Konda Porja Bible
ପାର୍ତୁମ୍ 33
ଜାକୁବ ଏସୌଦି ୱାଲେ ମିସାନିକା
ତାନିୱେନେକା ଜାକୁବ ମାରିଜି ସୁଡ଼ୁତାନ୍, ମାରି ସୁଡୁଦୁ, ଏସୌ ମାନାନ୍, ମାରି, ୱାନି ୱାଲେ ସାର୍ସ ଲୋକୁ । ଆବେଟ୍ ୱାନ୍ ନିଜେଦି କଡ଼ରିଙ୍ଗ୍ ବାଗ୍ କିଜି ଲେୟା ମାରି ରାହେଲ ମାରି ରୁଣ୍ତି ଦାସିକା ଲାକୁତୁ ସର୍ପେକିତାନ୍, ଅର୍ତାତ୍, ଆଗିଡ଼ି ରୁଣ୍ତି ଦାସି ମାରି ତାମେ କଡ଼ରିଙ୍ଗ୍, ତାନି ୱେନେକା ଲେୟା ମାରି ତାନି କଡ଼ରିଙ୍ଗ୍, ୱିଜେରି ୱେନେକା ରାହେଲ ମାରି ଜୋସେପତିଙ୍ଗ୍ ଇଟ୍ତାନ୍ । ମାରି, ଜାକୁବ ନିଜେ ୱିଜେରିଙ୍ଗ୍ ଆଗିଡ଼ି ସଲ୍ସି ସାତଦେବେଙ୍ଗ୍ ବୁମିଦୁ ମାଡ଼ିସ୍ କିବୁ କିବୁ ନିଜେଦି ଦାଦା ଲାକୁତୁ ଇତାନ୍ । ନାସ୍ତିୱାଲେ ଏସୌ ୱାନିଙ୍ଗ୍ ବେଟ୍ ଆଦେଙ୍ଗ୍ ଉର୍କୁସି ୱାଜି ୱାନି କକ୍ଲା ଆସ୍ସି ପୋମିତାନ୍ ମାରି ନଣ୍ତିତାନ୍, ମାରି, ରିଏର୍ ଆଡ଼୍ବାତାର୍ । ତାନିୱେନେକା ୱାନ୍ ସୁଡ଼୍ଜି ଆଇମେକାଙ୍ଗ୍ ମାରି କଡ଼ରିଙ୍ଗ୍ ସୁଡ଼ିଜି ୱେନେବାତାନ୍, “ନି ୱାଲେ ଇୟାକାର୍ ଏରୁ ?” ଆବେଟ୍ ୱାନ୍ ଇର୍ହାନ୍, “ମାପୁରୁ ଜିବନ୍ନୋଜି ନି ଦାସ୍ତିଙ୍ଗ୍ ଇୟା ୱିଜୁ କଡ଼ର୍ ସିତାମାନାନ୍ ।” ଆବେଟ୍ ଦାସିକ୍ ମାରି ତାମେ କଡ଼ର୍ ଲାକୁତୁ ୱାଜି ମାଡ଼ିସ୍ କିତାର୍ । ତାନିୱେନେକା ଲେୟା ତାନି କଡ଼ର୍ ୱାଜି ମାଡ଼ିସ୍ କିତାର୍; ୱିଜେରି ୱେନେକା ଜୋସେପ୍ ମାରି ରାହେଲ ଲାକୁତୁ ୱାଜି ମାଡ଼ିସ୍ କିତାର୍ ।
ଆବେଟ୍ ଏସୌ ୱେନ୍ବାତାନ୍, “ନାନୁ ଆଗିଡ଼ି ଏମେ ୱିଜୁ ଡ଼ାକୁ ମାନ୍ଦା ୱାଲେ ବେଟ୍ଆତା; ଆକା ଇନି ଉଣ୍ତିଙ୍ଗ୍ ?” ଜାକୁବ ଇର୍ହାନ୍, “ନା ପ୍ରବୁଦି ଆଗିଡ଼ି ଦୟା ପୋଇନି ଉଣ୍ତିଙ୍ଗ୍ ।”
ତାନିୱେନେକା ଏସୌ ଇର୍ହାନ୍, “ନାଙ୍ଗିଁ ବେସି ମାନାତ୍; ତୋଡ଼ାନ୍, ମିଦି ଇନିକା ମାନାତ୍, ଆକା ମିଦି ମାନିତ୍ ।” ଜାକୁବ ଇର୍ହାନ୍, “ସିଲେ, ମାଡ଼ିସ୍ କିଜିନା, ନାନୁ ନି ଆଗିଡ଼ି ଜଦି ଦୟା ପୋଇତା, ଆର୍ତିଙ୍ଗ୍ ନା କିୟୁଦାନ୍ ଆୟା ଦାନ୍ ଅଆ; ଇରିଙ୍ଗ୍ ମାପୁରୁଦି ମୋକମ୍ ସୁଡ଼ୁତି ୱାଜା ନାନୁ ନି ମୋକମ୍ ସୁଡ଼ୁତାମାନା; ମାରି ନିନୁ ନା ଉଣ୍ତିଙ୍ଗ୍ ୱେଡ଼ିକା ଆତିମାନି । ଆଦେଙ୍ଗ୍ ମାଡ଼ିସ୍ କିଜିନା, ନି ଲାକୁତୁ ତାତିମାନି ଇୟା ଦାନ୍ ଅଆ; ଇରିଙ୍ଗ୍ ମାପୁରୁ ନାଙ୍ଗିଁ ଆର୍ସିବାଦ୍ କିତାମାନ୍, ମାରି, ନାଙ୍ଗିଁ ୱିଜୁ ମାନାତ୍ ।” ଇୟାୱାଜା ବେସି ୱେଡ଼ିକାଦି ୱାଲେ ବାତିଙ୍ଗ୍ମାଲିତାନ୍ । ମାରି ଏସୌ ଆକା ଅତାନ୍ ।
