Luka 22

Piro lok ikom Yecu

(Mat 26:1-5; Mar 14:1-2; Jon 11:45-53)

11

Nino madito me Mugati ma Tobi Pe Iye ma kilwongo Karama me Kato onongo onyiko cok. 2Ajwaki madito pa Lubanga ki lupwonycik gubedo kayenyo kit yo ma myero ginek kwede Yecu; pien onongo gilworo lwak.

Juda oye me dobo Yecu

(Mat 26:1-5; Mar 14:10-11)

3Ci Catan odonyo i cwiny Juda Lakeriot ma en onongo dano acel ikin lupwonye apar wiye aryoni. 4Ci Juda Lakeriot ocito oporo lok ki ajwaki madito pa Lubanga ki ludito acikari me Ot pa Lubanga, kit yo ma myero emii Yecu kwede botgi. 5Cwinygi obedo yom, ci gucako cike me miye lim. 6Juda oye, ci omiyo oyenyo kare maber ma myero emii Yecu kwede botgi ma nongo lwak peke.

Yecu oyube me camo Karama me Kato kacel ki lupwonyene

(Mat 26:17-25; Mar 14:12-21; Jon 13:21-30)

7Ci dong nino me Mugati ma Tobi Pe Iye oromo, ma kitumu iye latin romo me Karama me Kato. 8Ci Yecu ooro Petero ki Jon, kun cikogi ni, “Wucit wuyub cam me Karama me Kato pirwa, wek wacam.” 9Ci gupenye ni, “Imito ni waciyub kwene?” 10Ci Yecu owaco botgi ni, “Nen, ka wudonyo i taun madit me Jerucalem, ci laco mo birwate kwedwu kun oyeyo agulu pii; en aye wulub kore wa i ot ma en bidonyo iye, 11ci wutit bot won ot ni, ‘Lapwony penyi ni, ot welo tye kwene, kama abicamo iye cam me Karama me Kato kacel ki lupwonyena?’ 12Ci en binyutu botwu kicika ot malac ma malone ma kipeto, kiyubu maber; wek wuyub ki wan kabedo kunu.” 13Ci gucito gunongo kit macalo Yecu owaco botgini, ci guyubu cam me Karama me Kato kunu.

Cam me otyeno pa Rwot

(Mat 26:26-30; Mar 14:22-26; 1 Kor 11:23-25)

14Ka cawa oromo, Yecu obedo piny i dog cam, kacel ki lukwena.

Acaki lok ikom Cam pa Rwotwa

(Mat 26:26-30; Mar 14:22-26; 1 Kor 11:23-26)

15Yecu owaco botgi ni, “Abedo ka mito mada me camo cam me Kato man kwedwu, ma kun nongo pud peya aneno can. 16Pien awaco botwu ni, pe dok abicamo nio ka te loke ocobe kakare i ker pa Lubanga” 17Ci otingo kikopo, kadong otyeko miyo pwoc ci owaco ni, “Wumak man, wupok ikinwu; 18pien awaco botwu ni, nia kombedi pe dok abimato pig olok nio wang ma ker pa Lubanga obino.” 19Ci omako mugati, kadong otyeko miyo pwoc, ci obaro iye, omiyogi kun waco ni, “Man aye koma ma kimiyo pirwu, wutim kuman me po pira.” 202 Kitmeno kadong gucamo otum otingo kikopo, kun waco ni, “Kikopo man aye gicike manyen i remona ma oo pirwu. 213 Ento, nen, ngat ma bidoba cinge tye kacel kweda i dog cam. 22Wod pa dano bicito gire kit macalo yam kiciko; ento bedo rac marom mene pi dano meno ma dobo Wod pa dano pien bineno can!” 23Lupwonyene gucako penye keken gi ni, anga ki ikin gi ma bitimo lok man.

