Konda Porja Bible
ପାର୍ତୁମ୍ 26
ଇସ୍ହାକ୍ ଗରାରଦୁ ବାସା କିତାନ୍
ଆଗ୍ଡ଼ି ଏଣ୍ତେସ୍ ଅବ୍ରହାମଦି ବେଡ଼ାଦୁ ଉଣିତିନିକା ପୁଟ୍ଏତାମାର୍ହାତ୍, ଆୟା ଦେସ୍ତୁ ମାରି ଉଣ୍ତ୍ରି ଦେବା ଆୟା ଉଣିତିନିକା ପୁଟ୍ଏତାତ୍ ଆକା, ଇସ୍ହାକ୍ ଗରାରଦୁ ପଲେସ୍ଟିୟରି ରାଜା ଅବିମେଲକ ଲାକୁତୁ ସର୍ହାନ୍ । ନାସ୍ତିୱାଲେ ମାପୁରୁ ୱାନିଙ୍ଗ୍ ଦର୍ସନ ସିଜି ଇର୍ହାନ୍, “ନିନୁ ମିସର ଦେସ୍ଦୁ ସଲ୍ମା; ମାପୁ ନିଙ୍ଗିଁ ଏମେ ଦେସ୍ଦୁ ଇନାପ୍, ଆବେନୁ ବାସା କିଆ । ନିନୁ ଇୟା ଦେସ୍ଦୁ ବାସା କିଆ, ଆବେଟ୍ ମାପୁ ମି ସାକା ଆଜି ନିଙ୍ଗିଁ ଆର୍ସିବାଦ୍ କିନାପ୍, ମାରି ନିଙ୍ଗିଁ ମାରି କୁଟୁମ୍ଦିଙ୍ଗ୍ ଇୟା ୱିଜୁ ଦେସ୍ ସିନାପ୍ ମାରି ମି ବୁବା ଅବ୍ରହାମ ଲାକୁତୁ ନିଜେଦି ଅଦିକାର୍ତି ପାର୍ମାଣ୍ ନିୟମ୍ ପୁରା କିନାପ୍ । ମାପୁ ବାଦଡ଼ଦି ସୁକେଙ୍ଗ୍ ୱାଜା ନି କୁଟୁମ୍ ପିରିସ୍ କିଜି ୱାରିଙ୍ଗ୍ ଇୟା ୱିଜୁ ଦେସ୍ ସିନାପ୍ ମାରି ନି କୁଟୁମ୍ତି ମାଡ଼ାନ୍ ଦୁନିଆଦି ୱିଜୁଜାତି ଆର୍ସିବାଦ୍ ପୋଇନାର୍ । ନାନ୍ ମିଙ୍ଗିଁ ଆର୍ସିବାଦ୍ କିନା, ଇରିଙ୍ଗ୍ ଅବ୍ରହାମ ମା ମାଟା ମାନାଜି ସିତିମାନି ବିସୟ୍ ମା ମାଟା ନି ନିୟମ୍ ମାନାତାମାନାନ୍ ।”
ଆବେଟ୍ ଇସ୍ହାକ୍ ଗରାରଦୁ ବାସା କିତାନ୍ । ଆବେଟ୍ ଆୟା ଜାଗାଦି ଲୋକୁ ୱାନି ଆଡ଼ି ବିସୟ୍ତାନ୍ ୱେନ୍ବାତାର୍, ୱାନ୍ ଇର୍ହାନ୍, “ୱାଦ୍ ନା ତାଙ୍ଗିଁ,” ଏଣ୍ତେସ୍ ଆୟା ବାଡିଦି ଲୋକୁ ରିବିକା ଉଣ୍ତିଙ୍ଗ୍ ନାଙ୍ଗିଁ ବା ସାପିସ୍ କିନାର୍, ଇକା ଅଡ଼୍ବିଜି ୱାନ୍ ତାନିଙ୍ଗ୍ ନିଜେଦି ଆଡ଼ି ଇଡ୍ରେଙ୍ଗ୍ ତିଲାତାନ୍; ଏଣ୍ତେସ୍ ରିବିକା ନାଣ୍ତ ସୁନ୍ଦୁରି ମାର୍ହାତ୍ । ମାରି ଆୟା ଜାଗାଦୁ ବେସିଦିନ୍ ବାସା କିତି ୱେନେକା ଉଣ୍ତ୍ରି ବେଡ଼ାଦୁ ପଲେସ୍ଟିୟ ରାଜା ଅବିମେଲକ୍ ଜରକା ସାରିଦାନ୍ ସୁଡ଼ୁତାନ୍ ଇସ୍ହାକତିଙ୍ଗ୍ ନିଜେଦି ଆଡ଼ି ରିବିକା ୱାଲେ ଗୁରିତିମାରିକା ସୁଡ଼ୁତାନ୍ । ଆବେଟ୍ ଅବିମେଲକ ଇସ୍ହାକଦିଙ୍ଗ୍ କୁକିସ୍ସି ଇର୍ହାନ୍, “ଆୟା ଆଇମା ସତେନେ ନି ଆଡ଼ି; ଆର୍ତିଙ୍ଗ୍ ନିନୁ ତାନିଙ୍ଗ୍ ନିଜେଦି ତାଙ୍ଗିଁ ଇଜି ଏଣ୍ତେସ୍ ଇର୍ହି ?” ନାସ୍ତିୱାଲେ ଇସ୍ହାକ୍ ଇର୍ହାନ୍, “ନାନୁ ଅଡ଼୍ବିତା, ନେସ୍ତି ତାନି ଉଣ୍ତିଙ୍ଗ୍ ନାଙ୍ଗିଁ ସାନିକା ୱାନାତ୍ ।”
ଆବେଟ୍ ଅବିମେଲକ ଇର୍ହାନ୍, “ନିନୁ ମା ୱାଲେ ଏନ୍ଦା ଇୟା ୱାଜା କିତି ? ଏମେ ଲୋକୁ ନି ଆଡ଼ିଦି ୱାଲେ ସାହାସ୍ତାନ୍ ଡର୍ଦେଙ୍ଗ୍ ଆଟ୍ତାନ୍ମାନ୍ଦି, ଆର୍ତିଙ୍ଗ୍ ନିନୁ ମାଙ୍ଗିଁ ଦସ୍ଆସ୍ତିମାନ୍ଦି ।” ତାନିୱେନେକା ଅବିମେଲକ ୱିଜୁ ଲୋକୁ ଇୟା ଆଦେସ୍ ସିତାନ୍, “ଏନ୍ ଆୟା ୱାନିଙ୍ଗ୍ ବା ୱାନି ଆଡ଼ିଙ୍ଗ୍ ମୁଟ୍ନାନ୍, ୱାନିଙ୍ଗ୍ ସାନିକା ଗଟାନାତ୍ ।”
ତାନିୱେନେକା ଇସ୍ହାକ୍ ଆୟା ଦେସ୍ଦୁ ଚାସ୍ପାଣି କିଜି ଆୟା ବାର୍ସୁ ସଏ ଗୁଣୁ ଲାବ୍ କିତାନ୍; ମାରି ସଦାପ୍ରବୁ ୱାନିଙ୍ଗ୍ ଆର୍ସିବାଦ୍ କିତାନ୍ । ଇୟାଉଣ୍ତିଙ୍ଗ୍ ୱାନ୍ ମୁସ୍କୁ ନିଙ୍ଗିଁଜି, ମାରି ୱାନ୍ ମାରି ନାଣ୍ତ ଦନ୍ ପୋଇଜି ବେସି ମାଜନ୍ ଆତାନ୍ । ମାରି ୱାନି ମେଣ୍ତେଙ୍ଗ୍ ମାରି ଡ଼ାକୁ, ମାରି ନାଣ୍ତ ସାକରଙ୍ଗୁ ଆତାର୍; ଆବେଟ୍ ପଲେସ୍ଟିୟଦି ଲୋକୁ ୱାରିଙ୍ଗ୍ ଆକାର୍ ଆଦେଙ୍ଗ୍ ଆସ୍ତାର୍ । ୱାରି ବୁବା ଅବ୍ରହାମ ବେଡ଼ାଦୁ ୱାନି ବୁବାଦି ସାକରଙ୍ଗୁ ଏମେ ଏମେ କୁଇଁ କାରିତାମାର୍ହାର୍, ପଲେସ୍ଟିୟଦି ଲୋକୁ ସିକିଲାଦାନ୍ ଆକା ୱିଜୁ ମୁସ୍ତା ସିତାର୍ ।
ତାନିୱେନେକା ଅବିମେଲେକ ଇସ୍ହାକ୍ ଇର୍ହାନ୍, “ନିନୁ ମା ଲାକୁତୁରାନ୍ ସାଙ୍ଗ୍ଆ, ଏନ୍ଦା ଇରିଙ୍ଗ୍ ନିନୁ ମା ମାଡ଼ାନ୍ ନାଣ୍ତ ସାକ୍ତି ଆତିମାନି ।” ଆବେଟ୍ ଇସ୍ହାକ୍ ଆୟା ଜାଗାଦାନ୍ ସଲିସ୍ ଗରାର ଲାକୁତୁ ଗୁଡ଼ା ତିଆର୍ କିଜି ଆବେନ୍ ବାସା କିତାନ୍ । ମାରି ନିଜେଦି ବୁବା ଅବ୍ରହାମଦି ବେଡ଼ାଦୁ କାରିତି ମାର୍ହି ଏମେ ଏମେ ନେଗି କୁଇଁ ଅବ୍ରହାମଦି ସାତି ୱେନେକା ପଲେସ୍ଟିୟର ମୁସ୍ତାମାର୍ହାର୍, ଆୟା ୱିଜୁ ଇସ୍ହାକ୍ ମାରିଡ଼େସି କାର୍ଜି ନିଜେଦି ବୁବା ସିତିମାର୍ହି ଦରୁ ଡ଼େସି ଇଟ୍ତାନ୍ ।
