Konda Porja Bible
ପାର୍ତୁମ୍ 11
ବାବିଲ୍ ମେଡ଼୍
ପୁର୍ବେ ସାରା ଦୁନିଆଦୁ ଉଣ୍ତ୍ରେ ବାସା ମାରି ଉଣ୍ତ୍ରେ ସାମାନ୍ ବଲୁ ମାର୍ହାତ୍ । ମାରି ଗଟ୍ନା ୱେନେକା ଲୋକୁ ପୁର୍ବେତରିଙ୍ଗ୍ ବୁଲାସାଲା କିବୁ କିବୁ ସିନିୟଦି ଦେସ୍ତୁ ଉଣ୍ତ୍ରି ବାଲିବାଡି ପୋଇଜି ଆବେନୁ ବାସା କିତାର୍ । ତାନିୱେନେକା ୱାର୍ ନିଜେ ନିଜେଦି ଲୋଇ ଇର୍ହାର୍, “ରାଦୁ, ମାଡୁ ଇଟା ତିଆର୍ କିଜି ନେଗେନ୍ତାନ୍ ଆଡ଼ାକ୍ନାଟ୍ ।” ଆବେଟ୍କୁ ଇଟା ୱାରି କାଲୁ ୱାଜା ମାରି ସିକଟ୍ ସିକିଲା ୱାରି ପାଉଡର୍ ୱାଜା ଆତାତ୍ । ମାରି ୱାର୍ ଇର୍ହାର୍, “ରାଦୁ, ମାଡୁ ମା ଉଣ୍ତିଙ୍ଗ୍ ଉଣ୍ତ୍ରି ଗାଡ଼୍ ମାରି ବାଦଡ଼ଦୁ ଇତିନାନି ଉଣ୍ତ୍ରି ନିର୍ଇ ମେଡ଼୍ ତିଆର୍ କିନାଟ୍; ଆବେଟ୍ ମା ଦରୁ ୱିଙ୍ଗିଁନାତ୍, ମାରି ମାଡୁ ସାରା ଦୁନିଆଦୁ ଇନିଙ୍ଗାଁ ଆନିଙ୍ଗାଁ ଆଜି ସାଏଟ୍ ।”
ତାନିୱେନ୍କା ଲୋକୁ ଏମେ ଗାଡ଼୍ ମାରି ନିର୍ଇ ମେଡ଼୍ ତିଆର୍ କିଜି ମାର୍ହାର୍, ଆକା ସୁଡ଼ୁଦେଙ୍ଗ୍ ମାପୁରୁ ରେସି ୱାତାନ୍ । ମାରି ସଦାପ୍ରବୁ ଇର୍ହାନ୍, “ସୁଡ଼ୁଦୁ, ଇୟା ଲୋକୁ ୱିଜେରେ ଏକ୍ଜୁଟ୍ ମାରି ଇୟାୱେରି ବାସାନେ ଉନ୍ଡ୍ରେ, ମାରି ଇଲେଇ ଇୟାକାର୍ ଇୟା ପାଣିଦୁ ତିଆର୍ ଆଜିନାର୍; ଇୟାୱେନ୍କା ଏମେ ଏମେକା କିଦେଙ୍ଗ୍ ବଦା କିନାର୍, ଆବେଟ୍ତାନ୍ ପାଣି କିଦେଙ୍ଗ୍ ଡ଼ିସ୍ଏର୍ । ଇୟାଉଣ୍ତିଙ୍ଗ୍ ୱାର୍ ଏଣ୍ତେସ୍ ନିଜେ ନିଜେଦି ବାସା ବୁଜାଦେଙ୍ଗ୍ ଆଟ୍ଏର୍, ଇୟାଉଣ୍ତିଙ୍ଗ୍ ରାଦୁ, ମାଡୁ ରେସି ସଲସି ଆୟା ଜାଗାଦୁ ୱାରି ବାସାଦି ମାଟାଦିଙ୍ଗ୍ ଆଇ ଆଇକା କିନାଟ୍ ।” ଇୟାୱାଜା ସଦାପ୍ରବୁ ଆୟା ଜାଗାଦାନ୍ ୱାରିଙ୍ଗ୍ ଦୁନିଆଦି ୱିଜୁ ତୋରିନ୍ ଇନିଙ୍ଗାଁ ଆନିଙ୍ଗାଁ କିତାନ୍; ଆବେଟ୍ ୱାର୍ ଗାଡ଼୍ ତିଆର୍ କିଦେଙ୍ଗ୍ ତେବାକିତାର୍ । ଇୟାଉଣ୍ତିଙ୍ଗ୍ ଆୟା ଗାଡ଼୍ତି ଦରୁ ବାବିଲ୍ ଆତାତ୍; ଏଣ୍ତେସ୍କି ସଦାପ୍ରବୁ ଆୟା ଜାଗାଦୁ ସାରା ଦୁନିଆଦି ବାସା ଆଇ ଆଇକା କିତାନ୍, ମାରି, ଆୟା ଜାଗାଦାନ୍ ୱାରିଙ୍ଗ୍ ୱିଜୁ ଦୁନିଆଦୁ ଇନିଙ୍ଗାଁ ଆନିଙ୍ଗାଁ କିତାନ୍ ।
ସେମଦି କୁଟୁମ୍
ସେମଦି କୁଟୁମ୍ ଇକା । ଗାଲିପିରୁଦି ଦୁଇ ବାର୍ସେକ୍ ୱେନେକା ଏସ୍ତିୱାଲେ ସେମ ସହେ ବାର୍ସେକ୍ ଆତି ବୟସ୍ତୁ ଅର୍ପକ୍ଷଦତିଙ୍ଗ୍ ଜନମ୍ କିତାନ୍ । ଅର୍ପକ୍ଷଦ ଜନମ୍ଆତି ୱେନେକା ସେମ ପାସ୍ସୋ ବାର୍ସୁ ଜିଜି ମାରି କଡ଼ର୍ ଜନମ୍ କିତାନ୍ ।
ମାରି ଅର୍ପକ୍ଷଦ ତିରିସ୍ ପାସ୍ ବାର୍ସୁ ବୟସ୍ତାନ୍ ସେଲହଦିଙ୍ଗ୍ ଜନମ୍ କିତାନ୍ । ସେଲହଦି ଜନମ୍ ୱେନେକା ଅର୍ପକ୍ଷଦ ସାର୍ସ ତିନି ବାର୍ସୁ ଜିବନ୍ ମାନିଜି ମାରି କଡ଼ର୍ ଆଇଲିକ୍ ଜନମ୍ କିତାନ୍ ।
ମାରି ସେଲହ ତିରିସ୍ ବାର୍ସୁ ବୟସ୍ତାନ୍ ଏବରତିଙ୍ଗ୍ ଜନମ୍ କିତାନ୍ । ଏବରତି ଜନମ୍ ୱେନେକା ସେଲହ ସାର୍ସ ତିନି ବାର୍ସୁ ଜିଜି ମାରି କଡ଼ର୍ ଆଇଲିକ୍ ଜନମ୍ କିତାନ୍ ।
ମାରି ଏବର ତିରିସ୍ ସାରି ବାର୍ସୁ ବୟସ୍ତାନ୍ ପେଲଗଦିଙ୍ଗ୍ ଜନମ୍ କିତାନ୍ । ପେଲଗଦି ଜନମ୍ ୱେନେକା ଏବର ସାର୍ସ ତିରିସ୍ ବାର୍ସୁ ଜିଜି ମାରି କଡ଼ର୍ ଆଇଲିକ୍ ଜନମ୍ କିତାନ୍ ।
ପେଲଗ ତିରିସ୍ ବାର୍ସୁ ବୟସ୍ତାନ୍ ରିୟୁଙ୍ଗ୍ ଜନମ୍ ଆତାନ୍ । ରିୟୁଦି ଜନମ୍ ୱେନେକା ପେଲଗ୍ ଦୁଇସ ନଅ ବାର୍ସୁ ଜିଜି ମାରି କଡ଼ର୍ ଆଇଲିକ୍ ଜନମ୍ କିତାନ୍ ।
ରିୟୁ ତିରିସ୍ ଦୁଇ ବାର୍ସୁ ବୟସ୍ତାନ୍ ସରୁଗଦିଙ୍ଗ୍ ଜନମ୍ କିତାନ୍ ସରୁଗଦି ଜନମ୍ ୱେନେକା ରିୟୁ ଦୁଇସ ସାତ୍ ନମ୍ୱର୍ତି ବାର୍ସୁ ଜିଜି ମାରି କଡ଼ର୍ ଆଇଲିକ୍ ଜନମ୍ କିତାନ୍ ।
