Konda Porja Bible
ପାର୍ତୁମ୍ 20
ଅବ୍ରାହାମ ନି ଅବିମେଲକ
ତାନିୱେନେକା ଅବ୍ରାହାମ ଆବେଟ୍ତାନ୍ ଉଣେରି ତରିନ୍ ସଲ୍ସି କାଦେସ୍ ମାରି ସୁରଦି ନାଡ଼ିମି ବାଡିଦୁ ତେବାଜି ଗରାରଦୁ ବାସା କିତାନ୍ । ମାରି ଅବ୍ରାହାମ ନିଜେଦି ଆଡ଼ି ସାରା ବିସୟ୍ତାନ୍ ଇର୍ହାନ୍, “ୱାଦ୍ ନା ତାଙ୍ଗିଁ; ଆବେଟ୍ତାନ୍ ଗରାରଦି ରାଜା ଅବିମେଲେକ ଲୋକୁ ପୋକସି ସାରାଦିଙ୍ଗ୍ ଆସ୍ସି ଅତାନ୍ ।” ଆୟା ନାଡ଼ା ମାପୁରୁ ଲବେରୁ ଅବିମେଲକଦି ଲାକୁତୁ ୱାଜି ଇର୍ହାନ୍, “ସୁଡ଼ୁଆ, ନିନୁ ସାନି, ଇରିଙ୍ଗ୍ ଏମେ ଆଇମାଦିଙ୍ଗ୍ ନିନୁ ଅତିମାନି, ୱାନି କନ୍ଲି ମାନାନ୍ ।”
ମାତର୍ ଅବିମେଲକ ତାନି ୱାଲେ ଡର୍ଇ ମାନିଙ୍ଗ୍ ଇର୍ହାନ୍, “ଏ ପ୍ରବୁ, ଏମେ ଦେସ୍ତି ଲୋକୁ ଦସ୍ସିଲିକା, ୱାରିଙ୍ଗ୍ ଇନିକା ନିନୁ ସାପିସ୍ କିନି ? ଆୟା ଲୋକୁ ନେ ନିଜେ ନାଙ୍ଗିଁ ଇନ୍ଏତା ମାର୍ହାନ୍ ଜେ, ୱାଦ୍ ନା ତାଙ୍ଗିଁ ? ମାରି, ଆୟା ଆଇମା ନିଜେ ଇର୍ହାତ୍ ଜେ ୱାନ୍ ନା ତଡ଼ାନ୍; ଆବେଟ୍ ମୋନତି ସାନ୍ତି ମାରି କିୟୁଦି ଦୋଷସିଲିକା ନାନୁ ଇୟା ପାଣି କିଜିନା ।”
ଆଦେଙ୍ଗ୍ ମାପୁରୁ ଲବେରାନ୍ ୱାନିଙ୍ଗ୍ ଇର୍ହାନ୍, “ମି ମୋନତି ଉଣ୍ତିଙ୍ଗ୍ ଇୟା ପାଣି କିଜିନିଦେର୍; ଇକା ମାପୁ ନେସ୍ନାପ୍; ମାରି ମାପୁ ବା ମା ବିରୁଦ୍ତାନ୍ ପାପ୍ କିଦେଙ୍ଗ୍ ମିଙ୍ଗିଁ ମାନା କିତାପ୍; ଇୟା ଉଣ୍ତିଙ୍ଗ୍ ତାନିଙ୍ଗ୍ ମୁଟ୍ତେଙ୍ଗ୍ ବା ନିଙ୍ଗିଁ ସିଏତାପ୍ । ଆବେଟ୍ ଇଲେ ଆୟା ଲୋକାଦି ଆଇମାଦିଙ୍ଗ୍ ଡ଼େପ୍ସି ସିଦୁ; ଏଣ୍ତେସ୍କି ୱାନ୍ ବବିସ୍ୟଦ୍ବକ୍ତା, ୱାନ୍ ମି ଉଣ୍ତିଙ୍ଗ୍ ପାର୍ତନା କିନାନ୍, ଆବେଟ୍କୁ ମିରୁ ଜିନିଦେରେ; ମାତର୍ ଜଦି ତାନିଙ୍ଗ୍ ଡ଼େସିସିଇଦେରେ, ଆର୍ତିଙ୍ଗ୍ ସତେନେ ମି ଇଲୁପରିବାର୍ ସାନିଦେରେ, ଇକା ନେସ୍ସମାଣ୍ତ୍ରୁ ।”
ଇୟାୱେନେକା ଅବିମେଲକ ନାଡ଼ାକାନେ ନିଙ୍ଗିଁଜି ଦାସରିଙ୍ଗ୍ କୁକ୍ସି ଇୟାୱିଜୁ ମାଟା ୱାରିଙ୍ଗ୍ ୱେର୍ତାନ୍, ୱାର୍ ନାଣ୍ଡ୍ ତିଲାତା ମାର୍ହାର୍ । ଆବେଟ୍କୁ ଅବିମେଲକ ଅବ୍ରାହାମଦିଙ୍ଗ୍ କୁକ୍ସି ଇର୍ହାନ୍, “ନିନୁ ମା ଉଣ୍ତିଙ୍ଗ୍ ଇୟାୱାଜା ପାଣି କିତି ? ନିନୁ ଜେ ମାଙ୍ଗିଁ ମାରି ମା ଦେସ୍ତିଙ୍ଗ୍ ନାଣ୍ତ ପାପ୍ଦୁ ବର୍ତ୍ତିକିତି, ମାପୁ ମି ବିରୁଦ୍ତାନ୍ ଇୟାୱାଜା ଇନିକା ଦୋସ୍ କିତାମାନାପ୍ ? ନିନୁ ମା ଉଣ୍ତିଙ୍ଗ୍ ଏନ୍ଦା ତାଗ୍ଇ ପାଣି କିତି ।” ଅବିମେଲକ ଅବ୍ରାହାମଦିଙ୍ଗ୍ ମାରି ଇର୍ହାନ୍, “ନିନୁ ଇନିକା ସୁଡ଼ୁଜି ଇୟାୱାଜା ପାଣି କିତି ?”
