Konda Porja Bible
ପାର୍ତୁମ୍ 14
ଅବ୍ରାମ ଲୋଟଙ୍ଗ୍ ରକିୟାକିତାନ୍
ତାନିୱେନେକା ସିନିୟରଦି ଅମ୍ରାପଲ ରାଜା ମାରି ଇଲ୍ଲାସରଦି ଅରିୟୋକ ରାଜା ମାରି ଏଲମଦି କଦର୍ଲାୟୋ ରାଜା ଅରିୟୋଲ ରାଜା ଏଲମଦି କଦର୍ଲାୟୋଆମଦି ରାଜା ମାରି ଗୋରିୟିମର ତିଦିୟଲ୍ ରାଜାଦି ଅଦିକାର୍ ବେଡ଼ାଦୁ, ଇୟାକାର୍ ସଦୋମଦି ରାଜା ବିରା ମାରି ହମରାଦି ରାଜା ବିର୍ସା ମାରି ଅଦ୍ମାର ରାଜା ସିନାବ୍ ମାରି ସବୋୟିମଦି ରାଜା ସିମେବର୍ ମାରି ବିଲାର୍, ସୋୟରଦି ରାଜା ୱାଲେ ଜୁଦ୍ କିତାର୍ । ଇୟାୱିଜେରେ ସିଦ୍ଦିମ କିଡ଼ିଇଦୁ, ସରୁ ସାମ୍ଦୁର୍ ଲାକୁତୁ ଉଣ୍ତାତା ମାର୍ହାର୍ । ଏଣ୍ତେସ୍ ୱାର୍ ବାର ବାର୍ସୁ ସାନ୍ଦି କଦର୍ଲାୟୋମର୍ ରାଜାଦି ମାନୁ ମାନିଜି ତେର ବାର୍ସେକ୍ତୁ ୱାରି ବିରୁଦ୍ ଆତାମାର୍ହାର୍ । ଆବେଟ୍କୁ ସଉଦ ବାର୍ସୁଦୁ କଦର୍ଲାୟୋମ ରାଜା ମାରି ୱାରି ସାକା ରାଜାଦି ଜାଗାଦୁ ୱାଜି ଅସ୍ତରୋତ୍ କର୍ଣ୍ନୟମଦି ରପାୟିୟ ଲୋକାଙ୍ଗ୍ ମାରି ହମରଦି ସୁସିୟ ଲୋକାଙ୍ଗ୍ ମାରି ସାବି କିରିୟତୟିମ୍ଦୁ ଏମିୟ ଲୋକାଙ୍ଗ୍, ମାରି ବାଲିବାଡିଦି ଲାକୁତୁ ଏଲ-ପାରଣ ସାନ୍ଦି ସେୟିଦି ଗୋରନ୍ତି ଲୋକୁ ହୋରିୟ ଲୋକାଙ୍ଗ୍ ଜିଣାତାର୍ । ମାରି ୱାର୍ ଆୟା ଜାଗାଦାନ୍ ଡ଼େସି ଐଣ୍ମିସ୍ପଟ୍, ମାରି, କାଦେସ୍ଦୁ ସଲିସ୍ ଅମାଲେକିୟ ଲୋକାଙ୍ଗ୍ ୱିଜୁ ଦେସ୍ ମାରି ହତ୍ ସସୋନ୍ ତାମରଦି ଲୋକୁ ଇମୋରିୟ ଲୋକାଙ୍ଗ୍ ଆରାକିତାର୍ । ଆବେଟ୍ ସଦୋମଦି ରାଜା ମାରି ହମରାଦି ଅଦ୍ମାର ରାଜା ମାରି ଅର୍ମରଦି ରାଜା ସବୋୟିମତି ରାଜା ମାରି ବିଲାର୍, ଅର୍ତାତ୍, ସୋୟରଦି ରାଜା, ଇୟା ପାସ୍ ରାଜା ମିସାତାର୍, ଏଲମଦି କଦର୍ଲାୟିମଦି ରାଜା ମାରି ଗୋୟିମର ତିଦିୟଲ୍ ରାଜା ମାରି ସିନିୟରଦି ଅମ୍ରାପଲ ରାଜା ମାରି ଇଲ୍ଲାସରଦି ଅରିୟୋକ ରାଜା, ଇୟା ନାଲ୍ଏର୍ ରାଜାଦି ୱାଲେ ସିଦ୍ଦିମ କିଡ଼ିଇଦୁ ଜୁଦ୍ କିଦେଙ୍ଗ୍ ଆସ୍ତାର୍ । ଆୟା ସିଦ୍ଦିମ କିଡ଼ିଇଦୁ କାଣେଲ୍ ସିକ୍ଲାଦି ନାଣ୍ତ ଗୁଟେଙ୍ଗ୍ ମାରେଏ; ସଦୋମ ମାରି ହମରାଦି ରାଜାର୍ ଉରୁକ୍ବୁ ଉରୁକ୍ବୁ ଆୟା ମାନୁ ଆର୍ତାର୍, ମାରି ଏସୋଲୋକୁ ତେବାତାର୍, ୱାର୍ ଗୋରକାଙ୍ଗ୍ ଉରୁକ୍ସି ସର୍ହାର୍ । ଆୟା ଉଣ୍ତିଙ୍ଗ୍ ୱାର୍ ସଦୋମ ମାରି ହମରାଦି ୱିଜୁ ସମ୍ପତି ମାରି ଉଣି ତିନିକା ଡ଼ିବିସ୍ କିଜି ଆସ୍ସି ସର୍ହାର୍ । ମାରି ଅବ୍ରାମ୍ତି ଦାଦ୍ସି ମାରିନ୍ ସଦୋମଦୁମାନି ଲୋକୁ ଲୋଟଙ୍ଗ୍ ମାରି ୱାରି ୱିଜୁ ସମ୍ପତି ଆସ୍ସି ସର୍ହାର୍ ନାସ୍ତିୱାଲେ ଅରେନ୍ ଉର୍କୁନିକାନ୍ ଏବ୍ରିୟ ଅବ୍ରାମତିଙ୍ଗ୍ କାବୁର୍ ସିତାନ୍; ଆୟା ବେଡ଼ାଦୁ ଅବ୍ରାମ ଇଷ୍କୋଲ୍ ମାରି ଆନେରଦି ତୋଡ଼ାନ୍ ଇମୋରିୟ ମମ୍ରିଦି ଅଲୋନ ମାରାନ୍ ଆଡିଗି ବାସା କିଜି ମାର୍ହାର୍, ମାରି ୱାର୍ ଅବ୍ରାମଦି ସାକା ମାର୍ହାର୍ । ନାସ୍ତିୱାଲେ ଅବ୍ରାମ ନିଜେଦି ଲୋକାଙ୍ଗ୍ ଆସାୟାଆନି ସନି କାବୁର୍ ୱେର୍ଇ ଦାପ୍ରେ ନେସ୍ତି ନିଜେଦି ଇଲୁଦୁ ଜନମ୍ଆତିମାନି ତିନିସ ଅଟ୍ର ଲୋକାଙ୍ଗ୍ ଅରେସ୍ ଅସି ସାତ୍ରୁରି ୱେନେକା ୱେନେକା ଉରୁକ୍ସି ଦାନ୍ ଗାଡ଼୍ ସାନ୍ଦି ସର୍ହାର୍ । ତାନିୱେନେକା ୱାନ୍ ନିଜେଦି ଦାସରିଙ୍ଗ୍ ରୁଣ୍ତି ଦଲକୁ କିଜି ନାଡ଼ା ବେଡ଼ାଦୁ ସାତ୍ରୁରିଙ୍ଗ୍ ଡାକ୍ତାର୍ । ୱାର୍ ୱାରିଙ୍ଗ୍ ଆରା କିଜି ଦମ୍ମେସକଦି ଡେବ୍ରିତରିନ୍ତି ହୋବା ସାନ୍ଧି ୱାରି ୱେନେକା ୱେନେକା ଉଲୁପ୍ତାର୍ । ମାରି, ୱିଜୁ ଦନ୍ ମାରି ନିଜେଦି ତଡ଼ାନ୍ ଲୋଟ ମାରି ୱାରି ସମ୍ପତି, ମାରି ଆଇମେକାଙ୍ଗ୍ ମାରି ଲୋକାଙ୍ଗ୍ ଡ଼େସି ତାତାର୍ ।
