Luka 23

Yecu inyim Pilato

(Mat 27:1-2,11-14; Mar 15:1-5; Jon 18:28-38)

1Lwak ducu gutware, ci gutero Yecu inyim Pilato. 2Ci gudote kun giwaco ni, “Dano man wanongo tye ka rwenyo rokwa. En ogengowa ni pe wacul mucoro bot Cecar, kun lwonge kene ni en Kricito, Rwot.” 3Ci Pilato openye ni, “In i Rwot pa Lujudaya bo?” Yecu ogamo ni, “In dong iwaco giri.” 4Pilato owaco bot ajwaki madito pa Lubanga ki lwak ducu ni, “Pe anongo kop marac ikom dano man.” 5Ento gin gudiye kun giwaco ni, “Danonu poyo lwak, kun pwonyo i lobo Judaya ducu, cake ki i Galilaya nio kwede wa kany.”

Yecu ocung inyim Kerode

6Ka Pilato owinyo lok man ci openyo ka gwok nyo Yecu Lagalilaya. 7Ka oniang ni en tye ite loc pa Kerode, ci ocwale bot Kerode, ma en kikome bene onongo tye i Jerucalem i karenu. 8Ka Kerode oneno Yecu, ci cwinye obedo yom tutwal, pien onongo yam con omito mada me nene, pien en onongo obedo kawinyo pire awinya, dok onongo ogeno ni ebineno lanyut me tango mo ma en bitiyo. 9Omiyo Kerode openyo Yecu ki peny mapolpol; ento Yecu pe omedo ki dok iye lok mo. 10Ajwaki madito pa Lubanga ki Lupwonycik inget kun gidote ki tek. 11Kerode ki acikarine gungalo Yecu, ci gunyware; ka guruke ki bongo me deyo, ci gudwoke kwede bot Pilato. 12Kerode ki Pilato gudoko lurem inino meno cut, pien yam con onongo gimon ikin gi.

Kingolo kop me to iwi Yecu

(Mat 27:15-26; Mar 15:6-15; Jon 18:39—19:16)

13Pilato olwongo ajwaki madito pa Lubanga ki luloc ki lwak kacel, 14ci owaco botgi ni, “Wun wukelo dano man bota ni en ngat ma rwenyo lwak, an apenye inyimwu, ci nen, pe anongo kop mo marac ikome ikom lok ducu ma wudote kwede; 15kadi Kerode bene pe onongo kop mo ikome, pien Kerode odwoko en botwa. Nen dano man, pe otimo gin mo ma myero kineke pire; 16pimeno abigoye, ci abigonye. [17Ikare me karama me kato Paska ducu, yam onongo mite ni myero Pilato ogony botgi ngat acel pirgi.]”

18Ento lwak ducu gudange lawangacel ni, “Pe wamite, neke woko! Gony ki wan Baraba!” 19Baraba kono yam obedo dano ma kitweye ibuc pi tugu lwak i Jerucalem ki pi nek. 20Pilato dok oloko botgi, kun mito gonyo Yecu; 21ento lwak gumede ki dange ni “Gure woko ikom yatariya, gure woko ikom yatariya!” 22Pilato owaco botgi tyen me adeke ni, “Pingo ka? Otimo kit gin ango marac? An gira pe anongo kop mo marac ikome ma myero kineke pire; pimeno abigoye, ci abigonye.” 23Ento lwak guwoo ki dange kun gidiye ni myero kigure ikom yatariya. Dwongi oloyo. 24Omiyo Pilato ongolo kop ni myero kitim Yecu kit macalo gimito. 25Ogonyo dano mayam kitweyo ibuc pi tugu dano ki pi nek, ma lwak gubako dogi bote pire; ento en omiyo Yecu botgi wek gutime kit macalo gimito.

