Luka 16

Carolok ikom lagwok jami ma pe ki ada

1Yecu owaco bot lupwonyene ni, “Yam tye ngat mo ma lalonyo, matye ki lagwok jamine. Kidoto danonu bote ni tye ka lanyo jamine. 2Ci en olwonge, ka openye ni, ‘Lok ango mono ma awinyo i komini? Kela wel jamina ducu ma igwokoni kikore, pien pe dong i bibedo lagwok jamina.’ 3Lagwok jamine oloko kekene ni, ‘Abitimo gin ango? Pien rwoda dong obikwanya woko ki i tic me gwoko jami. An pe atek ma aromo pur, lewic bene maka kalego lim alega. 4Dong angeyo gin ma abitimo, ka giryema woko ki i tic me gwoko jami, wek dano gujola i odigi.’ 5Ci olwongo lubanya pa ladite ki acel acel, openyo dano mukwongo ni, ‘Wel banya adi pa rwoda matye boti?’ 6En odoke iye ni, ‘Moo jeituni maromo jereken miya acel.’ Ci lagwok jami owace ni, ‘Kwany waraga banyani, ibed piny oyotoyot, ci ico pyere abic.’ 7Lacen openyo ngat mukene ni, ‘In kono itye ki wel banya adi?’ En ogamo ni, ‘Ngano maromo guniya miya acel.’ Ci owace ni, ‘Kwany waraga banyani, ico pyere aboro.’ 8Pieno ladit man opwoyo lagwok jami ma pe ki ada, pien otiyo ki ryeko. Pien dano me lobo man giryek i yalwakgi, gitye ki diro me tic makato dano me dero.” 9Ci Yecu omede kiwaconi, “Atito botwu ni, wumak lurem kun wutiyo ki lim ma pe atir, wek ka bitum, kijolwu ikabedo ma bedo matwal.

10Ngat ma lagen ikom jami matidi mo, bibedo ma lagen bene ikom jami madwong; ngat ma pe lagen ikom jami matidi mo, pe bibedo lagene bene ikom jami madwong. 11Dong ka yam pe wubedo ma lugen ikom lim me lobo man ma pe atir, ci dong anga ma bimiyowu lonyo me ada? 12Dong ka yam pe wubedo jo ma lugen ikom jami pa dano mukene, anga ma bimiyowu jamiwu kikome? 131 Pe tye latic mo matwero tiyo tic ki rwodi aryo lawangacel; pien ka otime ci en bikwero ngat acel woko, ci bimaro ngat mukene, nyo biketo cwinye me tic pi ngat acel, ci bicayo ngat mukene. Pe itwero tic pi Lubanga ka dok itiyo pi lim bene.”

Lok abola mogo ma Yecu owaco

(Mat 11:12,13; 5:31,32; Mar 10:11,12)

14Luparicayo mayam lumar lim guwinyo lok man ducu, ci gucaye. 15Ento Yecu owaco botgi ni, “Wun aye jo ma wunyute bot dano ni kitwu atir, ento Lubanga ngeyo cwinywu; pien gin ma dano dworo ni pire tek, en aye gin ma konye peke inyim Lubanga. 162

Cik pa Moses ki coc pa lunebi obedo tye nio wa ikare pa Jon. Cake ikare meno kitito lok me Kwena Maber ma mako ker pa Lubanga, ci dano ducu gidonyo iye ki tek. 173 Ento twero bedo yot mada me wek polo ki lobo gurweny woko, makato ton acel me cik me rwenyo woko.

Lok ma Yecu opwonyo ikom keto nyom

(Mat 19:1-12; Mar 10:1-12)

184

Laco mo keken ma oryemo dakone, ce dok onyomo dako mukene nongo otimo abor, ki ngat ma onyomo dako ma cware oryemo bene nongo otimo abor.

Laco ma lalonyo ki Lajaro

19Yam tye dano mo ma lalonyo ma ruku bongo ma lamar lamar ki kanyi maber me bongo camanini kun kwo dok camo bene cam me wel madwong nino ducu. 20I dog gange onongo lacan mo butu iye, nyinge Lajaro, ma kome orwato bur, 21kun cwinye gomo me camo cam ma oo piny ki iwi meja pa lalonyonu; gwogi bene onongo gibino ginango wang bure. 22Ka lacan oto, ci lumalaika gutinge, gutere i kor Abraim. Lalonyo bene oto, ci giyike woko. 23Oilo wange ki i Kapiny kun tye ki can, ci oneno Abraim tye kamabor kun Lajaro ojenge i kore. 24Ci en odange ni, ‘Wora Abraim, tima kica, cwal Lajaro olut lwet cinge i pii, wek okwe ki leba, pien atye ki arem madwong i mac man.’ 25Ento Abraim odoke iye ni, ‘Woda, po ni, ikare me kwoni gimiyi gin mabeco, ki Lajaro kitmeno kimiye gin maracu; ento kombedi dong gikweyo cwinye kany, in kono itye ki arem. 26Dok bene ikom lok man ducu, ikin wan ki wun kiketo iye longo matut, wek ka jo ma gimito ngolo nia ki kany, me bino botwu, pe otwere, wek ngat mo bene pe ongol nia ki kunu me bino botwa kany.’ 27Lalonyo owaco ni, ‘Dong alegi ba, wora, ore i ot pa abana, 28pien atye ki omegina abic, wek en ocitit botgi, ci gin guwek bino ikabedo man me can.’ 29Ento Abraim odoke iye ni, ‘Omegini gitye ki Moses ki lunebi; wek guwiny lokgi.’ 30Lalonyo owaco ni, ‘Pe, wora Abraim; ento ka ngat mo ikin jo ma oto ocito botgi, ci gibingut.’ 31Ento Abraim dok owace ni, ‘Ka pe giwinyo lok pa Moses ki pa lunebi, ci kadi bed ngat mo oa ki ikin jo muto bene, pe gibiye loke.’”