Konda Porja Bible
ପାର୍ତୁମ୍ 44
ଜୋସେପ୍ତି ମୁରୁତି ୱେଣ୍ତି ଗିନା
ତାନିୱେନେକା ଜୋସେପ୍ ନିଜେଦି ଇଲୁଦୁ ଦାୟିତ୍ ମାନି ଦାସ୍ତିଙ୍ଗ୍ ଆଦେସ୍ ସିତାନ୍, “ଇୟା ଲୋକା ବାସ୍ତାଦୁ ଏସ ପାସି ଆସ୍ନାତ୍, ନାସ ପୁରାବର୍ତି କିଜି ସିଦୁ, ମାରି, ୱିଜେରି ଡାବୁଙ୍ଗୁ ୱିଜେରି ବାସ୍ତାଦି ମୁସ୍କୁ ଇଡ୍ଦୁ । ମାରି ଇସ୍ରିୱାନି ବାସ୍ତାଦୁ ୱାନି ପାସି କଣି ଡାବୁଙ୍ଗୁ ୱାଲେ ନା କୁଡ଼ୁକା, ଆୟା ୱେଣ୍ତି କୁଡ଼ୁକା ଇଡ୍ଦୁ ।” ଆବେଟ୍ ୱାନ୍ ଜୋସେପ୍ତି ମାଟା ଇସାପ୍ତାନ୍ କିତାନ୍ । ମାରି ସାଲିଦି ଆତି ୱେନେକା, ୱାର୍ ଗଦଙ୍ଗାଁ ୱାଲେ ସର୍ହାର୍ । ମାରି, ଗାଡ଼ତାନ୍ ସସି ନାଣ୍ତ ଆକ ସଲେନ୍ଙ୍ଗା, ଜୋସେପ୍ ନିଜେଦି ଇଲୁଦୁ ଦାୟିତ୍ ମାନି ଦାସ୍ତିଙ୍ଗ୍ ଇର୍ହାନ୍, “ନିନୁ ନିଙ୍ଗିଜ ଆୟା ଲୋକା ୱେନେକା ୱେନେକା ଉର୍ସି ସଲ୍ସି ୱାରି ସାଙ୍ଗ୍ ଆସ୍ସି ଇନ୍ଆଁ, ମିରୁ ନେଗିକା କିନିପାଣିଦୁ ଏନ୍ଦାନିଙ୍ଗ୍ ତାଗିଇକା କିତିଦେର୍ ? ମା ମାଲିକ୍ ଆମାନ୍ ଉଣାନ୍ ମାରି ଏମେ ମାଡ଼ାନ୍ ପାଞ୍ଜି ସୁଣାନ୍, ଆୟା କୁଡ଼ୁକା ସିଲେ ନ ଇକା ? ଇୟାୱାଜା ପାଣିଦି ମାଡ଼ାନ୍ ମିରୁ ଦୋସ୍ କିତିମାନିଦେର୍ ।”
ଜୋସେପତି ସାକର୍ ମାଟା ଆସ୍ସି ଗଦଦୁ ସଲ୍ସି ୱାରିଙ୍ଗ୍ ପେରିତାନ୍ । ତାନିୱେନ୍କା ୱାରି ଲାକ୍ତୁ ଇଗା ସଲ୍ସି ଇୟା ୱିଜୁ ମାଟା ଇର୍ହାନ୍ । ଆବେଟ୍ ୱାର୍ ୱାନିଙ୍ଗ୍ ଇର୍ହାର୍, “ମା ମାଲିକ୍ ଏନ୍ଦାନିଙ୍ଗ୍ ଇୟା ନାନି ମାଟା ଇଜିନାନ୍ ?” ମି ଦାସରି ଇୟାୱାଜା ପାଣି କିନିକା ଆକ ମାନିତ୍ । ସୁଡ଼ୁଦୁ, ନିଜେ ନିଜେ ବାସ୍ତା ମୁସ୍କୁରାନ୍ ଆଗିଡ଼ି ଏମେ ଡାବୁଙ୍ଗୁ ପୋଇତା ମାରାପ୍; ଆକା ମାପୁ କିଣାନ୍ ଦେସ୍ତାନ୍ ଡ଼େସି ନି ଲାକୁତୁ ତାତାପ୍; ଆର୍ତିଙ୍ଗ୍ ଏଣ୍ତେସ୍ ନି ମାଲିକ୍ଦି ଇଲୁତାନ୍ ୱେଣ୍ତି ନ ବାଙ୍ଗାଁରାମ୍ ଡଙ୍ଗାଁ କିନାପ୍ ? ନି ଦାସରି ମାଡ଼ାନ୍ ଏମେୱାନି ମାଡ଼ାନ୍ ଆକା ପୁଟ୍ନାତ୍, ୱାନ୍ ସାପିନ୍, ମାରି, ମାପୁ ବା ମାଲିକ୍ଦି ସାକର୍ ଆନାପ୍ ।
ଆବେଟ୍ ୱାନ୍ ଇର୍ହାନ୍, “ନେଗେତ୍, ମି ମାଟା ଇସାପ୍ତାନ୍ ଆପିତ୍; ଏମେୱାନି ମାଡ଼ାନ୍ ଆକା ପୁଟ୍ନାତ୍, ୱାନ୍ ମା ସାକର୍ ଆନାନ୍, ମାତର୍ ଆଇକାର୍ ଦସ୍ସିଲିକାର୍ ଆନାର୍ ।” ଆବେଟ୍ ୱାର୍ ଆୟା ସାଙ୍ଗେ ବୁମିଦୁ ନିଜେ ନିଜେ ବାସ୍ତାତା ରେପ୍ସି ୱିଜେରେ ନିଜେ ନିଜେ ବାସ୍ତା କୁତ୍ତେଙ୍ଗ୍ ଆସ୍ତାର୍ । ଆୟା ଇଲୁଦୁ ଦାୟିତ୍ ମାନି ଦାସ୍ ପେରି ମାରିନ୍ ମାଡ଼ାନ୍ ଆରାମ୍ କିଜି ଇସ୍ରି ସାନ୍ଦି ପୋଇଜି ସର୍ହାନ୍; ମାରି ବିନ୍ୟାମିନ୍ତି ବାସ୍ତାଦାନ୍ ଆୟା କୁଡ଼ୁକା ପୁଟ୍ତାତ୍ । ନାସ୍ତିୱାଲେ ୱାର୍ ନାଣ୍ତ ଦୁଃକ୍ କିଜି ନିଜେ ନିଜେ ଆଙ୍ଗିଁଙ୍ଗ୍ କିସ୍ତାର୍, ମାରି ୱିଜେରେ ଗଦଦୁ ଲାଦେ କିଜି ଗାଡ଼୍ଦୁ ଡ଼େସି ସର୍ହାର୍ ।
ମାରି ଜିହୁଦା ମାରି ୱାନି ତୋଡ଼ାନ୍କୁ ଜୋସେପ୍ତି ଇଲୁତୁ ସର୍ହାର୍; ଜୋସେପ୍ ଆୟା ବେଡ଼ା ସାନ୍ଦି ଆବେନୁ ମାର୍ହାନ୍; ଆଦେଙ୍ଗ୍ ୱାର୍ ୱାନି ଆଗିଡ଼ି ବୁମିଦୁ ଗୁରୁଜି ମାଡ଼ିସ୍ କିତାର୍ । ଆର୍ତିଙ୍ଗ୍ ଜୋସେପ୍ ୱାରିଙ୍ଗ୍ ଇର୍ହାନ୍, “ମିରୁ ଏନ୍ଦା ନିନି ନାନି ପାଣି କିତିଦେର୍ ? ନା ୱାଜା ଲୋକ୍ ଜେ ସତେନେ ପାଞ୍ଜି ସୁଡ଼ୁଦେଙ୍ଗ୍ ଆଟ୍ନାନ୍, ଇକା ନ ମିରୁ ନେସ୍ଇଦେର୍ ?”
