Konda Porja Bible
ପାର୍ତୁମ୍ 36
ଏସୌଦି କୁଟୁମ୍
ଇକା ଆଜିନାତ୍, ଏସୌଦି କୁଟୁମ୍ । ତାନି ଆଇ ଦରୁ ଇଦୋମ ଏସୌ କିଣାନିୟ ଲୋକା ରୁଣ୍ତି ଆଇଲିକାଙ୍ଗ୍, ଅର୍ତାତ୍, ହିତିୟ ଏଲୋନଦି ଆଇଲି ଆଦାଦିଙ୍ଗ୍ ମାରି ଅନାର୍ ଆଇଲି ହିଦିୟ ସିବିୟନ୍ଦି ନାତି ଅହଲିବାମାଦିଙ୍ଗ୍, ତାନିଙ୍ଗ୍ ଡ଼ିସ୍ତିଙ୍ଗ୍ ନବାୟୋତଦି ତାଙ୍ଗିଁଙ୍ଗ୍ ଅର୍ତାତ୍, ଇସ୍ମାଏଲଦି ଆଇଲି ବାସ୍ମତ୍ତିଙ୍ଗ୍ ପେଡ଼ି କିତାନ୍ । ତାନିୱେନେକା ଏସୌଦି ମାଡ଼ାନ୍ ଆଦା ଇଲିପସ୍ତିଙ୍ଗ୍ ମାରି ବାସ୍ମତ୍ ରୁୟେଲଦିଙ୍ଗ୍ ଜନମ୍ କିତାତ୍ । ମାରି ଅହଲିବାମା, ଜିୟୁସ୍, ଜାଲମ୍ ମାରି କୋରହଦିଙ୍ଗ୍ ଜନମ୍ କିତାତ୍; ଏସୌଦି ଇୟା ୱିଜେରେ କଡ଼ର୍ କିଣାନ୍ ଦେସ୍ତୁ ଜନମ୍ ଆତାମାର୍ହାର୍ ।
ତାନିୱେନେକା ଏସୌ ନିଜେଦି ଆଡ଼ିକାଙ୍ଗ୍ ମାରି କଡ଼ରିଙ୍ଗ୍, ଆଇଲିକାଙ୍ଗ୍ ମାରି ଇଲୁଦି ଆଇ ୱିଜୁ ଲୋକାଙ୍ଗ୍, ମାରି, ନିଜେଦି ୱିଜୁ ଡ଼ାକୁକଡିଙ୍ଗ୍ ମାନ୍ଦା ମାରି କିଣାନ୍ ଦେସ୍ତୁ ଉଣ୍ତାକିତି ୱିଜୁ ଦନ୍ ଆସ୍ସି ନିଜେଦି ତୋଡ଼ାନ୍ ଜାକୁବ ଲାକୁତୁରାନ୍ ଆଇ ଦେସ୍ତୁ ସର୍ହାନ୍ । ଏଣ୍ତେସ୍କି ୱାରି ଦନ୍ ନାଣ୍ତମାନିଙ୍ଗ୍ ୱାର୍ ଉନ୍ଡ୍ରେ ମାନୁ ବାସା କିଦେଙ୍ଗ୍ ଆଟ୍ଏତାର୍, ମାରି, ୱାରି ଡ଼ାକୁକଡିଙ୍ଗ୍ ମାନ୍ଦା ଉଣ୍ତିଙ୍ଗ୍ ଆୟା ବାସାକିତି ବାଡିଦୁ ଅର୍ସେ ତେବାଦେଙ୍ଗ୍ ଆଟ୍ଏତାର୍ । ଇୟାୱାଜା ଏସୌ ସେୟିରଦି ଗରନ୍ତୁ ବାସା କିତାନ୍; ଆୟା ଏସୌଦି ଆଇ ଦରୁ ଇଦୋମ ।
