Luka 17

Bal

(Mat 18:6-7,21-22; Mar 9:42)

1Yecu owaco bot lupwonyene ni, “Gin mamiyo dano poto i bal pe bigenge; ento ngat ma bikelo gin mamiyo dano poto i bal bineno can! 2Kono onongo bedo ber bot dano meno ka kitweyo kidi rego ingute, ci kibole kwede i nam, kato ma en oweko ngat acel ikin lutino matino magi opoto ibal. 31 Wugwoke kenwu; ka lawoti obalo, juke, ka ongut, ci time kica. 42 Ka otimo bal ikomi tyen abiro inino acel, ce oloke boti tyen abiro, kun legi ni, ‘Angut,’ time kica.”

Niye

(Mat 17:20)

5Lukwena guwaco bot Rwot ni, “Med niye wa!” 6Rwot ogamo ni, “Kono yam wutye ki niye macalo nyig karadali, kono wuwaco ki yat man ni, ‘Pute keni, ipite i dye nam,’ kono owinyo dogwu.”

Tic pa latic

7“Anga ikinwu matye ki latice ma puru ki kweri dyang nyo kwayo romi, ma ka en odwogo ki i poto ci wace ni, ‘Bin oyotoyot ibed piny kacam’? 8Pe kong en biwace ni, ‘Yuba cam me otyeno, ci itwe bongo ipyeri ikela cam, nio ka an acamo, amato, lacen ka dong atyeko ci in bene ibicamo dok ibimato’? 9Latici mono bimito ni i pwoye ka ilubu lok ma kicike kwede? 10Pe gire. Wun bene kitmeno, ka wutyeko tiyo gin ducu ma kicikowu, myero wuwac ni, ‘Wan lutic ma mwa; watiyo gin ma myero keken.’”

Yecu ocango ludobo apar

11Ka onongo Yecu tye kacito Jerucalem, ci owok ki iwang apoki me Camaria ki Galilaya. 12Ka odonyo i paco mo, ci ludobo guromo kwede, kun gucung ki kamabor, 13ci gudange ni, “Yecu, Rwoda, kica omaki ikomwa do.” 143 Yecu onenogi, ci owaco botgi ni, “Wucit wunyute kenwu bot ajwaki pa Lubanga” Ma onongo pud gitye i yoo kacito, ci komgi olonye woko. 15Ngat acel ikin gi ka oneno ni ecang woko, ci odwogo cen kun pako Lubanga ki dwon malongo; 16oryebe piny katyen Yecu, kun pwoye. En onongo Lacamaria. 17Yecu openyo ni, “Yam pe kicango dano apar? Jo abongwen kono gitye kwene? 18Pingo pe tye ngat mo ikin gi ma odwogo cen ka pako Lubanga, ento kono larok man keken?” 19Ci Yecu owace ni, “A, icit giri, niyeni ocangi.”

Bino me ker pa Lubanga

(Mat 24:23-28,36-41)

20Luparicayo gupenyo Yecu ni, “Ker pa Lubanga bibino awene?” En odok iye botgi ni, “Ker pa Lubanga pe bibino ki lanyut ma gineno. 21Pe kibiwaco botwu ni, ‘Nen, en ene!’ nyo ni, ‘En ca!’ Pien nen, ker pa Lubanga dong tye ikinwu.”

22Yecu owaco bot lupwonyene ni, “Kare bibino ma wubiparo me neno nino acel mo pa Wod pa dano, ento pe wubineno. 23Kibiwaco botwu ni, ‘Nen, en ene!’ nyo ni, ‘Nen, en ca!’ Pe wucit iye, bene pe wulubgi. 24Pien kit macalo lutkot wil, ci menyo but lobo tungcel nio tungcel, Wod pa dano bene bibedo kitmeno i ninone. 25Ento myero kong okany can madwong, kun yalwak me kare man bene gikwere. 264 Macalo yam otime ikare pa Nua, ci bene bitime kitmeno ikare pa Wod pa dano. 275 Yam onongo gubedo kun gicamo, gimato dok awobegi ki anyiragi ginyome, nio inino ma Nua odonyo kwede i yeya, ci pii aluka ocore otyekogi woko ducu. 286 Kitmeno bene ikare pa Lot, onongo gicamo, gimato, giwilo jami, gicato jami, kipito ginapita, gigero odi; 29ento inino ma Lot oa woko ki i Codom mac ki kwir gweng calfa ma mac oliyo ocwer ki i polo, otyekogi woko ducu. 30Bibedo bene kitmeno ikare ma kibinyutu iye Wod pa dano. 317 Ininonu, ngat matye iwi ot kun jamine tye iot, pe myero olor piny ka cokogi; kitmeno bene ngat matye i poto pe myero odwog paco. 328 Wupo mono ikom dako pa Lot. 339Ngat ma mitoni item laro kwone pire kekene birwenyone, ento ngat ma ye rwenyo kwone pira, bigwoko. 34Atitiwu ni, i dyewor meno jo aryo bibutu iwi kitanda acel, kibikwanyo ngat acel, ci kibiweko ngat mukene dong. 35Mon aryo gibibedo ka rego kacel; ci kibikwanyo ngat acel, kibiweko ngat mukene dong. 36[Co aryo bibedo i poto, kibikwanyo ngat acel, ci kibiweko ngat acel dong.”]

37Lupwonyene gupenye ni, “Kwene, Rwot?” En owaco botgi ni, “Kama kom dano ma oto tye iye, acut bene gicoke kunu.”