ମାରି ସରୁଗ ତିରିସ୍ ବାର୍ସୁ ବୟସ୍ତାନ୍ ନାହୋରତିଙ୍ଗ୍ ଜନମ୍ କିତାନ୍ । ନାହୋରତି ଜନମ୍ ୱେନେକା ସରୁଗ ଦୁଇସ ବାର୍ସୁ ଜିଜି ମାରି କଡ଼ର୍ ଆଇଲିକ୍ ଜନମ୍ କିତାନ୍ ।
ମାରି ନାହୋର କଡ଼େ ନ ବାର୍ସୁ ବୟସ୍ତାନ୍ ତେରହଙ୍ଗ୍ ଜନମ୍ କିତାନ୍ । ତେରହଦି ଜନମ୍ ୱେନେକା ନାହୋର ସହେ ଉଣିସ୍ ବାର୍ସୁ ଜିଜି ମାରି କଡ଼ର୍ ଆଇଲିକ୍ ଜନମ୍ କିତାନ୍ । ମାରି ତେରହଦିଙ୍ଗ୍ ସତୁରି ବାର୍ସୁ ବୟସ୍ ଆତାତ୍ । ୱାନ୍ ଅବ୍ରାହାମ ମାରି ନାହୋର ମାରି ହାରଣ, ଇୟାୱେରିଙ୍ଗ୍ ଜନମ୍ କିତାନ୍ ।
ତେରହଦି କୁଟୁମ୍
ତେରହଦି କୁଟୁମ୍ । ତେରହ, ଅବ୍ରାମ ମାରି ନାହୋର ମାରି ହାରଣଦିଙ୍ଗ୍ ଜନମ୍ କିତାନ୍ । ମାରି, ଆୟା ହାରଣ ଲୋଟଙ୍ଗ୍ ଜନମ୍ କିତାନ୍; ମାତର୍ ହାରଣ ନିଜେଦି ବୁବା ତେରହରଦି ଆଗିଡ଼ି କଲଦିୟରି ଊର ଦରୁତି ନିଜେଦି ଜନମ୍ଆତି ଦେସ୍ଦୁ ସାତାନ୍ । ଇୟାୱେନ୍କା ଅବ୍ରାମ ମାରି ନାହୋର ପେଡ଼ି କିତାର୍; ଅବ୍ରାମଦି ଆଡ଼ିସି ଦରୁ ସାରି ମାରି ନାହୋରଦି ଆଡ଼ିସି ଦରୁ ମିଲ୍କା, ୱାଦ୍ ହାରଣଦି ଆଇଲି ମାର୍ହାତ୍; ଆୟା ହାରଣ ମିଲ୍କା ନି ଜିସ୍କାରଦି ବୁବା ମାର୍ହାନ୍ । ଆୟା ସାରି ବାଞ୍ଜି ମାର୍ହାତ୍, ତାନିଙ୍ଗ୍ କଡ଼ର୍ ଆଇଲିକ୍ ଆଏଜି ମାର୍ହାର୍ ।
ତେରହ ନିଜେଦି ମାରିସି ଅବ୍ରାମତିଙ୍ଗ୍ ମାରି ହାରଣଦି ମାରିସି ଲୋଟ ଦରୁତି ମାରିସିଙ୍ଗ୍, ମାରି ଅବ୍ରାମତି ଆଡ଼ି ସାରି ଦରୁଦି କଡ଼ିୟାବୁଡିଙ୍ଗ୍ ଅରେସ୍ ଅତାନ୍; ମାରି ଆୟା ୱିଜେରେ କଲଦିୟରି ଊରଦି ମାଡ଼ାନ୍ କିଣାନ୍ ଦେସ୍ଦୁ ସଲ୍ସି ହାରଣ ଗାଡ଼୍ତୁ ଇଜି ବାସା କିତାର୍ । ମାରି, ତେରହ ଏସ୍ତିୱାଲେ ଦୁଇସ ପାଞ୍ଚ୍ ବାର୍ସେକ୍ ଜିଜି ହାରଣ ଗାଡ଼୍ତୁ ସାତାନ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.