ମାରି ସେୟିର ଗରତି ଇଦୋମିୟ ଲୋକା ପୁର୍ବେଦି ଡକ୍ରାଦାଦା ଏସୌଦି କୁଟୁମ୍ । ଏସୌଦି କଡ଼ରି ଦରୁ ଇକା । ଏସୌଦି ଆଦା ଦରୁତି ଆଡ଼ିଦି କଡ଼ ଇଲିପସ୍ ମାରି ବାସ୍ମତ୍ ଦରୁଦି ଆଡ଼ିଦି କଡ଼ ରୁୟେଲ । ମାରି, ଇଲିପସ୍ଦି କଡ଼ ତୈମନ୍ ମାରି ଓମାର୍ ମାରି ସପୋ ମାରି ଗୟିତମ୍ ମାରି କନସ୍ । ମାରି, ଏସୌଦି କଡ଼ ଇଲିପସ୍ଦି ତିମ୍ନା ଦରୁଦି ଉଣ୍ତ୍ରି ଇସ୍ରିଆଡ଼ି ମାର୍ହାତ୍, ୱାଦ୍ ଇଲିପସ୍ଦି ମାଡ଼ାନ୍ ଅମାଲେକଦିଙ୍ଗ୍ ଜନମ୍ କିତାତ୍; ଇୟାକାର୍ ଏସୌଦି ଆଡ଼ି ଆଦାର୍ କଡ଼ର୍ । ରୁୟେଲଦି କଡ଼ ନହତ୍ ମାରି ସେରହ ମାରି ସମ୍ମ ମାରି ମିସା, ଇୟାକାର୍ ଏସୌଦି ଆଡ଼ି ବାସ୍ମତ୍ଦି କଡ଼ର୍ ।
ମାରି, ସିବିୟନ୍ଦି ନାତି ଅନାଦି ଆଇଲି ଅହଲିବାମା, ଏସୌଦି ଆଡ଼ି ମାର୍ହାତ୍, ତାନି କଡ଼ର୍ ଜିୟୁସ୍ ମାରି ଜାଲମ୍ ମାରି କୋରହ ।
ଏସୌଦି କଡ଼ରି କୁଟୁମ୍ । ଏସୌଦି ପେରିକଡ଼ ଇଲିପସ୍, ୱାନି କଡ଼ ରାଜା ତୈମନ୍ ମାରି ରାଜା ଓମାର୍ ମାରି ରାଜା ସପୋ ମାରି ରାଜା କନସ୍ ମାରି ରାଜା କୋରହ ମାରି ରାଜା ଗୟିତମ୍ ମାରି ରାଜା ଅମାଲେକ୍; ଇଦୋମ ଦେସ୍ତୁ ଇଲିପସ୍ କୁଡ଼ାଦି ଇୟା ରାଜାର୍ ଆଦାଦି କଡ଼ର୍ ମାର୍ହାର୍ ।
ଏସୌଦି କଡ଼ ରୁୟେଲଦି କଡ଼ ରାଜା ନହତ୍ ମାରି ରାଜା ସେରହ ମାରି ରାଜା ସମ୍ମ ମାରି ରାଜା ମିସା; ଇଦୋମ ଦେସ୍ତୁ ରୁୟେଲ କୁଡ଼ାଦୁ ଇୟା ରାଜାର୍ ଏସୌଦି ଆଡ଼ି ବାସ୍ମତ୍ଦି କଡ଼ର୍ ମାର୍ହାର୍ ।
ମାରି ଏସୌଦି ଆଡ଼ି ଅହଲିବାମାଦି କଡ଼ ରାଜା ଜିୟୁସ୍ ମାରି ରାଜା ଜାଲମ୍ ମାରି ରାଜା କୋରହ; ଅନାଦି ଆଇଲି ଅହଲିବାମା, ଏସୌଦି ଆଡ଼ି ମାର୍ହାତ୍, ଇୟାକାର୍ ତାନି କଡ଼ର୍ ମାର୍ହାର୍ । ଇୟାକାର୍ ଏସୌଦି, ଅର୍ତାତ୍, ଇଦୋମଦି କଡ଼ର୍ ମାରି ଇୟାକାର୍ ୱାରି ରାଜାର୍ ।
ସେୟିରଦି କୁଟୁମ୍
