Konda Porja Bible
ପାର୍ତୁମ୍ 4
କୟିନ ମାରି ଏବଲ
ତାନିୱେନେକା ଆଦମ ନିଜେଦି ଆଡ଼ିସି ହବାଦି ୱାଲେ ଡରିତାନ୍, ୱାଦ୍ ପଟାଦୁ ଆଜି କୟିନ ଦରୁତି ଅରେନ୍ କଡ଼ ଜନମ୍ କିଜି ଇର୍ହାତ୍, “ସଦାପ୍ରବୁ ସାକାଦାନ୍ ନାନୁ ଅରେନ୍ କଡ଼ ପୟ୍ତାମାନା ।” ତାନିୱେନ୍କା ୱାଦ୍ ହେବଲ ଦରୁଦି ୱାନି ତଡ଼୍ତିଙ୍ଗ୍ ଜନମ୍ କିତାତ୍ । ହେବଲ ମେଣ୍ତେଙ୍ଗ୍ ସାରାକିନି ଗଡ଼ୁଏନ୍ ମାରି କୟିନ ଚାସ୍ ପାଣି କିନିକାନ୍ ଆତାନ୍ । ଏସ ଦିନ୍ ୱେନ୍କା କୟିନ ସଦାପ୍ରବୁଦି ଉଦେସ୍ତାନ୍ ବୁମିଦାନ୍ ଆସ୍ତି ପଲ୍ ତାସି ସିତାନ୍ । ମାରି ହେବଲ ବା ନିଜେଦି ମାନ୍ଦାଦି ପ୍ରାତୁମ୍ ଜନମ୍ଆତି ଏସ ଜାତୁ ମାରି ୱାନିକା କଣ୍ୱେସ୍ ସିତାନ୍ । ସଦାପ୍ରବୁ ହେବଲତିଙ୍ଗ୍ ମାରି ୱାନି ପୁଜାଦିଙ୍ଗ୍ ମାନାତାନ୍ । ମାତର୍ କୟିନଙ୍ଗ୍ ମାରି ୱାନି ପୁଜାଦିଙ୍ଗ୍ ୱାନ୍ ମାନାଏତାନ୍ । ଇୟାଉଣ୍ତିଙ୍ଗ୍ କୟିନ ନାଣ୍ତ ରିସା ଆଜି ଦୁଃକ୍ କିତାନ୍ । ଆବେଟ୍କୁ ସଦାପ୍ରବୁ କୟିନଙ୍ଗ୍ ଇର୍ହାନ୍, “ନିନୁ ଏନ୍ଦା ରିସା ଆଜିନି ? ମାରି ଏନ୍ଦା ଦୁଃକ୍ ଆଜିନି ? ନେଗିପାଣି କିତିଙ୍ଗ୍, ନିନୁ ମୁସ୍କୁ ମକମ୍ ଆଏତ୍ ? ସତ୍ପାଣି କିଏତିଙ୍ଗ୍, ପାପ୍ ସେର୍ଲାଦୁ କାପ୍କିନାମାନାତ୍; ୱାନ୍ ମି ଉଣ୍ତିଙ୍ଗ୍ ସାସନ୍ କିଦେଙ୍ଗ୍ ବଦା କିନାତ୍, ମାତର୍ ନିନୁ ତାନି ମୁସୁକୁ ଜିଣାନିକା ମାନାତ୍ ।”
ତାନିୱେନ୍କା କୟିନ ନିଜେଦି ତୋଡ଼ାନ୍ ହେବଲତି ୱାଲେ ୱାର୍ଗିଜିସାତାର୍ । ଆବେଟ୍ ୱାର୍ କିଡ଼ିଇଦୁ ମାନି ବେଡ଼ାଦୁ କୟିନ ନିଜେ ତୋଡ଼ାନ୍ ହେବଲତିଙ୍ଗ୍ ଡାକ୍ସି ସାପିସ୍ତାନ୍ ।
ସଦାପ୍ରବୁ କୟିନଙ୍ଗ୍ ୱେନ୍ବାତାନ୍, “ନି ତଡ଼ାନ୍ ହେବଲ ଏମେବାନ୍ ?” ୱାନ୍ ଇର୍ହାନ୍, “ନାନୁ ନେସେଏ, ନାନୁ ଇନିକା ନା ତଡ଼ାନ୍ତି ରକିୟା କିନିକାନ୍ ?”
