Luka 13

Ka pe wungut pi balwu, ci wun ducu wubito

1Ikare meno onongo tye jo mogo kunu ma gutite pi Lugalilaya mogo mayam Pilato orubu remogi ki gitumgi. 2Ci Yecu odok iye botgi ni, “Wun wutamo ni Lugalilaya meno gin lubalo makato Lugalilaya mukene ducu, ma omiyo guneno can kitmenoni? 3Atito botwu ni pe; ento ka pe wungut, ci wun ducu wubito kitmeno. 4Nyo jo apar wiye aboro meno mayam ot ma wiye bor opoto ikomgi onekogi i Ciloam, wutamo ni gin onongo gutimo bal makato jo mukene ducu ma bedo i Jerucalem? 5Atito botwu ni pe; ento ka pe wungut, ci wun ducu wubito kitmeno.”

Carolok ikom oduru ma pe nyak

6Yecu obolo botgi carolok ni: “Yam tye dano mo ma onongo tye ki yat oduru ma kipito i poto oloke. En obino i tere kun yenyo nyige, ento pe onongo. 7Owaco bot lapur ni, ‘Nen, kombedi dong odoko mwaka adek kun abino, ayenyo nyig oduru man, pe anongo. Tong woko; pingo balo ngom nono?’ 8Ento lapur odoke iye ni, ‘Ladit, kong iwek obed pi mwaka man doki, nio ka abako ngom i tere, kun aony iye cet dyang mutwo. 9Ka binyak i mwaka ma binoni, ci ber; ento ka ce pe, ci ibitongo giri.’”

Yecu ocango dako ma cen ogomo i ceng Cabit

10Yam ka Yecu onongo tye ka pwony ikacoke mo i ceng Cabit. 11Dako mo onongo tye kunu matye ki cen ma okelo goro ikome pi mwaka apar wiye aboro; onongo dong ogome woko, ma pe twero tire. 12Ka Yecu onene, ci olwonge, kun wace ni, “Dako, kigonyi woko ki ikom goroni.” 13Ci Yecu oketo cinge ikome; cutcut dakonu otire, ci opako Lubanga. 141 Ento kiniga omako ladit me kacoke, pien Yecu ocango dano i ceng Cabit. Ci owaco bot lwak ni, “Tye nino abicel ma myero kitii iye tic; wubin inino meno wek kicangwu, pe i ceng Cabit.” 15Rwot odoke iye ni, “Wun lubuta! Ngat acel acel ki ikinwu pe gonyo twon ne nyo kanane ki i kacamgi, ci tero i pii i ceng Cabit? 16Dako man, ma en nya pa Abraim, mayam Catan otweye pi mwaka apar wiye aboro kulu, pe myero kigonye ki i twec man i ceng Cabit?” 17Ikare ma Yecu oloko lok man, ci lewic omako lukwore ducu; lwak ducu cwinygi obedo yom pi tic me aura ducu ma en otiyo.

Carolok ikom kodi karidali

(Mat 13:31-32; Mar 4:30-32)

18Pimeno en owaco ni, “Ker pa Lubanga rom ki gin ango? Abiporo ki gin ango? 19Rom ki kodi karidali ma dano mo okwanyo, ocoyo i potone; ci odongo, odoko yat madit, winyo me polo gibino gigero odigi i jange.”

Carolok ikom tobi

(Mat 13:33)

20Dok owaco ni, “Abiporo ker pa Lubanga ki gin ango? 21Rom ki tobi ma dako mo okwanyo, orubu ki moko mugati maromo adita adek, nio ka moko ducu oyenyu, okwot.”

Dogola mading

(Mat 7:13-14,21-23)

22Yecu omede ki wote ikin i taun madito ki gangi, kun pwonyo lwak, dok kwede tung Jerucalem. 23Ngat mo openye ni, “Rwot, jo manok aye mono bilare?” Yecu owaco botgi ni, 24“Wuket tek wek wudony ki i dogola mading; pien awaco botwu ni, jo mapol gibiteme me donyo, ento pe gibitwero. 25Won ot dong bia malo cego dogola ot woko, ci wun wubicung ki woko ka wudwongo dogola kun wuwaco ni, ‘Ladit, yabiwa dogola ba!’ En bidok iye botwu ni, ‘An pe angeyo kama wua iye.’ 26Ci wun wubiwaco ni, ‘Yam wacamo dok wamato kacel kwedi, dok bene ipwonyo dano i dye bomawa.’ 272 Ento en biwaco botwu ni, ‘Awaco botwu ni, pe angeyo kama wua iye; wua woko ki inyima, wun lutim maracu ducu!’ 283 Kunu wubikok dok wubikayo lakwu, ka wuneno Abraim ki Icaka ki Yakobo ki lunebi ducu kun gitye i ker pa Lubanga, ento wun ki komwu kibolowu woko. 294 Dano gibibino kun gia ki tung kunyango, ki tung kupotoceng, ki yo tung kumalo, ki tung kupiny, ci gibibedo piny i dog cam i ker pa Lubanga. 305 Nen, jo mogo ma guo lacen gibibedo me ati, ki jo mogo me ati gibibedo me lacen.”

Yecu okok pi Jerucalem

(Mat 23:37-39)

31I cawa meno luparicayo mogo gubino, ci guwaco bot Yecu ni, “Aa woko ki kany, pien Kerode mito neki.” 32Yecu odok iye botgi ni, “Wucit, wuwac bot too ca ni, ‘Nen, abiryemo cen dok abicango dano tin ki diki, inino me adeke abicobo dog tica. 33Kadi bed kitmeno, myero amede gira ki wota, tin ki diki ki dikimaca; pien lanebi pe myero oto ka mukene ma pe i Jerucalem.’ 34Jerucalem, Jerucalem, in ma ineko lunebi, ma icelo jo ma kioro boti woko ki gotti, tyen adii ma nene amito coko lutinoni woko, macalo min gweno coko lutinone ite bwome, ento in pe iye giri! 356 Nen, dong kibitenyo otti woko niyak. Dok atito boti ni, pe ibinena nio ka ibiwaco ni, ‘Kipwo ngat ma bino inying Rwot.’”