Luka 15

Carolok ikom romo ma orwenyo

(Mat 18:10-14)

11

Lujog mucoro ki lubalo onongo yam ginyiko cok kawinyo lok pa Yecu. 2Ci Luparicayo ki Lupwonycik gungur ikom Yecu kun giwaco ni, “Dano man jolo lubalo dok camo kwedgi.”

3Lok man omiyo Yecu obolo botgi carolok man ni, 4“Anga ikinwu matye ki romi miya acel, ka ngat acel ikin gi orwenyo, pe biweko romi pyere abongwen wiye abongwen i olet, ci cito kayenyo en ma orwenyoni, nio wang ma ononge? 5Ka ononge, ci bolo iwi gwoke, ki yomcwiny. 6Ka oo paco, lwongo lureme ki luwote kacel, ci waco botgi ni, ‘Cwinywu obed yom kacel kweda, pien dong anongo romona mayam orwenyoni.’ 7Kitmeno atito botwu ni, bibedo me yomcwiny madit tutwal iwi polo ikom labalo acel ma ongut, makato ikom jo pyere abongwen wiye abongwen ma kitgi atir ma pe mite ni gunguti.

Carolok ikom cente ma murweny

8Nyo dako mene, matye ki ciling ma nyige me ryal gin apar, kace nyige acel opoto orwenyo woko ci pe bicwinyo mac tara, ci yweyo ot kun yenyo matek nio wang ma onongo? 9Ka dong onongo, ci lwongo lureme ki luwote kacel, kun waco botgi ni, ‘Cwinywu obed yom kacel kweda, pien dong anongo ciling mera ma onongo orwenyoni.’ 10Kitmeno atito botwu ni, bibedo yomcwiny inyim lumalaika pa Lubanga ikom labalo acel ma ongut.”

Carolok ikom awobi murweny

11Yecu dok omede ki lok kun owaco ni, “Yam tye dano mo matye ki awobene aryo. 12Matidine owaco bot wone ni, ‘Aba, miya dul lim ma ka mera.’ Ci won gi opoko lime ikin gi. 13Lacen ka nino okato manoknok, awobi matidini ocoko jamine ducu, ci ocako wote me cito i lobo kamabor; ci obalo lime kunu pi bedo ki kwo me carocaro. 14Ikare ma lime dong otum ducu, ci kec laparanat opoto i lobo meno matek, ci awobinu ocako mal ata. 15Ocito odak bot ngat mo ma i lobo meno; danonu ocwale kagwoko opego. 16Cwinye ocako gomo cam ma opego camo; pe tye ngat mo ma omiye gin acama mo. 17Ento ka wiye ocako tic pire kene, ci owaco ni, ‘Lutic pa wora gitye mapol ata ma gicamo kwon loyogi aloya, ento an kono atye ka to ki kec kany!’ 18Abi a, adok cen bot wora, ci abiwace ni, ‘Aba, dong abalo inyim Lubanga ki inyimi; 19dong pe amyero me alwonga ni an a wodi; loka abed macalo ngat acel ikin lutici.’ 20Ci oa obino bot wone. Ento ka onongo en pud tye cen kamabor, wone onene. Kica omake ikome, oringo ogwako ngute, ci onoto leme. 21Wode owace ni, ‘Aba, dong abalo inyim Lubanga ki inyimi, pe dong amyero me alwonga ni an a wodi.’ 22Ento wone owaco bot lutice ni, ‘Wukel jor maber makato ducu wuruk ikome oyot; wurwak agit i nyig cinge, ki war i tyene. 23Wukel bene wod twon mucwe, wuneki, wek wacamu, wabed ki yomcwiny. 24Pien latinani yam onongo oto woko, ento kombedi dong tye makwo; yam onongo orwenyo woko, ento dong kinonge.’ Ci gucako kwero karamane ki yomcwiny.

25Wode madit onongo tye i poto; ka dwogo ma dong onyiko cok ki ot, ci en owinyo wer ki myel. 26Ci en olwongo ngat acel ikin lutic, ka openye ni, ‘Man kono gin ango matye ka timeni?’ 27Laticu odoke iye ni, ‘Omeru dong odwogo, ci woru oneke wod twon mucwe, pien ojole ma kome yot kun kwo.’ 28Ento kiniga omake, okwero donyo i ot. Wone okati woko obako doge bote. 29Ento en odoke iye ni, ‘Nen, pi mwaka magi mapol ata an atiyo boti, ma naka yam peya akwero winyo ciki, ento peya imiya kadi wa latin dyel mamwa, wek cwinya obed yom ki lurema. 30Ento latini man obino ma olanyo limi ducu ikom mon ma lukwele, ci in ineke wod twon mucwe!’ 31Wone ogamo doge ni, ‘Latina, in nino ducu itye kweda do, jamina ducu ma atye kwede obedo meri. 32Ber wacam kun wabedo ki yomcwiny, pien omeruni yam onongo oto woko, ento kombedi en dong kwo, yam onongo orwenyo woko, ento dong ginonge.’”