Kiguro Yecu ikom yatariya

(Mat 27:32-44; Mar 15:21-32; Jon 19:17-27)

26Ka acikari gitye katere dong woko, ci gumako Cimon, dano mo me Cirene ma onongo donyo i taun madit kun oa ki ikin paco, ci gucibo yatariya pa Yecu ma onongo otingoni igwoke, wek oting, olub ki kor Yecu; 27Lwak dano madwong gulube, ikin gi obedo mon mapol ma onongo gikumu kun gikok pire. 28Yecu oloke botgi ci owaco ni, “Anyira Jerucalem, pe wukok pira, ento wukok pirwu kenwu ki pi lutinowu. 29Pien nen, kare bibino ma dano gibiwaco ni, ‘Tye ki gum lulur, ki ot nyodo ma pe nywal, ki tunu ma pe gidoto!’ 301 Ikare meno dano bilok ki godi madongo kun gibiwaco ni, ‘Wupot ikomwa’; ki bot godi matino ni, ‘Umwa.’ 31Pien ka kitimo man ma yat pud dyak, ci bibedo ningning ka yat dong otwo?”

32Jo aryo mukene, ma lutim tim maracu, bene kiterogi ka kinekgi kacel kwede. 33Ka guo ikabedo ma kilwongo Cogo Wic, ci kigure ikom yatariya kunu, ki lutim maracu aryo, ngat acel tung lacuc, ngat acel tung lacam. 342 Yecu owaco ni, “Aba, wayi tim kica botgi, pien pe gingeyo gin ma gitye katiyone.” Ci gubolo kwir pi poko ginarukane. 353 Lwak gucung kun gineno; ento luloc gunyware kun giwaco ni, “Yam olaro jo mukene, kong olare kene ka en Kricito ma Lubanga oyero!” 36Acikari bene gunyware, gubino gumine kongo bwino mawac, 37kun giwaco ni, “Ka in i Rwot pa Lujudaya, lare keni!” 38I coc ma kiketo ka wiye, kicoyo ni, “Man aye Rwot pa Lujudaya.”

39Ngat acel ikin lutim maracu ma kiguro kacel kwede ocaye kun wace ni, “In pe i Kricito ma Lubanga oyero ce? Lare keni dok ilar wan bene!” 40Ento lawoteni ojuke kun waco ni, “In pe ilworo Lubanga? Kingolo kop ikomi marom kwede. 41Wan giwa kingolo kop ikomwa kakare; pien watye ka limo cul ma myero pi timwa; ento dano man pe otimo gin mo marac wa ki acel.” 42Ci owaco ni, “Yecu, po pira ka ibidonyo i keri.” 43Yecu odok iye bote ni, “Adada, awaco ki in ni, tin i bibedo kweda ikabedo me kuc.”

To pa Yecu

(Mat 27:45-56; Mar 15:33-41; Jon 19:28-30)

44Ka cawa dong mito romo abicel, piny ocido macol i lobo kunu ducu nio wa icawa abongwen, 454 kun wang ceng oume woko; ci bongo kicika me Ot pa Lubanga obar, dyere opoke aryo. 465 Ci Yecu odange ki dwon matek, kun waco ni, “Aba, amiyo cwinya i cingi!” Ka owaco lok man, ci oto. 47Ka ladit maloyo acikari oneno gin ma otime, opako Lubanga kun waco ni, “Adada, dano man kara peke ki bal mo!” 48Lwak ducu ma gucoke ka nene, ka guneno gin ma otime, gudok paco kun gidongo korgi. 496 Lureme ducu ki mon mayam gubino kwede nia i Galilaya, gucung ki cen kun gineno gin man.

Yiko kom Yecu i lyel

(Mat 27:57-61; Mar 15:42-47; Jon 19:38-42)

50-51Ikarenu onongo tye laco mo ma nyinge Yucepu ma oa ki i taun mo pa Lujudaya ma kilwongo Arimataya. En onongo dano maber dok kite atir, dok onongo kuru ker pa Lubanga. Kadi bed en onongo ngat acel ikin jo ma bedo iot pido, ci yam pe ocwako tamgi kadi ki ticgi bene. 52Dano man ocito bot Pilato, olego pi kom Yecu. 53Ci okwanye ki ikom yatariya, ci oboye ki bongo matar maryeny nidangdang malenge, ka opyele ilyel ma kikwinyo igot, kama peya kipyelo iye kom ngat mo. 54Ninonu onongo nino me Yube, pien ceng Cabit onongo dong cok cake. 55Mon mayam gubino kwede nia ki i Galilaya, guneno lyele, ki kit ma kipyelo kwede kome; 567 ci gudok cen, guyubu angwece ki moo wir.

I ceng Cabit, guywe kit macalo Cik tye.