Konda Porja Bible
ପାର୍ତୁମ୍ 34
ଦିଣାଦିଙ୍ଗ୍ ମତ୍କୁତ୍ନିକା
ତାନିୱେନେକା ଲେୟା ମାଡ଼ାନ୍ ଜନମ୍ ଆତି ଦିଣା ଦର୍ତି ଜାକୁବଦି ଆଇଲି ଅର୍ଲେନ୍ ଆୟା କିଣାନ୍ ଦେସ୍ତି ଆଇଲିକା ୱାଲେ ବେଟ୍ ଆଦେଙ୍ଗ୍ ସତାସର୍ହାତ୍ । ଆବେଟ୍ ହିଦିୟ ହମୋର୍ ଦରୁଦି ରାଜିଦି ଅଦିକାରିଦି ମାରିନ୍ ସିକିମ୍ ତାନିଙ୍ଗ୍ ସୁଡ଼ୁତାନ୍; ମାରି, ତାନିଙ୍ଗ୍ ଅସି ତାନି ୱାଲେ ଡରିଜି ତାନିଙ୍ଗ୍ ମତ୍କୁତାନ୍ । ମାରି ଜାକୁବଦି ଆୟା ରିପା ଆଇଲି ଦିଣାମାନୁ ୱାନି ମୋନ୍ ରେଲ୍ତାତ୍ ଆକା ୱାନ୍ ଆୟା ରିପା ଆଇଲିଦିଙ୍ଗ୍ ଜିବନ୍ ନୋଜି ତାନିଙ୍ଗ୍ ନେଗି ନେଗି ମାଟେଙ୍ଗ୍ ୱେର୍ତାନ୍ । ତାନିୱେନେକା ସିକିମ୍ ନିଜେଦି ବୁବା ହମୋରଦିଙ୍ଗ୍ ଇର୍ହାନ୍, “ନିନୁ ଇୟା ରିପା ଆଇଲିଦି ୱାଲେ ନାଙ୍ଗିଁ ପେଡ଼ିକିଜ ସିଦା ।”
ଆୟାୱେନ୍କା ଜାକୁବ ନିଜେଦି ଆଇଲି ଦିଣାଙ୍ଗ୍ ସିକିମ୍ ମତ୍କୁତ୍ତି ମାନି ମାଟା ୱେର୍ହାନ୍; ଆୟା ବେଡ଼ାଦୁ ୱାନି ମାରିସିର୍ କିଡ଼ିଇଦୁ ଡ଼ାକୁକଡିଙ୍ଗ୍ ୱାଲେ ମାର୍ହାର୍ଆକା ଜାକୁବ ୱାରି ୱାନିସାନ୍ଦି ଆଲେତା ମାର୍ହାନ୍ । ଆବେଟ୍ତାନ୍ ସିକିମ୍ଦି ବୁବା ହମୋର ଜାକୁବ ୱାଲେ ୱାରିଗିଜି ସାଦେଙ୍ଗ୍ ସର୍ହାନ୍ । ମାରି ଜାକୁବ ମାରିନ୍କୁ ଆୟା କାବୁର୍ ୱେନିଜି କିଡ଼ିଇଦାନ୍ ୱାତାମାର୍ହାର୍; ମାରି ସିକିମ୍ ଜାକୁବଦି ଆଇଲିଦି ୱାଲେ ଡରିଜି ଇସ୍ରାଏଲ ବିରୁଦ୍ତାନ୍ ଏମେ କିଇ ମୁର୍କୁ ପାଣି କିତାମାର୍ହାନ୍ ଆୟା ଉଣ୍ତିଙ୍ଗ୍ ୱାର୍ ମୋନତୁ ମାରି ବେସି ରିସା ମାର୍ହାର୍ । ନାସ୍ତିୱାଲେ ହମୋର ୱାରିୱାଲେ ୱାର୍ଗିଜିସାଜି ଇର୍ହାନ୍, “ମି ଇୟା ଆଇଲିଦିମାନୁ ନା ମାରିନ୍ ସିକିମଦି ମୋନ ବଦା ମାନାତ୍; ନାନୁ ମାଡ଼ିସ୍ କିଜିନା, ନା ମାରିନ୍ ୱାଲେ ତାନିଙ୍ଗ୍ ପେଡ଼ିକିଜ ସିଦାଟ୍ । ମାରି, ମା ୱାଲେ ପେଡ଼ି ଆନି ସାମ୍ନ୍ଦି ତର୍ତୁ, ମି ଆଇଲିକାଙ୍ଗ୍ ମାଙ୍ଗିଁ ସିଦାଟ୍, ମା ଆଇଲିକାଙ୍ଗ୍ ମିରୁ ଅତୁ । ଆର୍ତିଙ୍ଗ୍, ମିରୁ ମା ୱାଲେ ବାସା କିନିଦେର୍; ୱିଜୁ ଦେସ୍ ମି ଆଗିଡ଼ି ତେବାତା ମାନାତ୍, ଆବେନୁ ବାସାକିଦୁ ମାରି ବେପାର୍ କିଦୁ ମାରି ଅଦିକାର୍ କିଦୁ ।”
ମାରି, ସିକିମ୍ ଦିଣାଦି ବୁବେଙ୍ଗ୍ ମାରି ତୋଡ଼ାନ୍କାଙ୍ଗ୍ ଇର୍ହାନ୍, “ନା ଉଣ୍ତିଙ୍ଗ୍ ମି ଦୟା ସୁଣିକା ଆପିତ୍, ଆବେଟ୍ ଏମେକା ଇନିଦେର୍, ଆକା ନାନୁ ସିନା । ଜୋଡ଼ା ମାରି ଦାନ୍ ଏସୋ ଅଦିକ୍ ଲସିନିଦେର୍, ମି ମାଟା ଇସାବ୍ତାନ୍ ଆକା ସିନା; ମାତର୍ ଏମେସାରିବା ନା ୱାଲେ ଇୟା ଆଇଲିଦିଙ୍ଗ୍ ପେଡ଼ିକିଜ ସିଦାଟ୍ ।”
ଆର୍ତିଙ୍ଗ୍ ସିକିମ୍ ଜାକୁବଦି କଡ଼ରି ତାଙ୍ଗିଁଙ୍ଗ୍ ଦିଣାଙ୍ଗ୍ ମତ୍କୁତ୍ତି ମାନିଙ୍ଗ୍ ୱାର୍ ସିକିମ୍ ମାରି ୱାରି ବୁବା ହମୋର ୱାଲେ ସାଲାକିଦାନ୍ ୱାର୍ଗିଜି ସାତାର୍, “ମାପୁ ଅସୁନ୍ନତ ଲୋକାଙ୍ଗ୍ ନିଜେଦି ତାଙ୍ଗିଁକ୍ ସିନି ପାଣି କିଦେଙ୍ଗ୍ ଆଟ୍ଏପ୍, ଆକା କିତିଙ୍ଗ୍, ମା ମତ୍ ସିନାତ୍ । ଜଦି କେବଲ ଉଣ୍ତ୍ରି ପାଣି କିନିଦେର୍, ମା ୱାଜା ମିରୁ ୱିଜେରେ ମେମାରୁଙ୍ଗୁ ସୁନ୍ନତ ଆନିଦେର୍ ମାପୁ ମି ମାଟାଦୁ ରାଜି ଆତାପ୍ । ମାପୁ ମିଙ୍ଗିଁ ଗାଡ଼ି ସିନାପ୍ ମାରି ମି ଗାଡ଼ି ମାପୁ ଅନାପ୍, ମାରି, ମି ୱାଲେ ବାସା କିଜି ଅରେନ୍ ଲୋକ୍ ଆନାଟ୍ । ମାତର୍ ମିରୁ ଜଦି ସୁନ୍ନତ ବିସୟ୍ତାନ୍ ମା ମାଟା ୱେନ୍ଇଦେର୍, ଆର୍ତିଙ୍ଗ୍ ମାପୁ ଆୟା ଆଇଲିଦିଙ୍ଗ୍ ଆସ୍ସି ସନାପ୍ ।”
