Konda Porja Bible
ପାର୍ତୁମ୍ 35
ବେତେଲତୁ ମାପୁରୁ ଜାକୁବଙ୍ଗ୍ ଆର୍ସିବାଦ୍
ତାନିୱେନେକା ମାପୁରୁ ଜାକୁବଙ୍ଗ୍ ଇର୍ହାନ୍, “ନିନୁ ନିଙ୍ଗ୍ଜ ବେତେଲଦୁ ସଲ୍ସୋ ଆବେନୁ ବାସା କିଆ; ମାରି ମି ଦାଦା ଏସୌ ଆଗିଡ଼ିରାନ୍ ଉର୍କୁନି ବେଡ଼ାଦୁ ଏମେ ମାପୁରୁ ନିଙ୍ଗିଁ ବର୍ ସିତାମାର୍ହାନ୍, ୱାନି ଆଦେସ୍ତାନ୍ ପୁଜାବେଦି ତିଆର୍ କିଆ ।”
ଆବେଟ୍ ଜାକୁବ ନିଜେଦି ଇଲୁ ମାରି ସାଙ୍ଗ ଲୋକାଙ୍ଗ୍ ଇର୍ହାନ୍, “ମି ଲାକୁତୁ ଏମେ ୱିଜୁ ଆଇ ଦେସ୍ତି ଦିୟାମ୍କୁ ମାନେ, ୱାନିକାଙ୍ଗ୍ ଆକ ପୋକ୍ତୁ, ନିଜେଦିଙ୍ଗ୍ ସୁଚି କିଦୁ, ମାରି ନିଜେଦି ଆଙ୍ଗିଁଙ୍ଗ୍ ବାଦ୍ଲେ କିଦୁ । ମାରି ରାଦୁ, ମାଡୁ ନିଙ୍ଗିଁଜି ବେତେଲଦୁ ସନାଟ୍; ଏମେ ମାପୁରୁ ନା ଦୁକ୍ଦି ନାଣ୍ତିଙ୍ଗ୍ ନା ପାର୍ତନା ୱେର୍ହାନ୍, ମାରି ନା ବୁଲାନି ସାରିଦୁ ନା ସାକା ଆତାମାରାନ୍, ୱାନି ଆଦେସ୍ତାନ୍ ନାନୁ ଆୟା ବାଡିଦୁ ଉଣ୍ତ୍ରି ପୁଜାବେଦି ତିଆର୍ କିନା ।” ଆବେଟ୍ ୱାର୍ ନିଜେଦି ଲାକୁତୁ ଆଇ ଦେସ୍ତି ଦିୟାମ୍କୁ ମାରି ଗିତଣି ପାଗ୍ଡ଼େଙ୍ଗ୍ ୱିଜୁ ଆସ୍ସି ଜାକୁବଙ୍ଗ୍ ସିତାନ୍, ମାରି, ୱାନ୍ ଆକା ୱିଜୁ ଅସି ସିକିମ୍ ଲାକୁତୁ ଅଲନ୍ ମାରାନ୍ ମଦରୁ ମୁସ୍ତାନ୍ ।
ତାନିୱେନେକା ୱାର୍ ସର୍ହାର୍; ନାସ୍ତିୱାଲେ ସାରିବେଡ଼ିତିଦି ଗାଡ଼ଦୁ ମାପୁରୁଦି ମାଡ଼ାନ୍ ତିଲାନିକା ୱାତାତ୍ଆକା ୱାର୍ ଜାକୁବଦି କଡ଼ରିଙ୍ଗ୍ ପେର୍ଏତାର୍ ।
ତାନିୱେନେକା ଜାକୁବ ମାରି ୱାରି ଲୋକୁ କିଣାନ୍ ଦେସ୍ତି ଲୁସ୍ଦୁ, ଅର୍ତାତ୍, ବେତେଲଦୁ ଇଗା ସର୍ହାର୍ । ଆବେନୁ ୱାନ୍ ଉଣ୍ତ୍ରି ପୁଜାବେଦି ତିଆର୍ କିଜି ଆୟା ବାଡିଦି ଦରୁ 1ଏଲ-ବେତେଲ ଇଟ୍ତାନ୍; ଇରିଙ୍ଗ୍ ଜାକୁବ ଦାଦାଦି ତିଏଲ୍ତାନ୍ ଉରୁକ୍ନି ବେଡ଼ାଦୁ ମାପୁରୁ ଆୟା ବାଡିଦୁ ୱାନିଙ୍ଗ୍ ବର୍ ସିତାମାର୍ହାନ୍ । ମାରି ଆୟା ବାଡିଦୁ ରିବିକା ଦବୋରା ଦର୍ତି ବଡୁଡକ୍ରି ସାତାତ୍ଆକା, ବେତେଲଦି ଆଡ୍ଗିମାନି ଅଲନ୍ ମାରାନ୍ ମଦରୁ ତାନି ସାତିମାଡ଼ା ମୁସ୍ତାର୍, ମାରି ଆୟା ବାଡିଦି ଦରୁ 2ଅଲୋନ-ବାକୁତ୍ ଆତାତ୍ ।
