Konda Porja Bible
ପାର୍ତୁମ୍ 21
ଇସ୍ହାକ୍ତି ଜନମ୍
ତାନିୱେନେକା ପ୍ରବୁ ନିଜେଦି ବାକ୍ୟ ଇସାବ୍ତାନ୍ ସାରାଦି ଜାତୁନ୍ ଅତାନ୍; ମାରି ପ୍ରବୁ ଇନିକା ଇର୍ହାମାର୍ହାନ୍, ସାରା ଉଣ୍ତିଙ୍ଗ୍ ଆକା କିତାନ୍ । ଆବେଟ୍କୁ ସାରା ଅବ୍ରାହାମଦି ଆଡ଼ି ଡକ୍ରି କାଡ଼ାଦୁ ଗାର୍ବୁଦୁ ଆଜି ମାପୁରୁଦି ମାଡ଼ାନ୍ ଟିକ୍ ବେଡ଼ାଦୁ କଡ଼ ଜନମ୍ କିତାତ୍ । ଅବ୍ରାହାମ ସାରାଦି ଜନମ୍ ଆତି ନିଜେ କଡ଼ଦି ଦରୁ ଇସ୍ହାକ୍ ଇଟ୍ତାତ୍ । ମାରି ଅବ୍ରାହାମ ମାପୁରୁଦି ଆଦେସ୍ତାନ୍ ନିଜେଦି କଡ଼ ଇସ୍ହାକ୍ ଆଟ୍ ଦିନ୍ତି ନାଣ୍ତିଙ୍ଗ୍ ସୁନତ୍ କିତାର୍ । ଅବ୍ରାହାମଦି ସହେ ବାର୍ସୁ ବୟସ୍ତାନ୍ ୱାରି କଡ଼ ଇସ୍ହାକ୍ ଜନମ୍ ଆତାନ୍ । ମାରି ସାରା ଇର୍ହାତ୍, “ମାପୁରୁ ନା ମକମ୍ତୁ ସିକିନିକା ନି ୱେଡ଼ିକା ସିତାନ୍, ଇକା ୱେନିଜି ୱିଜେରେ ନା ୱାଲେ ସିକ୍ନାର୍ ।” ୱାଦ୍ ମାରି ଇର୍ହାତ୍, “ସାରା କଡ଼ଦିଙ୍ଗ୍ ପାଲୁ ଉଟ୍ନାତ୍, ଇୟା ମାଟା ଅବ୍ରହାମଦିଙ୍ଗ୍ ଏନ୍ ଇଡ୍ରେଙ୍ଗ୍ ଆଟ୍ତାନ୍ମାନ୍ଦି ? ଆତିଙ୍ଗ୍ବା ନାନୁ ଇଲେଇ ୱାନି ଡକ୍ରା କାଡ଼ାଦୁ କଡ଼ ଜନମ୍ କିତାନ୍ ।” ମାରି କଡ଼ ପେରିକାନ୍ ଆତାନ୍, ୱାର୍ ୱାନିଙ୍ଗ୍ ପାଲୁ ଉଣିକା ଡ଼ିସିସ୍ କିତାର୍; ମାରି ଏମେ ନାଣ୍ତିଙ୍ଗ୍ ଇସ୍ହାକ୍ଦିଙ୍ଗ୍ ପାଲୁ ଉଣିକା ଡ଼ିସିସ୍ କିତାର୍, ଆୟା ନାଣ୍ତିଙ୍ଗ୍ ଅବ୍ରହାମ ପେରିବଜି କିତାନ୍ ।
ହାଗାର ନି ଇସ୍ମାଏଲ ପେରିତାର୍