Pyem pi laro dito

244

Pyem bene ocake ikin lupwonyene ni anga ikin gi ma kitamo ni loyo ki dit. 255 Yecu owaco botgi ni, “Luker pa lurok giloyo lwakgi ki tek, dok jo matye ki twero ikomgi kilwongogi ni lutim ber. 266 Ento pe kitmeno botwu; ngat madit ikinwu myero odok macalo ngat matidi, ki latela wic myero obed macalo ngat ma tiyo pi dano. 27Pieno anga madit, ngat ma bedo i dog cam, kece mono ngat makele cam? Pe ngat ma bedo i dog cami, tye gire kumeno. Ento an abedo ikinwu macalo ngat ma tiyo pi dano.

28Wun aye jo ma wubedo ka ngeta jwijwi ikare ducu ma kibedo ka tema. 29Macalo Wora omiya ker, an bene abimiyowu. 30Wun wubicam, dok wubimato i dog mejana i kera, dok wubibedo iwi komker kun wungolo kop iwi kaka apar wiye aryo pa jo Icrael.

Yecu otito ni Petero bikwere woko

(Mat 26:31-35; Mar 14:27-31; Jon 13:36-38)

31Cimon, Cimon, nen Catan otyeko penyo pirwu me apyeta macalo lapur pyeto ngano poko woko ki ikom cunge, wek ipok ki ikinwu jo mabeco ki maracu, 32ento dong alego piri ni niyeni pe odok cen. In bene ka dong iloke idwogo cen, myero ijing cwiny utmegini.” 33Petero owace ni, “Rwot, dong atyeko yube me cito kwedi wa i buc ki to.” 34Yecu odoke iye ni, “Petero, awaci ni, tin twong gweno pe bikok, nio wang ma ikwera tyen adek ni pe ingeya.”

Kicaa lim, opiru, ki pala lucwan

357

Yecu openyo lupwonyene ni, “Ikare mayam aorowu labongo kicaa lim, nyo opiru, kadi war, ci gin mo oremowu?” Gin gugamo ni, “Pe.” 36Ci ocikogi ni, “Ento kombedi dong, ngat matye ki kicaa lim, myero oter, ki opiru bene kitmeno. Ngat ma pe ki pala lucwan myero ocat kanyine, wek owil kwede. 378 Pien awaco botwu ni, ginacoya man myero ocobe kakare ikoma ni, ‘Kikwane kacel ki lubalo’; pien lok ma kicoyo ikoma tye ka cobe kakare.” 38Lupwonyene guwace ni, “Rwot, nen, pala lucwan tye kany aryo.” En odok iye botgi ni, “Meno romo.”

Yecu olego i poto Gececemane

(Mat 26:36-46; Mar 14:32-42)

39Yecu okato woko, ci ocito iwi got Jeituni kit ma onongo en timo kare ki kare; ci lupwonyene gulubu kore. 40Ka oo i kabedo meno, ci owaco botgi ni, “Wuleg Lubanga, wek pe wudony i abita mo.” 41Ci oa opoke kwedgi marom ki kama ka kibayo iye lakidi, ci orumu conge piny, olego ni, 42“Wora, ka i mito, kwany kikopo man woko ki bota, ento pe obed kit macalo an amito; ento wek nimito ni aye ocobe.” 43Ci lamalaika ma oa ki i polo onen bote kun jingo cwinye. 44Ka kun onongo en tye ki kumu ki ton cwiny malit mada, ci en omede ki lega matek; omiyo kwok ocore ikome macalo remo ma cwer ton i ngom. 45Ka oa ki kalega, en obino bot lupwonye, ci onongo gunino woko pi aremcwiny. 46Ci en owaco botgi ni, “Wunino pingo? Wua malo, wuleg Lubanga, wek pe wudony i abita mo.”

