Konda Porja Bible
ପାର୍ତୁମ୍ 5
ଆଦମତି କୁଟୁମ୍
ଆଦମତି କୁଟୁମ୍ଦି କାତା ଇକା । ଏମେ ନାଣ୍ତିଙ୍ଗ୍ ମାପୁରୁ ଲୋକ୍ତିଙ୍ଗ୍ ତିଆର୍ କିତାନ୍; ଆୟାନାଣ୍ତିଙ୍ଗ୍ ମାପୁରୁଦି ରୁପ୍ତାନ୍ ୱାନ୍ ୱାନିଙ୍ଗ୍ ତିଆର୍ କିତାନ୍; ମେମାରି ନି ଆଇମା କିଜି ୱାନ୍ ୱାରିଙ୍ଗ୍ ତିଆର୍ କିତାନ୍; ମାରି ୱାର୍ ତିଆର୍ ଆନି ନାଣ୍ତିଙ୍ଗ୍ ୱାରିଙ୍ଗ୍ ଆର୍ସିବାଦ୍ କିଜି ଲୋକ୍ ଦରୁ ସିତାନ୍ । ଆଦମ ସହେ ତିରିସ୍ ବାର୍ସୁ ବୟସ୍ତାନ୍ ନିଜେଦି ୱାଜା ନି ରୁପ୍ତାନ୍ ଅରେନ୍ କଡ଼ ଜନମ୍ କିଜି ୱାନି ଦରୁ ସେତ ସିତାନ୍ । ସେତଦି ଜନମ୍ ୱେନେକା ଆଦମ ଆଟ୍ସୋ ବାର୍ସେକ୍ ଜିଜି ମାରି କଡ଼ର୍ ଆଇଲିକିକାଙ୍ଗ୍ ଜନମ୍ କିତାନ୍ । ଆଦମଦି ବୟସ୍ ନୋହସ ତିରିସ୍ ବାର୍ସେକ୍ ମାର୍ହାନ୍; ଆବେଟ୍କୁ ୱାନ୍ ସାତାନ୍ ।
ସେତ ସହେ ପାସ୍ ବାର୍ସେକ୍ତୁ ଇନୋସତିଙ୍ଗ୍ ଜନମ୍ କିତାନ୍; ଇନୋସଦି ଜନମ୍ ୱେନେକା ସେତ ଆଟ୍ସ ସାତ୍ ବାର୍ସେକ୍ ଜିଜି ମାରିବା କଡ଼ର୍ ଆଇଲିକ୍ ଜନମ୍ କିତାତ୍ । ସେତଦି ବୟସ୍ ନୋହସ ବାର ବାର୍ସେକ୍ ମାର୍ହାତ୍; ଆବେଟ୍ ୱାନ୍ ସାତାନ୍ ।
ଇନୋସ ନବେ ବାର୍ସେକ୍ ବୟସ୍ତୁ କୟିନାନତିଙ୍ଗ୍ ଜନମ୍ କିତାନ୍; ମାରି, କୟିନାନତି ଜନମ୍ ୱେନେକା ଇନୋସ ଆଟ୍ସ ପନ୍ଦର ବାର୍ସେକ୍ ଜିଜି ମାରିବା କଡ଼ର୍ ଆଇଲିକ୍ ଜନମ୍ କିତାର୍; ଇନୋସଦି ବୟସ୍ ନୋହସ ପାଞ୍ଚ୍ ବାର୍ସେକ୍ ମାର୍ହାତ୍; ଆବେଟ୍ ୱାନ୍ ସାତାନ୍ ।
କୟିନାନ ସତୁରି ବାର୍ସେକ୍ ବୟସ୍ତୁ ମହଲଲେଲଦିଙ୍ଗ୍ ଜନମ୍ କିତାନ୍; ମହଲଲେଲ ଜନମ୍ ଆତି ୱେନେକା କୟିନାନ ଆଟ୍ସ ଚାଲିସ୍ ବାର୍ସେକ୍ ଜିଜି ମାରିବା କଡ଼ର୍ ଆଇଲିକ୍ ଜନମ୍ କିତାର୍; ମାରି କୟିନାନଦି ବୟସ୍ ନୋହସ ଦସ୍ ବାର୍ସେକ୍ ମାର୍ହାତ୍; ଆବେଟ୍ ୱାନ୍ ସାତାନ୍ ।
ମହଲଲେଲ ସାଟେ ପାସ୍ ବାର୍ସେକ୍ତୁ ଜେରଦଦିଙ୍ଗ୍ ଜନମ୍ କିତାନ୍; ଜେରଦ ଜନମ୍ ଆତି ୱେନେକା ମହଲଲେଲ ଆଟ୍ସ ତିରିସ୍ ବାର୍ସେକ୍ ଜିଜି ମାରିବା କଡ଼ର୍ ଆଇଲିକ୍ ଜନମ୍ କିତାର୍; ମହଲଲେଲଦି ବୟସ୍ ଆଟ୍ସ ନୋବେପାସ୍ ବାର୍ସେକ୍ ମାର୍ହାତ୍; ଆବେଟ୍ ୱାନ୍ ସାତାନ୍ ।
