ଦିଙ୍ଗ୍ ଇର୍ହାର୍, “ନାନୁ ବା ଲୋବୁ ସୁଡ଼ୁତାମାନା; ସୁଡ଼ୁଆ ନା ତାଲା ମୁସୁକୁ ମୁଣ୍ତୁରି ଡାଡ଼ିଙ୍ଗ୍ ରୁଟିଙ୍ଗ୍ ଦସ୍ତାମାନା । ମୁସୁକୁରି ଡାଡ଼ିଦୁ ପାରୋ ରାଜାଦି ଉଣି ଉଣ୍ତିଙ୍ଗ୍ ଆଇ ଆଇ ଜାତିଦି ଉଣିକା ମାନାତ୍; ମାରି ପଟିଙ୍ଗ୍ ୱାଜି ନା ତାଲାଦୁ ମାନି ଡାଡ଼ିଦାନ୍ ଆକା ପେର୍ଜି ତିର୍ହେ ।”
ନାସ୍ତିୱାଲେ ଜୋସେପ୍ ଇର୍ହାନ୍, “ଇବେଣି ଅର୍ତ ଇକା, ଆୟା ମୁଣ୍ତୁରି ଡାଡ଼ିଦି ମୁଣ୍ତରି ନାଣ୍ତିଙ୍ଗ୍ ବୁଜାକିଜିନାତ୍ ।” ମୁଣ୍ତରି ନାଣ୍ତିଙ୍ଗ୍ ୱେନେକା ପାରୋ ରାଜା ନିଙ୍ଗିଁ ମୁକୁଡ଼ା କିନାନ୍ ମାରି ନି ତାଲା କୟ୍ଜି ନିଙ୍ଗିଁ ମାରାନ୍ ମୁସୁକୁ ଡ଼ନାନ୍, ମାରି, ପଟିଙ୍ଗ୍ ୱାଜି ନି ମେନ୍ଦଲ୍ତି କାଣ୍ତା ତିନେ ।
ମୁନେଟି ୱେନେକା ପାରୋ ରାଜାଦି ଜନମ୍ ଦିନ୍ ଇଗାୱାତାତ୍ ୱାନ୍ ନିଜେଦି ୱିଜୁ ଦାସରି ଉଣ୍ତିଙ୍ଗ୍ ବଜିତିଆର୍ କିତାନ୍ । ଆବେଟ୍ ୱାନ୍ ନିଜେଦି ୱିଜୁ ଦାସରି ଆଗିଡ଼ି ପେରି ଅଙ୍ଗୁର୍ରସ୍ ସିନିୱାନିଙ୍ଗ୍ ମାରି ପେରି ୱାର୍ନିୱାନିଙ୍ଗ୍ କୁକିସ୍ତାନ୍ । ମାରି ଜସେପ୍ଦି ମାଟା ଇସାବ୍ତାନ୍ ପାରୋ ରାଜା ପେରି ଅଙ୍ଗୁର୍ରସ୍ ସିନିୱାନିଙ୍ଗ୍ ୱାନି ନିଜେ ପଦଦୁ ଡ଼େସି ବାସାକିତାନ୍; ଆବେଟ୍ ୱାନ୍ ପାରୋ ରାଜାଦି କିୟୁଦୁ ଅଙ୍ଗୁର୍ରସ୍ ସିଦେଙ୍ଗ୍ ଆସ୍ତାନ୍ । ମାତର୍ ଜୋସେପ୍ ପେରି ୱାର୍ନିୱାନିଙ୍ଗ୍ ମାରାତୁ ଡ଼ତାନ୍ ଆତିଙ୍ଗ୍ବା, ପେରି ଅଙ୍ଗୁର୍ରସ୍ ସିନିକାନ୍ ଜୋସେପ୍ତିଙ୍ଗ୍ ଏତ୍ କିଏତାନ୍, ମାତର୍ ୱାନିଙ୍ଗ୍ ବାଣାତା ସର୍ହାନ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.