ନାସ୍ତିୱାଲେ ୱାରି ଇୟା ମାଟାଦୁ ହମୋର ମାରି ୱାନି ମାରିସି ସିକିମ୍ ୱେଡ଼ିକା ଆତାର୍ । ମାରି, ଆୟା ମୁରୁଲି ବେଗି ବେଗି ପାଣି କିତାନ୍, ଇରିଙ୍ଗ୍ ୱାନ୍ ଜାକୁବଦି ଗାଡ଼ିମାନୁ ବେସି ମନ୍ ସିତା ମାର୍ହାନ୍ । ଆୟା ସିକିମ୍ ନିଜେଦି ବୁବାଦି ଇଲୁଦି ୱିଜୁ ଲୋକା ମାଡ଼ାନ୍କୁ ନାଣ୍ତ ପେରିକାନ୍ ମାର୍ହାନ୍ ।
ତାନିୱେନେକା ହମୋର ମାରି ୱାନି ମାରିନ୍ ସିକିମ୍ ନିଜେଦି ଗାଡ଼୍ତି ସେର୍ଲାଦୁ ୱାଜି ଗାଡ଼୍ତି ବାସାନି ଲୋକା ୱାଲେ ୱାର୍ଗିଜିସାଜି ଇର୍ହାର୍; “ଇୟା ଲୋକୁ ମା ୱାଲେ ବିରଦ୍ସିଲେ; ଇୟାଉଣ୍ତିଙ୍ଗ୍ ଇୟାୱେରିଙ୍ଗ୍ ଇୟା ଦେସ୍ତୁ ବାସାଦେଙ୍ଗ୍ ମାରି ବେପାର୍ କିଦେଙ୍ଗ୍ ସିଆୟ୍ଆପିତ୍; ମାତର ସୁଡୁଦୁ, ଇୟା ଦେସ୍ ୱାରି ଉଣ୍ତିଙ୍ଗ୍ ନାଣ୍ତ ଆନାତ୍; ମାରି, ମାଡୁ ୱାରି ଗାଡ଼ିକାଙ୍ଗ୍ ତାତେଙ୍ଗ୍ ଆଟ୍ନିକା ମାରି ୱାର୍ ମା ଗାଡ଼ିକାଙ୍ଗ୍ ଅତେଙ୍ଗ୍ ଆଟ୍ନାର୍ । ମାତର୍ ୱାରି ଇୟା ଉଣ୍ତ୍ରି ରାଜିନାମା ମାନାତ୍, ମା ନାଡ଼ିମି ୱିଜେରେ ମେମାରି ଜଦି ୱାରିୱାଜା ସୁନ୍ନତ ଆନାର୍, ଆର୍ତିଙ୍ଗ୍ ୱାର୍ ମା ୱାଲେ ବାସା କିଜି ଅରେନ୍ ଲୋକୁ ଆନି ଉଣ୍ତିଙ୍ଗ୍ ରାଜି ଆନାର୍ । ୱାରି ଦନ୍, ସମ୍ପତି ମାରି ଡ଼ାକୁକଡ଼ିଙ୍ଗ୍ ନ ମାୱି ଆଉ ? କେବଲ ମାଡୁ ୱାରି ମାଟା ମାନାନିକା, ଆକା କିତିଙ୍ଗ୍, ୱାର୍ ମା ୱାଲେ ବାସା କିନାର୍ ।”
ନାସ୍ତିୱାଲେ ହମୋର ମାରି ୱାନି ମାରିନ୍ ସିକିମ୍ଦି ଇୟା ମାଟାଦୁ ୱାରି ଗାଡ଼୍ସେର୍ଲା ସିଜି ଆତ୍ରେ ସନି ୱିଜେରେ ଲୋକୁ ମାନାତାର୍; ଆବେଟ୍ ୱାରି ଗାଡ଼୍ସେର୍ଲା ସିଜି ସନି ୱିଜେରେ ମେମାର୍ଙ୍ଗାଁ ସୁନ୍ନତ ଆତାତ୍ ।
