Konda Porja Bible
ପାର୍ତୁମ୍ 13
ଅବ୍ରାମ ନି ଲୋଟ ୱେରେଏ ଆତାର୍
ତାନିୱେନେକା ଅବ୍ରାମ ନିଜେଦି ଆଇମା ମାରି ୱିଜୁ ଦନ୍ ଅସି ଲୋଟ ୱାଲେ ମିସର ଦେସ୍ତାନ୍ ସସି କିଣାନ୍ ଦେସ୍ତି ଉଣେରି ତରିନ୍ ସର୍ହାର୍ । ଅବ୍ରାମ ଗୋରିଏଙ୍ଗ୍, ମେଣ୍ତେଙ୍ଗ୍ ମାରି ଜାତୁ ମାରି ବାଙ୍ଗାଁରାମ୍, ୱେଣ୍ତିଦୁ ନାଣ୍ତଦାନ୍ ମାଜନ୍ ମାର୍ହାନ୍ । ମାରି, ୱାନ୍ ପୁର୍ବେଦି ବୁଲାସାଲାଇ ଇସାପ୍ତାନ୍ ଉଣେରି ତରିଟାନ୍ ବେତେଲ ତୋରିନ୍ ସଲୁପୁ ସଲୁପୁ ବେତେଲ ମାରି ଅୟର ନାଣିମି ଏମେ ଜାଗାଦୁ ପୁର୍ବେ ୱାରି ଗୁଡ଼ା ତିଆର୍ କିତାମାର୍ହାର୍, ଆୟା ଜାଗାଦୁ ଅବ୍ରାମ ଇଗା ସଲିସି ନିଜେଦି ପୁର୍ବେଦି ତିଆର୍ କିତି ପୁଜାବେଦି ଲାକୁତୁ ମାପୁରୁ ଦରୁଦାନ୍ ପାର୍ତନା କିତାନ୍ ।
ମାରି ଅବ୍ରାମଦି ସାଙ୍ଗ ଲୋଟଦିଙ୍ଗ୍ ବା ନାଣ୍ତ ମେଣ୍ତେଙ୍ଗ୍, ଡ଼ାକୁ ମାରି ନିଜେଦି ଇଲୁ ମାରି ଦାସ୍ର୍ ମାର୍ହାତ୍ । ଇୟା ଉଣ୍ତିଙ୍ଗ୍ ଆୟା ଦେସ୍ ୱାର୍ ଉଣ୍ତ୍ରେମାନୁ ବାସା କିନି ଉଣ୍ତିଙ୍ଗ୍ ଟିକ୍ ଆଏତାତ୍, ମାତର ୱାରିଙ୍ଗ୍ ନାଣ୍ତ ଜାତୁଙ୍ଗ୍ ମାନ୍ଧା ମାନିଙ୍ଗ୍ ୱାର୍ ଉଣ୍ତ୍ରେମାନୁ ବାସା କିଦେଙ୍ଗ୍ ଆଟ୍ଏତାର୍ । ମାରି, ଅବ୍ରାମଦି ଗଡ଼ୁଏନ୍ ମାରି ଲୋଟଦି ଗଡ଼ୁଏନ୍ ନିଜେ ନିଜେଦି ଲୋଇ ବିରୁଦ୍ ଆତାର୍ । ଆୟା ବେଡ଼ାଦୁ ଆୟା ଦେସ୍ତୁ କିଣାନିୟ ମାରି ପରିସିୟ ଲୋକୁ ବାସା କିଜି ମାର୍ହାର୍ ।
ଆବେଟ୍ ଅବ୍ରାମ ଲୋଟଙ୍ଗ୍ ଇର୍ହାନ୍, “ନାନୁ ଅନୁରଦ୍ କିଜିନା, ନି ମା ନାଣିମି, ମାରି ମି ଗଡ଼ୁଏନ୍ ମାରି ନା ଗଡ଼ୁଏନ୍ ନାଣିମି ଜଗଡ଼ା ଆମାକିତ୍, ଇରିଙ୍ଗ୍ ମାଡୁ ତ ନିଜେଦିଲୋକୁ । ନି ଆଗିଡ଼ି ନୋ ଇନିକା ଇୟାୱିଜୁ ଦେସ୍କୁ ସିଲୁ ? ଇଲେଇ ନିଙ୍ଗିଁ ମାଡ଼ିସ୍ କିଜିନା, ନିନୁ ନା ମାଡ଼ାନ୍କୁ ଆକ ଆଆ; ସିଲେତିଙ୍ଗ୍, ନିନୁ ଡେବିରି ତରିନ୍ ସରିଙ୍ଗ୍, ନାନୁ ଉଣି ତରିନ୍ ସନା; ସିଲେତିଙ୍ଗ୍ ନିନୁ ଉଣି ତରିନ୍ ସରିଙ୍ଗ୍, ନାନୁ ଡେବିରି ତରିନ୍ ସନା ।”