ତାନିୱେନେକା ଏସୌ ଇର୍ହାନ୍, “ରାଆ, ମାଡୁ ସନାଟ୍, ନାନୁ ମି ଆଗିଡ଼ି ଆଗିଡ଼ି ସଲ୍ସିନା ।”
ଆବେଟ୍ ଜାକୁବ ଇର୍ହାନ୍, “ନା ପ୍ରବୁ ନେସ୍ନାନ୍, ଇୟା କଡ଼ର୍ ଇସ୍ରିକାର୍, ମାରି ପାଲୁ ଉଣି ମେଣ୍ତେଙ୍ଗ୍ ମାରି ବାଚି ପିଲେକ୍ ନା ୱାଲେ ମାନେ; ଅର୍ଲେନ୍ ନାଣ୍ତ ବୁଲାକିତିଙ୍ଗ୍ ୱିଜୁ ମାନ୍ଦା ସାନେସନେ । ଆଦେଙ୍ଗ୍ ମାଡ଼ିସ୍ କିଜିନା, ନା ମାଲିକ୍ ନି ଦାସଦି ଆଗିଡ଼ି ଆଗିଡ଼ି ସାଙ୍ଗ୍ଆ; ସେୟିର ରାଜିଦୁ ନା ପ୍ରବୁଦି ଲାକୁତୁ ଇଗାସନି ସାନ୍ଦି ନାନୁ ଡ଼ାକୁ ବୁଲାନି ସାକ୍ତି ଇସାପ୍ତାନ୍ ମାରି କଡ଼ରି ବୁଲାନି ସାକ୍ତି ଇସାବ୍ତାନ୍ ଦିରେ ଦିରେ ବୁଲାକିଜି ଅନା ।”
ଏସୌ ଇର୍ହାନ୍, “ଆର୍ତିଙ୍ଗ୍ ନା ସାଙ୍ଗ୍ ଏସୋ ଲୋକାଙ୍ଗ୍ ମି ଲାକୁତୁ ଇଡ୍ଜି ସଲିସ୍ନା ।” ଜାକୁବ ଇର୍ହାନ୍, “ଇନି ଦରକାର୍ ? ନା ଉଣ୍ତିଙ୍ଗ୍ କେବଲ ମାଲିକ୍ତି ଦୟା ସୁଣିକା ମାନିତ୍ ।” ଆବେଟ୍ ଏସୌ ଆୟା ନାଣ୍ତିଙ୍ଗ୍ ସେୟିର ସାରି ସିଜି ଡ଼େସି ସର୍ହାନ୍ । ମାତର୍ ଜାକୁବ ସୁକ୍କୋତଦୁ ସଲ୍ସି ନିଜେଦି ଉଣ୍ତିଙ୍ଗ୍ ଇଲୁ ମାରି ଡ଼ାକୁକଡିଙ୍ଗାଁ ଉଣ୍ତିଙ୍ଗ୍ ସାଡ଼ା ତିଆର୍ କିତାନ୍; ଇୟାଉଣ୍ତିଙ୍ଗ୍ ଇୟା ବାଡି ସୁକ୍କୋତ ଦରୁତାନ୍ ୱେଙ୍ଗିଁତାମାନାତ୍ । ଇୟାୱାଜା ଜାକୁବ ପଦନ ଅରାମ୍ତାନ୍ ସସି ସାନ୍ତିଦାନ୍ କିଣାନ୍ ଦେସ୍ତି ସିକିମ୍ଦି ଉଣ୍ତ୍ରି ଗାଡ଼ଦୁ ଇଗା ସଲ୍ସି ଗାଡ଼୍ଦି ଆତ୍ରେ ଗୁଡ଼ା ତିଆର୍ କିତାନ୍ । ତାନିୱେନେକା ସିକିମ୍ଦି ବୁବା ହମୋରଦି କଡ଼ରିଙ୍ଗ୍ ସହେ ଅଦିଲି ୱେଣ୍ତି ଡାବୁ ସିଜି ଆୟା ଗୁଡ଼ା ତିଆର୍ କିତିମାନି ବୁମି କାଣ୍ତେକ୍ କଟାନ୍ । ମାରି, ଆବେନୁ ଉଣ୍ତ୍ରି ବେଦି ତିଆର୍ କିଜି ତାନି ଦରୁ ଏଲ-ଇଲୋହେ-ଇସ୍ରାଏଲ ଇଟ୍ତାନ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.