Luka 12

Dano myero gugwoke ikom lok buta

11

Ikare meno, lwak dano alip ki alip gucoke kacel, kun dong ginyone keken gi. Mukwongo, Yecu ocako waco bot lupwonyene ni, “Wugwoke ikom tobi pa Luparicayo, ma en aye buta. 22 Pe tye gin mo ma kiumu ma pe kibiyabo kamaleng, kadi gin ma kikano ma pe bingene. 3Pimeno wa lok ducu ma wuloko i colpiny biwinye ilengpiny; dok gin ducu ma wukwilo loke ki i tyelo, kibitito loke ki dwon malongo iwi ot malo.”

Ngat ma myero dano olwor

(Mat 10:28-31)

4“Lurema, atito botwu ni, pe wulwor jo ma neko kom, ento pe dok gitwero timo gin mo marac makato meno. 5Ento abinyutu botwu ngat ma myero wulwor: wulwor ngat ma ka dong oneko, ci dok tye ki twero me bolo i Geena; eyo, atito ni, wulwore. 6Ojwinyojwiny abic pe kicato pi denari aryo keken? Ento pe tye mo acel ikin gi ma wi Lubanga twero wil iye. 7Kadi bed wa yer wiwu ducu bene dong kikwanogi woko liweng. Pe wulwor; pien pirwu tek tutwal makato pi ojwinyojwiny mapol.”

Tucu nying Yecu inyim dano

(Mat 10:32-33; 12:32; 10:19-20)

8“Atito botwu ni, dano ducu ma bitucu inyim dano ni giye an, Wod pa dano bene biye gin inyim lumalaika pa Lubanga. 9Ento ngat ma kwera inyim dano, Wod pa dano bene bikwere inyim lumalaika pa Lubanga. 103 Dano ducu ma loko lok marac ikom Wod pa dano kibiweko bale; ento ngat ma yeto Cwiny Maleng pe kibiweko bale. 114 Ka kiterowu inyim kacoke ki inyim luloc ki wegi twer, pe wubed ka tamo kit ma myero wulok kwede, nyo ni wubigamo loke ningning, nyo ni kit lok ango ma wubiloko. 12Pien Cwiny Maleng bipwonyowu icawa meno i gin ma myero wuwaci.”

Carolok ikom lalonyo ma laming

13Ngat acel ikin lwak dok owaco bot Yecu ni, “Lapwony, wac bot omera wek wapok ginaleya kwede.” 14Ento Yecu ogamo doge ni, “Nyeri, in itamoni anga ma oketo an me bedo langolkop nyo lapok jami ikinwu?” 15Ci Yecu omede ki waco botgi ni, “Wugwoke ikom miti madwong pi lim; pien kwo pa dano pe cung i wel lim mapol ma en tye kwede.” 16Ka Yecu obolo botgi carolok ni, “Yam tye dano mo ma lalonyo ma cam ocek madwong i potone. 17Danonu openye kekene ki i cwinye ni, ‘Abitimo ango, pien pe atye ki kaonyo cama? Dong atimango?’” 18Dok owaco kekene ni “Abitimo kit man: abimuku derona ducu, ci abigoyo mukene maditone, kama abionyo cama ki jamina ducu i igi. 19Kadong ‘Abiwaco ki cwinya ni, dano ma lagum kom! Nen, atye ki jami mapol ma biroma pi mwaka mapol ata; abiywe mot, abicam, abimat, abibedo ki yomcwiny.’” 20Ento Lubanga owace ni, “In laming! ‘Idyewor ma tin kibikwanyo kwoni woko ki boti; ka jami ma iyubuni dong bibedo pa anga ce?’” 21Ci Yecu odolo te loke ni, “Tye kitmeno pi ngat ma kano lonyo pire kene, ma kun pe tye ki lonyo inyim Lubanga.”

Bed ki gen ikom Lubanga

(Mat 6:25-34)

22Ci Yecu owaco bot lupwonyene ni, “Pimeno awaco botwu ni, pe wubed ka paro pi kwowu, ni wubicamo ango; nyo pi komwu, ni wubiruku ango. 23Pien kwo pire tek kato cam, dok kom pire tek kato ginaruka. 24Kong wunen mono kit kwo agak; pe gicoyo kodi, dok bene pe gikayo kac, pe gitye ki dula kadi dero, ento Lubanga pitogi. Wun pe wutamoni pirwu tek kato pi winyo? 25Anga ki ikinwu pi bedo ki par mapol twero medo kare me kwone? 26Ka gin manok macalo man timone loyowu, pingo wubedo ki par mapol pi lok mukene? 275 Kong wutam pi lenga me tim, kit ma gidongo kwede; pe giwiyo uci, dok bene pe gicweyo bongo. Ento pud amede ki waco botwu ni, kadi bed Solomon yam oruke ki bongo me deyone ducu, ento pe oruke maleng makato mo acel ikin gi. 28Kace Lubanga ruku lum ma i tim kitmeno, ma bedo tye pi nino ma tin keken, ento diki inongo gibolo woko i keno, ci en pe birukuwu makato, wun jo ma niyewu nok? 29Pe wuwek cwinywu obale pi gin ma wubicamo, nyo gin ma wubimato; cwinywu pe obed ka paro lok mapol. 30(Pien rok ducu me lobo man yenyo jami magi;) Wonwu matye i polo ngeyo ni wumitogi. 31Ento ma ka meno, wuket cwinywu ikom ker pa Lubanga, ci jami magi ducu kibimedo botwu.”