ମାରି ଇସ୍ହାକଦି ସାକରଙ୍ଗୁ ଗରାରଦି ଗରନ୍ତୁ ମାରିଡ଼େସି କାରିଜି ଏରୁ ସନି କୁଇଁ ପୋୟ୍ତାର୍ । ଆବେଟ୍ ଗରାରଦେସ୍ଦି ଗାଉଡ଼ୁଙ୍ଗ୍ ଇସ୍ହାକଦି ଗାଉଡ଼ୁଙ୍ଗା ୱାଲେ ଜାଟି କିଜି ଇର୍ହାର୍, ଇୟା ଏରୁ ମାଙ୍ଗିଁ; ଇଲେ ଆୟା କୁଇଁଦି ଦରୁ ଏଷକ ଇଟ୍ତାର୍, ଏଣ୍ତେସ୍ ୱାର୍ ୱାରିୱାଲେ ଜାଟି କିତାର୍ ।
ତାନିୱେନେକା ଇସ୍ହାକ୍ତି ସାକରଙ୍ଗୁ ମାରି ଉଣ୍ତ୍ରି କୁଇଁ କାରିତାର୍, ୱାର୍ ଆୟାତାନିଙ୍ଗ୍ ବା ଜାଟି କିତାର୍; ଆବେଟ୍ ଇସ୍ହାକ୍ ଆୟାତାନି ଦରୁ ସିଟ୍ନା ଇଟ୍ତାନ୍ । ମାରି, ୱାନ୍ ଆବେଟ୍ତାନ୍ ସଲ୍ସି ଆଇ ଉଣ୍ତ୍ରି କୁଇଁ କାରିତାନ୍ । ଆୟାବାନୁ ୱାର୍ ଜାଟି କିଏତି ଉଣ୍ତିଙ୍ଗ୍ ଆବେଣି ଦରୁ ରାହୋବତ୍ ଅସାର୍ ଜାଗା ଇଟ୍ତାନ୍; ମାତର୍ ୱାନ୍ ଇର୍ହାନ୍, “ଇଲେଇ ପ୍ରବୁ ମାଙ୍ଗିଁ ବାଡି ସିତାନ୍, ମାଡୁ ଦେସ୍ତୁ ପିର୍ନାଟ୍ ।”
ତାନିୱେନ୍କା ୱାନ୍ ଆୟା ଜାଗାଦାନ୍ ବେର୍ସେବାଦୁ ସର୍ହାନ୍ । ଆୟା ନାଡ଼ା ପ୍ରବୁ ୱାନିଙ୍ଗ୍ ତରାୟ୍ଆଜି ଇର୍ହାନ୍, “ମାପୁ ନି ବୁବା ଅବ୍ରହାମଦି ମାପୁରୁ ଆନାପ୍; ତିଲାମାଟ୍, ମାତର୍ ମାପୁ ନିଜେଦି ସାକର୍ ଅବ୍ରହାମ ଉଣ୍ତିଙ୍ଗ୍ ମି ସାକା ଆନାପ୍ ମାରି ମିଙ୍ଗିଁ ଆର୍ସିବାଦ୍ କିଜି ମି କୁଟୁମ୍ ପିରିସ୍ କିନାପ୍ ।” ତାନିୱେନେକା ଇସ୍ହାକ୍ ଆୟା ଜାଗାଦୁ ପୁଜାବେଦି ତିଆର୍ କିଜି ପ୍ରବୁଦି ଦରୁଦାନ୍ ପାର୍ତନା କିତାନ୍ । ତାନିୱେନେକା ୱାନ୍ ଆୟା ଜାଗାଦୁ ଗୁଡ଼ା ତିଆର୍ କିତାନ୍, ୱାରି ସାକରଙ୍ଗୁ ଉଣ୍ତ୍ରି କୁଇଁ କାରିତାର୍ ।
ଅବିମେଲକ ନି ଇସ୍ହାକ୍ତି ୱାଲେ ରାଜିମାନା