Kimako Yecu

(Mat 26:47-56; Mar 14:43-50; Jon 18:3-11)

47Ka onongo Yecu pud tye kalok, ci lwak gubino, kun dano ma nyinge Juda aye otelo wigi, en ngat acel ikin lupwonyene apar wiye aryoni. Onyiko cok bot Yecu wek emote kun enoto leme. 48Ento Yecu openye ni, “Juda, in idobo Wod pa dano ki noto lem?” 49Ka jo ma ingete guneno gin mamito time, ci gupenyo ni, “Rwot, watong dano ki pala lucwan?” 50Ci ngat acel ki ikin gi otongo opii pa ajwaka madit pa Lubanga, onguno ite ma lacuc woko. 51Ento Yecu owaco ni, “Ogik dong ki man keken!” Obongo ite, ci ocange. 52Lacen Yecu owaco bot ajwaki madito pa Lubanga ki ludito pa acikari me Ot pa Lubanga, ki ludongo ma gubino ikome, ni, “Pingo wubino ikoma ki pala lucwan ki odo gu me maka macalo wubino ikom layak mo? 539 Yam abedo kwedwu jwijwi i Ot pa Lubanga, ci pe wumaka. Ento kombedi dong aye karewu me tic ki twero me colpiny.”

Petero okwero Yecu

(Mat 26:57-58; Mar 14:53-54,66-72; Jon 18:12-18,25-27)

54Ci gumako Yecu, gutere, gukele i ot pa ajwaka madit pa Lubanga. Ci Petero olubu kore kun woto ki cen ma ki borbor. 55Ka kimoko mac idyekal me wang oo, ma gubedo piny kacel, Petero bene obedo piny ikin gi. 56Ci angeca mo onene kun obedo kama mac ocaro; ongiye maber, ci owaco ni, “Dano man bene nakanen tye kacel kwede.” 57Ento Petero okwero woko kun waco ni, “Dako, an pe angeye gira.” 58Lacen ka kare okato manok, ngat mukene dok onene, ci owaco ni, “In bene i ngat acel ikin gi.” Ento Petero owaco ni, “Nye, an ku!” 59Ka kare dok okato mamito romo cawa acel, ngat mukene dok oloko kun moko ni, “Adadaeni, dano man nakanen tye kacel kwede; pien en Lagalilaya.” 60Ento Petero ogamo ni, “Nye, an akwiya lok ma itye ka waconeni.” Cutcut ma pud en waco lok man, twong gweno otugi kok. 61Rwot oloke oneno Petero. Ci Petero opo lok pa Rwot, kit macalo nakanen Yecu owace ni, “Ma nongo twong gweno peya okok tin, ibikwera woko tyen adek kulu.” 62Ci okato woko okok ki cwercwiny madwong.

Kinywaro Yecu, kigoye

(Mat 26:67-68; Mar 14:65)

63Jo ma gumako Yecu gunyware, ci gugoye; 64guboyo wange woko ki kitambara kun gipenye ni, “Ka in lanebi tuci! Anga mugoyi?” 65Gin guloko lok mukene mapol ikome, kun giyete bene.

Yecu ocung inyim kot

(Mat 26:59-66; Mar 14:55-64; Jon 18:19-24)

66Ka piny dong oru, ludongo pa lwak, kacel ki ajwaki madito pa Lubanga ki Lupwonycik, gucoke kacel; ci gukele inyim luotkot ka pidogi, ci guwaco ni, 67“Tit botwa kace in aye i Kricito ma Lubanga oyero.” Ento Yecu owaco botgi ni, “Ka atito botwu, wun pe wubiye; 68ka apenyowu wun pe wubidoka iye. 69Ento nicake kombedi Wod pa dano bibedo piny ikabedo me deyo ka nget Lubanga Won Twer tung lacuc.” 70Gin ducu gugamo ni, “Dong in i Wod pa Lubanga do?” Yecu ogamo ni, “Wun wuwaco ni an a en.” 71Ci guwaco ni, “Dok wamito caden me ngo? Wan dong wawinyo pirwa kenwa ki idoge kene.”