ନାସ୍ତିୱାଲେ ଲୋଟ୍ ମାର୍ଜି ସୁଡ଼ୁତାନ୍, ସୋୟର ସାନ୍ଦି ଜର୍ଦନଦି ୱିଜୁ ବାଡି ପ୍ରବୁଦି ଡଡି ୱାଜା ୱିଜୁ ନେଗିକା ମାରି ମିସର ଦେସ୍ ୱାଜା ମାର୍ହାତ୍; ମାତର୍ ଆୟା ବେଡ଼ାଦୁ ସଦୋମ ମାରି ହମରା ପ୍ରବୁଦି ମାଡ଼ାନ୍ ନାଷ୍ଟୁ ଆଏତ୍ ମାର୍ହାତ୍ । ଆବେଟ୍ ଲୋଟ ନିଜେଦି ଉଣ୍ତିଙ୍ଗ୍ ଜର୍ଦନଦି ବାଲିବାଡି ବାସେ କିଜି ୱେଡ଼ାସନି ତରିନ୍ ସର୍ହାନ୍; ଇୟାୱାଜା ୱାର୍ ରିଏର୍ ୱେରେଏ ଆତାର୍ । ଆବେଟ୍କୁ ଅବ୍ରାମ କିଣାନ୍ ଦେସ୍ତୁ ବାସା କିତାନ୍, ମାରି, ଲୋଟ ଆୟା ବାଲିବାଡିଦି ୱିଜୁ ଗାଡ଼୍ତି ନାଡ଼୍ମି ବାସା କିଜି ସଦୋମ ସାନ୍ଦି ଗୁଡ଼ା ତିଆର୍ କିଦେଙ୍ଗ୍ ଆସ୍ତାନ୍ । ଆୟା ସଦୋମଦି ଲୋକୁ ନାଣ୍ତ ତାଗ୍ଇକା ମାରି ମାପୁରୁଦି ଆଗିଡ଼ି ନାଣ୍ତ ପାପ୍ ମାର୍ହାର୍ ।
ଅବ୍ରାମ ହିବ୍ରଣ ତରିନ୍ ସର୍ହାନ୍
ତାନିୱେନେକା ଅବ୍ରାମଦି ମାଡ଼ାନ୍କୁ ଲୋଟ ୱେରେଏ ଆତି ୱେନେକା ସଦାପ୍ରବୁ ଅବ୍ରାମଦିଙ୍ଗ୍ ଇର୍ହାନ୍, “ଇଲେଇ ନିନୁ ଏମେମାନୁ ମାନି; ଆବେଣାନ୍ ସାରିବେଡ଼ିତି ତରିନ୍ ସୁଡ଼ୁଆ; ମାତର୍ ଇୟା ଇସ୍ରି ଦେସ୍ ନିନୁ ସୁଡ଼ୁଜିନି, ଆକା ମାପୁ ନିଙ୍ଗିଁଆ ମାରି ଜୁଗ୍ ୱିଜିନିସାନ୍ଦି ମି କୁଟୁମୁତିଙ୍ଗ୍ ସିନାପ୍ । ମାରି ଦୁନିଆଦି ଦୁଲି ୱାଜା ମାପୁ ମି କୁଟୁମୁଦିଙ୍ଗ୍ ପିରିସ୍ କିନା; ଏନ୍ ଏସାଙ୍ଗ୍ ଦୁନିଆଦି ଦୁଲି ଲେକିସ୍କିଦେଙ୍ଗ୍ ଆଟ୍ନାନ୍, ଆର୍ତିଙ୍ଗ୍ ମି କୁଟୁମ୍ ଲେକିସ୍କିଦେଙ୍ଗ୍ ଆନାତ୍ । ନିଙ୍ଗିଁଆ, ଇୟା ଦେସ୍ତୁ ୱିଜୁ ତୋରିଙ୍ଗ୍ ବୁଲାଆ; ଆବେଟ୍ ମାପୁ ମିଙ୍ଗିଁ ଆକା ସିନାପ୍ ।” ନାସ୍ତିୱାଲେ ଅବ୍ରାମ ଗୁଡ଼ା ୱିରିସି ହିବ୍ରୋଣ ଲାକୁତୁ ମମ୍ରିଦି ଅଲୋନ ମାରାନ୍ ମଦରୁ ସଲିସ୍ ବାସା କିତାନ୍, ମାରି ଆବେନୁ ମାପୁରୁଦି ଆଦେସ୍ତାନ୍ ଉଣ୍ତ୍ରି ପୁଜାବେଦି ତିଆର୍ କିତାନ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.