Luka

Kwena Maber ma

LUKA

Ocoyo

Lanyut wilok madito ma i buk man

Luka oryeyo kore kikore ni Cwiny Maleng pa Rwot aye olwongo Yecu me “kelo Kwena Maber bot lucan” 4:18, dok Kwena Maber man bene opong ki lok ma mako dano ki peko mapatpat magitye kwede. Lok ma mako yomcwiny bene pire tye matek mada i buk pa Luka, tutwale i cura mukwongo makelo lok me kwena ma mako kit ma Yecu obino kwede, ka dok i ladole nyutu kit ma Yecu odok kwede malo i polo. Lacoc man bene tito lok ma nyutu kit ma niye pa Lukricitayo onya odoko pol kwede ikin piny kit ma en otito i buk me Tic Pa Lukwena.

Coc ma kipoko i dul aryo madito (me acele mako lok matye i cura 1—2 ki me aryone kwako lok matye i buk man cake i cura 9—19) ma opong ki coc manonge i buk me Kwena Maber man keken, calo lok ma tito pi wer pa lumalaika ki kit ma lukwat guringo me cito ka limo kwede latin Yecu ma kinywalo i akul dyang, kit ma ginongo ki Yecu i Ot pa Lubanga, carolok ikom lacamariya maber ki carolok pa latin awobi ma orwenyo. Lok ma pire tek ma bene kinwoyo pire mada en aye lok me lega, Cwiny maleng, tic ma mon gutiyo i dog tic pa Yecu, ki kit ma Lubanga weko nyo rucu ki bal.

Lacim wilok madito ma i buk man

Lanyut

Nywal ki kare me tino pa Jon Labatija ki pa Yecu

Tic pa Jon Labatija

Batija pa Yecu ki atematema ma en owok iye

Tic pa Yecu ikin lwak ma i Galilaya

Aa pa Yecu ki i Galilaya me oo i Jerucalem

Cabit me agiki pa Yecu i Jerucalem ki ikin gangi ma cokcok ki kunu

Cer ki i lyel, nyute, ki dok pa Rwot Yecu i polo

Luka

Jami aryo ma nen kamaleng i Kwena Maber ma Luka ocoyo gin aye: Lubanga tamo matek pi lucan ki pi jo ma piny oloyo, ki bene Cwiny maleng en aye tye mic pa Lubanga madit maloyo ducu bot jo ducu ma kwaye. Coc pa Luka orwate mapol ki coc pa Marako ki pa Matayo, ento en bene tye ki carolok ma pe nonge i buk me Kwena Maber mukene, macalo carolok ikom Lacamariya maber 10:25-37. Ki Awobi ma orwenyo 15:11-32. Lacoc me buk pa Luka en aye bene obedo lacoc me buk me Tic Pa Lukwena.