ତାନିୱେନ୍କା ମିସରିୟା ହାଗାର ଅବ୍ରହାମଦି ଉଣ୍ତିଙ୍ଗ୍ ଏମେ କଡ଼ ଜନମ୍ କିତାତ୍, ଆୟା କଡ଼ ଇସ୍ହାକତିଙ୍ଗ୍ କାଡ଼୍ଜିନିକା ସାରା ସୁଡ଼ୁତାତ୍ । ଆବେଟ୍କୁ ୱାଦ୍ ଅବ୍ରହାମଦିଙ୍ଗ୍ ଇର୍ହାତ୍, “ନିନୁ ଇୟା ସାକରାଣିଙ୍ଗ୍ ମାରି ଇୟାତେନି କଡ଼ଦିଙ୍ଗ୍ ପେର୍ଆ; ମାତର୍ ଇୟା ସାକରାଣିତି କଡ଼ ନା କଡ଼ ଇସ୍ହାକ୍ ୱାଲେ ଅଦିକାରି ଆଦେଙ୍ଗ୍ ଆଟ୍ଏନ୍ ।” ଇୟା ମାଟା ୱେନିଜି ଅବ୍ରହାମ ନିଜେଦି କଡ଼ ଉଣ୍ତିଙ୍ଗ୍ ନାଣ୍ତ ଦୁଃକ୍ କିତାନ୍ । ଇରିଙ୍ଗ୍ ଇସ୍ମାଏଲ ବା ୱାନି ମାରିନ୍ ମାର୍ହାନ୍ । ନାସ୍ତିୱାଲେ ମାପୁରୁ ଅବ୍ରହାମଦିଙ୍ଗ୍ ଇର୍ହାନ୍, “ନିନୁ ଇୟା ମାରିନ୍ ମାରି ମି ସାକର୍ଣି ଉଣ୍ତିଙ୍ଗ୍ ଦୁଃକ୍ କିମା; ସାରା ନିଙ୍ଗିଁ ଇନିକା ଇଜିନାତ୍, ତାନି ମାଟାଦିଙ୍ଗ୍ ଚିନ୍ତା କିଆ; ଏଣ୍ତେସ୍ ଇସ୍ହାକ୍ ମାଡ଼ାନ୍କୁ ମି କୁଟୁମ୍ ନାଣ୍ତ ଆନାର୍ । ମାରି ଇୟା ସାକରାଣିଦି ମାରିନ୍ ମି କୁଟୁମ୍, ଇଲେଇ ମାପୁ ୱାନିମାଡ଼ାନ୍କୁ ଉଣ୍ତ୍ରି କୁଟୁମ୍ କିନାପ୍ ।”
ତାନିୱେନେକା ଅବ୍ରହାମ ନାଡ଼ାକାନେ ନିଙ୍ଗିଁଜି ରୁଟି ନି ଏରୁ ବର୍ତିମାନି ତଲୁ ମଣି ଆସ୍ସି ହାଗାରଦି ମେପିଦୁ ସିଜି କଡ଼ଦିଙ୍ଗ୍ ସିଜି ୱାନିଙ୍ଗ୍ ପୋକ୍ତାନ୍; ଆବେଟ୍କୁ ୱାନ୍ ସଲ୍ସି ବେର୍ସେବା ଦରୁଦି ବାଲିବାଡି ସାରି ବାଣାତାନ୍ । ମାରି ତଲୁ ମଣିଦି ଏରୁ ୱିଜିତେ, ହାଗାରଦି ଉଣ୍ତ୍ରି ଦୁପାଦି ଆଡିଗି କଡ଼ଦିଙ୍ଗ୍ ଡ଼ିସ୍ତା ସିତାତ୍ । ମାରି, ୱାଦ୍ ଆୟା ଆଗ୍ଡ଼ିରାନ୍ ଆକ ଅଡ଼ପ୍ ସଲ୍ସି ବାସ୍ତାତ୍; ଇରିଙ୍ଗ୍ ୱାନ୍ ଇର୍ହାନ୍, “କଡ଼ଦି ସାନିକା ନାନୁ ସୁଡ଼ୁଦେଙ୍ଗ୍ ଆଟ୍ଏ ।” ମାରି ୱାଦ୍ ୱାନି ଆଗ୍ଡ଼ି ବାସ୍ସି ପେରି ୱେୟୁଦାନ୍ ଆଡ଼ାବାତାତ୍ ।
ନାସ୍ତିୱାଲେ ମାପୁରୁ କଡ଼ଦି ଆଡ଼ାବାନିକା ୱେରାନ୍; ମାରି ମାପୁରୁଦି ଦୁତ୍ ବାଦଡ଼ତାନ୍ କୁକ୍ସି ହାଗାରତିଙ୍ଗ୍ ଇର୍ହାତ୍, “ଏ ହାଗାର, ନି ଇନିକା ଆତାତ୍ ? ତିଲାମା; ଇରିଙ୍ଗ୍ ଏମେ ଜାଗାଦୁ କଡ଼ ମାନାନ୍, ଆୟା ଜାଗାଦୁ ମାପୁରୁ ୱାନି ଆଡ଼ାବାନିକା ୱେର୍ଆ ମାନାନ୍ । ନିନୁ ନିଲ୍ଜ କଡ଼ଦିଙ୍ଗ୍ ନିକ୍ସ କିୟୁଦୁ ଆସ୍ଆ, ମାପୁ ୱାନିମାଡ଼ାନ୍କୁ ଉଣ୍ତ୍ରି ପେରି କୁଟୁମ୍ କିନାପ୍ ।”
ନାସ୍ତିୱାଲେ ମାପୁରୁ ୱାନି କାଣ୍ଗା ସୁଡ଼ିସିକିତାନ୍, ୱାଦ୍ ଏରୁମାନି କୁଇଁ ସୁଡ଼ୁଦେଙ୍ଗ୍ ଆଟ୍ସି ଆବେନୁ ସଲିସ୍ ତଲୁ ମଣିଦୁ ଏରୁ ନିରିସି କଡ଼ଦିଙ୍ଗ୍ ଉଟ୍ପିସ୍ କିତାତ୍ ।
ତାନିୱେନେକା ମାପୁରୁ କଡ଼ଦିଙ୍ଗ୍ ସାକା ଆଜି; ୱାନ୍ ପିରିତାନ୍, ମାରି ବାଲିବାଡିଦୁ ମାନ୍ଜି ଦନୁ ଆସ୍ନି ବନୁୱାଏନ୍ ଆତାନ୍ । ୱାନ୍ ପାରଣ ଦର୍ତି ବଲିବାଡିଦୁ ବାସା କିତାନ୍; ତାନିୱେନେକା ୱାନି ୟାୟା ୱାନିଙ୍ଗ୍ ଅରେତ୍ ମିସର ଦେସ୍ତି ଆଇଲିଦି ୱାଲେ ୱାନି ପେଡ଼ି କିତାତ୍ ।
ଅବ୍ରାହାମ ମାରି ଅବିମେଲକ ମାଡ଼ାନ୍ ନିୟମ
ଇୟା ବେଡ଼ାଦୁ ଅବିମେଲକ ମାରି ପିକଲ ଦରୁଦି ୱାରି ସେନାପତି ଅବ୍ରହାମଦିଙ୍ଗ୍ ଇର୍ହାର୍, “ମାପୁରୁ ମି ୱିଜୁ ପାଣିଦୁ ସାକା ମାନାନ୍ । ଆଦେଙ୍ଗ୍ ମିରୁ ମା ଉଣ୍ତିଙ୍ଗ୍ ମାରି ମା କଡ଼ର୍ ଆଇଲିକ୍ ବା କୁଟୁମ୍ ଉଣ୍ତିଙ୍ଗ୍ ବିସ୍ ସିମାଟ୍; ମାରି ମାପୁ ମି ଉଣ୍ତିଙ୍ଗ୍ ଏଣ୍ତେସ୍ ଦୟା କିତାମାନାପ୍, ଆୟାମାଡ଼ାନ୍ ମିରୁ ମା ଉଣ୍ତିଙ୍ଗ୍ ମାରି ମି ବାସାନି ଜାଗା ଇୟା ଦେସ୍ ଉଣ୍ତିଙ୍ଗ୍ ଦୟା କିନାନ୍, ମା ଆଗିଡ଼ି ମାପୁରୁଦି ପାର୍ମାଣ୍ କିଜି ଇୟା ମାଟା ଇନ୍ଆଁ ।”
ଆବେଟ୍କୁ ଅବ୍ରହାମ ଇର୍ହାନ୍, “ନାନୁ ପାର୍ମାଣ୍ କିତା ।”
