Luka 11

Pwony pa Yecu ikom lega

(Mat 6:9-15; 7:7-11)

1Yecu onongo yam tye kalega ikabedo mo; kadong otyeko, ci ngat acel ki ikin lupwonyene owace ni, “Rwot, pwonywa ki lega, kit macalo yam Jon opwonyo kwede lupwonyene.”

2Yecu odok iye botgi ni, “Ka wulego, ci wuwac kit man ni,

‘Wonwa, kiwor nyingi maleng. Ker meri obin.

3Miwa nino ki nino camwa me nino ducu.

4Iwek balwa, macalo wan ki komwa waweko bal pa dano ducu ma gibalo botwa.

Pe iterwa i abita.’”

5Dok owaco botgi ni, “Anga ikinwu matye ki lareme ci bicito bote i cwiny dyewor ka penye ni, ‘Larema, konya ki mugati adek; 6pien larema mo oa i wot, ocora, ci pe atye ki cam mo ma myero aket inyime.’ 7En bidoke iye ki i ot ni, ‘Wek yela; dong acego dogola woko, wan ki lutinona dong wabutu woko; pe atwero a malo ka mini gin mo.’ 8Atito botwu ni, kadi bed en pe bia malo ka miye gin mo pi bedo lareme, ento pi dide ci bia, bimiye gin ducu ma en mito. 9Dok awaco botwu ni, wulegi, ci kibimiyo botwu; wuyeny, ci wubinongo, wudwong dogola, ci kibiyabo botwu. 10Pien dano ma lego kimiye, ki ngat ma yenyo bene, nongo; ngat ma dwongo dogola bene, kibiyabo dogola bote bene. 11Anga ikinwu ma won latin, ka latine olege ni omiye rec, ci bimiye twol ma kaka rec? 12Nyo ka olege ni omiye tong gweno, ci bimiye oton? 13Ka wun jo maracu wungeyo miyo mot mabeco bot lutinowu, ci Wonwu matye i polo pe bikatowu, bimiyo Cwiny Maleng makato bot jo ma lege?”

Yecu ki Beeljebul

(Mat 12:22-30; Mar 3:20-27)

14Yam onongo Yecu tye ka ryemo cen ki ikom dano mo ma te lebe oto; ka cen dong oa ki ikom dano ma onongo tye ki cen, ma telebe oto ni, en oloko, ci lwak guuru. 151 Ento jo mogo ki ikin gi guwaco ni, “En ryemo cen ki twero pa Beeljebul ladit pa cen.” 162 Jo mukene onongo giyenyo lanyut ki bote ma a ki i polo, pi teme. 17Ento Yecu ongeyo tamgi, ci owaco botgi ni, “Ka ker me lobo mo iye opoke woko aryo, ci ker me lobo meno bale woko; dok bene gang ma jo ote opoke woko pe cung. 18Catan bene ka iye opoke woko kun gilwenyo ikin gi, ci kere bicung ningning? Pien wun wuwaco ni aryemo cen ki twero pa Beeljebul. 19Ka an aryemo cen ki twero pa Beeljebul, ci lupwonyewu kono giryemo cen ki twero pa anga? Pimeno gin aye gibibedo lungolkopwu. 20Ento kace an aryemo cen ki tek me cing pa Lubanga, ci dong wunge ni ker pa Lubanga dong obino botwu. 21Ka oteka ma oruku jami lwenye ducu tye ka gwoko gang kale, ci jamine ducu bedo labongo ayela. 22Ento ka dano matek kate obino olwenyo ikome ce oloye, ci en bicoko jami lwenye mayam en geno ni, dok bipoko jami ma en oyako ki boteni ducu. 233 Ngat ma pe tung bota, meno nongo en lakwora, dok ngat ma pe nywako kacel kweda ka coko, nongo keto mere aketa.”

Kit ma cen dwogo kwede ikom dano

(Mat 12:43-45)

24“Ka cen dong oa ki ikom dano mo, ci cito wire i tim kama pii pe iye kun yenyo kama ebiywe iye; ento ka nongone oloye woko, ci waco ni, ‘Abidok gira i oda kama yam aa ki iyeni.’ 25Ka obino, ce nongo kiyweyo iot woko maleng, kiyubu maber. 26En dok, cito kelo cen mukene abiro ma giracu gikate woko, ci gidonyo gibedo i odeni; lacen danonu bibedo marac makato kit ma onongo yam obedo kwede con.”

Gum me ada

27Ka Yecu oloko lok man, ci dako mo ki ikin lwak owoto dwone, owace ni, “Tye ki gum ic ma onywali, ki tunu ma idoto!” 28Ento Yecu ogamo ni, “Makatone gitye ki gum, jo ma giwinyo lok pa Lubanga, dok gigwoko!”