Lonyo ma kikano i polo

(Mat 6:19-21)

32“Pe wulwor, wun lutino romi, pien Wonwu cwinye yom atika me miyo ker botwu. 33Wucat jamiwu, wukony ki lucan. Wukwo kicaa lim ma pe tii, wukan lonyo ma pe tum i polo, kama lakwo mo pe oo iye, dok nyenye mo bene pe twero balo. 34Pien kama lonyowu tye iye, cwinywu bene bedo iye.”

Lutic ma kuru laditgi

356

“Wubed atera ma wutweyo pyerwu kun wuyube bene pi tic, ma tarawu lyel; 367 wubed macalo jo ma kuru ladit ticgi ka bidwogo nia ki i karama me nyom, wek giyabe dogola oyotoyot ka en dong obino dwongo dogcel me gang. 37Tye ki gum lutic meno ma laditgi ka odwogo nongo peya gunino. Adada awaco botwuni, en biruku bongo me tic, ci biwaco botgi ni gubed piny i dog cam, ci miyogi cam. 38Kadi bed ka en obino cwiny dyewor nyo okokgweno, kun onongogi tye ma gutere, lutic meno gitye ki gum. 398 Ento myero wunge lok man ni, kace nene won ot ngeyo cawa ma lakwo bibino iye kono okiyo ma pe oweko ngat mo oturu ode. 40Ci wun bene myero wubed ma wuyube pien Wod pa dano bibino icawa ma pe wutamo ni en bibino iye.”

Latic ma lagen nyo ma pe lagen

(Mat 24:45-51)

41Petero openyo ni, “Rwot, ibolo carolok man botwa keken, nyo bot dano ducu?” 42Rwot ogamo ni, “Anga ma lagwok ot ma lagen dok ma laryeko, ma rwode biweko dano ducu ma bedo i ode i teloce, wek opok botgi camgi ikare mamite? 43Latic meno tye ki gum, ma ladite ka odwogo binonge kun en tye katiyo tice meno. 44Adada awaco botwu ni, ladittu bimiye twero me loyo jamine woko ducu. 45Ento ka latic meno oloko kekene ni, ‘Rwoda dong ogale kabino’, ci ocako goyo lutic ma co ki ma mon, kun camo, mato, dok mer, 46ladit pa latic meno bidwogo inino mo ma en pe tamo pi dwogone, dok icawa ma en pe ngeyo, ci bipwode, dok bikete ikin jo ma pe gene. 47Latic meno ma ongeyo gin ma ladite mito, ento pe oyube iye, dok pe olubu gin ma ladite mito, kibipwode ki pwod madit tutwal. 48Ento latic ma pe ongeyo gin ma ladite mito, ce otiyo gin matwero miyo kipwode pire, kibipwode manok. Dano ma kimiye madwong, kibimito madwong bene ki bote; dok ngat ma kimiyo mapol bote, kibipenye bene mapol makato.”

Yecu okelo apokapoka

(Mat 10:34-36)

49“Abino ka cwinyo mac i lobo; kono dong omoko, kono ber! 509 Atye ki batija ma myero ki batija an kwede; piman dong atye ki toncwiny nio ka ocobe! 51Wun wutamo ni an abino ka kelo kuc i lobo? Pe, atito botwu ni pe akelo kuc; ento apokapoka. 52Cake tin jo abic ma i ot acel gibibedo kun gupoke; jo adek bikwero jo aryo ki jo aryo bikwero jo adek. 5310 Won latin bipoke woko ki ikom latine, latin bene bipoke woko ki wone; mego bipoke ki nyare, nyako bipoke woko ki mine; dayo bipoke woko ki ciwode, ki ciwod bene bipoke woko ki daa ne.”

Niang kit me poko kare

(Mat 16:2-3)

54Yecu dok owaco bot lwak ni, “Ka wuneno pol otinge tung kupotoceng, oyotoyot wuwaco ni, ‘Kot koni cwer’; ci cwer bene. 55Dok ka wuneno yamo kodo ki ibut piny tung kupiny, wun wuwaco ni, ‘Piny bibedo lyet matek’, ci time bene. 56Wun lubuta! Wungeyo poko kin gin manen i lobo ki i polo; pingo pe wungeyo poko kin lanyut me kare man?”

Yubu lok ki ngat ma doti

(Mat 5:25-26)

57“Pingo pe wumoko lok matye atir pirwu kenwu? 58Ka icito bot langolkop kun inywako yoo ki ngat ma doti, teme matek me yubu lok kwede ma pud wutye i yo, pe iwek en oteri inyim langolkop, ci weko langolkop miyi woko bot acikari, ci weko acikari teri iot buc. 59Atiti ni, pe ibikati woko ki kunu nio ka iculu cul ducu ma wi cente mo pe orem.”