ଆବେଟ୍ ଅବିମେଲକ ଅହୁସଦ ଦରୁଦି ନିଜେଦି ସଙ୍ଗ୍ତିଙ୍ଗ୍ ମାରି ପିକଲ ଦରୁଦି ସେନାପତିଙ୍ଗ୍ ଅରେସ୍ ଅସି ଗରାରଦାନ୍ ଇସ୍ହାକଦି ଲାକୁତୁ ସର୍ହାନ୍ । ଆବେଟ୍ ଇସ୍ହାକ୍ ୱାରିଙ୍ଗ୍ ଇର୍ହାନ୍, “ମିରୁ ତ ନାଙ୍ଗିଁ କାଡ଼ିଜିନିଦେର୍, ମାରି ମି ମାଡ଼ାନ୍କୁ ନାଙ୍ଗିଁ ଆକ କିତିମାରିଦେର୍, ଇଲେଇ ନା ଲାକୁତୁ ଏନ୍ଦା ୱାତିମାନିଦେର୍ ?” ଆବେଟ୍ ୱାର୍ ଇର୍ହାର୍, “ପ୍ରବୁ ମି ସାକା ମାନାନ୍, ଇକା ମାପୁ ଟିକ୍ ନେସ୍ତାପ୍; ଇଲେଇ ଇନାପ୍, ମା ମାନୁ ଉଣ୍ତ୍ରି ପାର୍ମାଣ୍ ମାନିତ୍ ମାରି ମା ୱାଲେ ନି ଇୟା ଉଣ୍ତ୍ରି ନିୟମ ଆପିତ୍; ମାପୁ ଏଣ୍ତେସ୍ ମିଙ୍ଗିଁ ମୁଟ୍ଏପ୍ ମାରି ମି ନେଗି ଉଣ୍ତିଙ୍ଗ୍ ମାରି ଇନିକା କିଏପ୍, ଇରିଙ୍ଗ୍ ମିଙ୍ଗିଁ ସାନ୍ତିଦାନ୍ ପୋକତାପ୍, ଆୟାୱାଜା ମିରୁ ମାଙ୍ଗିଁ କାଡ଼୍ମାଟ୍; ମିରୁ ତ ମି ମାପୁରୁଦି ଆର୍ସିବାଦ୍ଦି ଲୋକୁ ।” ନାସ୍ତିୱାଲେ ଇସ୍ହାକ୍ ୱାରି ଉଣ୍ତିଙ୍ଗ୍ ଉଣିକା ତିଆର୍ କିତାନ୍, ୱାର୍ ଉଟାର୍ । ତାନିୱେନେକା ୱାର୍ ବେଗି ନାଡ଼ାକାନେ ନିଙ୍ଗିଁଜି ନିଜେ ନିଜେ ପାର୍ମାଣ୍ କିତାର୍ । ମାରି, ଇସ୍ହାକ୍ ୱାରିଙ୍ଗ୍ ପୋକ୍ତାନ୍, ୱାର୍ ୱେଡ଼ିକାଦାନ୍ ୱାନି ଲାକୁତୁରାନ୍ ସର୍ହାର୍ ।
ଆୟା ନାଣ୍ତିଙ୍ଗି ଇସ୍ହାକଦି ସାକର୍କୁ ୱାଜି ନିଜେଦି କାରିତି କୁଇଁ ବିସୟ୍ତାନ୍ କାବୁର୍ ସିଜି ୱାନିଙ୍ଗ୍ ଇର୍ହାର୍, “ମାପୁ ଏରୁ ପୋଇତାପ୍ ।” ଆବେଟ୍ ୱାନ୍ ଆୟା କୁଇଁଦି ଦରୁ ସିବା ଇଟ୍ତାନ୍, ମାରି ନେରୁସାନ୍ଦି ଆୟା ଜାଗାଦି ଗାଡ଼୍ ବେର୍ସେବା ଦରୁଦାନ୍ ୱିଙ୍ଗିଁତାତ୍ ।
ଏସୌଦି ଆଇଦେସ୍ତି ଆଡ଼ିକ୍
ତାନିୱେନେକା ଏସୌ ଚାଲିସ୍ ବାର୍ସୁ ବୟସ୍ତାନ୍ ହିତ୍ତିୟ ବେରିଦି ଜିହୁଦିତ୍ ଦରୁଦି ଆଇଲିଦିଙ୍ଗ୍ ମାରି ହିତ୍ତିୟ ଏଲୋନଦି ବାସ୍ମତ୍ ଦରୁଦି ଆଇଲିଦିଙ୍ଗ୍ ପେଡ଼ି ଆତାନ୍ । ମାତର୍ ୱାର୍ ଇସ୍ହାକ୍ ମାରି ରିବିକାଦି ମୋନତି ଦୁଃକ୍ ୱାଜା ଆତାର୍ ।
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.