Luka 20

Kipenyo kit twer pa Yecu

(Mat 21:23-27; Mar 11:27-33)

1Inino mo acel ka Yecu tye ka pwonyo dano i Ot pa Lubanga kun tito lok me Kwena Maber, ajwaki pa Lubanga ki Lupwonycik ki ludongo gubino, 2ci gupenye ni, “Tit botwa, twero ango ma omiyo itimo gin magi; nyo anga ma omiini twero man?” 3Yecu odok iye botgi ni, “An bene abipenyowu ki peny acel; wek wudoka iye. 4Batija pa Jon twerone oa ki i polo nyo ki bot dano?” 5Guporo loke keken gi kun giwaco ni, “Ka wawaco ni, ‘Oa ki i polo,’ ci en bipenyowa ni, ‘Pingo pe wuye en?’ 6Ento ka wawaco ni, ‘Oa ki bot dano,’ ci danonu ducu gibicelowa ki gweng; pien dano ducu giye atika ni Jon aye lanebi.” 7Ma omiyo gudok iye bot Yecu ni pe gingeyo kama oa iye. 8Ci Yecu owaco botgi ni, “An bene pe abitito botwu kit twer ma omiyo atiyo tic magi.”

Carolok ikom poto olok ki lupur

(Mat 21:33-46; Mar 12:1-12)

91

Yecu ocako bolo carolok man bot lwak ni, “Yam tye dano mo ma opito olok i potone, ci oweko bot jo ma puru, ci en ocito woko wa i lobo mukene, orii kunu pi kare malac. 10Ka kare oromo, ci en ooro latice bot lupur poto ni myero gumine nyig olok mogo; ento lupur poto gugoye, guryeme ci odok ki cinge nono. 11En dok ooro latic mukene; gin gugoyo en bene, gutimo tim aranyi ikome, ci guryeme kwede odok ki cinge nono. 12Dok ooro me adeke; guketo ret ikom man, ci gucwale woko. 13Lacen won poto olok owaco ni, ‘Abitimo gin ango dong? Abioro woda ma amaro; gwok nyo gibiwore.’ 14Ento ikare ma lupur gunene, guloko keken gi ni, ‘Man aye dong lale lim kikome; waneke woko, wek lim ma en bileyoni obed mewa.’ 15Ci gucwale woko ki i poto olok, ka guneke. Won poto dong bitimogi ningning? 16En bibino, ci neko lupur poto meno woko ducu, ci bimiyo poto olok bot jo mukene.” Ka guwinyo lok man, guwaco ni, “Pe myero otime kumeno!” 172 Ento Yecu ociko wange ikomgi, ci owaco ni, “Man kono teloke ngo, mayam kicoyo i ginacoya ni,

‘Got ma lugedo gukweroni

en aye odoko got madit ma pire tek’?

18Dano ducu ma poto ikom got man bitur woko; ento ka got man opoto ikom ngat mo, ci binyote woko.”

19Lupwonycik ki ajwaki madito pa Lubanga gumito make icawanu, ento gulworo lwak; pien guniang ni en obolo carolok man ikomgi.

Culu mucoro bot cecar

(Mat 22:15-22; Mar 12:13-17)

20Gin gungiyo te kare maber, wek kioro lurot piny, ma giporo bedo ni gin jo ma gene, wek gumak lok ma a idoge, wek gumiye ite loc ki twero pa luloc ki luket cik. 21Gin gupenye ni, “Lapwony, wangeyo ni in iloko dok ipwonyo lok matye atir, pe ipoko kin dano, ento ipwonyo yo pa Lubanga ki ada.” 22Titi wa, “Myero wacul mucoro bot Cecar nyo pe?” 23Ento Yecu oniang ryekogi, ci openyogi ni, 24“Kong wunyuta lim ma kiculu kwede. Cal ki coc matye ikomeni pa anga?” Gugamo ni, “Pa Cecar.” 25Yecu owaco ni, “Wudwok jami pa Cecar bot Cecar, ki jami pa Lubanga wudwok bot Lubanga.” 26Pe gutwero mako lok mo ma oa ki idoge inyim lwak; ento guuru kit ma en ogamo kwede lok, ci guling alinga.

Peny ikom cer ki ikin jo ma oto

(Mat 22:23-33; Mar 12:18-27)

273

Lucadukayo mogo gubino bot Yecu, gin aye jo ma onongo giwaco ni jo ma oto pe gicer. 284 Gupenye ni, “Lapwony, Moses yam ocoyo botwa ni, ka laco mo oto woko ma oweko dakone ma pe ki lutino, ci omine myero olak dakonu, wek onywal kwede lutino ka wi omine. 29Yam onongo tye omego abiro; ngat mukwongo onyomo dako, ci oto labongo lutino. 30Me aryone olako dakonu, 31me adeke bene gulako dakonu, kitmeno gin abiro ducu gubedo ki dakonu, ci guto labongo lutino. 32Lacen dakonu bene oto. 33Ikare me cer ki ikin jo ma oto, dakonu bibedo dako pa anga ikin gi? Pien gin co abironi ducu gubedo kwede.”

34Yecu owaco botgi ni, “Jo me kare man ginyome; 35ento jo ma kikwanogi ni myero guo i lobo maca, ki i cer ki ikin jo ma oto, pe ginyome, dok pe gibigero co. 36Pien pe dok gitwero to, dong girom ki lumalaika; gin lutino pa Lubanga, pien dong kicerogi woko ki i to. 375 Ento ni jo muto twero cer, Moses kikome bene onyutu, i dul ma gikwano iye lok ikom caka ma pe owang ki mac kun mac lyel iwiye, en kama olwongo iye Rwot ni, ‘Lubanga pa Abraim, Lubanga pa Icaka, ki Lubanga pa Yakobo.’ 38Dong Lubanga pe Lubanga pa jo muto, ento Lubanga pa jo makwo; pien dano ducu bedo kwo pire.” 39Jo mogo ikin Lupwonycik gugamo doge ni, “Lapwony, iwaco kakare.” 40Pimeno pe dok guete me penye ki lok mo.

Peny ikom Kricito

(Mat 22:41-46; Mar 12:35-37)

41Ento Yecu openyogi ni, “Giwaco ningning ni Kricito ma Lubanga oyero en lakwar Daudi? 426 Pien Daudi kikome bene owaco i buk me Jabuli ni

‘Rwot owaco bot Rwoda ni,

bed itung bada ma lacuc,

43nio ka abimiyo lukwori doko kom laten tyeni.’

44Kitmeno kace Daudi yam olwonge ni Rwot, ci dok en bedo lakware ningning?”

Yecu ciko dano me gwoke ki Lupwonycik

(Mat 23:1-36; Mar 12:38-40; Luk 11:37-54)

45Ikare ma lwak ducu tye kawinyo loke, Yecu owaco bot lupwonyene ni, 46“Wugwoke ikom Lupwonycik ma gimaro wot ma guruku bongi maboco, dok gimito ni dano gubed ka motogi wa i cukgu, gimaro bedo iwi kom pa ludito, ka gitye ikacoke, dok gimaro bedo i kabedo me deyo i karama. 47Gin gimayo odi pa mon to, dok gibedo kalego lega maboco me buta keken. Kibingolo kop madit iwigi makato.”