ନାସ୍ତିୱାଲେ ଅବ୍ରାହାମ ଇର୍ହାନ୍, “ଇୟା ଦେସ୍ତୁ ମାପୁରୁଦି ଉଣ୍ତିଙ୍ଗ୍ ଇନି ତିଏଲ୍ ସିଲେତ୍; ଇୟା ଉଣ୍ତିଙ୍ଗ୍ ନାନୁ ସିନ୍ତାକିତା, ଇୟାକାର୍ ତ ନା ଆଡ଼ିଙ୍ଗ୍ ଲୋବ୍ତାନ୍ ନାଙ୍ଗିଁ ସାପିସ୍ କିନାର୍ । ୱାଦ୍ ନା ତାଙ୍ଗିଁ, ଇକା ସତ୍, ଏଣ୍ତେସ୍ ୱାଦ୍ ନା ବୁବାଦି ଗାଡ଼ି, ୟାୟାଦି ଗାଡ଼ି ସିଲେ, ମାରି, ନା ଆଡ଼ି ଆତାତ୍ । ଏସ୍ତିୱାଲେ ମାପୁରୁ ନାଙ୍ଗିଁ ବୁବାଦି ଇଲ୍ତାନ୍ ସପ୍ସି ତାତାନ୍, ନାସ୍ତିୱାଲେ ନାନୁ ତାନିଙ୍ଗି ଇର୍ହା, ନିନୁ ନା ଉଣ୍ତିଙ୍ଗ୍ ଦୟା କିନି, ମାଡୁ ଏମେ ଏମେ ଜାଗାଦୁ ସନାପ୍, ଆୟା ଆୟା ଜାଗାଦୁ ନିନୁ ନାଙ୍ଗିଁ ତଡ଼ାନ୍ ଇଜି ୱେର୍ନି ।”
ନାସ୍ତିୱାଲେ ଅବିମେଲକ ୱାନି ଆଡ଼ି ସାରାଦିଙ୍ଗ୍ ବା ଡ଼େସି ସିତାନ୍, ମାରିବା ମେଣ୍ତେଙ୍ଗ୍ ମାରି ଡ଼ାକୁକଡ଼ିଙ୍ଗ୍ ମାରି ସାକର୍ ସାକ୍ରାଣିକାଙ୍ଗ୍ କୁକ୍ସି ଅବ୍ରାହାମଦିଙ୍ଗ୍ ସିତାନ୍ । ତାନିୱେନେକା ଅବିମେଲକ ଅବ୍ରାହାମତିଙ୍ଗ୍ ଇର୍ହାନ୍, “ସୁଡ଼ୁଆ ମା ଇୟା ୱିଜୁ ଦେସ୍ ମି ଆଗ୍ଡ଼ି ମାନାତ୍, ମିଙ୍ଗିଁ ଏମେମାନୁ ବଦା, ଆବେନୁ ବାସା କିଆ ।” ମାରି ୱାନ୍ ସାରେଙ୍ଗ୍ ଇର୍ହାନ୍, “ସୁଡ଼ୁଆ, ମାପୁ ମି ତଡ଼ାନ୍ତିଙ୍ଗ୍ ଏକ୍ ଆଜାର୍ ୱେଣ୍ତି ସିତାପ୍; ସୁଡ଼ୁଆ, ଆକା ମି ଉଣ୍ତିଙ୍ଗ୍ ଗଟାତିମାନି ଆୟା ବିସୟ୍ ଉଣ୍ତିଙ୍ଗ୍ ୱିଜେରି ଆଗ୍ଡ଼ି କାଣାଗାଦି ପିଡ଼ିକ୍ତି ୱାଜା; ମାରି ୱିଜୁ ବିସୟ୍ତାନ୍ ନି ଉଣ୍ତିଙ୍ଗ୍ ନିୟାୟ୍ ବିସାର୍ କିଆୟ୍ଆତାତ୍ ।” ତାନିୱେନେକା ଅବ୍ରାହାମ ମାପୁରୁଦି ଲାକୁତୁ ପାର୍ତନା କିତାନ୍, ମାପୁରୁ ଅବିମେଲକଦିଙ୍ଗ୍ ମାରି ୱାନି ଆଡ଼ିଦିଙ୍ଗ୍ ମାରି ୱାନି ସାକରକାଙ୍ଗ୍ ନେଗେନ୍ କିତାନ୍; ଆବେଟ୍କୁ ୱାରି କଡ଼କକ୍ରା ଜନମ୍ ଆତାର୍ । ଏଣ୍ତେସ୍ ଅବ୍ରାହାମଦି ଆଡ଼ି ସାରାଦି ଉଣ୍ତିଙ୍ଗ୍ ସଦାପ୍ରବୁ ଅବିମେଲକଦି ଇଲୁଦି ଆଇମେକା ଗାର୍ବୁ ବାଞ୍ଜି କିତାମାର୍ହାନ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.