Luka 19

Yecu ki Jakayo

1Yecu odonyo i Jeriko kun onongo obikato akata. 2Onongo tye kunu dano mo ma nyinge Jakayo, lajog mucoro madit, dok lalonyo bene. 3En onongo tye kayenyo yo me neno Yecu, ento pe otwero pi lwak, pien en onongo cek. 4Pieno en oringo anyim, oito iwi yat olam wek enene, pien Yecu onongo obiwok ki i yoonu. 5Ka Yecu oo ikabedonu, oneno malo, ci owace ni, “Jakayo, lor piny oyotoyot; pien tin myero abed i odi.” 6Jakayo olor oyotoyot, ci ojole ki yomcwiny. 7Ka dano ducu guneno, ci gungur kun giwaco ni, “Nen laco man odonyo i ot kabedo welo pa dano ma labalo.” 8Jakayo oa malo, owaco bot Rwot ni, “Nen, Ladit, abimiyo nucu jamina bot lucan; ka abumo ngat mo i gin mo, abicule wang angwen.” 9Yecu owace ni, “Tin lar obino i ot man, pien en bene lakwar Abraim. 101 Pien Wod pa dano obino kayenyo ki ka laro jo ma orwenyo.”

Carolok ikom nyig Jabu apar

(Mat 25:14-30)

112

Ka pud dano gitye kawinyo lok man, Yecu omede ki loke, kun bolo botgi carolok, pien onongo dong cok ki Jerucalem, dok pien onongo gitamo ni ker pa Lubanga binen cutcut. 12Pimeno en owaco botgi ni, “Yam tye wod ker mo ma oa ocito i lobo mabor ka limo twerone me loc ka dong odwog cen. 13Ci en olwongo lutice apar, ci opoko botgi nyig jabu acel acel, kun owaco botgi ni, ‘Wucat ki wil nio wang ma an adwogo.’ 14Ento dano me lobone gukwere, gucwalo lukwena i kore ki lok ni, ‘Pe wamito dano man olowa.’ 15Ikare madong en odwogo, madong ocamo ker, ci ociko ni kilwong lutic mayam emiyogi lim mi, wek enge wel magoba ma gulimo i cato wilgi. 16Dano mukwongo obino inyime, ci owaco ni, ‘Ladit, nyig jabu acel ma imiyani wiye omede ki apar mukene.’ 17Ci ladite ogamo ni, ‘Ber, in latic maber! Pien yam ibedo lagen ikom jami matidi mo, i bibedo ki twero ikom taun madongo apar.’ 18Dano me aryone obino, owaco ni, ‘Ladit, lim ma imiya ni wiye dok omede ki abic mukene.’ 19Ci en owace ni, ‘In bene i bibedo ki twero ikom taun madongo abic.’ 20Latic mukene dok obino, owaco mere ni, ‘Ladit, limi en, agwoko, aboyo woko liking ikitambara, 21pien onongo alwori, pien in idano magwar; ikwanyo gin ma pe ikano, ikayo kac bene kama pe icoyo iye kodi.’ 22Laditi owace ni, ‘Abingolo kop loyi kun lubu lok ma oa ki idogi keni, in latic marac! Yam ingeyo ni an a dano magwar, akwanyo gin ma pe akano, akayo kac bene kama pe acoyo iye kodi, 23pingo dong pe ikano lima i benge, wek ka adwogo, agam lima ki magoba mo?’ 24Ci owaco bot jo ma gucung ka ngete ni, ‘Wugam nyig jabu aceli woko ki bote wumii bot ngat matye ki nyig jabu aparni.’ 25[Ento gin guwace ni, ‘Ladit, en dong tye ki nyig jabu apar!’] 263 Ci en owaco ni, ‘Atito botwu ni, dano ducu matye ki gin mo aye kibimedo bote gin mo; ento ngat ma pe ki gin mo, kibikwanyo woko ki bote kadi wa gin manok matye bote. 27Ento lukwora magi, ma gin gukwera ni pe abed lalocgini, wukelgi kany, wunekgi ki pala lucwan inyima.’”

Yecu odonyo i Jerucalem ki deyo madwong

(Mat 21:1-11; Mar 11:1-11; Jon 12:12-19)

28Ikare ma Yecu otyeko loko lok man, ci owoto anyim kun cito malo i Jerucalem. 29Ka dong onyiko cok ki Betepage ki Betania, ite got ma kilwongo ni Jeituni, Yecu ocako oro jo aryo ki ikin lupwonyene, 30kun cikogi ni, “Wucit i gang matye inyimwu. Kace wudonyo iye wubinongo latin kana ma kitweyo, ma ngat mo peya oito iwiye; ci wugony, wukel kany. 31Ka ngat mo openyowu ni, ‘Wugonye pingo?’ Wun wubidok iye kit man ni, ‘Rwot aye mito.’” 32Kitmeno jo ma kiorogi gucito, ci gunongo kit macalo Yecu otito botgini. 33Ka gitye ka gonyo latin kana, wegine gupenyogi ni, “Wugonyo latin kana pingo?” 34Gudok iye botgi ni, “Rwot aye mito.” 35Ci gukelo latin kana bot Yecu. Gupeto ginarukagi iwiye, ci guweko Yecu oito iwiye. 36Ka dong kana tye kawot kwede, dano gubedo ka peto ginarukagi i wangayo. 37Ikare madong gunyiko cok ki Jerucalem, i lung me got Jeituni, lwak lupwonyene ducu cwinygi obedo yom, ci gupako Lubanga ki dwon malongo pi tic madito ma guneno, 384 kun giwaco ni,

“Tye ki gum rwot ma bino inying Rwot Lubanga!

Kuc obed iwi polo,

ki deyo obed bot Lubanga ikabedo mamalo twal!”

39Luparicayo mogo ma onongo gitye ikin lwak guwaco bot Yecu ni, “Lapwony, juk lupwonyeni.” 40Yecu odok iye botgi ni, “Atito botwu ni, ka kono joni guling, ci godi magi kikomgi kono aye gudange.”

Yecu okumu pi Jerucalem

41Ka dong Yecu onyiko cok, en oneno taun madit man, ci okok pire, 42kun waco ni, “Tini ka kono onongo ingeyo lok makelo kuc boti, kono ber! Ento koni dong kikano woko ki boti. 43Pien kare bibino ikomi ma lukwori gibitoro lobo rumi woko dyere, ci gibingolowi tungi ki tungi. 44Kibireti piny, in ki lutinoni; pe kibiweko gweng mo acel i ii dong ma odode iwi wadi; pien yam pe ingeyo kare ma kibilimi iye.”

Yecu ocito odonyo i Ot pa Lubanga

(Mat 21:12-17; Mar 11:15-17; Jon 2:13-22)

45Ka Yecu odonyo i Ot pa Lubanga, ci en ocako ryemo lucat wil woko ki iye, 465 kun waco botgi ni, “Yam kicoyo ni, ‘Oda bibedo ot me lega,’ ento wun wuloko odoko boro pa luyak.” 476

Yecu obedo ka pwony i Ot pa Lubanga nino ducu. Ajwaki madito pa Lubanga ki Lupwonycik ki jo madito ikin lwak guyenyo yo me neke; 48ento pe gunongo gin mo ma myero gutim ikome, pien dano ducu guketo cwinygi kawinyo loke.