ୱାନ୍ ଇର୍ହାନ୍, “ନିନୁ ଏନ୍ଦା ଇୟାୱାଜା ପାଣି କିତି ? ନି ତଡ଼ାନ୍ତି ନେତେର୍ ବୁମିଦାନ୍ ମା ଉଣ୍ତିଙ୍ଗ୍ କୁକ୍ସିନାତ୍ । ଇୟାଉଣ୍ତିଙ୍ଗ୍ ଏମେ ବୁମି ନି କିୟୁଦାନ୍ ନି ତଡ଼ାନ୍ତି ନେତେର୍ ମାନାନି ଉଣ୍ତିଙ୍ଗ୍ ନିଜେଦି ୱେୟୁ ରେଆତାମାନାତ୍, ଆୟା ବୁମିଦାନ୍ ଇଲେଇ ନିନୁ ଆନାଦୁରିଆ ପୋଇତି; ବୁମିଦୁ ଚାସ୍ ପାଣି କିତିଙ୍ଗ୍ ବା ଆକା ନିଜେଦି ସାକ୍ତି ସିଜି ମାରି ମି ସେବା କିଏତ୍; ନିନୁ ଦୁନିଆଦୁ ଇଲୁସିଲି ଲୋକା ମାରି ବୁଲାନିୱାରି ୱାଜା ଆନି ।”
କୟିନ ସଦାପ୍ରବୁଙ୍ଗ୍ ଇର୍ହାନ୍, “ନା ଦଣ୍ତ୍ ସାସ୍ କିଦେଙ୍ଗ୍ ଆଟ୍ଇକା । ସୁଡ଼ୁଆ, ନିନୁ ନେରୁ ନାଙ୍ଗିଁ ଇୟା ବାଡିଦାନ୍ ପେରିତି, ଆବେଟ୍ ନି ଆଗ୍ଡ଼ିରାନ୍ ନାନୁ ମାର୍ଗିନା; ଇୟାୱାଜା ଦୁନିଆଦୁ ଇଲୁସିଲି ଲୋକ୍ତି ୱାଜା ମାରି ବୁଲାନିୱାରି ୱାଜା ଆତିଙ୍ଗ୍ ଇୟାୱାଜା ଆନାତ୍ ଜେ, ଏମେ ଲୋକ୍ ନାଙ୍ଗିଁ ପୟ୍ତିଙ୍ଗ୍ ସାୟାମାରାଗା ଡାକ୍ନାର୍ ।”
ମାରି ସଦାପ୍ରବୁ ୱାନିଙ୍ଗ୍ ଇର୍ହାନ୍, “ଇୟାଉଣ୍ତିଙ୍ଗ୍ ଏନ୍ କୟିନଙ୍ଗ୍ ସାୟାମାରାଗା ଡାକ୍ତିଙ୍ଗ୍, ୱାନି ସାତ୍ଗୁଣୁ ଦଣ୍ତ୍ ଆନାତ୍ ।” ମାରି ଏନ୍ ୱାନିଙ୍ଗ୍ ସୁଡ଼ୁଜି ଏଣ୍ତେସ୍ ସାପିସ୍ କିଏନ୍, ଇୟା ଉଣ୍ତିଙ୍ଗ୍ ସଦାପ୍ରବୁ କୟିନଦି ଉଣ୍ତିଙ୍ଗ୍ ଉନ୍ଡ୍ରି ସିନା ତିଆର୍ କିତାନ୍ । ମାରି କୟିନ ସଦାପ୍ରବୁଦି ଆଗ୍ଡ଼ିରାନ୍ ସଲ୍ସି ଏଦନତି ୱେଡ଼ାସନି ତରିନ୍ଟି ନୋଦ ଦରୁତି ବାଡିଦୁ ବାସାକିତାନ୍ ।
କୟିନଦି କୁଟୁମ୍
ମାରି କୟିନ ନିଜେଦି ଆଡ଼ିସି ୱାଲେ ଇଲୁଆସ୍ତାନ୍, ୱାଦ୍ ମେନ୍ଦଲ୍ତୁ ତେବାଜି ହୋନକଙ୍ଗ୍ ଜନମ୍ କିତାତ୍; ମାରି ୱାନ୍ ଉଣ୍ତ୍ରି ଗାଡ଼୍ ତିଆର୍ କିଜି ନିଜେଦି ମାରିନ୍ତି ଦରୁ ଇସାପ୍ତାନ୍ ଆବେଣି ଦରୁ ହନୋକ ସିତାତ୍ । ଆୟା ହୋନକଦି ମାରିନ୍ ଇରଦ ମାରି ଇରଦଦି ମାରିନ୍ ମହୁୟାୟେଲ ମାରି ମହୁୟାୟେଲଦି