ଅବ୍ରାମତିଙ୍ଗ୍ ମଲ୍କିସେଦ୍ତି ଆର୍ସିବାଦ୍
ଇୟାୱାଜା ଅବ୍ରାମ କଦର୍ଲାୟୋମଦିଙ୍ଗ୍ ମାରି ୱାରି ସାଙ୍ଗ ରାଜାରିଙ୍ଗ୍ ଜିଣାଜି ଡ଼େସିୱାନି ୱାଲେ, ସଦୋମ ରାଜା ୱାନି ୱାଲେ ବେଟ୍ଆନି ଉଣ୍ତିଙ୍ଗ୍ ସାବି କିଡ଼ିଇଦୁ, ରାଜାର୍ କିଡ଼ିଇଦୁ ବୁଲାତାର୍ । ମାରି ସାଲେମଦି ରାଜା ମଲ୍କିସେଦକ ରୋଟି ମାରି ଅଙ୍ଗୁର୍ରସ୍ ଆସ୍ସି ୱାତାନ୍; ୱାନ୍ ପେରି ମାପୁରୁଦି ଜାଜକ ମାର୍ହାନ୍; ୱାନ୍ ଅବ୍ରାମଦିଙ୍ଗ୍ ଆର୍ସିବାଦ୍ କିଜି ଇର୍ହାନ୍, ଅବ୍ରାମ ମୁସ୍କୁପୁର୍ ମାରି ଦୁନିଆଦି ଅଦିକାର୍ ପେରି ମାପୁରୁ ଆର୍ସିବାଦ୍ ଆପିତ୍; ପେରି ମାପୁରୁ ଦନ୍ୟ ଆପିନ୍, ୱାନ୍ ମି ସାତ୍ରୁରିଙ୍ଗ୍ ମି କିୟୁଦି ସର୍ପେ କିତାନ୍ । ନାସ୍ତିୱାଲେ ଅବ୍ରାମ ୱିଜୁ ଜିନିସ୍ତି ଦସ୍ ବାଗ୍ତାନ୍ ଉଡ୍ରି ବାଗ୍ ମଲ୍କିସେଦକତିଙ୍ଗ୍ ସିତାନ୍ । ସଦୋମଦି ରାଜା ଅବ୍ରାମତିଙ୍ଗ୍ ଇର୍ହାନ୍, “ନିନୁ ୱିଜୁ ସମ୍ପତି ଅଆ, ମାତ୍ର ଲୋକାଙ୍ଗ୍ ମାଙ୍ଗିଁ ସିଦା ।” ଆବେଟ୍କୁ ଅବ୍ରାମ ସଦୋମଦି ରାଜେଙ୍ଗ୍ ଇର୍ହାନ୍, “ନାନୁ ମୁସ୍କୁପୁର୍ ମାରି ଦୁନିଆଦି ଅଦିକାରି ପୟ୍ତି ପେରି ମାପୁରୁଙ୍ଗୁଁ ଉଦେସ୍ତାନ୍ ପାର୍ମାଣ୍ କିଜି ଇର୍ହାମାନା ଜେ, ନାନୁ ମିଦି ଇନିକା ଅଏ, କାଣ୍ତେକ୍ ନୁଲ୍ ନି ଜୁତାଦି ପିତା ବା ଅଏ; ୱେନେକା ମିରୁ ଇନିଦେରେ, ମାପୁ ଅବ୍ରାମ୍ତିଙ୍ଗ୍ ମାଜନ୍ କିତାମାନାପ୍ । କେବଲ ନା ମୁରୁଲି ଲୋକୁ ଏମେକା ଉଟାମାନାର୍, ଆକା ଅନା, ମାରି ନା ଏମେ ସାଙ୍ଗ୍ ଲୋକୁ ସର୍ହାମାର୍ହାର, ୱାର୍, ଆନେର୍ ମାରି ଇଷ୍କୋଲ୍ ମାରି ମମ୍ରି ନିଜେ ନିଜେ ପୋଇତିମାନି ବାଗ୍ ଅପିର୍ ।”
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.