ମାରି ମୁନେଟି ୱେନେକା ୱାର୍ ନବୁକୁ ଆତାର୍, ଦିଣାଦି ତୋଡ଼ାନ୍କୁ ସିମିୟୋନ୍ ମାରି ଲେବି, ଜାକୁବଦି ଇୟା ରିଏର୍ ମାରିନ୍କୁ ନିଜେଦି କୁଡ଼ାମୁକୁ ଆସ୍ସି ତିଲାଏଣ୍ତଗା ଗାଡ଼ ଅଦିକାର୍ କିଜି ୱିଜୁ ମେମାର୍ଆଙ୍ଗ୍ ସାପିସ୍ କିତାର୍ । ମାରି, ହମୋର ମାରି ୱାନି ମାରିନ୍ ସିକିମ୍ଦିଙ୍ଗ୍ କୁଡ଼ାମ୍ ସାରି ସାପିସ୍ କିଜି ସିକିମ୍ଦି ଇଲୁଦାନ୍ ଦିଣେଙ୍ଗ୍ ଅତାର୍ । ଜାକୁବଦି ମାରିସିର୍ ସାତି ଲୋକା ଲାକୁତୁ ୱାଜି ଗାଡ଼ତିଙ୍ଗ୍ ଡଙ୍ଗାଁ କିତାର୍, ଇରିଙ୍ଗ୍ ୱାରି ତାଙ୍ଗିଁଙ୍ଗ୍ ଆୟା ଲୋକୁ ମତ୍କୁତ୍ତା ମାର୍ହାର୍ । ମାରି ୱାରି ମେଣ୍ତେଙ୍ଗ୍ ମାରି ଡ଼ାକୁ ମାରି ଗଦଙ୍ଗ୍ ୱିଜୁ, ମାରି ଗାଡ଼୍ତି ୱିଜୁ ମାରି କିଡ଼ିଇଦି ୱିଜୁ ଜିନିସ୍ ଡଙ୍ଗାଁ କିତାର୍ । ମାରି ୱାରି କଡ଼ରିଙ୍ଗ୍ ମାରି ଆଇମେକାଙ୍ଗ୍ ତର୍ସି ୱିଜୁ ଦନ୍ ମାରି ଇଲୁଦି ୱିଜୁ ଡଙ୍ଗାଁ କିତାର୍ । ଆବେଟ୍ ଜାକୁବ ସିମିୟୋନ ମାରି ଲେବିଙ୍ଗ୍ ଇର୍ହାନ୍, “ମିରୁ ଇୟା ଦେସ୍ଦୁ ଅର୍ତାତ୍ କିଣାନିୟ ମାରି ପରିସିୟ ଲୋକା ଲାକୁତୁ ନାଙ୍ଗିଁ କାପୁ ୱାଜା କିଜି ତେରେପେତେ କିତିଦେର୍; ନା ଲୋକୁ ଉଣା, ଇୟାଉଣ୍ତିଙ୍ଗ୍ ୱାର୍ ନା ବିରୁଦ୍ତାନ୍ ଉଣ୍ତ୍ରେ ମାନୁ ଉଣ୍ତାଜି ନାଙ୍ଗିଁ ସାପିସ୍ କିନାର୍; ଆବେଟ୍ ଇଲୁକୁଟୁମ୍ ୱିଜୁ ନାଷ୍ଟୁ ଆନାପ୍ ।”
ୱାର୍ ଇର୍ହାର୍, “ଦାରିଣି ୱାଜା ମା ତାଙ୍ଗିଁ ୱାଲେ ପାଣି କିନିକା ୱାନି ପାଣି ମାର୍ହାତ୍ ନ ?”
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.