ଆବେଟ୍ ଜିହୁଦା ଇର୍ହାନ୍, “ମାପୁ ମାଲିକ୍ଦି ଆଗିଡ଼ି ମାରି ଇନି ଦାବି କିନାପ୍ ? ମାରି ଇନି ମାଟା ଇନାପ୍ ? ମାରି ଏଣ୍ତେସ୍ ନିଜେଦିଙ୍ଗ୍ ଦସ୍ ସିଲିକାର୍ ଇନାପ୍ ? ମାପୁରୁ ନି ଦାସରି ଦସ୍ ୱିକ୍ତା ମାନାନ୍; ସୁଡ଼ୁଆ, ମାପୁ ମାରି ଏମେୱାନି ମାଡ଼ାନ୍ କୁଡ଼ୁକା ପୁଟ୍ତାମାନାତ୍ ୱାନ୍, ମାରି ମାପୁ ୱିଜେରେ ମାଲିକ୍ଦି ସାକର୍ ଆନାପ୍ ।”
ଆବେଟ୍ ଜୋସେପ୍ ଇର୍ହାନ୍, “ଇୟା ନାନି ପାଣି ନା ମାଡ଼ାନ୍ ଆକ ଆପିତ୍; ଏମେୱାନି ମାଡ଼ାନ୍ କୁଡ଼ୁକା ପୁଟ୍ତାମାନାତ୍, ୱାନ୍ ମା ସାକର ଆପିନ୍; ମାତର୍ ମିରୁ ନେଗେନ୍ତାନ୍ ବୁବାଦି ଲାକୁତୁ ସୋସ ସାନ୍ଡ୍ରୁ ।”
ଜିହୁଦା ବିନ୍ୟାବିନ୍ ଉଣ୍ତିଙ୍ଗ୍ ବାତିଙ୍ଗ୍ମାଲ୍ନିକା
ଆବେଟ୍ ଜିହୁଦା ଜୋସେପ ଲାକୁତୁ ସଲ୍ସି ଇର୍ହାନ୍, “ମାଲିକ୍ ନି ଇୟା ଦାସଙ୍ଗ୍ ମାଲିକ୍ଦି ଗିତଣିଦୁ ପଦେ ମାଟା ଇନ୍ଡ୍ରେଙ୍ଗ୍ ସାରି ସିଦା ମାରି ନି ସାକର୍ ଉଣ୍ତିଙ୍ଗ୍ ନି ରିସା କାସ୍ମାକିତ୍; ଇରିଙ୍ଗ୍ ନିନୁ ପାରୋ ରାଜାଦି ୱାଜା ମାନି ।” ମାଲିକ୍ ନି ଦାସରିଙ୍ଗ୍ ୱେନ୍ବାତିମାର୍ହି, “ମି ବୁବା ମାରି ତୋଡ଼ାନ୍କୁ ମାନାର୍ ନ ?” ଆବେଟ୍ ମାପୁ ମାଲିକ୍ତିଙ୍ଗ୍ ଇର୍ହାମାର୍ହାପ୍, ମା ବୁବା ମାନାନ୍, ୱାନ୍ ଡକ୍ରା ଲୋକୁ; ମାରି, ୱାନି ଡକ୍ରାକାଡ଼ାଦୁ ଅରେନ୍ ମାରିନ୍ ମାନାନ୍, ଆୟାକାନ୍ ଇସ୍ରିକାନ୍; ମାତର୍ ୱାନି ସାଙ୍ଗ ସାତାମାନାନ୍, ୱାନ୍ନେ କେବଲ ୱାନି ୟାୟାଦି ସାରାସାରି ଅରେନ୍ ମାରିନ୍; ଆଦେଙ୍ଗ୍ ୱାନି ବୁବା ୱାନିଙ୍ଗ୍ ଜିବନ୍ନୋନାନ୍ । ଆବେଟ୍ ନିନୁ ଇୟା ଦାସରିଙ୍ଗ୍ ଇର୍ହିମାର୍ହି, “ମିରୁ ମି ତୋଡ଼ାନ୍ତିଙ୍ଗ୍ ନା ଲାକୁତୁ ତାଗାଟ୍, ନାନୁ ୱାନିଙ୍ଗ୍ ନିଜେଦି କାଣ୍ଗାଦାନ୍ ସୁଣା ।” ଆର୍ତିଙ୍ଗ୍ ମାପୁ ମାଲିକ୍ଦିଙ୍ଗ୍ ଇର୍ହାମାର୍ହାପ୍, ଆୟା କଡ଼ ବୁବେଙ୍ଗ୍ ଡ଼ିସ୍ତେଙ୍ଗ୍ ଆଟ୍ଏନ୍; ୱାନ୍ ୱାନି ବୁବେଙ୍ଗ୍ ଡ଼ିସ୍ସୋ ୱାତିଙ୍ଗାଁ, ବୁବା ସାନାସନାନ୍ । ଆବେଟ୍ ନିନୁ ଇୟା ଦାସରିଙ୍ଗ୍ ଇର୍ହି, ମି ୱାଲେ ଇସ୍ରି ତୋଡ଼ାନ୍ ରେଏତିଙ୍ଗ୍, ମିରୁ ମାରି ମା ମୋକମ୍ ସୁଡ଼ୁଦେଙ୍ଗ୍ ଆଟ୍ଇଦେର୍ ।
ତାନିୱେନେକା ମାପୁ ନି ସାକର୍ ଜେ ମା ବୁବା, ୱାନି ଲାକୁତୁ ସଲ୍ସି ୱାନିଙ୍ଗ୍ ମାଲିକ୍ଦି ଇୟା ୱିଜୁ ମାଟା ଇର୍ହାପ୍ । ଆବେଟ୍ତାନ୍ ମା ବୁବା ଇର୍ହାନ୍, ମିରୁ ଡ଼େସି ସଲ୍ସି ମା ଉଣ୍ତିଙ୍ଗ୍ ଏସୋ କାଦି କଡ଼ଜ ତାଗାଟ୍ । ଆବେଟ୍ ମାପୁ ଇର୍ହାପ୍, ସନ୍ଡ୍ରେଙ୍ଗ୍ ଆଟ୍ଏପ୍; ଜଦି ଇସ୍ରି ତୋଡ଼ାନ୍ ମା ୱାଲେ ମାନାନ୍, ଆର୍ତିଙ୍ଗ୍ ମାପୁ ସନ୍ଡ୍ରେଙ୍ଗ୍ ଆଟ୍ନାପ୍; ଇରିଙ୍ଗ୍ ଇସ୍ରି ତୋଡ଼ାନ୍ ମା ୱାଲେ ସିଲେତିଙ୍ଗ୍, ମାପୁ ଆୟା ଲୋକୁଦି ମୋକମ୍ ସୁଡ଼ୁଦେଙ୍ଗ୍ ଆଟ୍ଏପ୍ । ଆବେଟ୍ ନି ସାକର୍ ଜେ ମା ବୁବା, ୱାନ୍ ମାଙ୍ଗିଁ ଇର୍ହାନ୍, ମିରୁ ନେସ୍ନିଦେର୍, ମା ଆଡ଼ି ରାହେଲ୍ ମାଡ଼ାନ୍କୁ କେବଲ ରିଏର୍ ମାରିନ୍କୁ ଜନମ୍ ଆତାମାର୍ହାର୍ । ୱାରି ମାଡ଼ାନ୍କୁ ଅରେନ୍ ନା ଲାକ୍ତୁରାନ୍ ସାତାସର୍ହାନ୍, ଆବେଟ୍ ମାପୁ ଇର୍ହାପ୍, ୱାନ୍ ସତେନେ ବନ୍ ଜାତୁକା ମାଣାନ୍କୁ କଣ୍ତ୍ କଣ୍ତ୍ ଆଜି ନାସ୍ଟୁ ଆତାନ୍; ମାରି, ଆୟା ନାଣ୍ତିରାନ୍ ନାନୁ ମାରି ୱାନିଙ୍ଗ୍ ସୁଡ଼ୁଏଜିନା । ଇଲେଇ ମା ଲାକ୍ତୁରାନ୍ ୱେନିଙ୍ଗ୍ ଅତିଙ୍ଗ୍ ଜଦି ଇୟାୱେନିଙ୍ଗ୍ ଇନି ସନି ଗଟାନାତ୍, ଆର୍ତିଙ୍ଗ୍ ମିରୁ ନାଙ୍ଗିଁ ଇୟା ଡକ୍ରା ୱେଡ଼ାଦୁ ଦୁକ୍ତାନ୍ ସାପିସ୍କିନିଦେର୍ ।
ଇୟାଉଣ୍ତିଙ୍ଗ୍ ନି ସାକର୍ ଜେ ନା ବୁବା, ୱାନି ଲାକୁତୁ ନାନୁ ସରିଙ୍ଗାଁ, “ମା ୱାଲେ ଜଦି ଇୟା କଡ଼ ସିଲେତିଙ୍ଗ୍, ଆର୍ତିଙ୍ଗ୍ ଇୟା କଡ଼ ସିଲେତିକା ସୁଡ଼ୁଜି ୱାନ୍ ଆୟାଦାପ୍ରେ ସାନାସନାନ୍ । ଇରିଙ୍ଗ୍ ୱାନି ଜିବନ୍ ଇୟା କଡ଼ଦି ଜିବନ୍ଦୁ ତରାତା ମାନାତ୍ । ଆବେଟ୍ ନି ଇୟା ଦାସର୍ ଦୁକ୍ତାନ୍ ଡକ୍ରା ୱେଡ଼ାଦୁ ନି ସାକର୍ ମା ବୁବେଙ୍ଗ୍ ଦୁକିଦୁ ଗୁଟାଦୁପୋକ୍ନାର୍ । ମାରି, ନି ସାକର୍ ନାନୁ, ନା ବୁବାଦି ଲାକୁତୁ ଇୟା କଡ଼ଦି ଦାୟି ଆଜି ଇର୍ହାମାନା, ନାନୁ ଜଦି ୱାନିଙ୍ଗ୍ ମି ଲାକୁତୁ ତେଏ, ଆର୍ତିଙ୍ଗ୍ ନାନୁ ଜିନିମାନି ସାନ୍ଦି ବୁବା ଲାକୁତୁ ଦସି ଆନା । ଆଦେଙ୍ଗ୍ ମାଡ଼ିସ୍ କିଜିନା, ମାଲିକ୍ଦି ଲାକୁତୁ ଇୟା କଡ଼ଦି ବାଦୁଲୁ ନି ସାକର୍ ନାନୁ ନି ସାକର୍ ଆଜି ମାନା, ମାତର୍ ଇୟା କଡ଼ଦିଙ୍ଗ୍ ତୋଡ଼ାକାନ୍ ୱାଲେ ଅର୍ସେ ପୋକ୍ଆ । ଇରିଙ୍ଗ୍ ଇୟା କଡ଼ ନା ୱାଲେ ସିଲେତିଙ୍ଗ୍, ନାନୁ ନ ଏଣ୍ତେସ୍ ବୁବାଦି ଲାକୁତୁ ସଡ୍ରେଙ୍ଗ୍ ଆଟ୍ନା ? ମାରି, ବୁବେଙ୍ଗ୍ ଏମେ ସନି ଗଟାନାତ୍, ଆକା ନ ଏଣ୍ତେସ୍ ସୁଡ଼ୁଦେଙ୍ଗ୍ ଆଟ୍ନା ?”
Konda Porja Bible. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.