Luka 21

Mot ma dato omiyo

(Mar 12:41-44)

1Yecu oilo wange malo, ci oneno lulonyo ka gibolo motgi i canduk lim i Ot pa Lubanga. 2Ci oneno dato mo ma lacan, ka obolo cente mola ma nyige aryo. 3Ci owaco ni, “Adada awaco botwu ni, dato man ma lacan ni obolo lim madwong makato dano ducu. 4Pien jo mukeneni ducu gugito but limgi madwongi aye gubolo, ento dato man i caneni, obolo lim ducu matye bote, ma konyo kwone.”

Yecu otito pi muku Ot pa Lubanga

(Mat 24:1-2; Mar 13:1-2)

5Jo mogo ikin lupwonyene gubedo kalok pi Ot pa Lubanga, kit ma kideyo kwede ki godi mabeco ki gityer ma kimiyo bot Lubanga, ci Yecu owaco ni, 6“Gin magi ducu ma wunenoni, kare bibino, ma pe kibiweko got acel mo ma odode iwi wadi ma pe kibicoro woko piny.”

Can ma bipoto i lobo

(Mat 24:3-14; Mar 13:3-13)

7Lupwonyene gupenyo Yecu ni, “Lapwony, man bitime awene, dok kit gin ango ma binyutu ka man dong cok time?” 8Yecu ogamo ni, “Wugoke, dok pe ngat mo orwenywu; pien jo mapol gibibino inyinga, ma giwaco ni, ‘An aye a Kricito!’ dok ni, ‘Kare dong onyiko cok!’ Pe wulubgi. 9Dok ka wubiwinyo pi lweny ki pi arubaruba, pe wubed ki lworo, pien meno kong myero otime, ento agik pe bibino oyotoyot.”

10Lacen owaco botgi ni, “Rok bilweny ki rok wadi, ker bene bilweny ki ker wadi. 11Oyengyeng madongo biyengo lobo, kec laparanat ki two gemo mapatpat bipoto ikabedo mapol; ki gin mamiyo lworo mako dano, ki lanyut madongo bene, bia ki i polo. 12Ento ma peya gin meno ducu otime, kong kibimakowu, kibilibowu, kibiterowu inyim kacoke kapido ikomwu, kibitweyowu ibuc, kibikelowu inyim luker ki inyim luloc pi nyinga. 13Man aye bibedo kare botwu me tito lok me caden ikoma. 141 Pimeno, wumok itamwu ni pe wubitamo con kit ma wubipido kwede, 15pien abimiyowu twero me dok ilok ki ryeko, ma ngat mo ikin lukworwu pe bitwero ete ikomwu, kadi pyem kwedwu. 16Kadi wa lunyodowu ki omegiwu ki wadiwu ki luremwu bene gibidobowu, ci jo mogo ikinwu kibinekogi; 17dano ducu bimon kwedwu pira. 18Ento yer wiwu acel mo pe birwenyo. 19Ka wudiyo cwinywu, ci wubilaro kwowu.

Yecu otito pi keto Jerucalem

(Mat 24:15-21; Mar 13:14-19)

20Ento ka wuneno mony orumu Jerucalem, ci wunge ni kare me keto tere dong onyiko cok. 21Ci jo matye i Judaya myero guring iwi godi, jo matye i taun madit myero guring woko ki iye, jo matye woko ikin paco pe dok gudony i Jerucalem. 222 Pien kare meno bibedo kare me culu kwor, ki bicobo lok ducu mayam kicoyo. 23Dok mon ma giyac gibineno can ikare meno, ki mon ma gidoto lutino bene! Pien can man ma madit bipoto i lobo, ki kiniga madwong bipoto ikom jo me rok man. 24Kibinekogi ki pala lucwan, kibiterogi me bedo opii ikin rok ducu; lurok gibinyono Jerucalem piny, nio ka kare pa lurok otum.

Kit ma Wod pa dano bidwogo kwede

(Mat 24:29-31; Mar 13:24-27)

253

Lanyut binen ikom ceng, ikom dwe ki ikom lakalatwe, ci rok mapol ma iwi lobo bikumu kun nongo cwinygi bingabe angaba pi mor me biamwonyi ma i nam ma pii ne bitwage ma lik. 26Kom dano bimyel ki lworo, ka gibitamo gin ma bipoto ikom lobo; pien twer ma i polo ducu biyenge. 274 Lacen gibineno Wod pa dano kun bino iwi pol ki tek ki deyo madit. 28Ka gin magi dong ocako time, myero wua malo, myero wuil wiwu malo, pien kare me kokowu dong onyiko cok.”

Pwony ikom yat oduru

(Mat 24:32-35; Mar 13:28-31)

29Yecu dok obolo carolok botgi ni, “Kong wunen yat oduru, ki yadi mukene ducu; 30ka dong olot, wuneno pirwu kenwu, ci wungeyo ni oro dong cok. 31Kitmeno wun bene, ka wuneno gin magi otime, myero wunge ni ker pa Lubanga dong onyiko cok. 32Adada awaco botwu ni, yalwak me kare man pe bitum nio wang ma lok magi ducu otime. 33Polo ki lobo bitum, ento loka pe bitum.

Wubed ma wukiyo piny

34Ento wugwoke kenwu, cwinywu owek doko nwang pi woro me cam, ki mero kongo, ki pi paro lok me kwo man ma miyo wubedo ki tam mapol, wek ninonu pe obin oumwu atura macalo akum. 35Pien bibino ikom jo ducu ma bedo iwi lobo ducu. 36Ento wubed ma wangwu twolo kun wukiyo piny ikare ducu, kun wulego ni myero wubed ki tek me bwot ki i lok magi ducu ma bitime, ki me cung inyim Wod pa dano.” 375

Nino ducu onongo Yecu pwonyo i Ot pa Lubanga dyeceng, ento dyewor woto butu iwi got ma kilwongo ni got Jeituni. 38Odiko con dano ducu nongo gibino bote i Ot pa Lubanga kawinyo loke.