Kipenyo Yecu pi lanyut

(Mat 12:38-42; Mar 8:11-12)

294

Ka lwak gumede mapol, ci Yecu ocako waco ni, “Yalwak pa jo maracu giyenyo lanyut, ento pe kibimiyo botgi lanyut mo, kono lanyut pa lanebi Yona keken. 305 Pien kit macalo Yona yam odoko lanyut bot jo Nineve, kitmeno Wod pa dano bene bidoko lanyut bot yalwak me kare man. 316 Rwot ma dako matye tung kupiny bicung kacel ki yalwak me kare man ikare me ngolo kop, ci miyo kop loyogi; pien en oa ki i agiki lobo obino kawinyo ryeko pa Solomon, ento nen, gin madit makato Solomon tye kany. 327 Jo Nineve bicung kacel ki yalwak me kare man, ikare me ngolo kop, ci miyo kop loyogi, pien gin yam gungut pi lok ma Yona onongo otito, ento nen, gin madit makato Yona tye kany.”

Tara me menyo kom

(Mat 5:15; 6:22-23)

338

“Pe tye ngat mo ma cwinyo tara ci kano i gul, nyo umu auma ki aduku; ento cibo iwi lacib tara, wek dano ducu ma gibino i ot gunen derone. 34Tara me menyo komi aye wangi; kace wangi bal mo pe iye, ci komi kulu bipong ki dero. Ento kace wangi tye ki bal mo ikome, ci komi kulu bipong ki colpiny. 35Gwoke wek dero matye i iini pe odok colpiny. 36Dong ka komi kulu bedo i dero, kun colpiny pe iye, ci komi kulu bibedo i dero, macalo tara ma menyi ki derune ka tye kalyel.”

Yecu otucu pi can ma bipoto ikom Luparicayo ki Lupwonycik

(Mat 23:1-36; Mar 12:38-40; Luk 20:45-47)

37Ikare ma Yecu otyeko lok, Laparicayo mo olwonge kacam bote; Yecu odonyo i ot, obedo i dog cam. 38Laparicayo ouru ma oneno ni Yecu ocako cam ma pe kong ologo cinge. 39Ci Rwot owace ni, “Wun Luparicayo wulwoko nge kikopo ki nge atabo, kun iwu opong ki yak ki tim maracu. 40Wun lumingming! Pe en Lubanga aceli ma otiyo gin ma tung woko aye bene otiyo gin ma tung iye? 41Ento wumii gin ma i atabowu ki i kikopowu bot lucan wek okonygi; ci nen, jami ducu bibedo maleng botwu malube ki kwerwu.” 429

“Ento wubineno can, wun Luparicayo, pien wumiyo dul me apar me oyado ki ocobo ki kit pot dekwu ducu, kun wuweko ngolo kop atir ki maro Lubanga; meno ducu myero wutim kun pe wuweko magi bene. 43Wubineno can, wun Luparicayo, pien wumaro kabedo me dito ikacoke, dok wumito ni dano gumotwu ki woro i cuk. 44Wubineno can! Pien wurom ki lyel ma pe ginen ma dano woto iwigi kun pe gingeyo.”

45Ngat acel ikin Lupwonycik ogamo doge ni, “Lapwony, ka iwaco kit man nyutu ni iyeto wa wan bene.” 46Yecu odoke iye ni, “Wubineno can, wun Lupwonycik bene! Pien wumiyo dano yeyo yec mapek, ma yeyone tek, kun wun ki komwu pe wukonyo me tingo kadi ki nyig cingwu acel. 47Wubineno can, pien wucano got iwi lyel pa lunebi mayam kwariwu guneko. 48Kitmeno wun wucaden, wupwoyo tic pa kwariwu, pien gin gunekogi, ka dong wun wucano got iwi lyelgi. 49Piman Ryeko pa Lubanga owaco ni, ‘Abioro botgi lunebi ki lukwena, jo mogo ikin gi kibinekogi dok bene jo mukene kibilibogi.’ 50Wek kicul kwor pa lunebi ducu ma kinekogi ikom yalwak me kare man pi remo ma kionyo nia i acaki piny. 5110 Kibicako ki ikom remo pa Abel nio kwede wa ikom remo pa Jakaria ma oto ikin keno tyer pa Lubanga ki i Kabedo Maleng. Eyo atito botwu ni, kibiculu kwore ikom yalwak me kare man. 52Wubineno can, wun Lupwonycik, pien wumayo layab me ngeyo piny woko, kun wun ki komwu pe wudonyo iye, dok wugengo dano mamito donyo iye bene.”

53Ka Yecu dong oa ki kunu, ci Lupwonycik ki Luparicayo gucako diine matek ma girobo doge ki peny mapol, 54kun gikiye wek gimak lok ma a ki idoge.