Luka 18

Carolok ikom dato ki langolkop

1Yecu obolo bot lupwonyene carolok man ma pwonyogi ni myero guleg jwijwi, guwek ol. 2En owaco botgi ni, “Yam tye langolkop i taun madit mo, ma pe lworo Lubanga kadi woro dano. 3I taun madit meno bene yam onongo tye iye dato mo ma bino bote jwijwi kun wace ni, ‘Ngolkop ma atir ikom ngat ma pido kweda.’ 4Tyen mapol langolkop obedo kakwero; ento lacen oloko kekene ni, ‘Kadi bed pe alworo Lubanga, kadi woro dano, 5ento pien dato man yela, abingolo kop atir pire; gwok nyo en bijonya nono ki bino bota nino ducu.’” 6Ci Rwot owaco ni, “Wuwiny lok ma langolkop ma pe kite atir owaco. 7Pe itamoni Lubanga bingolo kop atir pi jo ma en oyero, ma gikok bote dyeceng ki dyewor? Itamoni en bigale ma pe timo gin mo pirgi? 8Atito botwu ni, en bingolo kop atir oyotoyot. Ento Wod pa dano ka bibino, tika binongo niye i lobo?”

Carolok ikom Laparicayo ki lajog mucoro

9Dok obolo carolok bot jo ma gene ken gi, ni kitgi atir, kun gicayo jo mukene. Owaco ni, 10“Jo aryo yam gucito kalega i ot pa Lubanga, ngat acel Laparicayo, ngat mukene lajog mucoro. 11Laparicayo ocung, olego gire kene kun waco ni, ‘Lubanga, apwoyi pien an pe acalo jo mukene, ma gin lubuma, jo ma pe gene, lutim abor, pe bene acalo lajog mucoro man. 12Arii kec kiryo i Cabit acel; amiyo dul me apar me jamina ducu ma alimo.’ 13Ento lajog mucoro ocung kamabor, onongo pe mito wa ilo wange malo i polo, ento en odongo kore, kun waco ni, ‘Lubanga, tima kica, pien an labalo!’ 141 Atito botwu ni, dano man odok i ode ma opore inyim Lubanga makato ngat mukene ca; pien dano ducu ma kete kene ni edit, kibidwoke piny, ento ngat ma mwole kene kibimiye doko dit.”

Yecu omiyo gum ikom lutino

(Mat 19:13-15; Mar 10:13-16)

15Dano gukelo bote lutino matino, wek oket cinge ikomgi; ka lupwonyene guneno, gujukugi. 16Ento Yecu olwongogi, ci owaco ni, “Wuwek lutino gubin bota, pe wugeng gi; pien ker pa Lubanga tye pi jo macalo gin. 17Adada awaco botwu ni, ngat ma pe jolo ker pa Lubanga macalo latin matidi, pe bidonyo iye.”

Laco ma lalonyo

(Mat 19:16-30; Mar 10:17-31)

18Laloc mo openyo Yecu ni, “Lapwony maber, atim gin ango wek anong kwo ma pe tum?” 19Yecu openye ni, “Pingo ilwonga ni aber? Pe tye ngat mo maber kono Lubanga keken. 202 Ingeyo Cik ni, ‘Pe i tim abor; pe ineki; pe ibed caden me goba; wor woru ki meni.’” 21Ogamo ni, “Alubu lok magi ducu cake wa ka tinona.” 22Ka Yecu owinyo, ci owace ni, “Pud tye gin acel mamite me atima; cat jami ducu ma itye kwede, ci mii lime ki lucan, ci i bibedo ki lwak lonyo ma kikano piri i polo; ka dong ibin icak lubu kora.” 23Ento ka danonu owinyo lok man, ci okumu, pien onongo en dano ma olonyo tutwal. 24Ka Yecu obedo ka nene, ci owaco ni, “Tek mada bot lulonyo me donyo i ker pa Lubanga! 25Pien bedo yot bot kinaga me donyo ki iwang libira, kato lalonyo me donyo i ker pa Lubanga” 26Dano ducu ma guwinyo guwaco ni, “Ci anga matwero lare?” 27Ento Yecu owaco ni, “Gin ma pe twere ki bot dano, ki bot Lubanga twere.” 28Petero owaco ni, “Nen, wan waweko paciwa, walubi.” 29En owaco botgi ni, “Adada, awaco ki wun ni, pe tye ngat mo ma oweko ode, nyo dakone, nyo omegine, nyo lunyodone, nyo lutinone, pi ker pa Lubanga, 30ma pe bilimo cul makato meno tyen mapol ikare man, ki ikare ma bibino anyim en binongo kwo ma pe tum.”

Yecu dok onwoyo tito pi to ne tyen me adeke

(Mat 20:17-19; Mar 10:32-34)

31Yecu otero lupwonyene apar wiye aryo i mung, ci owaco botgi ni, “Wunen, waecito i Jerucalem, lok ducu ma lunebi gucoyo ikom Wod pa dano bicobbe kakare. 32Pien kibimiye bot Lurok, ci kibingale, dok kibitimo aranyi ikome, kun kibingulu wa laa ikome. 33Gibipwode ki del anino, ci kibineke, ento inino me adeke en bicer.” 34Ento lupwonyene pe guniang lok ma en owaco; pien kikano telok man woko ki botgi, ci pe gumedo ki ngeyo lok ma kiwaco botgi.

Yecu ocango latowang cok ki Jeriko

(Mat 20:29-34; Mar 10:46-52)

35Ka dong gunyiko cok ki Jeriko, latowang mo onongo obedo piny inget yo kun lego lim. 36Ka en owinyo lwak tye ka mol ma gin kato ki ka ngete, ci openyo ni, “Meno kono gin ango?” 37Kitite ni, “Yecu me Najaret aye tye kakato.” 38Latowang odange ni, “Yecu Lakwar Daudi, kica omaki ikoma ba!” 39Dano ma onongo gutelo nyim Yecu gujuke ni, “Ling, nye;” ento en omede ameda ki dange ni, “Lakwar Daudi, kica omaki ikoma ba!” 40Ka Yecu ocung, ci owaco ni kikele bote. Ka obino cok, ci Yecu openye ni, 41“Imito atimi gin ango?” Ci latowang ogamo ni, “Rwot, amito ni wanga onen piny odoco.” 42Ci Yecu owace ni, “Nen giri piny, niyeni ocangi.” 43Cutcut wange ocako neno piny, ci olubu kor Yecu kun miyo deyo bot Lubanga. Dano ducu ka guneno, ci gupako Lubanga.