Luka 14

Yecu ocango latwo akwota kom

1Iceng Cabit mo acel, ka Yecu ocito kacam i ot pa laloc mo ma Laparicayo, kun jo mogo gubedo ka kiye mot. 2Dano mo ma twoyo two akwota kom onongo tye inyime. 3Ci Yecu openyo Lupwonycik ki Luparicayo ni, “Cik ye ni kicang dano iceng Cabit, nyo pe?” 4Ento guling alinga mot ma pe giwaco gin mo. Yecu omako latwoni, ci ocange, ka dong ocike ni ocit gire. 51 Ci openyogi ni, “Anga ikinwu ma ka tye ki kanane nyo twone ka opoto iwang it matut ci pe biywayone woko cutcut iceng Cabit?” 6Ento dok ilok meno oloyogi woko.

Pwony bot welo ki bot lalwongo

7Ka Yecu oneno kit ma dano ma kilwongogi giyero ki kabedo mabeco, ci obolo botgi carolok man ni, 82 “Ka kilwongi i karama me nyom, pe icibed ikabedo mabere me rwom mamalo; gwok nyo kilwongo bene dano dit makati, 9ci lalwong wun aryonu ducu bibino boti ci biwaco ni, ‘Wek kabedo ki dano man.’ Kadong ibidok ikabedo mapiny ki twon lewic madit. 10Ento ka kilwongi, cit ibed ikabedo mapiny, wek ka dano ma olwongi obino en biwaco boti ni, ‘Larema, kob malo iwi komi’, ci i bibedo ki deyo inyim dano ducu ma wubedo kwedgi i dog cam. 113 Pien ngat ma kete kene ni edit, kibidwoke piny, ento ngat ma mwole kene kibimiye doko dit.”

12Ci dok owaco bene bot dano ma olwonge ni, “Ka ilwongo dano i cam me dyeceng nyo me otyeno, pe ilwong luremi, nyo omegini, nyo watti, nyo lulonyo ma bedo cok ka ngeti; weko gin bene gilwongi, wek gicul wang lwongoni. 13Ento ka itedo karama, lwong lucan, lungolo, jo ma komo, ki lutowang, 14ci i bibedo ki gum, pien pe gitwero culu wang lwongoni. Ci Lubanga biculi ikare ma jo ma kitgi atir bicer iye.”

Carolok ikom karama madit

(Mat 22:1-10)

15Ka ngat acel ma gubedo kwede i dog cam owinyo lok man, ci owaco bot Yecu ni, “Tye ki gum dano ma bicamo kwon i ker pa Lubanga!” 16Ento Yecu odoke iye ni, “Dano mo yam otedo karama madit, en olwongo jo mapol iye. 17Ka kare me karama oromo, ci en ooro latice ka poyo wi jo ma kilwongogi ni, ‘Wubin, pien dong kiyubu jami ducu.’ 18Ento gin ducu gucako bako dogi ni kitim kica botgi. Ngat mukwongo owace ni ‘Awilo poto, myero acit ka nenone alegi itima kica.’ 19Dano me aryo owaco ni, ‘Awilo twoni apar me pur, acito ka ngiyogi, alegi itima kica.’ 20Ngat mukene owaco ni, ‘Pud anyomo dako anyoma nyen, pimeno pe atwero bino.’ 21Laticu odwogo otito bot rwode kitmeno. Kiniga omako won ot, ci owaco ni, ‘Cit oyotoyot i wangayo, ki ikin gang, icikel lucan, luput, lutowang ki jo ma lungolo.’ 22Ci latic owaco ni, ‘Ladit, watimo gin ma iciko, ento kabedo gire pud tye.’ 23Ladit owaco bot laticenu ni, ‘Cit igudu madito ki i yo lum, icuk cwiny dano ki tek wek gudony i ot, wek oda opong. 24Dong atito botwu ni, pe tye ngat mo ikin jo mayam kilwongogi me bino ma bibilo karamana.’”

Jami ma dano jalo pi lubu Yecu

(Mat 10:37-38)

25Lwak mapol guwoto kacel ki Yecu, ci Yecu oloke botgi kun waco botgi ni, 264 “Ka ngat mo obino bota, ma kun pud peya okwero wone ki mine, dakone ki lutinone, omegine ki nyimegine, kadi wa kwone kikome, ci en pe twero bedo lapwonyena. 275 Ngat ma pe tingo yatariyane, kun luba, pe twero bedo lapwonyena. 28Pien anga ikinwu ka mito gero ot ma wiye bor, ci pe kong kwongo bedo piny ka kwano wel lim mamite, kace etye kwede ma eromo tyekone? 29Ka pe kumeno, miyo ka ocibo guti, matyekone oloye woko, ci dano ducu ma gibineno gibicako ngale, 30kun giwaco ni, ‘Dano man ocako gedo, ento tyekone oloye woko.’ 31Nyo rwot mene, ma obicito i mony kalweny ki rwot mukene, ma pe kong bedo piny poro lok, kace etwero tero dano alip apar me romo ki jo alip pyere aryo? 32Ka pe kumeno, ci en bicwalo kwena bot rwot ca ma pud tye kamabor, wek openy pi gin ma miyo giribe kwede ki kuc.” 33Ikit yo acelu, Yecu odolo te loke ni, “Kitmeno, dano ducu ma ikinwu ma iye pe twero jalo jami ducu ma etye kwede, pe twero bedo lapwonyena.”

Kado atwona mabot

(Mat 5:13; Mar 9:50)

34“Kado atwona ber; ento ka dong odoko bot ci kibitimo ningning wek dok odok mit? 35Pe dong ber me aketa i poto, dano gibolo woko ata. Ngat matye ki it me winyo lok, owiny.”