ମାରିନ୍ ମତୁସାୟେଲ ମାରି ମତୁସାୟେଲଦି ମାରିନ୍ ଲେମକ । ଇୟା ଲେମକ ରୁଣ୍ତି ଆଇମେକାଙ୍ଗ୍ ପେଡ଼ିଆତାନ୍, ଅରେତ୍ତାନି ଦରୁ ଆଦା ଆଇତାନି ଦରୁ ସିଲା ମାର୍ହାତ୍ । ଆଦାଦି ପଟାଦୁ ଜାବଲ ଜନମ୍ ଆତାନ୍, ୱାନ୍ ଗୁଡ଼େଆଙ୍ଗାଁ ତେବାଜି ଜାତୁଙ୍ଗାଁଦି ପୁର୍ବେଦି ମେମାର୍ଏନ୍ ମାର୍ହାନ୍ । ୱାନି ତଡ଼ାନ୍ତି ଦରୁ ଜୁବଲ, ୱାନ୍ ଟଇଲା ବାଜା ମାରି ପିରଡ଼ି ଉକୁନିୱାରି ପୁର୍ବେଦି ମେମାର୍ଏନ୍ ମାର୍ହାନ୍ । ସିଲାଦି ପଟାଦୁ ତୁବଲ-କୟିନ ଜନମ୍ ଆତାର୍, ୱାନ୍ ପିତଲ୍ ମାରି ଲୁୱାଦି ୱିଜୁ ରକମ୍ତି କାଣ୍ତାକୁଡ଼ାମ୍କୁ ତିଆର୍ କିନିକାନ୍ ମାର୍ହାନ୍; ତୁବଲ୍ କୟିନଦି ନୟମା ଦର୍ତି ଅରେତ୍ ତାଙ୍ଗିଁ ମାର୍ହାତ୍ ।
ତାନିୱେନ୍କା ଲେମକ ନିଜେଦି ଆଡ଼ିକାଙ୍ଗ୍ ଇର୍ହାନ୍,
“ଏ ଆଦା ମାରି ସିଲା, ନା ମାଟା ୱେଣ୍ତ୍ରୁ; ଏ ଲେମକଦି ଆଡ଼ିକ୍, ମିରୁ ନା ବାକ୍ୟଦିଙ୍ଗ୍ ଗିତଣିସିଜି ୱେଣ୍ତ୍ରୁ; ଅରେନ୍ ମୁରୁଲି କଡ଼ ନାଙ୍ଗିଁ ମୁଟ୍ତି ବାଦ୍ଲୁ ନାନୁ ୱାନିଙ୍ଗ୍ ସାପିସ୍ କିତାମାନା ।
ଏସାଙ୍ଗ୍ କୟିନଦି ସାନି ଦଣ୍ତ୍ ସାତ୍ଗୁଣ ଆନାତ୍,
ଆର୍ତିଙ୍ଗ୍ ଲେମକଦି ଦଣ୍ତ୍ ସତୁରି ସାତ୍ ଗୁଣୁ ପୁରା ଆନାତ୍ ।”
ସେତ ନି ଇନୋସ
ଇୟାୱେନ୍କା ଆଦମ ମାରିଡ଼େସି ନିଜେଦି ଆଇମାଦି ୱାଲେ ଡରିତାନ୍, ୱାଦ୍ ଅରେନ୍ କଡ଼ ଜନମ୍ କିଜି ୱାନି ଦରୁ ସେତ ଇଟ୍ତାର୍; ଏଣ୍ତେସ୍କି ୱାଦ୍ ଇର୍ହାତ୍, “ମାପୁରୁ ହେବଲତି ବାଦ୍ଲୁ ମାରି ଅରେନ୍ ମାରିନ୍ ନାଙ୍ଗିଁ ସିତାମାନାନ୍, ଇରିଙ୍ଗ୍ କୟିନ ୱାନିଙ୍ଗ୍ ସାପିସ୍ କିତାମାର୍ହାନ୍ ।” ଆବେଟ୍ ସେତଙ୍ଗ୍ ବା ଅରେନ୍ କଡ଼ ଜନମ୍ ଆତାନ୍; ମାରି ୱାନ୍ ୱାନି ଦରୁ ଇନୋସ ସିତାନ୍ । ଇୟା ବେଡ଼ାଦୁ ଲୋକୁ ସଦାପ୍ରବୁଦି ଦରୁଦାନ୍ ପାର୍ତନା କିଦେଙ୍ଗ୍ ଆସ୍ତାର୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.