ମାରି ଅବିମେଲକଦି ସାକରଙ୍ଗୁ ଅବ୍ରହାମଦି ଉଣ୍ତ୍ରି ନେଗି କୁଇଁ ସାକ୍ତିଦାନ୍ ଅଦିକାର୍ କିତାମାର୍ହାନ୍, ଆଦେଙ୍ଗ୍ ଅବ୍ରହାମ ଅବିମେଲକଦି ମାଟା ୱେର୍ନିକା । ଆବେଟ୍କୁ ଅବିମେଲକ ଇର୍ହାନ୍, “ଇୟା ପାଣି ଏନ୍ କିତାନ୍, ଆକା ମାପୁ ନେସ୍ଏପ୍; ମାରି ନିନୁ ନେ ମାଙ୍ଗିଁ ୱେର୍ଇତି; ମାପୁ କେବଲ ନେରୁନେ ଇୟା ମାଟା ୱେରାପ୍ ।” ତାନିୱେନେକା ଅବ୍ରହାମ ମେଣ୍ତେଙ୍ଗ୍ ମାରି ଡ଼ାକୁ ଅସି ଅବିମେଲକଦିଙ୍ଗ୍ ସିତାନ୍, ମାରି ରିଏର୍ ଉଣ୍ତ୍ରି ନିୟମ ତିର୍ କିତାର୍ । ମାରି ଅବ୍ରହାମ ମାନ୍ଦାଦାନ୍ ସାତୋଗୋଟା ମେଣ୍ତା ପିଲେକ୍ ୱେର୍ଏ କିଜି ଇଟ୍ତାନ୍ । ଆବେଟ୍କୁ ଅବିମେଲକ ଅବ୍ରହାମଦିଙ୍ଗ୍ ୱେନ୍ବାତାନ୍, “ନିନୁ ଏମେ ଇସାବ୍ତାନ୍ ଇୟା ସାତଗୋଟା ମେଣ୍ତା ପିଲେକ୍ ୱେର୍ଏ କିଜି ଇଟ୍ତିମାନି ?”
ଅବ୍ରହାମ ଇର୍ହାନ୍, “ନାନୁ ଜେ ଇୟା କୁଇଁ କାରିତାମାନା, ଆବେଣି ପାର୍ମାଣ୍ଦି ଉଣ୍ତିଙ୍ଗ୍ ନା ମାଡ଼ାନ୍ ଇୟା ସାତଗୋଟା ମେଣ୍ତା ପିଲେକ୍ ଅତେଙ୍ଗ୍ ଆନାତ୍ ।” ଆବେଟ୍ ଆବେଣି ଜାଗାଦି ଦରୁ ବେର୍ସେବା ଆତାତ୍, ଏଣ୍ତେସ୍ ଆୟାମାନୁ ଆୟା ରିଏର୍ ଜାଗାଦୁ ପାର୍ମାଣ୍ କିତାର୍ । ଇୟାୱାଜା ୱାର୍ ବେର୍ସେବା ଲାକୁତୁ ନିୟମ୍ ତିର୍ କିତାର୍, ଅବିମେଲକ ମାରି ପିକଲ ଦରୁଦି ୱାନି ସେନାପତି ନିଙ୍ଗିଁଜି ପଲେସ୍ଟିୟରି ଦେସ୍ତୁ ଡ଼େସି ସର୍ହାର୍ । ତାନିୱେନେକା ଅବ୍ରହାମ ଆୟା ବେର୍ସେବା ଲାକୁତୁ ଉଣ୍ତ୍ରି ଜାଉଁ ମାରାନ୍ ଉର୍ସି ଆୟା ବାଡିଦୁ ଜୁଗ୍ ଜୁଗ୍ତି ମାପୁରୁ ସଦାପ୍ରବୁଦି ଦରୁଦାନ୍ ପାର୍ତନା କିତାନ୍ । ମାରି ଅବ୍ରହାମ ପଲେସ୍ଟିୟରି ଦେସ୍ତୁ ନାଣ୍ତ ବାର୍ସେକ୍ ବାସା କିତାନ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.