ଜେରଦ ସହେ ସାଟେଦୁଇ ବାର୍ସେକ୍ତୁ ହୋନକଦିଙ୍ଗ୍ ଜନମ୍ କିତାତ୍; ହୋନକଦି ଜନମ୍ ୱେନେକା ଜେରଦ ଆଟ୍ସ ବାର୍ସେକ୍ ଜିଜି ମାରିବା କଡ଼ର୍ ଆଇଲିକ୍ ଜନମ୍ କିତାନ୍; ଜେରଦଦି ବୟସ୍ ନୋହସ ସାଟେଦୁଇ ବାର୍ସେକ୍ ମାର୍ହାତ୍; ଆବେଟ୍ ୱାନ୍ ସାତାନ୍ ।
ହୋନକ ସାଟେପାସ୍ ବାର୍ସେକ୍ତି ବୟସ୍ତାନ୍ ମତୁସେଲହଦିଙ୍ଗ୍ ଜନମ୍ କିତାନ୍; ମତୁସେଲହଦି ଜନମ୍ ଆତି ୱେନେକା ହୋନକ ତିନିସୋ ବାର୍ସେକ୍ ସାନ୍ଦି ମାପୁରୁଦି ୱାଲେ ବୁଲାସାଲା କିତାନ୍, ମାରି ୱାନ୍ ମାରିବା କଡ଼ର୍ ଆଇଲିକ୍ ଜନମ୍ କିତାନ୍; ହୋନକଦି ବୟସ୍ ତିନିସୋ ସାଟେପାସ୍ ବାର୍ସେକ୍ ମାର୍ହାନ୍; ହୋନକ ମାପୁରୁଦି ୱାଲେ ବୁଲାସାଲା କିତାନ୍; ମାରି ୱାନ୍ ସାୟାମାୟା ଆତାନ୍; ଏଣ୍ତେସ୍ ମାପୁରୁ ୱାନିଙ୍ଗ୍ ଅତାନ୍ ।
ମତୁସେଲହ ସହେ ଅସେସାତ୍ ବାର୍ସେକ୍ତି ବୟସ୍ତାନ୍ ଲେମକଦିଙ୍ଗ୍ ଜନମ୍ କିତାନ୍; ଲେମକଦି ଜନମ୍ ଆତି ୱେନେକା ମତୁସେଲହ ସାତସୋ ଅସେଦୁଇ ବାର୍ସେକ୍ ଜିଜି ମାରିବା କଡ଼ର୍ ଆଇଲିକ୍ ଜନମ୍ କିତାନ୍; ମତୁସେଲହଦି ବୟସ୍ ନହସୋ ସାଟେନୋଅ ବାର୍ସେକ୍ ମାର୍ହାତ୍; ଆବେଟ୍ ୱାନ୍ ସାତାନ୍ ।
ଲେମକ ସହେ ଅସେଦୁଇ ବାର୍ସେକ୍ତି ବୟସ୍ତାନ୍ ଅରେନ୍ କଡ଼ ଜନମ୍ କିତାନ୍, ମାରି ୱାନି ଦରୁ ନୋହ ସିତାର୍, ଏଣ୍ତେସ୍ ୱାନ୍ ଇର୍ହାନ୍, ସଦାପ୍ରବୁଦି ମାଡ଼ାନ୍ ଆନାଦୁରିଆ ସିତିମାନି ବୁମିଦୁ ମା ପାଣି ମାରି କିୟୁଦି କାସ୍ଟୁ ବିସୟ୍ତାନ୍ ଇକା ମା ୱେଡ଼ିକା କିବିସ୍କିନାତ୍ । ନୋହଦି ଜନମ୍ ଆତି ୱେନେକା ଲେମକ ପାସ୍ସୋ ନବେପାସ୍ ବାର୍ସେକ୍ ଜିଜି ମାରିବା କଡ଼ର୍ ଆଇଲିକ୍ ଜନମ୍ କିତାନ୍; ଲେମକଦି ବୟସ୍ ସାତ୍ସ ସତୁରି ସାତ୍ ବାର୍ସେକ୍ ମାର୍ହାତ୍; ଆବେଟ୍ ୱାନ୍ ସାତାନ୍ । ମାରି ନୋହଙ୍ଗ୍ ପାସ୍ସୋ ବାର୍ସେକ୍ ବୟସ୍ ଆତାତ୍; ମାରି ନୋହ, ସେମ ମାରି ହାମ ମାରି ଜେପତ୍ଦିଙ୍ଗ୍ ଜନମ୍ କିତାନ୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.