ପୁର୍ବେକାଡ଼ାଦି ଆୟା ଦେସ୍ତୁମାନି ହୋରିୟ ସେୟିରଦି କଡ଼ର୍ ଲୋଟନ୍ ମାରି ସୋବଲ୍ ମାରି ସିବିୟନ୍ ମାରି ଅନା ମାରି ଦିସୋନ୍ ମାରି ଏଜର ମାରି ଦିସନ୍; ସେୟିରଦି ଇୟା କଡ଼ର୍ ଇଦୋମ ଦେସ୍ତି ହୋରିୟ କୁଡ଼ାଦି ରାଜାର୍ ମାର୍ହାର୍ ।
ଲୋଟନଦି କଡ଼ ହୋରି ମାରି ହେମମ୍, ମାରି ଲୋଟନ୍ଦି ତିମ୍ନା ଦରୁଦି ତାଙ୍ଗିଁ ମାର୍ହାତ୍ । ମାରି, ସୋବଲ୍ଦି କଡ଼ ଅବଲନ୍ ମାରି ମାନହତ୍ ମାରି ଏବଲ ମାରି ସପୋ ମାରି ଓନମ୍ ।
ମାରି, ସିବିୟିନଦି କଡ଼ର୍ ଅୟା ମାରି ଅନା; ଇୟା ଅନା ନିଜେଦି ବୁବା ସିବିୟନ୍ଦି ଗଦ ସାରାକିନି ବେଡ଼ାଦୁ ଗରନ୍ତୁ ଉସୁମୁ ଏରୁଦି ଉସା ସନିକା ପୟ୍ଜି ସପ୍ତାମାର୍ହାନ୍ । ଆୟା ଅନାଦି କଡ଼ ଦିସନ୍ ମାରି ଆଇଲି ଅହଲିବାମା । ମାରି, ଦିସନ୍ଦି କଡ଼ ହିମ୍ଦନ୍ ମାରି ଇସବନ୍ ମାରି ଜିତ୍ରନ୍ ମାରି କରାନ୍ । ଏଜରଦି କଡ଼ ବିଲହନ୍ ମାରି ସାବନ୍ ମାରି ଆକନ୍ । ମାରି, ଦିସନ୍ଦି କଡ଼ ଉସ୍ ମାରି ଅରାନ୍ । ହୋରିୟ କୁଡ଼ାଦି ରାଜା ଇକା; ରାଜା ଲୋଟନ୍ ମାରି ରାଜା ସୋବଲ୍ ମାରି ରାଜା ସିବିୟନ୍ ମାରି ରାଜା ଅନା ମାରି ରାଜା ଦିସୋନ୍ ମାରି ରାଜା ଏଜର ମାରି ରାଜା ଦିସନ୍ । ଇୟାକାର୍ ସେୟିରଦି ଦେସ୍ତୁ ହୋରିୟ କୁଡ଼ାଦି ରାଜାର୍ ମାର୍ହାର୍ ।
ଇଦୋମଦି ରାଜାର୍
ମାରି, ଇସ୍ରାଏଲ ଲୋକା ମୁସୁକୁ ଏମେ ରାଜା ସାସନ୍ କିନି ଆଗିଡ଼ି ଇୟା ରାଜାର୍ ଇଦୋମ ଦେସ୍ତୁ ସାସନ୍ କିତାର୍ । ବିୟୋରର ବେଲା ଦରୁଦି କଡ଼ ଇଦୋମ ଦେସ୍ତୁ ସାସନ୍ କିତାନ୍, ୱାନି ଗାଡ଼୍ ଦରୁ ଦିନ୍ଆବା । ବେଲାଦି ସାନି ୱେନେକା, ୱାନି ପଦଦୁ ବସ୍ରାଦୁ ତେବାନି ସେରହଦି କଡ଼ ଜୋବବ୍ ସାସନ୍ କିତାନ୍ । ମାରି ଜୋବବ୍ଦି ସାତି ୱେନେକା ତୈମନ୍ ଦେସ୍ତି ହୁସମ୍ ୱାନି ପଦଦୁ ସାସନ୍ କିତାନ୍ । ହୁସମଦି ସାତି ୱେନେକା, ବଦଦଦି କଡ଼ ଜେ ହଦଦ୍ ମୋୟାବ କିଡ଼ିଇଦୁ ମିଦିୟନଦିଙ୍ଗ୍ ଜିଣାତାନ୍, ୱାନ୍ ୱାନି ପଦଦୁ ସାସନ୍ କିତାନ୍; ୱାନି ଗାଡ଼୍ ଦରୁ ଅବିତ୍ । ହଦଦ୍ଦି ସାତି ୱେନେକା, ମସ୍ରେକାଦୁ ତେବାନି ସମ୍ଲ ୱାନି ପଦଦୁ ସାସନ୍ କିତାନ୍ । ମାରି, ସମ୍ଲଦି ସାତି ୱେନେକା ପରାତ୍ ଗାଡାଦି ଲାକୁତୁରି ରାହୋବତ୍ଦୁ ବାସାନି ସୌଲ ୱାନି ପଦଦୁ ସାସନ୍ କିତାନ୍ । ସୌଲଦି ସାତି ୱେନେକା, ଅକ୍ବୋରଦି କଡ଼ ବାଲ୍ହାନନ୍ ୱାନି ପଦଦୁ ସାସନ୍ କିତାନ୍ । ମାରି, ଅକ୍ବୋରଦି କଡ଼ ବାଲ୍ହାନନ୍ଦି ସାତି ୱେନେକା, ହଦର ୱାନି ପଦଦୁ ସାସନ୍ କିତାନ୍; ୱାନି ଗାଡ଼୍ ଦରୁ ପାଉ ମାରି ୱାନି ଆଡ଼ିଦି ଦରୁ ମହେଟବେଲ୍ ମାର୍ହାତ୍; ୱାଦ୍ ମଟ୍ରେଦରଦି ଆଇଲି ମାରି ମେସାହବଦି ନାତି । ଏସୌମାଡ଼ାନ୍ ଜନମ୍ ଆତାର୍, ମାରି, କୁଟୁମ୍ ମାରି ବାଡି ମାରି ଦରୁ ଇସାପ୍ତାନ୍ ଏମେ ଏମେ ରାଜାର୍ ମାର୍ହାର୍, ୱାରି ଦରୁଇସାପ୍; ଆତାତ୍, ରାଜା ତିମ୍ନା ମାରି ରାଜା ଅଲ୍ବା ମାରି ରାଜା ଜିତେତ୍ । ମାରି ରାଜା ଅହଲିବାମା ମାରି ରାଜା ଏଲା ରାଜା ପିନୋନ୍ ମାରି ରାଜା କନସ୍ ମାରି ରାଜା ତୈମନ୍ ମାରି ରାଜା ମିବ୍ସର୍ ମାରି ରାଜା ମଗ୍ଦିୟେଲ ମାରି ରାଜା ଇରମ୍; ଇୟାକାର୍ ନିଜେ ନିଜେଦି ଅଦିକାର୍ କିତିମାନି ଦେସ୍ତୁ ବାସାନି ବାଡି ଇସାବ୍ତାନ୍ ଇଦୋମଦି ରାଜାର୍ ମାର୍ହାର୍ । ଇଦୋମିୟଦି ଡକରାଦାଦା ଏସୌଦି ମାଟା ୱିଜିତାତ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.