ତାନିୱେନେକା ଜାକୁବ ପଦନ ଅରାମ୍ତାନ୍ ଡ଼େସିୱାତାନ୍, ମାପୁରୁ ମାରିଡ଼େସି ବର୍ ସିଜି ୱାନିଙ୍ଗ୍ ଆର୍ସିବାଦ୍ କିତାନ୍ । ମାରି, ମାପୁରୁ ୱାନିଙ୍ଗ୍ ଇର୍ହାନ୍, “ନି ଦରୁ ଜାକୁବ; ମାତର୍ ନି ଦରୁ ମାରି ଜାକୁବ ଆଏତ୍, ନି ଦରୁ ଇସ୍ରାଏଲ ଆନାତ୍; ମାରି ୱାନ୍ ୱାନି ଦରୁ ଇସ୍ରାଏଲ ଇଟ୍ତାନ୍ ।” ମାପୁରୁ ୱାନିଙ୍ଗ୍ ମାରି ଇର୍ହାନ୍, “ମାପୁ ସର୍ବସକ୍ତିମାନ୍ ମାପୁରୁ; ମିରୁ ଜନମ୍କିଜି ମାରି ନାଣ୍ତ ଆଦୁ; ମି ମାଡ଼ାନ୍ ଉଣ୍ତ୍ରି କୁଟୁମ୍, ମାରି କୁଡ଼ା ସମାଜ୍ ଆପିତ୍, ମାରି, ମି କୁଟୁମ୍ତାନ୍ ରାଜାର୍ ଜନମ୍ ଆନାର୍ । ମାରି, ମାପୁ ଅବ୍ରାହାମ ମାରି ଇସ୍ହାକଦିଙ୍ଗ୍ ଏମେ ଦେସ୍ ସିତା ମାନାପ୍, ଆୟା ଦେସ୍ ନିଙ୍ଗିଁ ମାରି ମି କୁଟୁମ୍ଦିଙ୍ଗ୍ ସିନାପ୍ ।” ଆୟା ବାଡିଦୁ ୱାନି ୱାଲେ ଇୟାୱାଜା ୱାର୍ଗିଜିସାଜି ମାପୁରୁ ୱାନି ଲାକୁତୁରାନ୍ ସର୍ହାନ୍ । ଆବେଟ୍ ଜାକୁବ ଆୟା ୱାର୍ଗିଜିସାତି ବାଡିଦୁ ଉନ୍ଡ୍ରି ମୁଣ୍ତା, ଅର୍ତାତ୍, କାଲୁ ମୁଣ୍ତା ନିଲ୍ପିସି ତାନି ମୁସୁକୁ ଅଙ୍ଗୁର୍ରସ୍ ପୁଜା ସିତାନ୍ ମାରି ନିୟୁ ୱାକ୍ତାନ୍ । ମାରି, ଜାକୁବ ମାପୁରୁଦି ୱାଲେ ୱାର୍ଗିଜିସାତି ବାଡିଦି ଦରୁ ବେତେଲ ଇଟ୍ତାନ୍ ।
ରାହେଲ୍ତି ସାନିକା
ତାନିୱେନେକା ୱାର୍ ବେତେଲଦି ମାଡ଼ାନ୍ ସଅସି ସର୍ହାର୍, ମାତର୍ ଇପ୍ରାତାଦୁ ଇଗା ସନି ଉଣ୍ତିଙ୍ଗ୍ କାଣ୍ତେକ୍ ସାରି ମାନୁବୁ ମାନୁବୁ ରାହେଲଦି ପଟାଦୁ ନପି ନିଙ୍ଗିଁତାତ୍; ମାରି, ତାନି ଜନମ୍ କିନିକା ବେସି କାସ୍ଟୁ ଆତାତ୍ । ମାରି ଜନମ୍କିନି ନପି ବେସିକାସ୍ଟୁ ଆତାତ୍, ବଡୁଡକ୍ରି ତାନିଙ୍ଗ୍ ଇର୍ର୍ହାତ୍, “ତିଲାମା, ନିନୁ ଇଲେଇ ବା କଡ଼ ଜନମ୍ କିନି ।” ମାତର୍ ୱାଦ୍ ସାତାତ୍, ମାରି, ଜିବନ୍ସନି ୱାଲେ କଡ଼ଦି ଦରୁ 3ବିନୋନି ଇଟ୍ତାତ୍; ମାତର୍ ୱାନି ବୁବା ୱାନି ଦରୁ 4ବିନ୍ୟାମିନ୍ ଇଟ୍ତାନ୍ । ଇୟାୱାଜା ରାହେଲ ସାତାସର୍ହାତ୍, ଇପ୍ରାତା, ଅର୍ତାତ୍, ବେତଲିହିମ୍ଦୁ ସନି ସାରି ଲାକୁତୁ ତାନି ସାତିମାଡ଼ା ମୁସ୍ତାର୍ । ତାନିୱେନେକା ଜାକୁବ ଆୟା ଦୁକି ମୁସୁକୁ ଉଣ୍ତ୍ରି କାଲୁ ମୁଣ୍ତା ନିଲ୍ପ୍ତାନ୍; ରାହେଲ ଦୁକିଦି ଆୟା ମୁଣ୍ତା ନେର୍ସାନ୍ଦି ମାନାତ୍ । ତାନିୱେନେକା ଇସ୍ରାଏଲ ଆବେଟ୍ତାନ୍ ସସି ସଲ୍ସି ଏଦର ଗାଡ଼୍ ନାସି ତାନି ଲାକୁତୁ ଗୁଡ଼ା ତିଆର୍ କିତାନ୍ ।
ଜାକୁବଦି ମାରିନ୍କୁ
ଆୟା ଦେସ୍ଦୁ ଇସ୍ରାଏଲ ବାସାକିନି ୱାଲେ ରୁବେନ୍ ସଲ୍ସି ନିଜେଦି ବୁବା ବିଲ୍ହା ଦରୁଦି ଇସ୍ରି ଆଡ଼ିଦି ୱାଲେ ଡରିତାନ୍, ମାରି ଇସ୍ରାଏଲ ଆକା ୱେନ୍ଜି ମାରି ରିସା ଆତାନ୍ । ଜାକୁବଙ୍ଗ୍ ବାର ଲୋକ ମାରିନ୍କୁ ମାର୍ହାର୍; ୱାରି ଲୋଇ ରୁବେନ୍ ଜାକୁବଦି ପେରିକଡ଼, ୱାନ୍ ମାରି ସିମିୟୋନ ମାରି ଲେବି ମାରି ଜିହୁଦା ମାରି ଇସାକର ମାରି ସବୁଲୁନ୍, ଇୟାକାର୍ ଲେୟାଦି କଡ଼ର୍; ମାରି, ଜୋସେପ୍ ମାରି ବିନ୍ୟାମିନ୍ ରାହେଲଦି କଡ଼ର୍; ମାରି, ଦାନ୍ ମାରି ନପ୍ତାଲି ରାହେଲଦି ଦାସି ବିଲ୍ହାଦି କଡ଼ର୍; ମାରି, ଗାଦ୍ ମାରି ଆସେର୍ ଲେୟାଦି ଦାସି ସିଲ୍ପାଦି କଡ଼ର୍ । ଜାକୁବଦି ଇୟା ୱିଜୁ କଡ଼ର୍ ପଦନ ଅରାମତୁ ଜନମ୍ ଆତାମାର୍ହାର୍ ।
ଇସ୍ହାକ୍ତି ସାନିକା
ତାନିୱେନେକା କିରିୟତ ଅର୍ବ, ଅର୍ତାତ୍, ହିବ୍ରୋଣ ଗାଡ଼ଦି ଲାକୁତୁ ମମ୍ରି ଦରୁଦି ଏମେ ବାଡିଦୁ ଅବ୍ରାହାମ ମାରି ଇସ୍ହାକ୍ ବାସାକିଜି ମାର୍ହାର୍, ଆୟା ବାଡିଦୁ ଜାକୁବ ନିଜେଦି ବୁବା ଇସ୍ହାକ୍ ଲାକୁତୁ ଇଗାସର୍ହାନ୍ । ଇସ୍ହାକ୍ଦି ବାର୍ସୁ ସହେ ଅସେ ବାର୍ସୁ ମାର୍ହାତ୍ । ତାନିୱେନେକା ଇସ୍ହାକ୍ ଡକରା ଆଜି ସାତାସର୍ହାନ୍, ନିଜେଦି ଲୋକା ଲାକୁତୁ ମୁସାତାନ୍; ମାରି ୱାନି ମାରିସିର୍ ଏସୌ ନି ଜାକୁବ ୱାନିଙ୍ଗ୍ ମୁସ୍ତାର୍ ।
Source notes (4)
- Footnote ବେତେଲତୁ ମାପୁରୁ
- Footnote ଦୁଃକ୍ ମାରାନ୍
- Footnote କସ୍ଟଦି କଡ଼
- Footnote ଉଣିକିୟୁଦି ମାରିନ୍
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.